Dhjetë shtetas të Kosovës vazhdojnë të jenë nëpër kampe të personave të zhvendosur, apo në qendra të ndalimit në Siri, ndërsa për 70 shtetas të Kosovës në këtë shtet nuk ka informacione për vendndodhjen apo nëse janë gjallë.

Kështu thuhet në raportin e Departamentit amerikan të Shtetit (DASH), dedikuar terrorizmit në botë, për vitin 2023.

Në pjesën për Kosovën përmendet se Kosova i ka riatdhesuar 121 persona dhe i ka arrestuar 12 shtetas të saj që kanë qenë në Siri. Aty është vlerësuar se, sikurse në të kaluarën, shtetasit e Kosovës vazhdojnë të jenë të cenueshëm ndaj përpjekjeve për rekrutim nga ana e organizatave të dhunshme fetare.

Pas shpërthimit të konfliktit në Siri, më 2011, vlerësohet se rreth 350 kosovarë patën udhëtuar drejt Sirisë dhe Irakut, për të luftuar kryesisht krah grupit ekstremist, Shteti Islamik (IS).

Personat që janë kthyer në Kosova janë përballur me procese gjyqësore. Megjithatë, sipas raportit, ndonëse korniza legjislative e Kosovës parasheh ndjekjen penale të të dyshuarve për mbështetje të aktiviteteve terroriste apo pjesëmarrjen në luftërat e huaja, dënimet për kryerje të veprave terroriste janë të buta, me lirime të kusht apo lirime të parakohshme, si dhe mbikëqyrje të çorganizuar pas lirimit.

Në vitin 2015, Kosova e ka miratuar një ligj të posaçëm që sanksionon pjesëmarrjen në luftëra të huaja, ndërsa Kodi Penal parasheh dënime për kryerje të veprave terroriste prej pesë vjet e deri në burgim të përjetshëm.

Zyrtarë të Shërbimit Korrektues të Kosovës i kanë thënë Radios Evropa e Lirë se pas proceseve gjyqësore, rreth 42 të burgosur për pjesëmarrje në luftëra të huaja kanë kaluar nëpër institucionet e tij korrektuese. Aktualisht, në institucionet korrektuese ndodhen shtatë prej tyre.

Në raportin e DASH-it përmendet se prej majit të vitit 2023, Byroja Federale e Hetimeve në Shtetet e Bashkuara (FBI) ka angazhuar një këshilltar për kundërterrorizëm që të mbulojë rajonin e Kosovës, Shqipërisë dhe Maqedonisë së Veriut.

Agjentë të FBI-së është thënë se kanë marrë pjesë në takimet e task-forcës kundërterrorizmit dhe kanë ofruar këshilla përgjatë hetimeve.

Aty përmendet po ashtu se Qeveria e Kosovës ka punuar në mënyrë konstruktive me Shtetet e Bashkuara dhe komunitetin ndërkombëtar në përpjekjet kundërterrorizmit më 2023, dhe që e ka miratuar strategjinë e shumëpritur dhe planin e veprimit për luftim dhe parandalim të terrorizmit, për periudhën 2023-28, të katërtën qysh prej pavarësisë.

Sa u përket incidenteve terroriste që kanë ndodhur në Kosovë më 2023, në raport është përmendur që pas sulmit të 29 majit të atij viti të serbëve kundër pjesëtarëve të misionit të NATO-s në Kosovë, KFOR, autoritetet e Kosovës kanë shpallur Brigadën e Veriut dhe Mbrojtjen Civile si organizata terroriste.

Është përmendur edhe sulmi në Banjskë të Zveçanit, i kryer më 24 shtator, si pasojë e të cilit është vrarë rreshteri i Policisë së Kosovës, Afrim Bunjaku. Kosova fajëson Serbinë për organizim dhe kryerje të sulmit, ndërsa Beogradi mohon gjithçka.

Roli i Gjermanisë në 25 vitet e fundit në Kosovë ka qenë shumëdimensional. Prandaj, edhe prezenca e mediave gjermane në Kosovë, që nga viti 1998 e deri më sot, ka qenë e rëndësishme.

Gjatë Luftës së Kosovës, roli i Gjermanisë shënoi një moment kyç në marrëdhëniet Kosovë-Gjermani. Vendimi për të marrë pjesë në Operacionin e Forcave Aleate të NATO-s në vitin 1999 dhe më pas për të kontribuar në KFOR përfaqësoi një ndryshim historik për Gjermaninë, duke qenë dislokimi i parë ushtarak i vendit që nga Lufta e Dytë Botërore.

Ky vendim shkaktoi një debat të madh brenda Partisë së Gjelbër, e cila kishte një bazë pacifiste, dhe brenda qeverisë federale të kancelarit Gerhard Schröder dhe ministrit të Jashtëm Joschka Fischer. Pavarësisht këtyre debateve të brendshme, pjesëmarrja e Gjermanisë në operacion u bë një moment i rëndësishëm në politikën e jashtme dhe të sigurisë të saj, duke hapur rrugën për një angazhim afatgjatë për sigurinë e Kosovës.

Por, si e portretizoi media gjermane këtë angazhim? Për të kuptuar më mirë qasjen e mediave gjermane në Kosovë, si dhe kontributin e tyre përmes arkivave të Reporting House nga periudha e luftës 1998-1999, u mbajt një diskutim në zyret e këtij institucioni.

Pjesëmarrëse ishte gazetarja nga Kosova, Vjosa Çerkini, që punon në Deutsche Welle, e cila ndau përvojën e saj profesionale dhe pikëpamjet mbi ndikimin e mediave gjatë asaj periudhe dhe pas saj.

Ajo u shpreh: “Rrugëtimi im nuk ka qenë aspak i lehtë, si një 18-vjeçare udhëtova për në Gjermani për t’u bërë gazetare e pavarur. Ishte një rrugë e gjatë ku më është dashur të mësoj gjuhën, të krijoja kontakte të reja dhe të siguroja financa vetanake”. Vjosa, e emocionuar nga kujtimet e luftës, ndau me të pranishmit detaje të shumta që gjeneratat e reja nuk i kishin dëgjuar më parë.

Temat e trajtuara në këtë ngjarje, si dhe ndikimi i mediave gjermane gjatë periudhës së luftës dhe pas saj, u ndoqën me shumë interes, duke e ditur se shumë media, përfshirë ato gjermane, kanë luajtur një rol të rëndësishëm në zbardhjen e fakteve të asaj periudhe të dhimbshme për popullin shqiptar.

Artikull nga gazetarja Albina Zeneli. /UBT News/

Një tërmet me magnitudë 4.0 sipas shkallës Rihter goditi Kosovën në orët e para të mëngjesit të së enjtes, më 12 dhjetor 2024. Epiqendra e tërmetit u lokalizua 16 kilometra në jugperëndim të Prizrenit, pranë fshatit Vërmicë, në një thellësi prej 16 kilometrash, sipas Qendrës Sizmologjike Evropiane të Mesdheut (EMSC).

Dridhjet u ndien dukshëm në zonën jugperëndimore të Kosovës, si dhe në disa qytete të Maqedonisë së Veriut. Shemsi Mustafa, udhëheqës i Rrjetit Sizmologjik të Kosovës, deklaroi se, për shkak të magnitudës së ulët, tërmeti nuk shkaktoi rrezik për popullatën apo dëme materiale. Ai shtoi se zona sizmogjene e Prizrenit mbetet aktive, dhe në të ardhmen mund të regjistrohen tërmete më të forta, bazuar në Hartën e Rrezikut Sizmik të Kosovës.

Një tjetër dridhje me magnitudë 3.2 u regjistrua në orën 03:59, me epiqendër 17 kilometra në jugperëndim të Prizrenit dhe 7 kilometra në veriperëndim të Dragashit, në një thellësi prej 11 kilometrash. Ndërprerjet e natës shërbejnë si një kujtesë për nevojën e vëmendjes ndaj aktivitetit sizmik në rajon.