OnePlus 15 u prezantua në Kinë muajin e kaluar dhe dje bëri debutimin e tij global. Vetëm një ditë më pas, modeli ndërkombëtar ka filluar të marrë përditësimin e parë të softuerit.

Ky është përditësimi që do t’i presë përdoruesit sapo ta marrin pajisjen. Përditësimi vjen si OxygenOS 16.0.1.303, i bazuar në Android 16.

Ai po shpërndahet si për tregun indian, me firmware CPH2745_16.0.1.303(EX01), ashtu edhe për atë të Bashkimit Evropian, me firmware CPH2747_16.0.1.303(EX01). Paketa e re sjell patch-in e sigurisë së muajit nëntor 2025, si dhe një sërë përmirësimesh funksionale.

Në listën e ndryshimeve përfshihen: hapja më e shpejtë e aplikacioneve nga Ekrani Kryesor, mundësia për të personalizuar emrat e veglave, rregullimi i madhësisë së orës në temat Flux, grumbullimi i veglave përmes zvarritjes së tyre.

Po ashtu drejtimi automatik i imazheve portret dhe arkitekturore gjatë prerjes e rrotullimit, vendosja e videove si zile, skanim më i shpejtë i viruseve, animacion i përmirësuar për sensorin e gjurmës së gishtit, një ndërfaqe e re për motorin e rrjetit AI LinkBoost, njoftime në kohë reale për përshpejtimin e rrjetit në kushte të dobëta, si dhe opsioni për të testuar shpejtësinë e rrjetit dhe për të parë detajet e statusit të tij.

/A.Z/UBT News/

Miliona njerëz përdorin Wi-Fi publik për të kursyer të dhëna mobile, por Google paralajmëron se ky zakon rrezikon sigurinë e tyre.

Në një dokument, gjigandi këshillon përdoruesit e smartfonëve të shmangin sa më shumë përdorimin e rrjeteve publike të pa-sigurta.

Sipas Google, shumë Wi-Fi publik janë të pakriptuara e të sulmueshme nga hakerët, që do të thotë se informacioni që dërgoni bjen në duart e kriminelëve. Hyrja në llogari ose përdorimi i kredencialeve gjatë lidhjes me Wi-Fi publik rrit rrezikun e komprometimit të të dhënave.

Ekspertët e sigurisë kibernetike e mbështesin këtë paralajmërim.

Dr. Manny Niri, lektor në Oxford Brookes University, tha se Wi-Fi publik mund të jetë i rrezikshëm se shumë rrjete nuk janë të kriptuara e hakerët kapin të dhënat ose krijojnë hotspot-e false për të mashtruar përdoruesit.

Google publikoi këshillat në dokumentin 10-faqesh “Behind the Screen” për tetor 2025, ku udhëzon përdoruesit të monitorojnë llogaritë bankare e raportin e kreditit si sinjale të hershme. Rekomandohet përdorimi i versioneve të sistemit operativ dhe patch-eve të sigurisë.

Oliver Buxton nga Norton thekson se hotspot-et falas transmetojnë të dhëna në tekst të thjeshtë, duke i bërë përdoruesit të prekshëm ndaj sulmeve kibernetike. Hotspot-et mashtruese që imitojnë rrjete legjitime mashtrojnë përdoruesit për të vjedhur trafikun e tyre online.

Jake Moore, këshilltar sigurie në ESET, sugjeron që përdoruesit të kontrollojnë gjithmonë se janë lidhur me rrjetin para se të hyjnë në internet. Dr. Niri shton se përdorimi i VPN, vizita vetëm në faqet e sigurta (https) dhe kalimi në të dhëna mobile janë më të sigurta.

Nëse përdorni Wi-Fi publik, shmangni hyrjen në llogari të rëndësishme si banka ose email, dhe mbani softuerin gjithmonë të përditësuar.

Google paralajmëron për mesazhe mashtruese (SMS phishing) që synojnë të vjedhin të dhënat personale. Këto përdorin urgjencë, gabime drejtshkrimore ose lidhje të dyshimta.

Ekspertët këshillojnë të ndiqni disa rregulla bazë për t’i identifikuar:

Autoriteti: Mos i besoni automatikisht mesazheve që pretendojnë të jenë nga banka ose autoritete të tjera.

Urgjenca: Mos nxitoni për shkak të kërcënimeve ose afateve të shkurtra.

Emocioni: Mos lejoni që frika, paniku apo kurioziteti t’ju mashtrojnë.

Mungesa e burimeve: Oferta që duken shumë të mira për të qenë të vërteta shpesh janë mashtrime.

Ngjarje aktuale: Kriminelët përdorin lajmet ose eventet e fundit për t’u dukur të besueshëm.

Përdoruesit mund të mbrojnë informacionin personal dhe të reduktojnë rrezikun kur përdorin rrjete publike. /A.Z/UBT News/

Gjatë debutimit të tij zyrtar në një ngjarje teknologjike në Moskë, roboti i parë humanoid me AI i Rusisë, i quajtur AIdol, pësoi një incident në skenë.

Ndërsa po drejtohej nga stafi drejt kolonës zanore të filmit Rocky, roboti humbi ekuilibrin dhe ra, duke lënë disa pjesë pas në skenë.

Stafi reagoi shpejt, duke e mbuluar me një ekran dhe duke e tërhequr nga publiku.

Zhvilluesit e prezantuan AIdol si një shembull i avancimeve në robotikë, por rënia iu atribuua problemeve të kalibrimit.

Kompania thekson se incidenti ndodhi gjatë fazës së vazhdueshme të testimit të robotit.

Pamjet e ngjarjes u shpërndanë nga mediat e pavarura ruse dhe shfaqin momentin e përpjekjes së stafit për të kontrolluar situatën. /A.Z/UBT News/