Bashkia e Tiranës ka miratuar një vendim të veçantë për të nderuar një nga figurat më të shquara të artit shqiptar, aktorin legjendar Mirush Kabashi, duke i dedikuar emrin e tij Teatrit në Parkun e Madh të Liqenit Artificial. Ky vendim ka si qëllim përjetësimin e kontributit të jashtëzakonshëm të Kabashit në teatrin dhe kinematografinë shqiptare, duke e shndërruar atë në një simbol të vlerave artistike dhe kulturore që kanë shoqëruar historinë e shoqërisë shqiptare.

Kryetari i Bashkisë së Tiranës, Erion Veliaj, theksoi se ky veprim nuk është vetëm një nderim për të kaluarën, por edhe një investim për të ardhmen. “Duke i dhënë emrin ‘Mirush Kabashi’ një hapësire që i dedikohet artit, ne jo vetëm që nderojmë të kaluarën, por gjithashtu investojmë në një të ardhme ku vlerat artistike dhe kulturore do të lulëzojnë në zemër të kryeqytetit,” u shpreh Veliaj.

Ai shtoi se emërtimi i Teatrit të Parkut të Madh të Liqenit Artificial me emrin e Kabashit është një nderim për një nga artistët më të shquar të vendit, i cili ka lënë një trashëgimi të pashlyeshme në historinë e artit shqiptar. “Propozimi për emërtimin është një iniciativë që përfaqëson një kontribut të rëndësishëm në ruajtjen dhe promovimin e trashëgimisë sonë kulturore. Mirush Kabashi ka përfaqësuar Shqipërinë në skenat më prestigjioze ndërkombëtare, duke përcjellë mesazhe universale përmes artit të tij,” tha ai.

Mirush Kabashi, i cili u nda nga jeta një vit më parë në moshën 75-vjeçare, është konsideruar një ndër aktorët më të vlerësuar të historisë së teatrit dhe kinemasë shqiptare. Gjatë karrierës së tij të gjatë, Kabashi interpretoi mbi 100 role në teatër dhe 30 personazhe në kinematografi, duke lënë një markë të pashlyeshme në artin shqiptar. Shfaqja e tij e famshme “Apologjia e vërtetë e Sokratit” është një nga momentet më të rëndësishme të kulturës shqiptare.

Për veprimtarinë e tij artistike, Mirush Kabashi është nderuar me mbi 90 çmime dhe tituj prestigjiozë, duke përfshirë “Artist i Merituar”, “Mjeshtër i Madh i Skenës” dhe “Nderi i Kombit”, të cilët iu akorduan nga Presidenti i Republikës së Shqipërisë. Përveç titujve kombëtarë, Kabashi ka marrë edhe vlerësime nga institucione ndërkombëtare, duke u bërë një nga emrat më të njohur të artit shqiptar jashtë kufijve të Shqipërisë.

Vendimi për të emëruar Teatrin në Parkun e Madh të Liqenit Artificial me emrin e Mirush Kabashit është një akt i domosdoshëm për të nderuar një artist të tillë dhe për të siguruar që kontributet e tij të mbeten të gjalla për brezat e ardhshëm. Ky është një hap i rëndësishëm drejt ruajtjes dhe promovimit të vlerave artistike dhe kulturore që janë pjesë e identitetit kombëtar./UBTNews/

Drejtoria Rajonale e Trashëgimisë Kulturore në Gjirokastër ka realizuar ndërhyrjen më të madhe në ruajtjen dhe restaurimin e pasurisë kulturore të qytetit dhe qarkut, duke e cilësuar këtë vit si një periudhë me projekte të rëndësishme. Restaurimi i monumenteve të trashëgimisë kulturore ka marrë një vëmendje të veçantë, me qëllim ruajtjen dhe promovimin e pasurive të çmuara historike, që janë një identitet i çmuar për Gjirokastrën dhe rrethin përkatës.

Qendra e Studimeve dhe Publikimeve për Arbëreshët ka njoftuar vendosjen e shtatores së heroit kombëtar, Gjergj Kastrioti Skënderbeu, në qytetin e Tuzit, në Malin e Zi.

Ceremonia e vendosjes së shtatores u zhvillua në sheshin qendror të komunës së Tuzit, një hapësirë simbolike për shqiptarët e kësaj zone. Pas krijimit të komunës së re të Tuzit, pas ndarjes nga Komuna e Podgoricës, Kuvendi i Tuzit miratoi njëzëri vendimin për ngritjen e këtij monumenti, që nderon figurën legjendare të Skënderbeut, i njohur si simbol i luftës dhe qëndresës për liri e pavarësi.

Në ceremoni morën pjesë qytetarë të Malit të Zi, si dhe mysafirë nga të gjitha trevat shqiptare dhe diaspora, përfshirë përfaqësues të komunitetit shqiptar në Shtetet e Bashkuara të Amerikës. Pjesëmarrësit nderuan figurën e Skënderbeut, duke u bashkuar në një festë të madhe kombëtare, që thekson lidhjet e forta mes shqiptarëve, si dhe respektin e përjetshëm për heroizmin e tij.

Një pjesë e konsiderueshme e financimit për realizimin e shtatores erdhi nga shoqatat shqiptare të “Mërgatës së Malësisë” në SHBA, të cilët dhanë mbështetje për realizimin e këtij projekti me rëndësi historike dhe kulturore për shqiptarët në Malin e Zi dhe në mbarë botën.

Vendosja e shtatores së Skënderbeut në Tuz, një qytet që ka një histori të pasur me shqiptarë, është një akt simbolik që thekson lidhjet e pandashme të kombit shqiptar me këtë pjesë të Ballkanit dhe me heroizmin e Skënderbeut, një emër që ka ngelur i shenjtë për çdo shqiptar, kudo ku jeton./UBTNews/

Nëpërmjet një përmbledhjeje të pasur filmash dhe dokumentarësh nga shtete të ndryshme të botës, do të dëgjohet zëri dhe përvoja e personave me aftësi të kufizuara në festivalin e filmit evropian që po mbahet në Prishtinë.

Nga data 1 deri më 3 dhjetor 2024, qytetarët janë të ftuar të shijojnë artin dhe kulturën e vendeve evropiane në Kino Armata, në Prishtinë.

Ky aktivitet është pjesë e Festivalit Evropian të Filmit, i cili gjithashtu bën pjesë në kuadër të Festivalit Ndërkombëtar “Arti pa Kufi”, organizuar nga Zyra e Bashkimit Evropian në Kosovë, në bashkëpunim me Ambasadën e Belgjikës.

Në hapjen e këtij festivali, Ioanna Lachana, zëdhënëse e Zyrës së BE-së në Kosovë, theksoi se fokusi kryesor i filmave dhe dokumentarëve do të jetë përvojat e personave me aftësi të kufizuara, duke reflektuar vlerat dhe mesazhin e Ditës Ndërkombëtare të Personave me Aftësi të Kufizuara.

Sipas saj, nëpërmjet artit, secili është përgjegjës për ta ndërtuar një botë më gjithëpërfshirëse.

“Festival që ofron një platformë shumë të fuqishme ku mund të dëgjohet zëri i personave me aftësi të kufizuara. Siç e dini të gjithë, nesër shënohet Dita Ndërkombëtare e Personave me Aftësi të Kufizuara. Sot, nëpërmjet artit, do të fillojmë një diskutim se si secili prej nesh është përgjegjës për ta ndërtuar një botë më gjithëpërfshirëse”, ka theksuar Lachana.

Në hapjen e festivalit u promovuan dy filma “Një motër (A Sister) dhe Rondini.