Komisioni Qendror i Zgjedhjeve ka marrë vendim që të mbyllen qendrat e votimit në përfaqësitë diplomatike në tre vende, në Kanbera në Australi, Ankara të Turqi dhe Iowa në ShBA me 32 votues. Kjo për shkak numrit të vogël të votueseve.

Anëtari i KQZ-së, Arianit Elshani ka thënë se gjithë këta votues të regjistruar do të mund të votojnë përmes postës në kutitë postare që janë të hapur nga KQZ në këto shtete.

“Po ashtu Këshilli i Operacioneve Zgjedhore ka shqyrtuar edhe një rekomandim të ardhur nga sekretariati i cili është diskutuar po ashtu edhe me Ministrinë e Punëve të Jashtme për mbylljen e tre qendrave të votimit, ku po ashtu janë njoftuar edhe votuesit e këtyre përfaqësive diplomatike e qendrave të votimit jashtë vendit që do të mbyllen. Pra, bëhet fjalë për Kanbera në Australi, e cila ka pas 18 votues të regjistruar, bëhet fjalë për Ankaranë në Turqi me 25 votues të regjistruar për votim fizik dhe Iowa në ShBA me 32 votues të regjistruar për votim fizik…Votuesit të cilët kanë qenë të regjistruar për votim fizik në këto tre përfaqësi diplomatike do të udhëzohen që të votojnë me postë brenda kutisë në kuti postare në vendin përkatës”, tha Elshani.

Po ashtu, është miratuar dizajni dhe sloganin për fushatën e informimit publik.

“Kemi rekomandim për dizajn dhe sloganin që do të përdorët për këto zgjedhje…Slogani është ky “Zgjedhjet për Kuvendin e Republikës së Kosovës, vota jote për Kosovën 2025, ky është slogani”, tha Elshani.

Në mbledhjen që ka mbajtur KQZ të martën, po ashtu ka akredituar vëzhguesit e dhjetëra përfaqësive të huaja diplomatike të akredituara në Kosovë dhe të organizatave ndërkombëtare. Në mesin e të akredituarëve ishin edhe organizata jo-qeveritare vendore dhe vëzhgues nga Institucioni i Avokatit të Popullit.

Në përgjithësi, KQZ akeditoi grupin e radhës prej 1 mijë e 680 vëzhguesve për vëzhgimin e zgjedhjeve për Kuvendin e Kosovës, të cilat do të mbahen më 9 shkurt 2025, prej të cilëve 13 vëzhgues nga trupa të menaxhimit të zgjedhjeve nga shtete të ndryshme, 81 vëzhgues të përfaqësive të vendeve të huaja të akredituara në Kosovë, 1 mijë e 126 vëzhgues nga OJQ-të vendore, 393 vëzhgues nga organizata të ndryshme ndërkombëtare dhe 67 vëzhgues nga Institucioni i Avokatit të Popullit.

Nga numri i përgjithshëm i të akredituarëve, KQZ akreditoi rreth 400 vëzhgues të organizatave të ndryshme ndërkombëtare, të cilat janë të specializuar në fushën e zgjedhjeve, në mesin e të cilave: Misioni Vëzhgues i Zgjedhjeve nga Bashkimi Evropian, Asambleja Paramentare e Këshillit të Evropës, Asociacioni i Zyrtarëve Zgjedhorë Botërorë (A-WEB), IFES, International IDEA, National Demokratic Institute (NDI), International Republican Institute (IRI), Zyra e BE-së në Kosovë, etj.

Po ashtu, KQZ ka akreditoi më shumë se 80 vëzhgues të ambasadave të ndryshme në Kosovë, 24 prej të cilëve nga ambasada e SHBA-ve dhe 30 të tjerë nga ajo e Britanisë së Madhe. Edhe ambasadat e shteteve tjera si ajo e Francës, Italisë, Holandës, Japonisë, Finlandës, Suedisë dhe Turqisë, u akredituan nga KQZ.

Sipas njoftimit të KQZ-së, zgjedhjet e 9 shkurtit do të vëzhgohen edhe nga institucione zgjedhore nga shtete të ndryshme, si Shqipëria, Kroacia, Mali i Zi, Maqedonia e Veriut e Bullgaria.

Prokuroria Speciale e Kosovës ka ngritur të martën aktakuzë kundër të pandehurit me inicialet C.K., i nacionalitetit serb, nën dyshimet për kryerje të veprës penale, krim i luftës kundër popullsisë civile.

Përmes një komunikate për media, Prokuroria ka thënë se hetimet kanë vërtetuar se i pandehuri ka kryer dhunë seksuale ndaj një viktime të nacionalitetit shqiptar, në periudhën e luftës në Kosovë, 1998-1999.

Prokuroria i ka propozuar Gjykatës Themelore në Prishtinë që procesi gjyqësor të zhvillohet në mungesë, pasi i pandehuri është i paarritshëm për organet e drejtësisë.

Prokuroria Speciale ka ngritur një varg aktakuzash tjera në mungesë edhe në fund të dhjetorit, kryesisht për krime të kryera gjatë luftës në Kosovës.

Gjykimi në mungesë, sipas sistemit të drejtësisë në Kosovë, mund të zhvillohet vetëm me kusht që prokuroria dhe gjykata t’i kenë shteruar të gjitha mjetet për ta siguruar praninë e të akuzuarit.

Ehat Miftaraj nga Instituti i Drejtësisë në Kosovë, i ka thënë Radios Evropa e Lirë javë më parë se, institucionet e Kosovës, me shumë gjasë, bazuar në ligjet në fuqi, do të lëshojnë fletarrestime të kuqe të Organizatës Ndërkombëtare të Policisë (Interpol) për personat që janë dënuar në mungesë për krime lufte.

Më 26 dhjetor të vitit që lamë pas, Gjykata Themelore në Prishtinë e ka dënuar me 15 vjet burgim Çedomir Aksiqin, për akuzën krime lufte kundër popullsisë civile, të kryera nga janari deri në maj të vitit 1999 në territorin e komunës së Shtimes, përkatësisht në fshatrat Reçak, Malopolc dhe Petrovë.

Ky është vendimi i parë për krime lufte i marrë në mungesë, bazuar në Kodin e ndryshuar të Procedurës Penale të vitit 2022.

Radio Evropa e Lirë i është drejtuar Ministrisë së Drejtësisë në Qeverinë e Kosovës me pyetjen nëse është kërkuar lëshimi i ndonjë fletarrestimit të kuq për Aksiqin para gjykimit, dhe nëse do ta bëjë tani pas vendimit, por nuk ka marrë përgjigje.

Kosova nuk është anëtare e Interpolit, prandaj fletarrestimet lëshohen me ndërmjetësimin e Misionit të Kombeve të Bashkuara në Kosovë (UNMIK)./REL/

Familjarë, kolegë, politikanë, profesorë, si dhe shumë qytetarë, i dhanë të martën lamtumirën e fundit profesorit Minir Dushi i cili vdiq një ditë më parë. Ata bënë homazhe para arkivolit të tij në Shtëpinë e Kulturës “Rexhep Mitrovica” në Mitrovicë.

Për ta nderuar akademik Dushin, homazhe bëri edhe ish-drejtori i minierës me flotacion Trepça, Burhan Kavaja, i cili veç tjerash, të ndjerin e quajti patriot dhe burrë i cili me 18 vepra të shkruara mban vendin e parë në Akademinë e Kosovës.

“Ai ishte patriot, mësimdhënës, bujar, por mbi të gjitha burrë i cili me 18 vepra të shkruara mban vendin e parë në Akademinë e Kosovës…Ka kontribuar në masë të madhe në punësimin e shqiptarëve në objektet industriale të Trepçës. Kontributi i tij i madh është edhe në krijimin e Institutit, posaçërisht të Fakultetit të Mitrovicës…Ai mbahet mend edhe si inxhinier i cili në gjuhën shqipe ka ligjëruar i pari në Kosovë, në pjesën industriale të Mitrovicës”, ka thënë Kavaja.

Akademik Fejzullah Krasniqi, ish-koleg i Dushit, tha se veprën të cilën e ka lënë profesori, e bënë atë të pavdekshëm.

“Njeri i veçantë i cili ka dhënë kontribut të jashtëzakonshëm për shkencën në Kosovë, në veçanti për shkencat e tokës, miniera. Inxhinieri dhe doktori i parë i shkencave teknike…Veprën që ka lënë profesori Minir, e ka bërë atë të pavdekshëm”, theksoi Krasniqi.

Ndërkaq, Bajram Mustafa, qytetar nga Mitrovica, njëherësh mik i profesorit të ndjerë, potencoi se akademik Dushi ka lënë gjurmë të pashlyeshme në historinë e Trepçës dhe Mitrovicës.

“Një njeri që vërtetë ka lënë gjurmë të pashlyeshme në historinë e Trepçës dhe Mitrovicës, por edhe të mbarë Kosovës e Shqipërisë”.