Në shënim të Ditës Ndërkombëtare të të Drejtave të Njeriut, është hapur ekspozita “E vërteta, kujtesa, drejtësia”, kushtuar dokumentimit të krimeve të luftës dhe kërkimit të drejtësisë për viktimat e luftës.

Presidentja e Republikës së Kosovës, Vjosa Osmani, tha se krimet e kryera gjatë luftës kanë lënë plagë të pashërueshme për mijëra familje në vend, duke theksuar se kërkimi i drejtësisë mbetet përgjegjësi institucionale dhe morale.

“Krimet e luftës, krimet kundër njerëzimit e gjenocidi i ushtruar nga regjimi i Millosheviqit shkaktuan dhimbje e cila nuk do të shuhet asnjëherë. Mijëra të vrarë, përfshirë shumë fëmijë, mijëra gra e burra të dhunuar, mijëra persona të zhdukur me dhunë të cilët ende mungojnë në familjet e tyre. Dhimbja e tyre nuk njeh kohë, ajo është një plagë e hapur, plagë e gjallë, plagë e cila kullon çdo ditë dhe e cila kërkon drejtësi”, tha ajo.

Ajo shtoi se angazhimi institucional për të vërtetën dhe kujtesën është i pandalshëm.

Duke e cilësuar ekspozitën si dëshmi të qëndresës, Osmani tha se të mbijetuarit, me plagë fizike e shpirtërore, janë simbol i dinjitetit njerëzor dhe zë i së vërtetës që nuk do të heshtet.

“Nuk do të lejojmë që e vërteta të shtrembërohet, nuk do të lejojmë që kujtesa të shuhet; do të përkujtojmë fëmijët e vrarë, nënat e baballarët që nuk u kthyen kurrë, familjet që humbën gjithçka, ata që u zhdukën me dhunë. Për secilin prej tyre, për gratë që përjetuan tmerrin e dhunimit në kohë lufte dhe çdo viktimë të luftës. Secilin pa dallim, për secilën prej tyre kërkojmë drejtësi. Të mbijetuarit që jetojnë sot me plagë fizike, por mbi të gjitha plagë shpirtërore, janë personifikim i rezistencës dhe dinjitetit njerëzor; janë zëri i së vërtetës që asnjëherë nuk do të heshtet. Kosova nuk do të heqë dorë, nuk do të lejojmë që krimet të harrohen, nuk do të lejojmë që gjenocidi të mohohet. Për secilin person të zhdukur, për secilin fëmijë të vrarë, për secilën viktimë të dhunës seksuale do të flasim këtu dhe në çdo vend të botës; drejtësi do të kërkohet pa ndalur dhe e vërteta duhet të dëgjohet”, tha ajo.

Drejtori i Institutit për Krime të Luftës, Atdhe Hetemi, në fjalën e tij theksoi se ekspozita është më shumë sesa një paraqitje vizuale.

“Kjo ekspozitë nuk është vetëm paraqitje vizuale e së kaluarës sonë, por akt institucional i kërkesës për përgjegjësi dhe dëshmi e fuqishme se krimet e kryera gjatë luftës në Kosovë nuk harrohen, por vazhdojnë edhe pas më shumë se një çerekshekulli liri të jenë plagë të hapura që kërkojnë drejtësi. Pra, videot dhe fotomaterialet që shpalosen sot para jush nuk janë thjesht imazhe, janë zëra të ngrirë në kohë, janë jetë të ndërprera dhunshëm, familje të shkatërruara, fëmijë, gra, burra dhe të moshuar që u bënë target i një represioni sistematik dhe të organizuar nga regjimi serb”, tha ai./S.K/EO/

Të paktën 19 persona kanë vdekur dhe 16 të tjerë janë lënduar pasi dy ndërtesa u shembën në Fez, një nga qytetet më të vjetra të Marokut, raportuan mediat shtetërore të lajmeve.

Ata gjithashtu kanë thënë se blloqet kishin treguar shenja neglizhence për njëfarë kohe.

Autoritetet lokale në prefekturën e Fezit raportuan se dy ndërtesa katërkatëshe ngjitur ishin shembur gjatë natës, tha agjencia shtetërore e lajmeve, raporton Reuters.

Fez, është një ish-kryeqytet që daton që nga shekulli i tetë dhe qyteti i tretë më i populluar i vendit, u përfshi në një valë protestash dy muaj më parë kundër qeverisë për shkak të përkeqësimit të kushteve të jetesës dhe shërbimeve të dobëta publike./S.K/EO/

Ambasada gjermane në Kosovë, ka lëshuar një njoftim drejtuar kandidatëve për kryeministër dhe subjekteve politike në garën për zgjedhjet e 28 dhjetorit, ku ambasada rikujton se organizimi i tubimeve zgjedhore në territorin gjerman nuk lejohet më pak se tre muaj para mbajtjes së zgjedhjeve në vendin e tyre.

Zgjedhjet e jashtëzakonshme në Kosovë, do të mbahen më 28 dhjetor, kjo do të thotë se nuk mund të ketë tubime në Gjermani, një nga vendet ku ka më së shumti diasporë kosovare.

“Meqenëse kemi një diasporë të madhe të Kosovës në Gjermani, dëshirojmë t’u kujtojmë të gjithë kandidatëve se, si rregull, ngjarjet e fushatës zgjedhore nga zyrtarët e huaj në Gjermani nuk lejohen në periudhën më pak se 3 muaj para zgjedhjeve. Faleminderit për mirëkuptimin tuaj”, thuhet në njoftim.

Së fundmi, kandidati për kryeministër nga Lidhja Demokratike e Kosovës, Lumir Abdixhiku, ka paralajmëruar tubim në Frankenthaler të Gjermanisë më 13 dhjetor./S.K/EO/

Zyra Kombëtare e Auditimit (ZKA) ka identifikuar mangësi të shumta në procesin e ndërtimit të objektit për Klinikat Nefrologji dhe Hemato-Onkologji në Shërbimin Spitalor dhe Klinik Universitar të Kosovës (ShSKUK) për periudhën 2018-2025.

Raporti i auditimit “Ndërtimi i objektit për Klinikat Nefrologji dhe Hemato-Onkologji”, ka vlerësuar procesin e ndërtimit duke nisur nga buxhetimi dhe planifikimi, procedurat e tenderimit, deri te menaxhimi i fondeve dhe implementimi i kontratës.

Gjithashtu, janë evidentuar mangësi në buxhetim, tenderim dhe menaxhim të fondeve, përfshirë mospërputhjen në planifikimin buxhetor për ndërtimin e objektit, qasjen e dyfishtë në hartimin e specifikave teknike, mospërputhjen mes dokumentacionit teknik të projektit dhe paramasës, mangësinë në procesin e vlerësimit të ofertave gjatë tenderimit dhe dobësinë në menaxhimin e shpenzimeve.

Auditorja e Përgjithshme, Vlora Spanca, theksoi se këto mangësi tregojnë nevojën për një qasje më sistematike dhe respektim të plotë të kornizës ligjore në zbatimin e projekteve, për të rritur përgjegjësinë, transparencën dhe integritetin në menaxhimin e fondeve publike.

ZKA-ja ka dhënë pesë rekomandime për përmirësimin e proceseve:

1. Forcimi i kontrolleve të brendshme për harmonizimin e buxhetimit dhe transparencën e fondeve;

2. Kontroll më efektiv të njësive kërkuese dhe zyrës së prokurimit për specifika teknike të qarta;

3. Përmirësimi i sistemit të kontrollit gjatë përgatitjes së paramasës për të harmonizuar dokumentacionin teknik me kërkesat e projektit;

4. Sigurimi që tenderët të konsiderohen të përgjegjshëm vetëm kur janë në përputhje me të gjitha kërkesat e dosjes;

5. Ndarja e qartë e burimeve dhe shpenzimeve për secilin projekt dhe forcimi i mekanizmave të kontrollit të brendshëm për identifikimin e gabimeve që në faza të hershme./S.K/EO/