Google po zgjeron funksionalitetin e Google Drive me një mjet të ri për përpunimin bazik të videove, të quajtur Google Vids. Ky funksion është aktualisht në dispozicion për përdoruesit e disa planeve të Google Workspace.

Kur një video hapet në Drive, një ikonë e purpurt e Google Vids shfaqet në këndin e sipërm të djathtë, duke u dhënë përdoruesve mundësinë për të bërë prerje, për të shtuar muzikë, tekst dhe elementë vizualë. Pas përpunimit, krijohet një skedar i ri, i cili duhet ruajtur ose eksportuar veçmas.

Google Vids është i përshtatshëm për video me format MP4, QuickTime, OGG dhe WebM, me kohëzgjatje deri në 35 minuta dhe madhësi maksimale 4GB.

Ky shërbim nuk është i disponueshëm për llogaritë personale të Google Drive, por do të jetë i aksesueshëm për përdoruesit e kualifikuar të Workspace brenda 15 ditëve të ardhshme.

Ndërsa është projektuar kryesisht për desktop, disa funksione bazike mund të përdoren edhe nga shfletuesit në pajisjet mobile.

Ky hap është pjesë e përpjekjeve të Google për të integruar më shumë mjete krijuese dhe funksione praktike në platformën e saj cloud.

Ulefone po përgatitet të prezantojë tabletin më të ri Tab A9 Pro, së bashku me një version të dedikuar për fëmijë – Tab A9 Pro Kids.

Pajisja vjen me procesorin Helio G91 dhe sistemin operativ Android 15. Është i pajisur me 4GB RAM (LPDDR4X) dhe 128GB memorie të brendshme (UFS 2.1), që mund të zgjerohet deri në 2TB përmes kartës microSD.

Tableti ka ekran 8.68 inç me rezolucion 1,340 × 800 pikselë, rifreskim 90Hz dhe ndriçim deri në 400 nits. Mbështet edhe standardin Widevine L1, që lejon transmetime video në cilësi 1080p.

Për fotografi dhe video, Tab A9 Pro përfshin një kamerë kryesore 12MP Sony IMX363, një lente ultra-wide 13MP Samsung me kënd prej 136.5°, dhe një kamerë frontale 8MP për video-thirrje.

Bateria prej 5,040 mAh mbështet karikim të shpejtë 18W përmes portës USB-C. Pajisja gjithashtu ofron lidhje LTE, altoparlantë stereo dhe hyrje 3.5mm për kufje.

Me këtë kombinim specifikash, Ulefone Tab A9 Pro synon të ofrojë një përvojë të ekuilibruar mes performancës dhe çmimit të përballueshëm.

Themeluesi i Tesla dhe SpaceX, Elon Musk, ka deklaruar se modeli më i fundit i inteligjencës artificiale i kompanisë së tij xAI, i quajtur Grok 3, do të bëhet me burim të hapur në gjashtë muajt e ardhshëm.

Sipas Musk, ky vendim ka për qëllim të ofrojë më shumë transparencë në zhvillimin e AI-së dhe t’i japë mundësi studiuesve dhe zhvilluesve të analizojnë dhe përmirësojnë modelin jashtë ambienteve të kompanisë. Kjo nismë ndjek publikimin e mëparshëm të Grok 2.5, i cili tashmë është i disponueshëm me parametrat përkatës.

Grok 3 u prezantua në fillim të këtij viti, dhe Musk ka pretenduar se ai i tejkalon modelet konkurruese nga kompani si OpenAI dhe DeepSeek, sidomos në detyra që përfshijnë matematikën, shkencën dhe programimin. Megjithatë, modeli ka hasur edhe kritika për disa përgjigje të papërshtatshme që ka gjeneruar.

Duke e bërë Grok 3 të aksesueshëm si kod me burim të hapur, xAI synon të forcojë pozicionin e vet si një nga iniciativat udhëheqëse në fushën e inteligjencës artificiale me qasje të hapur

Sipas raportimeve të Bloomberg, Apple po transferon pjesën më të madhe të prodhimit të iPhone në Indi, përpara prezantimit të serisë së re iPhone 17, që pritet të ndodhë muajin e ardhshëm.

Kompania planifikon të prodhojë të gjitha katër modelet e serisë në Indi, dhe për herë të parë, të gjithë iPhone-t e rinj që do të dërgohen në tregun amerikan do të prodhohen atje. Ky lëvizje shërben për të zvogëluar varësinë e Apple nga Kina dhe për të rritur kapacitetet prodhuese në Indi, ku kompania ka zgjeruar aktivitetin në pesë fabrika, përfshirë dy që janë hapur së fundmi.

Bloomberg raporton se deri në gjysmën e prodhimit të iPhone-ve në Indi do të vijë nga fabrikat e kontrolluara nga Tata Group, një multinacionale indiane me bazë në Mumbai. Gjithashtu, partneri i hershëm i Apple, Foxconn, vazhdon të ketë një rol të rëndësishëm me fabrikën e saj në Bangalore.

Seria iPhone 17 pritet të prezantohet në shtator, me modelet standard iPhone 17, 17 Pro dhe 17 Pro Max, si dhe një variant më të hollë dhe më të avancuar që do të quhet iPhone Air. Për modelin “buxhetor” të gjeneratës së ardhshme, iPhone 17e, pritet të dalë në treg në fillim të vitit 2026.

Në Shtetet e Bashkuara, administrata Trump kishte kërcënuar me tarifa nëse Apple do të vazhdonte të prodhonte jashtë vendit. Megjithatë, kompania ka njoftuar së fundmi nga Shtëpia e Bardhë një investim shtesë prej 100 miliardë dollarësh në prodhimin brenda SHBA-së, si pjesë e programit “Made in America”. Ky investim është pjesë e një strategjie më të gjerë të Apple, që kap vlerën totale prej 600 miliardë dollarësh, për të rritur prodhimin e komponentëve në vend.

Ndërkohë, India vazhdon të jetë një prej vendeve ku Apple shmang tarifat e administratës Trump për momentin, pasi iPhone-t e prodhuar aty nuk janë prekur nga masa tarifore, sipas Bloomberg.