Sport

10 vite nga ndërkombëtarizimi i KOK-ut, suksese të mëdha e shumë barriera të thyera

Published

2 years ago

on

Figurat më eminente të sportit botërorë zbarkuan në Kosovë me ftesë të Komitetit Olimpik (KOK) të Kosovës për të festuar së bashku 10 vjetorin e anëtarësimit të kësaj të fundit në Komitetin Olimpik Ndërkombëtar.

Presidenti i Komitetit Olimpik Ndërkombëtar (IOC) Thomas Bach, ai i Komitetit Olimpik të Evropës, Spyros Capralos, presidenti i Komitetit Ndërkombëtar të Lojërave Mesdhetare, Davide Tizzano, si dhe presidentë të shumë federatave sportive ndërkombëtare, dhe personalitete tjera nga sporti botëror ishin pjesë e kësaj galambrëmje ku u festua ky përvjetor me shumë suksese të Kosovës në sport në arenën ndërkombëtare.

Anëtarësimin në Komitetin Olimpik Ndërkombëtar e cilësoi si “ngjarje hisorike” për Kosovën presidenti i Komitetit Olimpik të Kosovës, Ismet Krasniqi. Ai tha se Kosova edhe pse vend i vogël, i tregoi botës se me punë, besim e përkushtim mund të arrihet diçka më shumë se sa mund të imagjinohet dhe se kjo do të dëshmohet edhe në vitet e ardhshme.

“Gjatë këtyre 10 viteve e dimë që rruga nuk ka qenë gjithmonë e lehtë, ka pasur sfida, ka pasur dyshime por më shumë se çdo gjë tjetër ka pasur besim dhe guxim…Kosova edhe pse një shtet i vogël ka treguar se ka një potencial të madh një kështjellë të pamposhtur dhe ëndrra të mëdha. Pesë medaljet tona olimpike, katër në Lojërat Evropiane, triumfet në Lojërat Mesdhetare, sukseset në kampionatet botërore dhe evropiane janë dëshmi se kur besojmë në veten tonë asnjë kufi nuk është i pamundur. Ne kemi dëshmuar se mund të arrihet gjithçka, ndoshta madje më shumë se sa kishim menduar vetëm duke pasur besim dhe duke punuar me përkushtim”, ka thënë Krasniqi.

Presidentja e Republikës së Kosovës, Vjosa Osmani theksoi se ky 10 vjetor e gjen Kosovën me shumë suksese të jashtëzakonshme të arritura në sport.

Ajo shtoi se sportistët e Kosovës po bëjnë një rrugëtim të jashtëzakonshëm nëpër botë dhe se ata janë shtylla kryesore dhe ambasadorët më të mirë të Kosovës dhe imazhit të saj në arenën ndërkombëtare dhe kjo u dëshmua me xhudisten Majlinda Kelmendi e cila tashmë është bërë frymëzim edhe për sportistët e rinj në të gjithë botën.

“Rrugëtimi i sportistëve të Kosovës ka qenë i jashtëzakonshëm nga fitimi i medaljeve olimpike deri të mbajtja e flamurit me krenari në skenën ndërkombëtare. Ata i kanë treguar botës se kush është Kosova në të vërtetë…Sportistët tanë kanë dëshmuar se janë ambasadorët tanë më të mirë e më të denjë të Kosovës, prandaj jemi krenar për çdo hap, çdo garë dhe çdo qëllim që e kanë arritur. Kjo dekadë është e mbushur me arritje dhe momente të paharrueshme për sportin e Kosovës, në fakt për secilin qytetar të Kosovës sepse nëpërmjet sportit Kosova u vendos në hartën globale në mënyrë jashtëzakonisht dinjitoze”, deklaroi Osmani.

Kurse kryeministri i Republikës së Kosovës, Albin Kurti, tha se kjo dekadë shënoi histori jo vetëm për Kosovën por edhe për sportin ndërkombëtar sepse Kosova fitoi medalje në debutimin e saj në Lojërat Olimpike me kampionen Majlinda Kelmendi.

Kurti tha se këtë rrugëtim të suksesshëm Kosova do ta vazhdojë edhe me organizimin e Lojërave Mesdhetare në vitin 2030 duke ofruar gatishmërinë e Qeverisë së Kosovës për ta mbështetur fuqishëm organizimin e këtyre lojërave.

“Gjatë kësaj dekade, Kosova ka arritur atë që dikur dukej e pamundur. Nga njohja ndërkombëtare, në pjesëmarrje e përfaqësim dhe direkt në medalje të artë Olimpike. Histori për Kosovën, e histori edhe për sportin ndërkombëtar, ku një shtet, në debutim të Lojërave, fiton medalje të artë Olimpike. Më lejoni të shpreh mirënjohjen më të thellë për kampionen tonë, gruan e guximshme, shqiponjën e maleve të rugovës, të artën tonë të parë olimpike, Majlinda Kelmendi. Suksesi i saj jo vetëm që e ngriti Kosovën në majat e sportit botëror, por edhe frymëzoi breza të tërë të rinjsh që të ëndërrojnë dhe të punojnë drejt madhështisë”, tha Kurti.

Ndryshe, Komiteti Olimpik i Kosovës u anëtarësua në Komitetin Olimpik ndërkombëtar më 9 dhjetor të vitit 2014.

Related Topics:
Continue Reading

Sport

Mohamed Salah merr një dhuratë të pazakontë në Turqi, mbetet i befasuar nga propozimi i kryetarit të komunës

Published

9 hours ago

on

August 7, 2026

By

Ish-sulmuesi i Liverpoolit, Mohamed Salah, është përballur me një moment të pazakontë vetëm pak javë pasi nisi aventurën e tij të re te Trabzonspori.

34-vjeçari iu bashkua klubit turk në fillim të këtij muaji si lojtar i lirë, pas përfundimit të kontratës me Liverpoolin. Vendimi i tij për të vazhduar karrierën në Turqi surprizoi shumë tifozë dhe analistë të futbollit.

Pas prezantimit zyrtar, Salah vizitoi distriktin Arakli në Trabzon, ku u prit nga kryetari i komunës, Huseyin Avni Coskun Çebi. Takimi ishte planifikuar fillimisht si pjesë e një xhirimi promovues, por mori një kthesë të papritur.

Gjatë bisedës, Çebi foli për ndikimin e ndryshimeve klimatike dhe përmendi se në të ardhmen temperaturat e larta mund ta bëjnë jetën më të vështirë në Egjipt, vendlindjen e futbollistit.

“Ngrohja globale po kërcënon botën. Në të ardhmen do të bëhet e vështirë të jetohet në Egjipt gjatë verës. Distrikti ynë do të jetë shumë i banueshëm dhe ndër vendet më pak të prekura nga ngrohja globale”, tha ai.

Më pas, kryetari i komunës i bëri Salahut një ofertë që e la të habitur.

“Prandaj, le t’ju dhurojmë një copë të bukur tokë këtu. Mund të jetë një vend i mrekullueshëm për fëmijët dhe nipërit tuaj, pa probleme me ujin dhe i paprekur nga ngrohja globale”, shtoi Çebi.

Reagimi i Salahut u bë menjëherë viral në rrjetet sociale. Egjiptiani u pa duke prekur fytyrën në shenjë befasie, ndërsa iu përgjigj kryetarit të komunës me një “Faleminderit”, përpara se ta përshëndeste me shtrëngim duarsh.

Salah ka nisur kështu një kapitull të ri në karrierën e tij me Trabzonsporin, klub me të cilin, sipas raportimeve, do të përfitojë rreth 16.8 milionë euro në sezon. Me afrimin e yllit egjiptian, Trabzonspori synon të rivalizojë Galatasarayn dhe Fenerbahçen në garën për titullin e kampionit në Turqi.

D.L

Continue Reading

Sport

Fenerbahçe synon transferimin e Endrickut, Mourinho kërkon sulmuesin e Real Madridit

Published

12 hours ago

on

August 7, 2026

By

Fenerbahçe po përgatit një lëvizje befasuese në afatin kalimtar të verës, duke synuar transferimin e sulmuesit brazilian të Real Madridit, Endrick.

Sipas mediumit turk Fanatik, drejtori ekzekutiv i klubit, Cihan Kamer, pritet të udhëtojë drejt Madridit për të zhvilluar bisedime lidhur me një marrëveshje të mundshme. Klubi turk thuhet se është i vendosur ta bindë talentin brazilian të pranojë ofertën dhe të transferohet në Stamboll.

E ardhmja e 20-vjeçarit në “Santiago Bernabéu” është vënë në pikëpyetje pas afrimit të Carlos Espit nga Levante për 25 milionë euro. Konkurrenca e shtuar në repartin ofensiv pritet të kufizojë hapësirat e Endrickut në formacion.

Ndërkohë, trajneri i Real Madridit, Jose Mourinho, raportohet se e konsideron Espin si një alternativë të rëndësishme në repartin sulmues dhe nuk mund t’i garantojë Endrickut minutat që ai kërkon.

Pikërisht kjo situatë ka nxitur interesimin e Fenerbahçes, e cila shpreson të përfitojë nga pasiguria rreth rolit të brazilianit në skuadrën madrilene dhe ta bindë atë të vazhdojë karrierën në Superligën turke.

D.L

Continue Reading

Sport

KB Vëllaznimi prezanton strukturën e re drejtuese, Ardit Bakalli zgjidhet kryetar i klubit

Published

15 hours ago

on

August 7, 2026

By

Profili zyrtar i KB Vëllaznimit ka njoftuar për zgjedhjen e strukturës së re drejtuese të klubit, pas Kuvendit Zgjedhor të mbajtur më 5 gusht 2026.

Sipas njoftimit të publikuar nga klubi gjakovar, në pozitën e kryetarit të KB Vëllaznimit është zgjedhur Ardit Bakalli.

Bordi i ri drejtues i klubit përbëhet nga:

  • Ardit Bakalli – Kryetar
  • Bledar Kusari
  • Ardit Zeka – Sekretar
  • Blend Kasapolli
  • Ardian Maloku
  • Behar Ferizi
  • Shkëlqim Gërqina
  • Jeton Bakalli
  • Endrit Berisha

KB Vëllaznimi ka bërë të ditur se kjo strukturë e re është pjesë e vizionit të klubit për forcimin e organizimit, rritjen e profesionalizmit dhe vazhdimin e punës për zhvillimin institucional dhe sportiv.

“Klubi i uron suksese drejtuesve të rinj dhe i falënderon për gatishmërinë për të kontribuar në rrugëtimin e ardhshëm të klubit”, thuhet në njoftimin zyrtar të KB Vëllaznimit.

Për Vëllaznimin. Për Gjakovën.

D.L

Continue Reading

Sport

KB Sigal Prishtina përforcohet me dy lojtarë të rinj, vazhdon edhe me Liri Zenelin

Published

15 hours ago

on

August 7, 2026

By

KB Sigal Prishtina ka nisur kompletimin e skuadrës për sezonin e ri, duke bërë të ditur dy afrime të reja në ekip.

Klubi bardhekaltër ka mirëpritur në radhët e veta Vincent Golson Jr dhe Elton Krasniqin, të cilët do të jenë pjesë e Sigal Prishtinës në edicionin e ardhshëm. Dy lojtarët e rinj pritet të sjellin cilësi dhe energji të re në skuadrën kampione.

Përveç afrimeve të reja, Sigal Prishtina ka konfirmuar edhe vazhdimin e bashkëpunimit me Liri Zenelin. Basketbollisti, i cili ka qenë pjesë e ekipit edhe më herët, do të vazhdojë të mbajë fanellën bardhekaltër edhe në sezonin e ri.

Me këto lëvizje, KB Sigal Prishtina po ndërton një skuadër të balancuar, duke kombinuar përforcimet e reja me lojtarët që tashmë e njohin ambientin e klubit.

D.L

Continue Reading

Të kërkuara