Lajmet

​Zgjedhjet në Shqipëri, kërkohet reformimi i opozitës

Analisti në Shqipëri, Lutfi Dervishi thotë se zgjedhjet lokale të 14 majit në Shqipëri janë fitore e qartë e Partisë Socialiste.

Published

on

Zgjedhjet lokale në Shqipëri po konsiderohen fitore absolute e Partisë Socialiste dhe debakël politik për opozitën. Derisa procesi i numërimit të votave po shkon drejt fundit, ku deri më tani dihet se nga 61 bashki, PS-ja ka fituar 43 sosh, kurse opozita vetëm shtatë, njohësit e zhvillime politike vlerësojnë se opozita duhet të reformohet që të bëhet alternativë e besueshme për qytetarët atje.

Analisti në Shqipëri, Lutfi Dervishi thotë se zgjedhjet lokale të 14 majit në Shqipëri janë fitore e qartë e Partisë Socialiste. Ai përmend rënien e opozitës dhe veçmas të PD-së në bastionet e veta, sikur në Shkodër. Sipas tij, opozita ka fituar në bashki të dorës së dytë apo të tretë.

“Ka një fitore të qartë të Partisë Socialiste, një performancë të dobët të opozitës për shkak të disa faktorëve por edhe ndasive që ka mes opozitës. Në rezultate befasuese ishte rënia e Shkodrës që ka qenë një qytet e qeverisur nga forcat djathta dhe PD-ja, përgjatë 33 viteve të fundit. Tirana nuk është se ka ndonjë histori, në kuptimin e rikonfirmimit në detyrë të kryetarit Veliaj, kjo edhe për shkak të avantazhit të dukshëm që ka kur janë numëruar më shumë se gjysma e kutive të votimit. Pritet që nesër të konfirmohet rezultati i 61 bashkive për gjithë Shqipërinë. Koalicioni Bashkimi për Fitoren ka arritur të marrë një rezultat të dobët, kryesisht 5-6 bashki të dorës së dytë apo të tretë”, thotë ai.

Edhe njohësi i zhvillimeve politike në Shqipëri, Ben Andoni, thotë se zgjedhjet lokale në Shqipëri janë dështim i opozitës.

Megjithatë, ai vlerëson se procesi i djeshëm zgjedhor ka pasur ngecje të mëdha në administrimin zgjedhor, fillimisht me identifikimin elektronik. Ai përmend edhe shitblerjen e votave, e cila sipas tij po bëhet në mënyrë të sofistikuar.

“Duket se në këto zgjedhje ka pasur ngecje shumë të mëdha. E para me identifikimin biometrik, e dyta me trajnimin e numëruesve, komisionarëve dhe të gjithë pjesës që duhet të merren me zgjedhje. Ka pasur një gatishmëri jo shumë të madhe të pajisjeve elektronike, të cilat një pjesë janë marrë gati ditët e fundit, pa u kontrolluar. Kjo solli probleme që ne në disa vende kaluam sërish në identifikimin manual, pastaj edhe votimin. Të gjitha këto treguan se akoma administrata jonë vuan problematika të mëdha, të cilat më shumë rrjedhin në fryrje të madhe të administratës dhe politizimin. Tani ka ardhur koha që KQZ-ja të jetë një institucion absolutisht apolitik”, deklaron Andoni.

Në anën tjetër, analisti Dervishi thotë se opozita në Shqipëri duhet të ketë reflektim të brendshëm pas zgjedhjeve lokale dhe jo të kontestojë në mënyrë apriori rezultatet.

“Opozita ka nevojë për reforma dhe figura të reja që të bëhet një alternativë e besueshme. Ka nevojë që të paraqitet disi më ndryshe, pasi pesha e madhe e pushtetit që ka marrë PS-ja prej 10 vitesh në pushtetin qendror dhe tashmë merr shumicën e pushtetit lokal do të duhej të ishte një avantazh për opozitën, por nuk është përkthyer. Reflektimin e brendshëm përveç dosjes së kontestimeve që nuk do të mungojë, duhet të jenë parësore”, deklaron ai.

Ndërkaq, Andoni, thotë se humbja kaq e madhe e opozitës, përkundër që PS-ja është në pushtet që 10 vjet është lajm i keq për demokracinë në Shqipëri.

“Ky është një lajm shumë i keq për opozitën shqiptare. Shpresoj që në mes të tyre të gjenerohen rryma të reja, forca, por e shikojë shumë të vështirë. Partia Demokratike legale që mund të bënte diçka, jo vetëm që nuk arriti të bënte diçka, por një pjesë e tyre u bashkua me zotëri Berisha dhe bënin fushatë me të”, thekson ai.

Procesi i numërimit të votave ka përfunduar në një numër të madh të bashkive në Shqipëri, ku deri tani dihet që Partia Socialiste ka fituar në 34 bashki. Ndërsa, koalicioni Bashkë Fitojmë, do t’i drejtojë shtatë bashki. Sipas rezultateve të deritanishme, Partia Socialiste ka fituar në Lushnje, Sarandë, Cërrik, Patos, Librazhd, Rrogozhinë, Bulqizë, Gramsh, Belsh, Roskovec, Tropojë, Dropull, Përmet, Skapar, Poliçan, Konispol, Këlcyrë, Fushë-Arrës, Libohovë, Pustec, Kamëz, Vora, Elbasan, Pusteci, Delvinë, Klos, Kolonjë, Këlcyrë, Tepelenë, Pukë, Peqin, Elbasan, Delvinë dhe Vlorë.

Ndërkohë në Shkodër deri tani janë numëruar 243 qendra të votimit nga 247 sa janë gjithsej. Aty po prin kandidati i PS-së, Benet Bahri Beci.

Lajmet

Osmani në Sofje, takoi presidentin bullgar dhe mbretin e Jordanisë

Published

on

By

Presidentja Vjosa Osmani, po qëndron në Bullgari, për ta përfaqësuar vendin krahas liderëve të tjerë në takimin e nivelit të lartë të Procesit Aqaba për Ballkanin III, i cili do të mbahet në Sofje.

Nga atje Osmani ka publikuar një fotografi nga takimit me Mbretin Abdullah II të Jordanisë dhe Presidentin e Bullgarisë, Rumen Radev.

‘’Me Mbretin Abdullah II të Jordanisë dhe Presidentin e Bullgarisë, Rumen Radev, në Takimin e Aqaba në Sofje, për ta nxitur bashkëpunimin, dialogun dhe stabilitetin rajonal.

Continue Reading

Lajmet

Rivarrosen mbetjet mortore të 10 viktimave të luftës

Published

on

Me nderime shtetërore, janë rivarrosur mbetjet mortore të dhjetë viktimave të luftës, të cilat ishin pjesë e listës së personave të zhdukur. Mbetjet e tyre ishin identifikuar së fundmi nga mbetjet mortore të zhvarrosura në varreza masive në Bishtazhin të Gjakovës.

Ceremonia e rivarrimit u mbajt në Kompleksin Memorial “Kodra e Kuqe” në Grabanicë të Klinës, ku u rivarrosën martirët Adem (Hazir) Gashi, Sahit (Ahmet) Gashi, Bekim (Hashim) Hasani, Sheremet (Brahim) Ismajli, Osman (Kadri) Fejza, Shkelzen (Rifat) Hajdaraj, dhe Bekim (Muharrem) Gashi. Në varrezat e Jashanicës në Klinë, u rivarrosën eshtrat e Mentor (Xhemajl) Myrtajt.

Ceremonitë e rivarrimit vazhduan me viktimat e tjera, përfshirë Vehbi (Pajazit) Halilaj, i cili u rivarros në varrezat e fshatit Llapqevë në Malishevë, dhe Mentor (Maliq) Kryeziu, që u rivarros në Bubavec të Malishevës. Mbetjet mortore të Sabedin (Kadri) Kryeziu u rivarrosën më 21 mars në varrezat e fshatit Mleqan, Malishevë.

Ky akt përkujton sakrificat e viktimave të luftës dhe mundëson nderimin dhe kujtimin e tyre.

Continue Reading

Bota

Shpërthejnë përleshjet në Sudanin e Jugut, 30 të vdekur

Published

on

Në Sudanin e Jugut, përleshjet e dhunshme kanë shpërthyer në komunitetin e Abiemnom, në veri të vendit, duke lënë të paktën 30 të vdekur. Trazirat nisën pas një vjedhjeje të bagëtive nga një grup të rinjsh të armatosur në distriktin Rueng. Pas kësaj, forcat e sigurisë intervenuan, por një ditë më vonë, të rinjtë u kthyen me përforcime dhe sulmuan komunitetin Abiemnom.

Qytetarët dhe forcat e sigurisë tentuan të mbronin qytetin, por u përballën me një numër më të madh forcash armiqësore. Disa nga viktimat ishin pjesë e grupit të rinjve të armatosur.

Konfliktet midis barinjve dhe fermerëve janë të zakonshme në Sudanin e Jugut, por përleshjet e fundit vijnë pas tensioneve politike të rritura në vend. Arrestimi i Zëvendës Presidentit, Riek Macar, nga forcat besnike të Presidentit Salva Kiir, ka rritur shqetësimet për mundësinë e një ripërtëritjeje të luftës civile, që ka shkatërruar vendin gati shtatë vjet më parë.

Continue Reading

Bota

Kryeministri i përkohshëm i Serbisë: Jemi shumë pranë formimit të qeverisë së re, nuk përjashtohet as mundësia e zgjedhjeve

Published

on

Millosh Vuçeviç, kryeministri i përkohshëm i Serbisë dhe lideri i Partisë Progresive Serbe (SNS), ka deklaruar se formimi i qeverisë së re është shumë afër, por ka ende mundësi që të thirren zgjedhje të reja. Në një intervistë për Prva TV, Vuçeviç tha se një kryeministër i ri do të mund të formonte një kabinet deri më 18 prill, por theksoi se ka një mundësi të vogël që, nëse nuk arrijnë një marrëveshje për formimin e kabinetit, mund të shpallen zgjedhje të reja.

Ai përmendi se procesi i formimit të kabinetit do të jetë i vështirë dhe kërkon hartimin e një prezantimi brenda shtatë deri në dhjetë ditë. Pas konsultimeve me presidentin serb, Aleksandar Vuçiç, Vuçeviç theksoi se koalicioni që mbështet SNS është i bindur se nuk është e nevojshme të mbahen zgjedhje të reja dhe se do të propozojnë dy kandidatë për postin e kryeministrit të emëruar.

Continue Reading

Të kërkuara