Presidenti i FIFA-s, Gianni Infantino, ka deklaruar se Irani “me siguri” do të marrë pjesë në Kupën e Botës 2026, edhe pse situata gjeopolitike dhe konflikti me Shtetet e Bashkuara dhe Izraelin kanë ngritur pikëpyetje për sigurinë e pjesëmarrjes së tij.Duke folur në forumin “Invest in America” të CNBC-së, Infantino theksoi rëndësinë e pjesëmarrjes së Iranit në turne, duke thënë se vendi e ka siguruar kualifikimin dhe se lojtarët duhet të kenë mundësinë të luajnë.

“Ekipi kombëtar iranian do të vijë me siguri. Shpresojmë që deri atëherë situata të jetë e qetë. Irani duhet të vijë, sepse ata përfaqësojnë popullin e tyre dhe janë kualifikuar. Lojtarët duan të luajnë”, u shpreh ai.Infantino shtoi se gjatë një takimi me përfaqësuesit e Iranit në Antalia të Turqisë ishte impresionuar nga skuadra dhe dëshira e tyre për të marrë pjesë në turne.

“Shkova t’i takoja. Është një ekip i mirë dhe ata vërtet duan të luajnë. Sporti duhet të qëndrojë jashtë politikës”, tha ai.

Megjithatë, ai pranoi se ndarja mes sportit dhe politikës nuk është gjithmonë e mundur.

“Nuk jetojmë në hënë, jetojmë në Tokë. Por nëse askush nuk punon për të ndërtuar ura, atëherë ne e bëjmë atë punë”, shtoi kreu i FIFA-s.

Kupa e Botës 2026 do të organizohet nga Shtetet e Bashkuara, Kanadaja dhe Meksika. Sipas planit aktual, Irani është parashikuar të luajë dy ndeshje të fazës së grupeve në Inglewood, Kaliforni dhe një në Seattle.

Tensionet e fundit kanë shtuar pasiguritë rreth pjesëmarrjes së Iranit, ndërsa zyrtarë iranianë dhe amerikanë kanë dhënë deklarata kontradiktore për situatën dhe sigurinë e ekipit gjatë turneut.

Xhudistja kosovare, Distria Krasniqi, e ka kaluar me sukses pengesën e parë në Kampionatin Evropian që po mbahet në Tbilisi të Gjeorgjisë. Në xhiron e dytë të kategorisë deri në 52 kg, Distria dominoi plotësisht ndaj çekes Tereza Bodnarova, duke fituar me “Waza-ari”.

Si bartëse e parë në kategorinë e saj, Distria ishte e lirë në xhiron e parë dhe tashmë vazhdon rrugëtimin drejt zonës së medaljeve. Sot në tatami pritet të dalin edhe Fatjona Kasapi (52 kg) dhe Erza Muminoviq (48 kg).

Gara në Gjeorgji ka mbledhur rreth 400 xhudistë nga 46 vende të ndryshme, ku Kosova përfaqësohet me ekipin e saj elitar. Garimi për xhudistët tanë do të vijojë edhe të premten, ku në tatami do të zbresin Laura Fazliu, Akil Gjakova dhe Dardan Cena.

Bayern Munich dhe Arsenali kanë prerë biletën për në gjysmëfinale të Ligës së Kampionëve, pas dy përballjeve dramatike që dhuruan spektakël dhe emocione deri në fund.

Në “Allianz Arena”, Bayerni triumfoi 4-3 ndaj Real Madridit, në një ndeshje të çmendur me përmbysje dhe gola spektakolare. Takimi nisi me avantazhin e shpejtë të madrilenëve përmes Arda Güler, por gjermanët reaguan menjëherë duke barazuar me Aleksandar Pavlović.

Güler riktheu epërsinë për Realin me një goditje dënimi të jashtëzakonshme, ndërsa Harry Kane barazoi sërish për Bayernin. Para pushimit, Kylian Mbappé shënoi për 2-3, duke e lënë gjithçka të hapur.

Në pjesën e dytë, loja u ashpërsua dhe tensioni u rrit ndjeshëm. Real Madridi mbeti me një lojtar më pak pas përjashtimit të Eduardo Camavinga në minutën e 86-të, çka rezultoi vendimtare. Bayerni përfitoi maksimalisht: Luis Díaz barazoi në minutën e 89-të, ndërsa Michael Olise vulosi përmbysjen me golin e fitores për 4-3.

Me këtë rezultat dhe fitoren në total 6-4, gjermanët sigurojnë kalimin në fazën tjetër.

Ndërkohë, Arsenali konfirmoi epërsinë ndaj Sportingut 1-0 duke menaxhuar me zgjuarsi avantazhin e ndeshjes së parë. Skuadra londineze tregoi pjekuri taktike dhe organizim të lartë, duke mos i lënë hapësira kundërshtarit për përmbysje.

Sportingu tentoi të reagojë, sidomos në tranzicion dhe me presion të lartë, por mbrojtja e Arsenalit qëndroi solide, duke ruajtur kontrollin e lojës dhe rezultatin që i dërgoi anglezët në gjysmëfinale.

Kështu, Bayerni dhe Arsenali bashkohen mes katër skuadrave më të mira të Europës, duke konfirmuar formën dhe ambiciet e tyre për trofeun më prestigjioz në nivel klubesh.

Kosova nis nesër rrugëtimin në Kampionatin e 75-të Evropian të xhudos, ku sytë janë kthyer nga kampionia jonë olimpike, Distria Krasniqi.

Si bartësja e parë në kategorinë deri në 52 kilogramë, Distria konsiderohet favoritja kryesore për të mbrojtur titullin dhe për të fituar medaljen e saj të katërt të artë në kontinent.

Përveç saj, në ditën e parë të garave në Gjeorgji, në tatam do të zbresin edhe Erza Muminoviq në kategorinë deri 48 kilogramë dhe Fatjona Kasapi në kategorinë deri 52 kilogramë, të cilat synojnë të befasojnë pas rikthimit nga lëndimet.

Ethet e garës do të vazhdojnë edhe të premten, ku në kërkim të medaljeve do të jenë Laura Fazliu, Akil Gjakova dhe Dardan Cena.

Laura vjen si bartësja e katërt dhe pretendente serioze për podium, ndërsa Akil Gjakova do të përballet me konkurrencën më të fortë të mundshme në mesin e 41 xhudistëve në kategorinë deri 73 kilogramë.

Në këtë kampionat madhështor marrin pjesë mbi 400 sportistë nga 46 shtete të ndryshme, ndërsa ekipi i Kosovës udhëton me synime të qarta për të vazhduar dominimin në arenën ndërkombëtare.