Lajmet

Tahiri paralajmëron kallëzim penal për secilin anëtar të bordit të ZRrE-së

Ai tha se faturat e fundit që kanë paguar qytetarët e Kosovës kanë qenë të papërballueshme.

Published

4 years ago

April 14, 2022

Betim Gashi

Shefi i Grupit Parlamentar të PDK-së, Abelard Tahiri ka kërkuar nga Bordi i ZRrE-së që t’i japë instruksione KEDS-it që tarifat e reja për energjinë të jenë me çmim të vjetër, pas vendimit të Gjykatës Themelore.

Në të kundërtën ka paralajmëruar se do të bëjnë kallëzim penal për secilin anëtar të bordit të ZRrE-së.

“Ne bëjmë thirrje që sa më shpejt të mblidhet bordi i ZRrE-së dhe sa më shpejtë të japë instruksionet që KEDS-i për këtë muaj të tarifojë qytetarët me tarifë të ulët të energjisë elektrike dhe jo me këtë të lartin që ka ndodhur para dy muajve. Faturat e fundit që kanë paguar qytetarët e Kosovës kanë qenë të papërballueshme për qytetarët. Andaj ZRrE-ja, qeveria dhe presidentja të respektojnë vendimin e Gjykatës Themelore të Prishtinës. Përderisa nuk kemi vendim të apelit të shkallës së dytë, i njëjti është në fuqi dhe asnjë rrethanë qytetarët nuk duhet të tarifohet me tarifa të shtrenjta sepse është e jashtëligjshme. Në rast se bordi deri në ditën e hënë nuk mblidhet për të dhënë instruksione KEDS-it që tarifat e reja të jenë me tarifa të vjetra, atëherë ne si Grup Parlamentar do të bëjmë kallëzim penal për secilin anëtarë të Bordit”, tha ai në seancën e sotme të Kuvendit.

Vendi

Afati i fundit kushtetues për konstituimin e Kuvendit

Published

1 minute ago

August 7, 2026

UBTNews

Sot mbushet afati i fundit kushtetues për konstituimin e Kuvendit të Kosovës, ndërsa nga ky institucion nuk është bërë e ditur se kur do të vazhdojë seanca e ndërprerë për legjislaturën e 11-të.

Punimet e seancës konstituese u ndërprenë me kërkesë të kryetarit të Lëvizjes Vetëvendosje, Albin Kurti, i cili kërkoi kohë shtesë për diskutime me përfaqësuesit e partive politike, me qëllim arritjen e një marrëveshjeje për çështjen e presidentit. Kjo kërkesë nxiti reagime nga ligjvënësit e Partisë Demokratike, mirëpo kryesuesi i seancës, Avni Dehari, ndërpreu punimet.

Para ndërprerjes, Kuvendi përmbylli dy pikat e para të rendit të ditës: formimin e komisionit për verifikimin e mandateve dhe betimin e deputetëve. Pasi u konstatua rregullsia e mandateve, ligjvënësit e zgjedhur dhanë betimin, përfshirë edhe deputetët e Listës Serbe. /E.A/

lajme

Mot me diell dhe temperatura deri në 37°C sot në Kosovë

Published

9 minutes ago

August 7, 2026

UBTNews

Kosovën e pret një ditë me mot kryesisht me diell dhe i nxehtë këtë të premte.

Sipas Institutit Hidrometeorologjik të Kosovës (IHMK), temperaturat minimale do të lëvizin ndërmjet 13°C dhe 18°C, ndërsa ato maksimale do të arrijnë nga 33°C deri në 37°C.

Gjatë ditës mund të shfaqen vranësira të pakta kalimtare në disa zona, por nuk parashihen reshje shiu. Po ashtu, do të fryjë erë e lehtë deri mesatare nga drejtimi i veriut dhe veriperëndimit me shpejtësi prej 1 deri në 5 m/s.

Nga IHMK bëjnë të ditur se temperaturat do të mbeten pak mbi mesataren shumëvjeçare, mirëpo mbeten brenda normave për stinën e verës. /E.A/

Live

SHBA përballet me opsione të vështira për mbylljen e konfliktit me Iranin

Published

11 minutes ago

August 7, 2026

UBTNews

Ndërsa lufta e Presidentit Donald Trump kundër Iranit ka hyrë në muajin e saj të gjashtë, paralajmërimet dhe përpjekjet diplomatike të kësaj jave kanë nxjerrë në pah pozicionin e ndërlikuar në të cilin ai ndodhet, teksa përpiqet të tërheqë SHBA-në nga një konflikt jopopullor që fillimisht pretendonte se do të zgjaste vetëm disa javë.

Trump ndodhet përballë dy rrugëve: të pranojë një marrëveshje të përkohshme që po mekohet mes Iranit dhe Omanit – e cila do t’i jepte Teheranit kontroll mbi ngushticën e Hormuzit, diçka që nuk e posedonte para luftës – ose të zbatojë paralajmërimet e tij për përshkallëzim të mprehtë, duke rrezikuar një krizë më të zgjatur.

Opsioni i parë, sipas analistëve, do t’i gjeneronte Iranit lëshimin më të madh që nga sulmi i SHBA-së dhe Izraelit më 28 shkurt dhe do të zyrtarizonte mbikëqyrjen e Republikës Islamike mbi këtë rrugë të rëndësishme të transportit të naftës, diçka që administrata Trump kishte premtuar ta parandalonte.

Rruga e dytë, që ka të ngjarë të përfshijë një valë të re sulmesh ajrore, mund të bartë rreziqe politike për Trumpin përpara zgjedhjeve të rëndësishme afatmesme të nëntorit në SHBA, ndërsa nuk duket se ofron ndonjë garanci më të madhe suksesi se bombardimet e mëparshme.

Trump mund të zgjedhë gjithashtu të ruajë status quo-në aktuale: të mbajë bllokadën e porteve iraniane dhe të kundërpërgjigjet periodikisht ndaj çdo sulmi mbi transportin detar. Megjithatë, as kjo qasje nuk i ofron një dalje të dinjitshme nga një konflikt që ai kishte parashikuar të përfundonte në mes të prillit.

“Është një menu opsionesh të këqija, por Trump mund të ketë kuptuar se nuk mund ta lërë këtë luftë të vazhdojë pafundësisht,” u shpreh Aaron David Miller, ish-negociator për Lindjen e Mesme.

Duke iu përgjigjur pyetjeve të gazetares së Reuters, një zyrtar amerikan deklaroi në kushte anonimiteti se çdo rrugë e përkohshme e transportit detar do të jetë “pa asnjë pengesë” dhe pa mbikëqyrje nga asnjë palë. /Reuters/

Lajmet

Humbin jetën tre qytetarë nga Kosova në një aksident në Gjermani

Published

25 minutes ago

August 7, 2026

UBTNews

Tre persona nga Kosova kanë humbur jetën në një aksident rrugor të enjten në mëngjes në Gjermani, ka njoftuar një i afërm i tyre.

Sipas njoftimit, aksidenti ka ndodhur teksa viktimat – të moshave 61, 34 dhe 16 vjeç, pjesëtarë të së njëjtës familje – po ktheheshin nga Kosova.

Ngjarja është regjistruar në autostradën A3 në rajonin e Bavarise.

Sipas raportimeve të mediave lokale, automjeti ka dalë nga rruga dhe ka rënë në linjën hekurudhore. Ndonëse nuk ka pasur përplasje me tren, tre personat që ndodheshin në veturë kanë mbetur të vdekur në vendngjarje.