Një person është gjetur pa shenja jete të premten në mëngjes në rrugën “Enver Maloku”, në lagjen “Bregu i Diellit” në Prishtinë.

Lajmin e ka konfirmuar Policia e Kosovës. Zëdhënësi i policisë për rajonin e Prishtinës, Enis Pllana, tha se informata është pranuar rreth orës 08:00.

“Sot rreth orës 08:00 kemi pranuar informatën për një person pa shenja jete në rrugën ‘Enver Maloku’ në Prishtinë. Vdekjen e viktimës e ka konstatuar ekipi mjekësor në vendin e ngjarjes,” deklaroi Pllana.

Ai theksoi se policia, në koordinim me prokurorin e shtetit, ka nisur një hetim mbi vdekjen dhe po vazhdon me ndërmarrjen e të gjitha veprimeve hetimore e të ekzaminimit për sqarimin e plotë të rrethanave të rastit. /E.A/

Në Pikën e Kalimit Kufitar në Dheu i Bardhë, më 16 shtator 2026, rreth orës 11:40, është shoqëruar në stacionin policor një shtetas i Serbisë, pasi gjatë kontrollit ka prezantuar një patentë shoferi që dyshohet të jetë e falsifikuar.

Dokumenti është konfiskuar për ekzaminim.

Pas intervistimit, me vendim të prokurorit, i dyshuari është liruar dhe rasti do të procedohet në procedurë të rregullt./A.K/

Në Prizren, më 16 shtator 2026, rreth orës 20:15, është raportuar një aksident trafiku me fatalitet.

Sipas Policisë, një i dyshuar, mashkull kosovar, duke mos iu përshtatur kushteve dhe shpejtësisë së rrugës, me automjet ka goditur një këmbësore, femër kosovare.

Si pasojë e plagëve të marra, viktima ka ndërruar jetë.

Me vendim të prokurorit, trupi i pajetë është dërguar në Institutin e Mjekësisë Ligjore (IML) për obduksion, ndërsa i dyshuari është dërguar në mbajtje./A.K/

Gjatë 24 orëve të fundit, Policia e Kosovës ka regjistruar gjithsej gjashtë raste të dhunës në familje, të cilat kanë ndodhur në tri komuna të vendit: Prishtinë, Gjakovë dhe Lipjan. Tri raste janë evidentuar në kryeqytet, tri të tjera në Gjakovë, si dhe një rast në Lipjan.

Sa i përket rrethanave të ngjarjeve, në kryeqytet janë raportuar tri raste të ndryshme: në dy prej tyre viktimat gra janë sulmuar fizikisht nga të dyshuarit burra, ndërsa në rastin e tretë bëhet fjalë për një mosmarrëveshje mes një gruaje dhe një burri. Të gjithë të dyshuarit në këto ngjarje janë liruar në procedurë të rregullt me vendim të prokurorit.

Në Lipjan është evidentuar një rast ku një person dyshohet se ka ushtruar dhunë fizike dhe psikike ndaj një gruaje. Pas procedurave të intervistimit, i dyshuari po ashtu është liruar në procedurë të rregullt.

Ndërkaq, situatë më e rëndë është shënuar në Gjakovë përmes tri rasteve të ndara. Në rastin e parë, dy burra janë përleshur fizikisht mes vete; njëri prej tyre është arrestuar dhe më pas liruar në procedurë të rregullt, kurse tjetri ndodhet ende në kërkim policor. Në dy rastet e tjera, dy persona janë dërguar në mbajtje me vendim të prokurorit pasi kanë ushtruar dhunë dhe keqtrajtim fizik ndaj dy viktimave grave, prej të cilave njëra ka pranuar edhe tretman mjekësor. /E.A/