Lajmet

​ShSKUK nuk u ofron shërim, rreth 1 mijë pacientë kërkojnë trajtim shëndetësor jashtë vendit

Sipas u.d të drejtorit të Fondit, 5 milionë euro janë shpenzuar për trajtim jashtë vendit.

Publikuar

Edhe në vitin 2022 rreth 1 mijë pacientë kosovarë nuk gjetën shërim në institucionet publike shëndetësore në Kosovë, prandaj u detyruan që të kërkojnë mbështetje financiare nga shteti për trajtim mjekësor jashtë vendit. Ata që vuajnë nga sëmundje malinje vazhdojnë të jenë pacientët të cilët më së shumti iu deshtë që të kërkojnë ilaç në spitalet jashtë vendit, kryesisht në Turqi.

Ushtruesi i detyrës së drejtorit të Fondit për Sigurime Shëndetësore, Bujar Kaçuri ka thënë se në pamundësi që klinikat e Shërbimit Spitalor Klinik Universitar të Kosovës të ofrojnë shërbime për diagnoza të ndryshme edhe vitin e kaluar, pacientët kosovarë kërkuan mbështetje për shërim jashtë vendit.

“Në bazë të të dhënave, numri i pacientëve të cilët kërkojnë ndihmë apo trajtim jashtë vendit sillet rreth 1 mijë, klinikat nuk mund t’i veçojmë sepse secila klinik i ka specifikat e veta. Mirëpo, diagnozat më të shpeshta apo sëmundjet të cilat i përkrah programi për trajtim jashtë vendit, kanë qenë sëmundjet malinje të cilat e kanë një kosto bajagi të lartë dhe mundësitë e Kosovës si shtet për t’i trajtuar dhe ofruar ato diagnoza, nuk ekziston dhe kryesisht kjo lloj sëmundje ose është përkrahur për trajtim jashtë vendit… Derisa shteti është në pamundësi për të ofruar zgjidhje për këto diagnoza, atëherë e vetmja zgjidhje është trajtimi jashtë vendit”, theksoi ai.

Sipas u.d të drejtorit të Fondit, 5 milionë euro janë shpenzuar për trajtim jashtë vendit, ku këto mjete kryesisht po shkojnë në drejtim të spitaleve turke.

Kaçuri ka shtuar se nga gushti kur ka ardhur në pozitën e udhëheqësit të këtij institucioni, ka një trend të referimit në numër më të madh të rasteve të rregullta se sa të atyre urgjente, siç ishte më herët.

“Mbi 5 milionë janë shpenzuar, jemi në procedurë edhe të pagesave të disa lëndëve, por lëndët të cilat i kemi trashëguar janë në proces të riverifikimit… (Turqia) ka dominuar, mirëpo nga marrja e detyrës së drejtorit të Fondit, kam dërguar tek drejtorët e klinikave që asnjë lëndë apo aplikacion në referim për trajtim jashtë vendit nuk do të aprovohet i cili është jashtë listës së diagnozave dhe i cili është pjesë e udhëzimit administrativ. Të njëjtën gjë e ka bërë edhe bordi për trajtim jashtë vendit dhe është vërejtur një dukuri se në të kaluarën rastet urgjente kanë qenë më të shpeshta, por pas dërgimit të këtij njoftimi ka ndryshuar trendi tash është rritur kërkesa për trajtime të rregullta. Ndërsa, ka rënë kërkesa për trajtime emergjente, ndoshta kjo duhet të trajtohet dhe të kërkohet përgjigje edhe nga klinikat dhe mendime konzilare, të cilat i kanë referuar rastet si të rregullta apo emergjente dhe të hulumtohet se pse ka ndërruar ky trend i referimeve”, deklaroi Kaçuri.

E në Shoqatën për të Drejtat e Pacientëve të Kosovës e shohin tejet shqetësues faktin që pacientët në Kosovë, vazhdojnë të bredhin spitaleve private brenda dhe jashtë vendit për të kërkuar shërbim, pasi institucionet publike shëndetësore nuk po u ofrojnë trajtim.

Kryetari i PRAK-ut, Besim Kodra thotë se shteti i Kosovës e ka obligim t’u garantojë shërbime shëndetësore qytetarëve të saj.

Kodra thotë se lista e pacientëve që presin për të marrë mbështetje nga shteti për t’u trajtuar jashtë vendit është shumë e gjatë.

“Lista e pritjes është shumë e gjatë, aty përveç rasteve që janë urgjente, madje edhe rastet tash kanë vështirësi për shkak se shteti turk nuk po i pranon më ato fletëzotime, rastet e tjera që janë selektive, shkojnë kohë shumë të gjatë për shkak se Fondi është i zhytur në borxhe dhe nuk mund të vazhdoj të hyj në borxh edhe më tutje pacientëve… Në kushte normale Fondet e Sigurimeve Shëndetësore bëjnë marrëveshje me institucionet spitalore për shkak se ajo marrëveshje garanton çmim më të ulët dhe siguri për pacientët, qytetarët tanë nuk kanë siguri gjatë trajtimit në spitalet tjera për shkak se shteti nuk ka asnjë lloj kompetence të mbikëqyrë trajtimin e tij, përveç se e paguan atë pjesën e parave që do ta paguaj asnjë lloj kompetence nuk e ka”, theksoi ai.

Deputeti i Lidhjes Demokratike të Kosovës, Armend Zemaj theksoi se programi për trajtime mjekësore jashtë institucioneve publike, ka probleme enorme.

Sipas tij, ka një tendencë për t’u mbuluar dështimet që po ndodhin në këtë institucion.

“Problemet që janë aty tash, janë më tepër janë enorme, por tendenca për t’i fshehur dhe mbuluar problemet dhe dështimet është më e rrezikshme sesa për t’u marrë me zgjidhjen e këtyre problemeve, asnjë hallkë llogaridhënëse nuk i përgjigjet njëra-tjetrës dhe kjo është ajo që po e shohim dhe fatkeqësisht po e vuajnë pacientët dhe qytetarët e Kosovës. Edhe në Fond edhe në ShSKUK, brenda MSh por edhe në agjencitë tjera që do të duheshin të konsideroheshin të pavarura në zinxhirin e sektorit të shëndetësisë”, u shpreh ai.

Në vitin 2021, mbi 1 mijë e 100 pacientë të Kosovës, kërkuan mbështetje financiare nga shteti për të marrë shërbim shëndetësor jashtë institucioneve publike, kryesisht drejt atyre jashtë vendit. Po këtë vit përsëri spitalet turke ishin hapësirat ku pacientët kosovarë kërkuan trajtim.

Lajmet

Diskutimi në UBT mbi rëndësinë e Sigurisë në Komunikacion  

Publikuar

nga

Më 23 maj 2024, Fakulteti i Inxhinierisë së Ndërtimit dhe Infrastrukturës në UBT organizoi një debat për sigurinë në komunikacion. Ky diskutim u zhvillua në bibliotekën e kampusit të UBT-së, si pjesë e Javës së Sigurisë në Komunikacion.

Debati ofroi një platformë për të diskutuar aspekte të ndryshme të sigurisë në komunikacion, duke përfshirë infrastrukturën, aspektet ligjore dhe rregullat e policisë së Kosovës. Pjesëmarrësit u informuan dhe patën mundësinë të debatojnë mbi këto tema të rëndësishme.

Në këtë aktivitete morën pjesë përfaqësues nga institucionet kryesore, përfshirë Ministrinë e Planifikimit Hapësinor dhe Infrastrukturës. Diskutimet u përqendruan në rolin dhe rëndësinë e infrastrukturës për sigurinë në komunikacion, si dhe në sfidat dhe strategjitë për përmirësimin e saj.

Debati u hap nga Dekani i Fakultetit Inxhinierisë së Ndërtimit në UBT, Visar Krelani, i cili falënderoi të pranishmit për prezencën dhe theksoi nevojën e zhvillimit të diskutimeve të tilla në nivele akademike.

Togeri Nazim Zogaj, përfaqësues nga Policia e Kosovës ndau pikëpamjet dhe rekomandimet e tyre për sigurinë në komunikacion. Sipas togerit të Policisë së Kosovës, Nazim Zogaj, disa nga shkaktarët më të shpeshtë të aksidenteve rrugore në vitin 2023 ishin mosmbajtja e distancës së sigurisë mes automjeteve, manipulimi i pasigurt me automjet, mos përshtatja e shpejtësisë ndaj kushteve të rrugës, mos respektimi i përparësisë së kalimit, kyçje e pasigurt në rrugë, radhitje e parregullt apo ndërrim i shiritave, kthim, rrotullim dhe lëvizje prapa.

Togeri Zogaj raportoi se ka pasur një rritje të numrit të kundërvajtjeve të cilat kanë rezultuar me pikë negative. Në vitin 2018, ishin regjistruar 18 mijë kundërvajtës, ndërsa në vitin 2023 ky numër ka arritur në 28 mijë. Kjo rritje tregon për një trend negativ, por Zogaj shprehu shpresën se statistikat do të përmirësohen me ndryshime të mundshme ligjore gjatë këtij viti.

“Gjithashtu, numri i personave të cilëve u është ndaluar drejtimi i mjetit motorik është rritur nga mbi 6 mijë në vitin 2018 në mbi 9 mijë në vitin 2023. Po ashtu, është vërejtur një rritje e madhe në kundërshtimet ndaj kundërvajtjeve, nga 1791 ankesa në vitin 2018 në 5556 ankesa në vitin 2023”, tha Zogaj.

Zogaj gjithashtu pasqyroi të dhënat krahasuese të numrit të patentë shoferëve dhe mjeteve motorike me aksidentet fatale dhe personat e vdekur nga viti 2011 deri në 2023. Në vitin 2011, numri i patentë shoferëve të lëshuar nga MPB-ja ishte 475,902, ndërsa deri në vitin 2023 ky numër është rritur në 879,555, një rritje prej 403,653 ose 85%.

“Numri i mjeteve motorike në qarkullim është rritur nga 189,943 në vitin 2011 në 459,108 në vitin 2023, një rritje prej 269,165 ose 142%. Krahasimi i aksidenteve fatale me numrin e patentë shoferëve të lëshuar tregon një rënie për 34 aksidente fatale ose 26%, dhe numri i personave të vdekur ka rënë për 51 persona ose 33%”, theksoi togeri Zogaj.

Nol Dedaj, ekspert i komunikacionit dhe profesor në UBT, ka deklaruar se çdo vit në aksidente rrugore humbin jetën rreth 1.300.000 persona, ndërsa rreth 50.000.000 persona pësojnë lëndime trupore. Sipas tij, parashikimet tregojnë se deri në vitin 2030, aksidentet rrugore mund të bëhen shkaku i pestë kryesor i vdekjeve në botë, me rreth 2.400.000 viktima nëse trendi aktual vazhdon.

“Në vitin 2020, Asambleja e Përgjithshme e Kombeve të Bashkuara miratoi një program dhjetëvjeçar, mbështetur nga 100 shtete, me qëllim të stabilizimit dhe uljes së numrit të viktimave nga aksidentet rrugore. Ky program synon një reduktim prej 50% të viktimave deri në vitin 2030. Nëse arrihet ky objektiv, do të parandalohen rreth 5 milionë viktima dhe 50 milionë lëndime trupore, duke kursyer gjithashtu rreth 30 miliardë dollarë nga buxhetet e shteteve”, u shpreh Dedaj.

Visar Baxhuku, profesor në UBT, ka theksuar se kundërvajtjet që rezultojnë në pagesa gjobash kanë përfunduar si proces. Sipas tij, numri i kundërvajtjeve është rritur në mënyrë represive, duke shënuar një rritje prej 21.5% në Ballkan, ku nga 219 gjoba për çdo 1000 banorë në vit, krahasuar me 94 gjoba për çdo 1000 banorë në shtetet evropiane, që është një numër shumë i lartë dhe ka kosto financiare të konsiderueshme. Ai sugjeron që për të ulur aksidentet, masat preventive duhet të zëvendësohen me masa të tjera./UBTNews/

Vazhdo të lexosh

Lajmet

Krasniqi letër Kurtit, Abdixhikut e Haradinajt, i fton për shpërndarje të Kuvendit më së largu deri më 29 maj

Publikuar

nga

Kryetari i PDK-së, Memli Krasniqi, ka bërë të ditur se u ka dërguar letër kryetarit të VV-së dhe kryeministrit Albin Kurti, atij të LDK-së, Lumir Abdixhiku dhe kreut të AAK-së, Ramush Haradinaj, në të cilën tha se e ka ritheksuar qëndrimin e PDK-së për nevojën e mbajtjes së zgjedhjeve të parakohshme.

Krasniqi tha se në takimin e fundit që e ka zhvilluar me secilin lider të tri partive parlamentare, ka shprehur qëndrimin se zgjedhjet sot janë domosdoshmëri qytetare dhe jo dëshirë politike, teksa shtoi se tani është koha që të veprojnë të koordinuar dhe me hapa konkretë.

“Partia Demokratike e Kosovës ka propozuar datat 30 qershor ose 7 korrik për mbajtjen e zgjedhjeve të parakohshme dhe për shkak të afateve ligjore dhe kushtetuese, për të arritur njërën nga këto data, mocioni procedural për shpërndarjen e Kuvendit të Kosovës, do të duhej të votohej më së largu deri më 29 maj. Andaj, edhe sot, unë i ftoj të gjitha partitë parlamentare që të koordinohemi e të bashkëpunojmë për të mirën e qytetarëve tanë”, shkroi Krasniqi.

Më tej, Krasniqi tha se qytetarët e vendit kanë nevojë për qeveri të re, që sipas tij, fokusohet në zhvillim ekonomik, mirëqenie qytetare dhe integrim euro-atlantik.

“Zgjedhjet e reja janë thelbësore për të krijuar një Kuvend funksional që është në shërbim të interesit qytetar”, tha ai.

Vazhdo të lexosh

Lajmet

Për herë të parë, Policia e Kosovës merr letër urimi nga Departamenti Amerikan i Drejtësisë

Publikuar

nga

Policia e Kosovës ka marrë letër urimi për herë të parë nga Departamenti Amerikan i Drejtësisë (DOY), me rastin e diplomimit të gjeneratës së fundit të kadetëve të PK-së.

Gregory Ducot, në emër të DOY-së, ia ka dërguar këtë letër urimi drejtorit të Përgjithshëm të Policisë së Kosovës, Gazmend Hoxha.

Në letrën e tij, drejtori Ducot ka thënë se është shumë krenar që ndjek Policinë e Kosovës, e cila, sipas tij, vazhdimisht po përparon dhe po rritet, duke zbatuar vlerat më të larta demokratike dhe praktikat më të mira të forcave të rendit.

“Ndër të tjera, një falënderim iu drejtua Policisë së Kosovës për nderimin e oficerëve të rënë të Shteteve të Bashkuara të Amerikës, me bartjen e shiritit përkujtimor gjatë javës në shënim të Ditën Memoriale Oficeri i Paqes dhe Javën e Oficerit të Policisë, 12-18 maj 2024. Drejtori Ducot tha se vlerëson partneritetin e vendosur dhe të palëkundur me Policinë e Kosovës”, thuhet në njoftimin e Policisë së Kosovës.

Në përgjigje e tij, drejtori i Përgjithshëm i policisë, Gazmend Hoxha, ka thënë se e ka pranuar me kënaqësi këtë letër, duke theksuar se partneriteti me ShBA-të do të jetë i padiskutueshëm dhe do të vazhdojë të rritet edhe më tej.

Vazhdo të lexosh

Lajmet

​Kusari-Lila kundër PDK-së: Shpërndarja e Kuvendit paksa e paimagjinueshme

Publikuar

nga

Shefja e Grupit Parlamentar të Lëvizjes Vetëvendosje, Mimoza Kusari-Lila, ka dalë kundër kërkesës së PDK-së për shpërndarjen e Kuvendit dhe shkuarjen në zgjedhje të reja, duke thënë se një gjë e tillë është “paksa e paimagjinueshme”.

Ajo ka arsyetuar dështimin e sotëm të seancës plenare, e cila sipas saj ndodhi, me kërkesë të vetë iniciuesit Aleancës për Ardhmërinë e Kosovës për një datë tjetër.

“Shpeshherë ka akuza ose kundër akuza se nuk po ka ballafaqim të drejtpërdrejtë në fusha të caktuara qofshin ato ekonomi, drejtësi, siguri e kështu me radhë. Sot të gjithë ministrat e dikastereve kryesorë, përfshirë kryeministrin ishin prezentë, por ishte kërkesë e Grupit Parlamentar të AAK-së, ftuesit e kësaj seance që kjo të shtyhet për një datë tjetër… Më 22 mars është përvjetori i qeverisjes, por ne i kemi pasur seancat të Kuvendit, gjithashtu kemi pasur edhe mbledhje të Kryesisë, ju e dini se edhe Kuvendi ka kaluar në një proces me sfida të ndryshme, të cilat fatmirësisht u tejkaluan. E dini se këtë javë dhe javën e kaluar ka pasur seanca të suksesshme edhe në miratim të marrëveshjeve ndërkombëtare, por gjithashtu edhe të projektligjeve dhe besoj që me të njëjtën dinamikë Kuvendi do të vazhdojë deri në përmbyllje të sesionit pranveror”, deklaroi Kusari.

Të paimagjinueshme e konsideroi shpërndarjen e Kuvendit, teksa Kusari-Lila përmendi numrin e deputetëve pjesëmarrës për debatin e sotëm parlamentar., duke thënë se pozita është e gatshme të vazhdojë mandatin deri në fund.

“Është paksa e paimagjinueshme të pritet shpërndarja e Kuvendit ku për debat të tri vjet qeverisje ka aq pak deputetë në sallë e lëre më të mendohet për një situatë, e cila do të nënkuptonte përfundimin e punës së legjislaturës së tetë, përderisa nuk janë kryer të gjitha pikat, ka shumë pak pika të pa trajtuara, por gjithashtu jemi në dinamikën dhe ritmin e mirë të përmbushjes së agjendës legjislative. Gjatë ditëve të ardhshme do të ketë edhe projektligje në lexim të dytë por edhe marrëveshje ndërkombëtare, që në ndërkohë miratohen ose nënshkruhen nga ministrat, miratohen nga qeveria dhe i sillen Kuvendit. Në aspektin legjislativ, pozita është e gatshme të vazhdojë mandatin deri në fund dhe për të përmbushur agjendën legjislative më shumë se çdo legjislaturë deri më tani”, theksoi ajo.

E pyetur se a ka marrëveshje mes Vetëvendosjes dhe PDK -së për shpërndarjen e Kuvendit, Kusari-Lila ka mohuar një gjë të tillë.

“Deri më tani, këto janë vetëm fjalë. Nuk ka marrëveshje mes Vetëvendosjes dhe PDK-së. Ka vetëm atë që kemi thënë publikisht. Marrëveshje nëse janë të gjitha partitë nga opozita, përfshirë LDK-në dhe AAK-në, për shpërndarjen e Kuvendit, atëherë do të ndodhë, nëse nuk janë atëherë jo, atëherë do të shkojmë deri në fund kështu”, ka thënë ajo.

Kusari-Lila shtoi se numri i projektligjeve të miratuara, përfshirë edhe ato ndërkombëtare, është gjithsej 244.

Vazhdo të lexosh

Të kërkuara