Kosova dhe Belgjika shënuan një hap të ri bashkëpunimi dypalësh pasi shteti belg vendosi të njoh zyrtarisht atasheun e Mbrojtjes së Republikës së Kosovës atje.

Sipas Ministrisë së Mbrojtjes së Kosovës, në këtë mënyrë fuqizohet përfaqësimi ushtarak dhe marrëdhëniet institucionale ndërmjet dy vendeve.

Lidhur me këtë, ministri në detyrë i Mbrojtjes, Ejup Maqedonci dhe ministri i Mbrojtjes i Belgjikës, Theo Francken, mbajtën një konferencë të përbashkët për media në Prishtinë.

Maqedonci u shpreh mirënjohës për mbështetjen belge që nga viti 2008, duke e cilësuar këtë vendim si një hap domethënës në rrugën e Kosovës drejt integrimit euroatlantik.

“Falënderoj nga zemra ministrin belg të mbrojtjes, mikun tim Theo dhe mikun e Kosovës i cili për një kohë të gjatë ka kontribuar dhe mbështetur kauzën e Kosovës në të gjitha instancat, ku ka pasur mundësi që të avokojë për çështjen e vendit tonë. Faleminderit për këtë lajm të jashtëzakonshëm për vendin tonë, këtë lajm me peshë të madhe që Belgjika, kryeqyteti i dy destinacioneve të vendit tonë, NATO-s dhe Bashkimit Evropian, po njeh pra praninë e atasheut të mbrojtjes së Republikës së Kosovës pikërisht në Bruksel, gjë që na jep mundësinë për të thelluar bashkëpunimin me Belgjikën si një vend i yni partner”, tha Maqedonci.

Ministri Francken theksoi se lidhja me Kosovën është historike dhe strategjike, duke e quajtur njohjen e atasheut si një “hap logjik” për përforcimin e partneritetit në siguri.

“Unë kam qenë këtu për here të parë në vitin 2009, pra para 16 vitesh, isha këtu, isha ministër i emigracionit në Belgjikë për ca vite, para 10 vitesh prandaj jam i lumtur që jam këtu me funksion të ri, funksionin e ministrit të mbrojtjes dhe tregtisë së jashtme dhe jam këtu për të zhvilluar një takim fantastik bilateral me kolegun tim. Dje në mbrëmje dhe sot në mëngjes u takuam, vizituam trupat tonë të KFOR-it sepse ata janë të rëndësishëm për sigurinë e shtetit dhe për stabilitet në Ballkan dhe unë mendoj se për ne është shumë e rëndësishme të kemi këtë mision së bashku me tre shtetet e Beneluksit. Ne kemi pilot dronësh që punojnë këtu dhe është hera e parë brenda 10 vitesh që kemi shumë njerëz në territorin tuaj për të mbrojtur Kosovën. Pra unë jam dikush që gjithmonë ka qenë shumë mbështetës ndaj rastit të Kosovës. Belgjika është një nga vendet e para që ka njohur pavarësinë e shtetit tuaj dhe është shumë i rëndësishëm për ne. Dhe është në atë sferë, në atë shpirt që ne duam të lajmërojmë sot zyrtarisht se atasheu ushtarak do të pozicionohet në Bruksel”, tha ai.

Ministri belg u pyet edhe rreth zhvillimeve në veri të Kosovës, që lidhen me sulmet terroriste që Serbia.

“Unë nuk jam ministër i Punëve të Jashtme, unë kam trupa nga Belgjika të stacionuar në Kosovë në kuadër të KFOR-it dhe pilotë dronësh profesionistë, unë nuk kam komandë sepse nuk jam ministër i Punëve të Jashtme por ajo që mund të them është se qeveria e re belge anon nga Kosova, për t’i mbajtur qytetarët e Kosovës të sigurt dhe për të thënë se Kosova është Evropë”, tha ai.

Deputeti i Lëvizjes Vetëvendosje, Nezir Kraki e ka quajtur “spektakël të zbehtë dhe qesharak”, vendimin e deputetëve të partive tjera politike për të qëndruar në sallë plenare pas ndërprerjes së seancës.

Ai tha se është për keqardhje që edhe pas vendimit të Gjykatës Kushtetuese ka interpretime të ndryshme.

“Po konfirmohet keq-leximi dhe keq-interpretimi i aktgjykimit të fundit të Gjykatës Kushtetuese. Sjellja nuk ka ndryshuar përkundër ndryshimit që ne e kemi bërë në anën tonë dhe lëshimit, gatishmërisë që të lëshojmë pe me dy mundësi ose të shkojmë te votimi i komisionit dhe ta refuzojmë komisionin dhe ta rrëzojmë dhe pastaj të kalojmë në pako me zonjën Haxhiu së bashku me kryetarët e Kuvendit ose të votohet në mënyrë të fshehtë sepse sipas neve Gjykata Kushtetuese veç e ka konfirmuar atë. Dhe krejt ata që u bënë ekspertë të drejtës kushtetuese duhet ta dinë që kur një gjë thuhet në një vendim të formës së prerë nuk mund ta interpretosh në disa forma”, deklaroi Kraki.

Pas ndërprerjes së seancës konstituive nga kryesuesi Avni Dehari i LVV-së, partitë e tjera kanë qëndruar në sallën plenare.

Deputeti i LVV-së e konsideroi si “spektakël të zbehtë dhe qesharak”.

“Ani shumë mirë, ne kemi javë që i bëjmë thirrje deputetëve të PDK-së, LDK-së dhe gjithëve aty që të mos vijnë në sallë për badihava. Dhe ata kanë gati tre muaj tash që vijnë veç hajt dhe kjo ardhja në sallë veç hajt sa për spektakël kanë nisur me i dalë boja edhe kësaj ardhje tash qëndrimi në sallë nuk ka asnjë simbolik aty, është vetëm spektakël i zbehtë i cili nuk thotë asgjë. Po të kishin ata vullnet që të bëjnë kuvendin dhe të ja mundësojnë Kosovës që të ketë institucione do e çonin dorën për, kundër. Këto spektakle janë sa të zbehta aq edhe qesharake”, shtoi ai.

Ministria e Punëve të Jashtme dhe Evropiane e Kroacisë (MVEP) u ka rekomanduar shtetasve të saj që t’i shtyjnë të gjitha udhëtimet jo të domosdoshme drejt Serbisë.

Në një njoftim të publikuar sot, Ministria u ka bërë thirrje qytetarëve kroatë për “kujdes të shtuar, ndjekje të situatës aktuale dhe informim më të detajuar para udhëtimit, sidomos në dritën e sjelljeve të papërshtatshme dhe të pabazuara nga ana e autoriteteve të Republikës së Serbisë ndaj shtetasve kroatë”.

“Duke marrë parasysh që shpesh ndodhin bllokime të rastësishme të rrugëve si pasojë e protestave qytetare, është e rëndësishme të kihet parasysh se është e pamundur të parashikohet gjendja në komunikacion dhe vështirësitë eventuale që mund të ndikojnë ndjeshëm në qarkullimin në të gjithë vendin. Qytetarëve kroatë u rekomandohet veçanërisht t’i shmangin vendet ku grumbullohet numër i madh njerëzish”, thuhet në njoftimin e MVEP-it.

Në çdo moment, në rast të ndonjë situate të jashtëzakonshme apo urgjence jashtë orarit zyrtar, shtetasit kroatë kanë të drejtë të kontaktojnë Ambasadën e Republikës së Kroacisë në Republikën e Serbisë përmes numrit emergjent të telefonit: 0038163485757.

“Vendimi për të udhëtuar jashtë vendit është përgjegjësi personale e secilit individ. Rekomandimet dhe paralajmërimet për udhëtimet jashtë vendit, të publikuara në faqen zyrtare të Ministrisë së Punëve të Jashtme dhe Evropiane të Republikës së Kroacisë, janë të natyrës këshilluese”, thuhet në njoftim.

Në Serbi, ditëve të fundit janë organizuar bllokada rrugësh si përgjigje ndaj thirrjes së studentëve për “mosbindje civile”, pas protestës së madhe të mbajtur më 28 qershor, në të cilën u kërkua shpallja e zgjedhjeve të parakohshme.

Policia ndërhyri duke larguar bllokadat dhe arrestuar pjesëmarrësit, pas së cilës gjë partitë opozitare dhe studentët akuzuan autoritetet për përdorim “brutal” të forcës.

Para përshkallëzimit të tensioneve në Serbi, autoritetet kishin dëbuar artistë dhe qytetarë nga vendet fqinje që kishin shprehur mbështetje për protestat në Serbi./REL

Ministria e Shëndetësisë ka rekomanduar që institucionet publike dhe private të zbatojnë masa mbrojtëse për mbrojtjen e punëtorëve nga temperaturat e larta, për periudhën 3 deri më 10 korrik.

“Temperaturat e larta ndikojnë negativisht në shëndetin e njeriut, veçanërisht tek grupet më të ndjeshme të shoqërisë, si: fëmijët, të moshuarit, gratë shtatzëna, personat me sëmundje kronike, si dhe punëtorët që punojnë në ambiente të hapura apo në kushte pune me temperatura të larta”, thuhet në njoftimin e Ministrisë së Shëndetësisë, bazuar në rekomandimet e Institutit Kombëtar të Shëndetësisë Publike.

Rekomandimet:

1.1 Të përshtatin oraret e punës për të punësuarit e tyre dhe sipas mundësive të aplikohet orar fleksibël të punës që nënkupton lejimin e punëtorëve që të fillojnë punën më herët në mëngjes ose të punojnë nga shtëpia nëse ka mundësi;

1.2 Shtatzënat të lirohen nga puna gjatë orëve të pikut të nxehtësisë, ose të punojnë nga shtëpia;

1.3 Personat më sëmundje kronike dhe me gjendje shëndetësore të rënduar, të lejohen të punojnë nga shtëpia;

1.4 Të sigurohet ajrosja e mjaftueshme në vendet e punës të mbyllura;

1.5 Të vendosen pika freskimi (përdorim i çadrave të lëvizshme dhe materialeve të tjera për të krijuar hije apo zona freskimi) në vend-punishtet e hapura për freskim të punëtorëve dhe të sigurohet qasje në ujë të ftohtë për punëtorët;

1.6 Të shpërndahen informacione përmes burimeve të informimit për qytetarët për mënyrat e mbrojtjes nga nxehtësia;

1.7 Ata që merren me punët në bujqësi, të planifikojnë zhvillimin e punëve të tyre në mëngjes herët ose pasdite vonë për të shmangur ekspozimin në nxehtësinë e madhe.

1.8 Institucionet private po ashtu këshillohen që të marrin në konsideratë këto rekomandime nga IKSHPK

Ministria gjithashtu rekomandon masat mbrojtëse ndaj ekspozimeve në temperaturat e larta për qytetarët.

5.1. Të shmanget qëndrimi në ambientin e jashtëm në pikun e nxehtësisë;

5.2 Të konsumohet ujë për tu mbrojtur nga dehidrimi dhe të shmangen pijet e gazuara;

5.3 Të përdoren kapelë dhe syze mbrojtëse nga dielli kur qëndrohet jashtë;

5.4 Mos të lihen fëmijët vetëm në veturë deri sa prindërit/kujdestarët kryejnë ndonjë punë;

5.5 Të kontaktohen rregullisht të afërmit e moshuar ose me sëmundje kronike për të konfirmuar nevojat shëndetësore të tyre;

6. Vendimi hyn në fuqi fillon të zbatohet prej 3 deri në 10 korrik 2025;