Premier League konsiderohet si liga më e fortë dhe më konkurruese në futbollin botëror aktualisht. Duke pasur parasysh presionin e menaxherëve për rezultate më të mira, nganjëherë mundësitë për lojtarët e rinj janë të kufizuara, por në anën tjetër ka një numër talentësh të cilët dita-ditës po zhvillohen mjaft shumë.

Në njoftimin e fundit të ‘Transfermarkt’, vlera e Premier League u rrit për 10.30 milionë euro, kështu duke e bërë kampionatin anglez më të shtrenjtin në botë momentalisht me një vlerë prej 11.15 miliardë eurosh në treg.

Por cilët janë dhjetë lojtarët më të vlefshëm nën moshën 21-vjeçare në Premier League?

1. Jérémy Doku – Manchester City – 21 vjeç – 65 milionë euro:

Jérémy Doku u përshtat me stilin e lojës së Pep Guardiolas, duke fituar minuta direkt në krahun e majtë të sulmit te Manchester City, shpeshherë edhe para Jack Grealish. Ai madje barazoi një rekord në Premier League, duke regjistruar katër asistime në një ndeshje (6-1 kundër Bournemouth). Performanca e tij ka rënë paksa që nga fillimi i vitit, por kujtojmë që ai është në moshën 21-vjeçare dhe gjithmonë ka hapësirë për përmirësim në të ardhmen.

2. Rasmus Højlund – Manchester United – 21 vjeç – 65 milionë euro:

Sulmuesi danez nuk arriti të shënonte në 11 ndeshjet e para të Premier League në vitin 2023, por forma e tij hasi ngritje në vitin 2024. Goli i tij i parë në kampionat erdhi pikërisht në fund të dhjetorit kundër Aston Villa-s, para se një dëmtim të pengonte rritjen dhe zhvillimin e tij. Højlund shënoi shtatë gola në gjashtë ndeshje kështu duke e mbyllur fuqishëm sezonin me ‘djajtë e kuq’ duke triumfuar në finalen e ‘FA Cup’ ndaj Manchester Cityt.

3. Kobbie Mainoo – Manchester United – 19 vjeç – 50 milionë euro:

Në një sezon mjaft të dobët për Man United, padyshim një nga gjërat pozitive ishte sezoni i jashtëzakonshëm i mesfushorit të talentuar, Kobbie Mainoo. 19-vjeçari shënoi disa gola të rëndësishme gjatë këtij edicioni si dhe u ftua në skuadrën provizore të Anglisë për EURO 2024.

4. Evan Ferguson – Brighton – 19 vjeç – 50 milionë euro:

Evan Ferguson doli në skenë sezonin e kaluar dhe shënoi gjashtë gola në Premier League në sezonin e tij debutues për Brighton. Në fillim të këtij sezoni, ai pati ngritje si dhe shënoi gjashtë gola në 11 paraqitje. Talenti irlandez ka tërhequr vëmendjen e shumë nga klubeve kryesore të Evropës. Megjithatë mungesa e minutazhës ka pësuar një rënie prej 10 milionë euro në tregun e transferimeve.

5. Levi Colwill – Chelsea – 21 vjeç – 50 milionë euro:

Pavarësisht një sezoni tjetër të dobët për Chelsean, ku ‘Blutë’ përfunduan në vendin e gjashtë në Premier League duke pranuar 63 gola, Levi Colwill ka pasur një sezon pozitiv në aspektin profesional. Pas huazimit te Brighton, ai arriti të siguronte minuta në mbrojtjen e Chelseat ku bëri 23 paraqitje në ligë për Blues këtë sezon, si dhe bëri debutimin e tij për Kombëtaren e Anglisë në muajin tetor ndaj Australisë.

6. Alejandro Garnacho – Manchester United – 19 vjeç – 45 milionë euro:

Kur Alejandro Garnacho shënoi golin e jashtëzakonshëm ndaj Evertonit në muajin nëntor, të gjithë te Manchesteri si dhe tifozët e futbolldashësit mbetën të habitur. Argjentinasi ashmë ka fituar çmimin e golit të muajit dhe është shpallur si një pretendent i fortë për golin e sezonit. Që atëherë, ai ka qenë një titullar i rregullt për skuadrën Ten Hag, dhe ka qenë një nga pikat e forta të Manchester Unitedit.

7. Destiny Udogie – Tottenham – 21 vjeç – 45 milionë euro:

Pas huazimit të tij te Fiorentina sezonin e kaluar, jo shumë prisnin që Udogie të kishte një ndikim kaq të madh në ekipin e parë të Tottenhamit këtë sezon. Megjithatë mbrojtësi italian kontribuoi me dy gola dhe tri asistime gjatë këtij sezoni. Vlera e 21-vjeçarit në tregun e transferimeve u rrit për 5 milionë euro në muajin mars, por pas dëmtimit të tij ndaj Newcastle në prill të këtij viti, ai e mbylli sezonin më herët sesa që pritej.

8. Jarrad Branthwaite – Everton – 21 vjeç – 42 milionë euro:

Evertoni e përfundoi sezonin 23/24 me mbrojtjen e katërt më të mirë në Premier League. Një nga meritorët për këtë statistikë ka qenë edhe Jarrad Branthwaite, i cili ka dhënë kontributin e tij në vijën e mbrojtjes. Ai është përfshirë në skuadrën provizore të Anglisë për EURO 2024 dhe shumë skuadra evropiane kanë shprehur interes për shërbimet e tij. Në njoftimin e fundit të ‘Transfermarkt’, shtatlarti anglez pati një rritje prej 12 milionë € në tregun e transferimeve.

9. Pape Matar Sarr – Tottenham – 21 vjeç – 40 milionë euro:

Një tjetër lojtar me cilësi të mira në skuadrën e Tottenhamit këtë sezon. Mesfushori i talentuar senegalez ka shënuar tri gola dhe tri asistime në Premier League këtë sezon, dhe vlera e tij në tregun e transferimeve u rrit për 5 milionë euro, sipas njoftimit të fundit.

10. Rico Lewis – Manchester City – 19 vjeç – 38 milionë euro:

Rico Lewis bëri debutimin e tij në kampionatin anglez në moshën 18-vjeçare në nëntor të vitit të kaluar kështu duke hasur në ngritje, falë pjesëmarrjes së vazhdueshme me ekipin e parë të Manchester Cityt. Lewis është futbollist i cili mund të mbulojë edhe pozitën e mesfushës përveç krahut të djtathtë të mbrojtjes. Ai është njëri ndër lojtarët e rinj më të vlerësuar në Evropë dhe shënoi një rritje prej 18 milionë € në përditësimin e vlerës së tij në treg në muajin dhjetor të vitit të kaluar./UBTNews/

Trajneri i Kombëtares shqiptare, Silvinjo, prezantoi listën e 27 lojtarëve për fazën përgatitore të “EURO 2024” në një konferencë për mediat. Fillimisht ai shprehu krenarinë e tij për të qenë trajner dhe falënderoi lojtarët për kontributin e tyre në kualifikueset e Europianit.

Zgjedhjet e trajnerit u bazuan në analizat dhe studimet e kujdesshme të cilat përfshinën karakteristikat dhe nevojat e lojtarëve, duke marrë parasysh edhe skenarin e mundshëm të finaljes së Kampionatit Europian. Trajneri Silvinjo theksoi përgjegjësinë e tij për zgjedhjen e ekipit dhe theksoi që qëllimi është përfaqësimi dinjitoz i kombit shqiptar në këtë turne prestigjioz. Lista e lojtarëve përmban futbollistë të pozicioneve të ndryshme dhe ka qenë rezultat i një përgatitjeje intensive për të përballuar sfidat që do të paraqiten në Europianin 2024, siç raporton FSHF.

 “Para së gjithash dua t’ju them se është një krenari për mua të jem trajner i Kombëtares në finalet e Kampionatit Europian 2024. Është shumë e rëndësishme për mua dhe për stafin të them disa fjalë. Dua të falënderoj të gjithë djemtë që deri këtu kanë bërë një rrugëtim me të gjithë ne. Respekt maksimal për të gjitha ata. Zgjedhjet tona janë të bazuar në studime, analize, karakteristikat individuale dhe kolektive të çdo lojtari, si edhe të skenarit që do të kemi në finalet e Europianit. Është përgjegjësi e trajnerit të zgjedhë lojtarët, për fat të keq unë nuk mund t’i marr me vete të gjithë. Kërkova të bëj më të mirën dhe i kam dedikuar të gjitha përpjekjet e mia për të bërë më të irën për këtë skuadër. Ne shkojmë në Gjermani për të luajtur për 3 milionë shqiptarë të cilët jetojnë këtu dhe më shumë se 10 milionë të cilët jetojnë jashtë kufijve të Shqipërisë” – tha fillimisht trajneri Silvinjo dhe raporton Federata Shqiptare e Futbollit.

Më pas tekniku i Kombëtares komentoi listën paraprake me 27 lojtarë të grumbulluar në kuadër të përgatitjeve për finalet e “EURO 2024”. Zgjidhjet e trajnerit Silvinjo: Portierë: Etrit Berisha, Thomas Strakosha, Elhan Kastrati, Simon Simoni; Mbrojtës: Berat Gjimshiti, , Ivan Balliu, Ardian Ismajli, Arlind Ajeti, Naser Aliji, Mario Mitaj, Enea Mihaj, Marash Kumbulla;  Mesfushorë: Amir Abrashi, Kristjan Asllani, Nedim Bajrami, Medon Berisha, Klaus Gjasula, Qazim Laçi, Ernest Muçi, Ylber Ramadani; Sulmues: Jasir Asani, Armando Broja, Mirlind Daku, Arbër Hoxha, Rey Manaj dhe Taulant Seferi

Trajneri i Kombëtares shqiptare, Silvinjo, u përgjigj pyetjes për shkakun e kufizimit të listës së lojtarëve për Kampionatin Europian 2024, duke shpjeguar se zgjedhjet e tyre ishin të bazuara në analiza të thelluara dhe në karakteristikat e nevojshme për të përballuar sfidat e një turneu të tillë. Ai vlerësoi kontributin e lojtarëve dhe theksoi se zgjedhjet ishin të bazuara në kontekstin specifik të këtij turneu, ku ekipi do të duhet të përballet me një rreziqësi të ndryshme dhe për të cilën është e rëndësishme të kesh një grup të përshtatur mirë.

Në lidhje me mungesën e disa lojtarëve të rëndësishëm si Cikalleshi dhe Uzuni, trajneri nënvizoi se kanë përqendruar përpjekjet e tyre në përshtatjen e ekipit për të përballuar një grup të vështirë dhe për të siguruar një harmoni në fushën e lojës. Ai gjithashtu shprehu besimin e tij te grupi aktual prej 27 lojtarësh dhe theksoi nevojën për të fokusuar në sfidat që presin përpara. Silvinjo gjithashtu komentoi mungesat në sulm dhe vlerësoi lojtarët që janë përfshirë në listë, si Amir Abrashi dhe Medon Berisha, duke iu referuar eksperiencës së tyre dhe kontributit të mundshëm në fushën e lojës. Ai nënvizoi se lojtarët janë të ndërgjegjshëm për situatën dhe janë të gatshëm për sfidën para tyre.

Në lidhje me pyetjen e futbollistit të ri Armando Broja, trajneri shpjegoi se për ta, fakti se një lojtar luan ose nuk luan shumë me klubin nuk është kriteri kryesor për zgjedhjen. Ai po ashtu theksoi vlerën e përshtatshmërisë fizike dhe psikologjike të lojtarëve në këtë fazë të rëndësishme.

Në fund, Silvinjo bëri thirrje për një qëndrim të qetë dhe të fokusuar në përballjen e sfidave përpara dhe në këtë turne, duke theksuar se qëllimi është të përfaqësojnë me dinjitet kombin shqiptar dhe të japin maksimumin për të arritur rezultate të mira. Ai përfundoi duke përmendur se presioni i turneut është i pranishëm, por ata duhet të fokusohen tek objektivi i tyre për të përfaqësuar vendin me nder dhe profesionalizëm./UBTNews/

D.E.

Mauricio Pochettino tani edhe zyrtarisht do të ndajë rrugët me Chelsea-n. Drejtuesit e klubit dhe vetë trajneri argjentinas patën një takim para disa ditësh, ku të dy palët ranë dakord për të ndërprerë marrëveshjen e cila ishte planifikuar të zgjaste së paku deri në verën e vitit 2025, me mundësi vazhdimi edhe për një vit.

Një gjë të tillë për largimin e teknikut 52-vjeçar e ka konfirmuar edhe vetë skuadra e Chelseat, duke shprehur mirënjohje për punën dhe angazhimin e tij sa ishte në krye të detyrës.

“Në emër të të gjithëve te Chelsea, dëshirojmë të shprehim mirënjohjen tonë për Mauricion dhe punën e tij këtë sezon. Ai do të jetë i mirëpritur të kthehet në Stamford Bridge në çdo kohë dhe ne i urojmë të gjitha më të mirat në karrierën e tij si trajner”, thuhet në deklaratën e klubit.

Pochettino mori drejtimin e skuadrës londineze verën e kaluar dhe krahas një fillimi zhgënjyes, Chelsea përfundoi në vendin e gjashtë të tabelës në Premier League.

Një gjë e cila vlen të ceket është se nga xhiro e 24-të në Premier League, ku Chelsea përballej me Crystal Palace, ata ka humbur vetëm një nga 15 ndeshjet e luajtura (ndaj Arsenalit me rezultat 5-0). Por kjo nuk mjaftoi për drejtuesit e klubit dhe tani Pochettino bëhet trajneri i gjashtë në pesë vitet e fundit që shkarkohet nga “blutë”.

Por kush do të jetë trajneri i ardhshëm i Chelseat?

Sipas mediave angleze bëhet e ditur se kandidatët e mundshëm për të zëvendësuar Pochettino-n te Chelsea janë Sebastian Hoeneß (VfB Stuttgart), Michel (Girona), Kieran McKenna (Ipswich Town), i cili gjithashtu është i lidhur me Brighton dhe Enzo Maresca (Leicester City), por deri në këto momente nuk ka asgjë konkrete./UBTNews/

Klubi Futbollistik “Llapi” ka njoftuar se ka vazhduar bashkëpunimin edhe për një vit me sulmuesin Ahmed Januzi.

Nënshkrimi i kontratës së re me Januzin vjen si rezultat i angazhimit maksimal të tij këtë sezon me ç’rast klubi e ka vlerësuar kontributin e tij të dhënë për skuadrën, për rezultatet e arritura dhe kualifikimin në Europa Ligë.

Edhe vetë Januzi ka qenë shumë i kënaqur me vazhdimin e bashkëpunimit, ku edhe është prononcuar për faqen zyrtare të klubit.

“Ndihem jashtëzakonisht i vlerësuar nga klubi pasi më ofroi kontratë të re, të cilën e pranova pa asnjë hezitim dhe jam shumë i kënaqur që do vazhdoj të jap kontributin tim për ekipin e Llapit. Këtu jemi si një familje dhe e mbështesim jashtëzakonisht shumë njëri-tjetrin, si stafi ashtu edhe futbollistët mes vete. Ndjej keqardhje që nuk e arritëm titullin kampion por tifozëve të zjarrtë “Ultras Legjendat” iu premtojmë angazhim maksimal për t’i gëzuar ata me suksese si në Evropë ashtu edhe në sezonin e ri të Superligës”, thuhet në njoftimin e faqes zyrtare të klubit.

Januzi është paraqitur gjithsej në 32 ndeshje këtë edicion ku edhe ka kontribuuar me dhjetë gola e katër asistime./UBTNews/