Policia e Kosovës ka bërë të ditur se ka arrestuar katër shtetas të Turiqsë në Fushë Kosovë.

Të njëjtit dyshohen për posedim dhe shitje të narkotikëve teksa gjatë bastisjes siç bën të ditur Policia ka sekuestuar 1,482 gramë substancë narkotike të llojit marihuanë.

“Janë arrestuar katër të dyshuar meshkuj shtetas të Turqisë, pasi që gjatë kontrollit të vendbanimeve të tyre janë gjetur dhe sekuestruar 1482 gram substancë narkotike e llojit marihuanë, 590€, 8 telefona mobil, një automjet (fugon), një laptop, si dhe disa gjësende të tjera që lidhen me rastin. Me vendim të prokurorit të dyshuarit janë dërguar në mbajtje”, thuhet në raportin 24-orësh të Policisë.

Ferizaj

Edhe në Ferizaj, dy persona janë arrestuar pasi që gjatë kontrollit të disa objekteve janë gjetur dhe sekuestruar 734.4 gram substancë narkotike e llojit kokainë.

Policia gjeti edhe 15.005 €, 3950 franga zvicerane, dy telefona mobil, dy vetura dhe disa gjësende tjera që lidhen me rastin. Me vendim të prokurorit të dyshuarit janë dërguar në mbajtje./S.K/PK/

Shqipëria është tronditur ditën e djeshme nga ngjarjet tragjike, ku u konfirmuan tre vrasje dhe një atentat i një shpërthimi me tritol. Ngjarjet ndodhën në qytetet Berat, Durrës, Shkodër dhe Tiranë ka njoftuar Policia e Shtetit.

Berat

Ngjarja tragjike në Berat ndodhi kur pas një konflikti shtetasi Kristo Mema Alias Kastriot Hoxha, 63 vjeç, banues në lagjen “Barrikadë”, Berat, ka goditur me mjet prerës shtetasin Keli Hoxha., 42 vjeç, i cili ka humbur jetën. Ngjarja ka ndodhur rreth orës 15:10, kur situata mes dy personave u përshkallëzua në dhunë fizike.

Sipas të dhënave paraprake, konflikti ka nisur për shkak të një kali që përdorej për shëtitje turistike në zonën e kalasë.

Policia e Beratit ka arrestuar autorin e vrasjes me iniciale K.M.

Durrës

Në qytetin e Durrësit, 25-vjeçari Marjan Kodheli u bë e ditur se vrau me thikë babanë e tij, Pjetër Kodheli, një 69-vjeçar i cili u gjet pa shenja jete në banesën e tij. Ngjarja ka ndodhur saktësisht në zonën e Kodrës së Kuajve, në fshatin Shkallnur të Durrësit.

Pas një ndjekjeje intensive që zgjati rreth dy orë, forcat e posaçme “Shqiponja” arritën ta arrestojnë në lagjen nr. 13 të Durrësit, në një lokal në bregdet te Shkëmbi i Kavajës, në pronësi të motrës së vet. Gjatë kontrollit, policia gjeti dhe sekuestroi thikën me të cilën dyshohet se është kryer krimi.

Shkodër

Ndërkaq, në Shkodër iu vu tritol 38-vjeçarit Enea Busukja, i cili sapo ndezi makinën, mjeti shpërtheu. Sipas policisë, si pasojë e shpërthimit ai mbeti i plagosur.

Tiranë

Në Tiranë, ngjarja e rëndë ndodhi në zonën e “Komunës së Parisit” në Tiranë duke marrë përmasa tragjike, kur 34-vjeçari Indrit Ismaillari, kamerier në lokalin në zonën e Komunës së Parisit, ka mbetur viktimë pasi është goditur me thikë nga Filip Shehu, i cili punonte si kuzhinier në këtë biznes, ku ishin kolegë në të njejtin biznes.

Autori u arrestua menjëherë nga forcat e policisë pas krimit./S.K/KP/TCH/

Agjencia për Informim dhe Privatësi (AIP) ka deklaruar se Policia e Kosovës ka bazë ligjore për të përdorur kamerat e sigurisë publike në shqiptimin e gjobave për kundërvajtje në trafik, ku sipas tyre, kjo praktikë nuk bie ndesh me Ligjin për Mbrojtjen e të Dhënave Personale, pasi është e paraparë në Ligjin për Rregullat e Trafikut Rrugor

AIP sqaroi se neni 75 i Ligjit për Mbrojtjen e të Dhënave Personale zbaton rregulla të përgjithshme për përdorimin e kamerave për qëllime të sigurisë publike, por lejon përjashtime në rastet kur ekziston një ligj specifik që autorizon përdorimin e tyre për funksione të tjera.

“Ligji specifik në këtë rast është Ligji Nr. 08/L-186 për Rregullat e Trafikut Rrugor, i cili në nenin 254 parasheh përdorimin e pajisjeve elektronike për identifikimin e kundërvajtjeve dhe shqiptimin e gjobave elektronike. Kjo dispozitë përcakton se, në rastet kur kundërvajtja konstatohet me pajisje elektronike, gjoba i dërgohet në adresë pronarit të mjetit, ndërsa parashikon edhe detyrimin e pronarit për të dhënë të dhënat e personit që e ka drejtuar automjetin në momentin e shkeljes. Në këtë kuptim, kamerat e trafikut përbëjnë pajisje elektronike, sepse përmes incizimeve të tyre identifikohet automjeti, koha dhe vendi i shkeljes, gjë që mundëson shqiptimin e gjobës në mënyrë të automatizuar dhe të dokumentuar”, thuhet në përgjigjen e AIP për Metro.

Tutje bëhet e ditur se neni 242 i Ligjit për Trafikun Rrugor parashikon se shpejtësia e lëvizjes së automjeteve mund të konstatohet përmes video-incizimeve, të cilat vlejnë si provë ligjore.

“Neni 242 i Ligjit Nr. 08/L-186 për Rregullat e Trafikut Rrugor parashikon se shpejtësia e lëvizjes së mjetit mund të konstatohet edhe me video incizime, me pajisje mobile ose statike, ndërsa vetë incizimi me të dhëna për shpejtësinë e konstatuar shërben si provë ligjore. Kjo dispozitë e forcon më tej kuptimin se video incizimet, pra kamerat, janë mjete të ligjshme që përdoren për evidentimin e kundërvajtjeve në trafik. Gjithashtu neni 254, paragrafi 1 i Ligjit Nr. 08/L-186 për Rregullat e Trafikut Rrugor përcakton se në rastet kur identifikimi i kundërvajtjes është bërë me pajisje elektronike, pala njoftohet përmes kontakteve të dhëna ndërsa gjoba i dërgohet në adresë pronarit të mjetit”, thuhet ndër të tjera në njoftim.

Ndërkaq, sipas AIP , Policia e Kosovës ka bazë ligjore për të përdorur kamerat e vendosura me qëllim të shqiptimit të gjobave kundërvajtëse dhe nuk bie në kundërshtim me dispozitat e Ligjit për Mbrojtjen e të Dhënave Personale”, ka theksuar Agjencia për Informim dhe Privatësi.

“Duke u mbështetur në këto dispozita, vlerësojmë se përdorimi i kamerave nga Policia e Kosovës për shqiptimin e gjobave elektronike është i bazuar në Ligjin Nr. 08/L-186 për Rregullat e Trafikut Rrugor dhe përbën përjashtim të lejuar me ligj nga rregullat e nenit 75 të Ligjit Nr. 06/L-082 për Mbrojtjen e të Dhënave Personale. Përpunimi i të dhënave personale në këtë rast zhvillohet për ushtrimin e një detyrimi ligjor që buron nga Ligji për Rregullat e Trafikut Rrugor, si dhe për ushtrimin e autoritetit zyrtar të përcaktuar në nenin 5 paragrafi 1.5 të LMDhP-së”, thuhet në përgjigje.

Ndëra gjatë javës së kaluar Rrjeti i Organizatave Joqeveritare AVONET kishte ngritur dyshime për kundërligjshmëri dhe cenim të privatësisë në përdorimin e kamerave të sigurisë publike për gjoba në trafik, duke theksuar se ato janë të destinuara për siguri publike dhe hetim penal, jo për ndëshkime administrative./S.K/AIP/PK/

Këshilli Prokurorial i Kosovës (KPK),ka pezulluar nga detyra prokurorin Beqë Shala, i cili u arrestuar dje në Prizren nën dyshimin për ryshfet.

“Këshilli Prokurorial i Kosovës (KPK), njofton se, në përputhje me kompetencat e tij kushtetuese dhe ligjore, pas pranimit të njoftimit zyrtar nga Prokuroria Speciale e Republikës së Kosovës (PSRK), përmes të cilit është konfirmuar se është iniciuar hetim penal ndaj të pandehurit Beqë Shala, prokuror në Departamentin e Përgjithshëm të Prokurorisë Themelore në Prizren, ka vendosur unanimisht që të pezullojë përkohësisht nga detyra zyrtare prokurorin Beqë Shala, deri në një vendim tjetër të Këshillit, përkatësisht deri në përfundimin e procedurës penale që është në zhvillim e sipër”, thuhet në njoftimin e KPK-së.

Gjithashtu, KPK njofton se ky vendim është marrë me qëllim të sigurimit të paanshmërisë, integritetit dhe efikasitetit të procedurës penale hetimore, si dhe për të garantuar zhvillimin e pandikuar të procedurës si dhe ruajtjen e besimit të publikut në sistemin prokurorial të Republikës së Kosovës./S.K/EO/PK/