Komiteti Ekzekutiv i UEFA-s votoi në Tiranë stadiumin “Metropolitano” të Madridit vendin mikpritës të finales së Ligës së Kampionëve 2027.

Stadiumi kombëtar i Varshavës do të presë finalen e Ligës së Kampioneve për vajza 2027, ndërsa finalja e Superkupës do të luhet në Salzburg të Austrisë.

Finalja e Ligës së Kampionëve në futsall 2026 do të luhet në Pesaro të Italisë, finalja e EURO U-19 në futsall në Astana (Kazakistan), ndërsa finalja e Evropianit të futsallit për vajza 2027 në Osjek të Kroacisë.

Komiteti Ekzekutiv miratoi një ndryshim në rregulloret e kompeticioneve të klubeve të UEFA-s për djem 2025-2026, për të lejuar zëvendësimin e përkohshëm të maksimumi një lojtari në fushë që pëson dëmtim ose sëmundje afatgjatë, gjatë fazës së ligës, deri në javën e gjashtë të ndeshjeve (e përfshirë).

Arsyeja e këtij ndryshimi është të garantohet që listat e skuadrave të mos reduktohen në mënyrë të padrejtë dhe që lojtarët të mbrohen nga ngarkesa shtesë.

Bonuse për finalet e Ligës së Kombeve të UEFA-s për vajza 2025.

Komiteti miratoi një shumë totale prej 1.000.000 euro për shpërndarje, bazuar në renditjen e ekipeve në Finalet e Ligës së Kombeve të UEFA-s për vajza, si më poshtë:

Vendi i katërt: 150.000 euro (15% rritje)

Vendi i tretë: 200.000 (20% rritje)

Vendi i dytë: 250.000 euro (25% rritje)

Vendi i parë: 400.000 euro (40% rritje)

Kërkesë për autorizimin e zhvillimit të ndeshjeve të kampionatit kombëtar jashtë territorit të UEFA-s.

Komiteti Ekzekutiv diskutoi kërkesat nga RFEF (Federata Spanjolle e Futbollit) dhe FIGC (Federata Italiane e Futbollit) për të miratuar zhvillimin e një ndeshjeje të kampionatit kombëtar secila jashtë vendit të tyre, në veçanti jashtë territorit të UEFA-s, raporton ATSH./S.K/KP/

Shqipëria do të luajë në datën 11 tetor një nga ndeshjet më të rëndësishme jo vetëm për kualifikueset e Botërorit, por gjithashtu edhe për historinë, duke ditur rivalitetin e kuqezinjve me Serbinë, historikun mes tyre dhe problemet politike.

Pavarësisht se këto në futboll nuk kanë vend, në tribunat e tifozerisë serbe kanë qenë gjithmonë prezentë, madje edhe atëherë kur asgjë nuk lidhej as me Shqipërinë dhe as me Kosovën.

Kjo ndeshje e shumëpritur, pritet të zhvillohet në datën 11 tetor në Beograd dhe numri 11, nuk vetëm data në të cilën luhet ndeshja, por lidhet edhe me shumë “11-a” të tjera.

11 VITE NGA DRONI- Në vitin 2014, Shqipëria luante një ndeshje të madhe në Serbi, teksa ëndrra për një vend në Europianin e Francës sapo kishte nisur. Kuqezinjtë përballeshin jo vetëm me skuadrën serbe, por me terrorin serb, me tifozerinë e cila në çdo moment bënte thirrje për vdekjen e shqiptarëve, apo edhe me vendimet për të mos lejuar jo vetëm tifozët shqiptarë, por as flamurin kuqezi në stadium. Gjithçka u duk se po shkonte mirë, kur në qiellin e Beogradit u shfaq flamuri “Autochthonous”, me autor Ballist Morinën, “incident” ky që jo vetëm që i solli Shqipërisë 3 pikët në tavolinë, por gjithashtu dënoi edhe Serbinë me zbritje pikësh, duke e bërë kualifikimin e kuqezinjve edhe më të lehtë.

11 PIKË NË SERBI- Kuqezinjtë kanë objektiv vendin e dytë në grup, pasi Anglia praktikisht e ka blinduar vendin e parë, duke treguar forcën ndaj çdo rivali. Të gjithë në Kombëtare e dinë se pas hapit fals ndaj Letonisë, vendi i dytë mund të arrihet vetëm duke mundur Serbinë në Beograd, që duhet të shoqërohet patjetër me një fitore ndaj Andorrës e më pas, ndaj Anglisë mund të luajnë pa presionin e rezultatit. Me një fitore në Serbi, kuqezinjtë do të arrinin në kuotën e 11 pikëve dhe me shumë gjasa, do të blindojnë vendin e dytë në grup.

11 PËRBALLJE MES DY SKUADRAVE- Dy skuadrat janë përballur në historinë e tyre 11 herë, nga të cilat 3 ndeshje kanë qenë mes Shqipërisë e Serbisë, e 8 të tjera kanë qenë mes Shqipërisë dhe Ish-Jugosllavisë, megjithatë fitorja e vetme e kuqezinjve ka qenë në 14 tetorin e vitit 2014, me rezultatin 0-3 në tavolinë, fitore kjo që e ndihmoi Shqipërinë të shkonte në Europianin e 2016 me 14 pikë.

11 LUANË NË FUSHË- Në datën 11 tetor, në fushë nuk duhet të jenë vetëm 11 futbollistë por 11 luanë, të cilët duhet të dinë vlerën e fitores, vlerën e 3 pikëshit e për më tepër, duhet të dinë vlerën e fanellës kuqezi dhe faktin se një fitore, i afron jashtëzakonisht shumë me Botërorin, pavarësisht se duhet të kalojnë edhe fazën e “Play Off”. Nëse në fushë janë 11 luanë të cilët japin shpirtin deri në vërshëllimën e fundit, fitorja mund të arrihet pa vështirësi ashtu siç merrej ndaj Greqisë kampione të Europës, apo edhe ndaj Francës në miqësore e ndaj Portugalisë në kualifikueset e Europianit./S.K/EO/

Policia Kombëtare spanjolle e ka arrestuar një tifoz të Real Oviedos për shkak të thirrjeve raciste në hapësirën e tifozëve vendës në stadiumin “Carlos Tartiere” gjatë ndeshjes me Real Madridin, e zhvilluar më 24 gusht.

Këtë e bën të ditur Policia e Asturie ku tifozi u ndalua për një krim kundër integritetit moral dhe një krim të urrejtjes pasi u identifikua falë analizës së fotove dhe të videove.

Ai bëri gjeste dhe tinguj majmuni në minutën e 37-të, që përkoi me festimin e golit të parë të skuadrës mysafire, të shënuar nga Kylian Mbappe.

Ky incident i panevojshëm u raportua pas ndeshjes së organizuar nga LFP (Liga de Fútbol Profesional).

Burri, i identifikuar, e dha një deklaratë në selinë e policisë dhe iu dorëzua gjyqtarit të parë hetues në Oviedo.

“Më shumë sesa thjesht një arrestim. Është propozuar gjithashtu një shkelje kundër Ligës kundër Dhunës, Racizmit, Ksenofobisë dhe Intolerancës në sport, e cila e parasheh një gjobë prej 60 mijë deri në 650 mijë euro për vepra shumë të rënda penale, si dhe një ndalim në impiantet sportive”.

Sipas asaj që e parasheh Kodi Penal dhe Selia e Lartë e Policisë së Asturie, krimet si ai i urrejtjes mund ta mbartin një dënim maksimal prej tre vjetësh burgim./S.K/EO/

Legjenda e boksit, Mike Tyson, ka bërë së fundmi një pranim të habitshëm duke zbuluar se përdorte fentanyl (substancë narkotike), për të përballuar dhimbjet gjatë karrierës së tij ikonike.

“Ishte një analgjezik, dhe e përdorja për të trajtuar gishtin e këmbës. Ishte si heroinë sapo të kalonte efekti dhe hiqeje Band-Aid-in, fillon të kesh simptoma të tërheqjes, të vjella, ashtu si në heroinë”, rrëfeu Tyson në episodin e fundit të “Katie Miller Podcast”.

Fentanyl është një opioid sintetik shumë i fuqishëm, i aprovuar nga Administrata për Ushqimin dhe Barnat në SHBA për përdorim si qetësues dhimbjesh, por mund të jetë fatal edhe në doza të vogla nëse përdoret pa recetë.

Miku i ngushtë i Tyson, Arturo Gatti, i cili ndërroi jetë në 2009, kishte një betejë të gjatë me opioidet, siç kishte rrëfyer më parë në intervista.

Sipas Qendrës për Kontrollin dhe Parandalimin e Sëmundjeve (CDC), vitin e kaluar 48,422 persona humbën jetën për shkak të përdorimit të paligjshëm të fentanylit.

Ky opioid është 100 herë më i fuqishëm se morfina dhe 50 herë më i fuqishëm se heroinë.

Varësia nga drogët është një sfidë me të cilën Tyson ka përballuar për një kohë të gjatë, dhe kjo nuk është hera e parë që publikohet dhimbja ekstreme në këmbët e tij.

Ai madje kishte goditur me shuplakë Jake Paul gjatë përgatitjeve për ndeshjen e tyre në nëntor 2024, pasi Paul i kishte shkelur gishtin gjatë peshimit. Tani në të 50-tat, Tyson është angazhuar fuqishëm në biznesin e tij të kanabisit, duke e përdorur si alternativë ndaj ilaçeve tradicionale për dhimbje./S.K/EO/