Lajmet

OAK kërkon shkurtimin e afatit kohor për inicimin e procedurës hetimore në AKK

Muja tha se ky projektligj adreson të gjitha format e mundshme të keqpërdorimit dhe abuzimit të bizneseve në treg.

Published

4 years ago

December 10, 2021

Betim Gashi

Në dëgjimin publik për Projektligjin për mbrojtjen e konkurrencës, Oda e Afarizmit të Kosovës ka kërkuar shkurtimin e afateve kohore për përgjigjen e inicimit të procedurës hetimore në Autoritetin Kosovar të Konkurrencës (AKK).

Kryesuesi i Grupit punues në Komisionin për Ekonomi, deputeti Armend Muja tha se ky projektligj adreson të gjitha format e mundshme të keqpërdorimit dhe abuzimit të bizneseve në treg.

Megjithatë Diellza Zeqiri, përfaqësuese e Odës së Afarizmit të Kosovës, ka kërkuar ndryshimin e nenit 36, përkatësisht paragrafin 6 të këtij projektligji për shkurtimin e afateve kohore për trajtimin e inicimit të procedurave për hetim nga dhjetë muaj sa është aktualisht në tre muaj.

“Në rast se inicion procedurë tek Autoriteti Kosovar i Konkurrencës, është një afat shumë i gjatë i pritjes, 10 muaj për të marrë në fund një konkluzion që nuk ka kushte për të filluar procedurën. Mendojmë se është afat i gjatë, ne kemi pasur raste konkrete, ku si Odë e Afarizmit kemi paraqitur rastet në fillim të vitit te Autoriteti Kosovar i Konkurrencës, ndërsa deri në fund të vitit s’e kemi marrë as atë përgjigjen e kërkuar. Pas kësaj periudhe të gjatë të pritjes ne kemi marrë një përgjigje prej AKK-së që nuk ka kushte për të vazhduar procedurën. Me të vërtetë është një afat shumë i gjatë”, tha Zeqiri.

Kjo kërkesë e OAK-ut, kryesuesi Muja ka thënë se duhet të harmonizohet me të drejtën administrative.

“Edhe ashtu BE na ka rekomanduar t’i harmonizojmë të gjitha ligjet me të drejtën administrative. Këtë ta harmonizojmë dhe pastaj kur ka mungesë të kapaciteteve, shtetit i kërkojmë shtimin e kapaciteteve. Pra, e njësojmë edhe këtë, dhe do të sugjeroja administratën e Kuvendit në këtë pikë të njësohet me të drejtën administrative”, theksoi Muja.

Ndërsa, zyrtarë të Ministrisë së Industrisë, Ndërmarrësisë dhe Tregtisë kanë thënë se qëllimi i këtij projektligji është për mbrojtjen e konkurrencës në treg. Rexhep Bllaca nga MINT, tha se risi substanciale e këtij projektligji është trajtimi i abuzimit me pozitë dominuese.

“Si risi substanciale e këtij projektligji është abuzimi me pozitën dominuese. Pozitë dominuese kanë ndërmarrja, e cila ka pjesëmarrje në treg 40 për qind. Ndërsa nëse janë dy apo më shumë ndërmarrje që veprojnë bashkërisht në treg në mënyrë të ndërlidhur, pjesëmarrja në treg duhet të jetë 60 për qind. Kjo është në përputhje të plotë me Rregulloren e BE-së”, theksoi Bllaca.

Edhe organizata të tjera për mbrojtjen e interesave të biznesit kanë kërkuar që me anë të këtij projektligji të rregullohet fusha e konkurrencës në tregun kosovar.

Lajmet

Bellingham dhe Foden rikthehen në kombëtaren e Anglisë

Published

12 hours ago

November 7, 2025

UBT News

Jude Bellingham dhe Phil Foden janë rikthyer në skuadrën e Anglisë për ndeshjet kualifikuese të Kupës së Botës kundër Serbisë dhe Shqipërisë.

Trajneri Thomas Tuchel ka ftuar për herë të parë mesfushorin e Bournemouthit, Alex Scott, i cili ka bërë paraqitje mbresëlënëse këtë sezon. Nga ana tjetër, Jack Grealish dhe Danny Welbeck nuk janë përfshirë në listë, ndërsa mungojnë edhe Ollie Watkins dhe Myles Lewis-Skelly.

Bellingham, që kishte munguar në grumbullimin e kaluar për shkak dëmtimi, është rikthyer në formë me Real Madridin, duke shënuar tre gola në katër ndeshjet e fundit. Edhe Foden ka shkëlqyer me Manchester Cityn, ku shënoi dy herë në Ligën e Kampionëve kundër Borussia Dortmund.

“Jemi të kënaqur që janë rikthyer. Të dy kanë qenë vendimtarë për klubet e tyre dhe tani mund të ndihmojnë edhe kombëtaren,” tha Tuchel.

Anglia kryeson Grupin K me 18 pikë pas gjashtë ndeshjeve, ndërsa përballet me Serbinë në Wembley të enjten dhe me Shqipërinë në Tiranë të dielën.

Skuadra e Anglisë:

Portierë: Henderson, Pickford, Pope

Mbrojtës: Burn, Guehi, James, Konsa, O’Reilly, Quansah, Spence, Stones

Mesfushorë: Anderson, Bellingham, Henderson, Rice, Rogers, Scott, Wharton

Sulmues: Bowen, Eze, Foden, Gordon, Kane, Rashford, Saka./S.K/KP/

Lajmet

Vdes në moshën 24 vjeçare lojtari i Cowboys, Marshawn Kneeland

Published

13 hours ago

November 7, 2025

UBT News

Sipas autoriteteve ligjore, ka vdekur mbrojtësi i Dallas Cowboys, Marshawn Kneeland në moshën 24 vjeçare. Ekipi lëshoi një deklaratë të enjten duke mos përmendur shkakun e vdekjes.

“Me trishtim të madh, Dallas Cowboys njoftojnë se Marshawn Kneeland ndërroi jetë tragjikisht këtë mëngjes. Marshawn ishte një shok skuadre i dashur dhe anëtar i organizatës sonë. Mendimet dhe lutjet tona në lidhje me Marshawn janë me të dashurën e tij Catalina dhe familjen e tij.”, thuhet në njoftim.

Cowboys kanë vënë në dispozicion burime këshillimi për të gjithë lojtarët, trajnerët dhe stafin.

Lojtarët aktualisht janë në javën e pushimit dhe nuk janë planifikuar të stërviten përsëri deri të hënën.

Policia e DPS-së gjeti automjetin e Kneeland të rrëzuar në Dallas Parkway në drejtim të jugut pranë Warren Parkway. Sipas raportit, Kneeland iku nga vendi i ngjarjes në këmbë dhe oficerët kontrolluan zonën me ndihmën e K-9 dhe njësive të dronëve.

Ndërsa autoritetet po kërkonin Kneeland, një dispeçer u tha oficerëve se njerëzit që e njihnin kishin marrë një mesazh në grup nga Kneeland duke i thënë lamtumirë. Përafërsisht tre orë më vonë, Kneeland u gjet i vdekur./S.K/NFL/

Lajmet

Profesorët e UBT-së përfaqësojnë institucionin në konferencën ndërkombëtare të projektit COWEB në Sarajevë

Published

13 hours ago

November 7, 2025

Driton Iseni

Profesorët Dr. Engelbert Zefaj dhe Dr. Mentor Shaqiri përfaqësuan UBT-në në konferencën punuese ndërkombëtare të projektit COWEB, e cila u mbajt në Sarajevë, në ambientet e International Burch University.

Gjatë konferencës, përfaqësues nga universitete partnere të rajonit prezantuan punimet dhe rezultatet e tyre kërkimore, duke ndarë përvoja mbi zhvillimin e praktikave të reja në mësimin virtual bashkëpunues.

Në këtë kuadër, profesori i UBT-së Dr. Engelbert Zefaj mbajti një prezantim me temën: “Kultura dhe Ndërkulturaliteti në Mësimin Virtual Bashkëpunues (VCL): Ndikimet Pedagogjike dhe Vlerësimi i Studentëve”, ku theksoi rëndësinë e bashkëpunimit ndërkulturor dhe ndikimin pozitiv të tij në përmirësimin e përvojës së të nxënit.

Projekti COWEB ka për qëllim ndërtimin e kapaciteteve në institucionet e arsimit të lartë në Ballkanin Perëndimor për bashkëpunim ndërkombëtar virtual, duke promovuar pedagogji inovative dhe bashkëkrijimin e përmbajtjeve digjitale që forcojnë aftësitë dhe kompetencat e shekullit XXI.

Nëpërmjet pjesëmarrjes aktive në këtë projekt, UBT vazhdon të dëshmojë rolin e tij si një ndër institucionet lidere në avancimin e metodave bashkëkohore të mësimdhënies dhe në nxitjen e bashkëpunimit akademik ndërkombëtar në rajonin e Ballkanit Perëndimor.

Lajmet

Kosova e publikon listën e të ftuarve për ndeshjet vendimtare ndaj Sllovenisë dhe Zvicrës

Published

13 hours ago

November 7, 2025

UBT News

Kombëtarja e Kosovës e ka publikuar listën për dy ndeshjet e muajit nëntor ndaj Sllovenisë dhe Zvicrës.

Kapiteni Amir Rrahmani është rikthyer pasi mungoi në muajin tetor, së bashku me Baton Zabergjën. Ndërkohë, në listën rezervë kanë rënë Florent Hadërgjonaj e Florian Haxha.

Lista e plotë e Kosovës:

Portierë: Arijanet Muric, Amir Saipi, Visar Bekaj, Faton Maloku

Mbrojtësit: Amir Rrahmani, Mërgim Vojvoda, Lumbardh Dellova, Fidan Aliti, Ilir Krasniqi, Albian Hajdari, Kreshnik Hajrizi, Dion Gallapeni, Leard Sadriu

Mesfushorët dhe sulmuesit: Valon Berisha, Elvis Rexhbecaj, Leon Abdullahu, Veldin Hoxha, Lindon Emërllahu, Meriton Korenica, Ermal Krasniqi, Baton Zabërgja, Edon Zhegrova, Milot Rashica, Florent Muslija, Fisnik Asllani, Vedat Muriqi./S.K/EO/