Një person është arrestuar në Podujevë nën dyshimin se ka kryer veprën penale të sulmit seksual ndaj një gruaje.

Sipas raportit të Policisë, i dyshuari është intervistuar dhe, me vendim të prokurorit kujdestar, është liruar në procedurë të rregullt.

“Është arrestuar i dyshuari mashkull kosovar, pasi dyshohet se ka kryer veprën e lartcekur ndaj viktimës femër kosovare. Me vendim të prokurorit, pas intervistimit, rasti vazhdon të trajtohet në gjendje të lirë”, thuhet në njoftimin e Policisë.

Policia e Kosovës ka raportuar për disa raste të dhunës në familje të regjistruara gjatë 1 qershorit, ku dy persona janë arrestuar dhe dërguar në mbajtje me vendim të prokurorit.

Një rast ka ndodhur në Prishtinë, një burrë dhe një grua janë intervistuar nga policia pasi dyshohet se pas një mosmarrëveshjeje kanë sulmuar njëri-tjetrin. Pas procedurave hetimore, me vendim të prokurorit, të dyshuarit janë liruar në procedurë të rregullt.

Ndërkaq, në një rast tjetër në Prishtinë, policia ka arrestuar një burrë nën dyshimin për kryerjen e veprës penale të dhunës në familje ndaj një viktime mashkull. Pas intervistimit, me urdhër të prokurorit, i dyshuari është dërguar në mbajtje.

Një arrestim tjetër është kryer edhe në Han të Elezit, ku një burrë dyshohet se ka ushtruar dhunë ndaj një gruaje. Viktima ka pranuar trajtim mjekësor, ndërsa i dyshuari është ndaluar me vendim të prokurorit.

Ndërkohë, në Pejë është raportuar një rast tjetër i dhunës në familje, ku një mashkull kosovar dyshohet se ka kryer veprën ndaj një gruaje. Pas intervistimit, palët janë liruar në procedurë të rregullt, ndërsa hetimet për rastin do të vazhdojnë në gjendje të lirë.

Policia e Kosovës ka bërë të ditur se të gjitha rastet janë duke u trajtuar në koordinim me prokuroritë përkatëse.

Policia e Kosovës, përkatësisht njësia Task Forca – Drejtoria Rajonale Kufitare Jug, ka parandaluar një rast të kontrabandimit me mallra në komunën e Vitisë, sipas raportit zyrtar të datës 31 maj 2026.

Pas pranimit të informatave se në një shtëpi të pabanuar ishin strehur mallra të kontrabanduara të sjella nga Maqedonia e Veriut në Kosovë përmes rrugëve ilegale, njësitë policore kanë ndërmarrë veprime operative dhe hetimore.

Gjatë kontrollit të objektit, pas marrjes së autorizimit verbal nga prokurori kompetent, është zbuluar dhe sekuestruar një sasi e konsiderueshme e duhanit të përpunuar, në peshë rreth 300 kilogramë, i gatshëm për treg.

Sipas vlerësimeve, vlera e mallrave të sekuestruara arrin rreth 6 mijë euro, ndërsa shmangia nga obligimet doganore dhe akciza llogaritet rreth 12 mijë euro.

Pas përfundimit të procedurave të para hetimore, mallrat e sekuestruara i janë dorëzuar Doganës së Kosovës për trajtim të mëtejmë ligjor.

Policia e Kosovës ka sekuestruar afër 26 kilogramë substancë narkotike të dyshuar si marihuanë dhe ka arrestuar tre persona të dyshuar për përfshirje në trafikim.

Sipas njoftimit zyrtar, operacioni është realizuar në kuadër të planit të koduar “kontrolli”, pas identifikimit të dy automjeteve të dyshuara në pikëkalimin kufitar në Vërmicë, të cilat dyshohej se po transportonin substanca narkotike. Automjetet kanë qenë me targa serbe.

Njëra nga veturat është ndaluar dhe kontrolluar në Zveçan, ku janë zbuluar hapësira të modifikuara për fshehjen e narkotikëve. Gjatë kontrollit janë gjetur rreth 25.984 kilogramë substancë e dyshuar narkotike e llojit marihuanë. Ndërkohë, vetura tjetër është ndaluar në Jarinjë dhe dyshohet se ka shërbyer si përcjellëse për sigurimin e rrugës.

Sipas Policisë së Kosovës, tre të dyshuar janë arrestuar në lidhje me rastin, mes tyre një shtetas i Serbisë dhe dy shtetas të Malit të Zi.

Autoritetet kanë bërë të ditur se të gjitha veprimet e mëtejshme do të ndërmerren në koordinim me organet e drejtësisë.