Lajmet

Murati dorëzon kallëzim penal për shpronësimet e rrugës Kijevë-Zahaq

Published

4 years ago

September 3, 2021

Betim Gashi

Ministri i Financave, Hekuran Murati ka dërguar në Prokurorinë Speciale kallëzimin penal lidhur me procesin e shpronësimeve për projektin e ndërtimit të rrugës nacionale Prishtinë – Pejë, përkatësisht segmentin Kijevë – Klinë – Zahaq, për të cilën raporti i auditimit ka gjetur një shpërputhje prej mbi 12 milionë eurove.

Sipas një komunikate të ministrisë, për qëllime të këtij projekti ishte paraparë shpronësimi i 1,059 pronave, prej të cilave 858 ishin prona private, 148 prona shoqërore dhe 53 prona të privatizuara nga procesi i privatizimit.

“Të gjeturat e auditorit shpërfaqin shkelje të shumta në këtë proces, duke u nisur nga mungesa e buxhetimit të mjeteve që është kërkesë ligjore, e deri tek mos-respektimi i kritereve dhe procedurave të vlerësimit. Mirëpo më kryesorja që duhet të theksohet është shpërputhja e vlerave në mes të tabelës së vlerësimit të dorëzuar fillimisht nga Departamenti i Tatimit në Pronë tek asokohe Ministria e Mjedisit dhe Planifikimit Hapësinor me datë 17 maj 2019, dhe vlerave në tabelën e miratuar nga Qeveria me datë 17 dhjetor 2019. Bazuar në tabelat e Departamentit të Tatimit në Pronë, segmenti në fjalë është vlerësuar me shumën prej 31,040,729 euro. Pas këtij vlerësimi, më 17 dhjetor 2019 Ministria e Mjedisit dhe Planifikimit Hapësinor ka proceduar propozim-vendimin në Mbledhje të Qeverisë për të miratuar shpronësimin e pronave të këtij segmenti mirëpo me tabela tjera, e që për parcelat e njëjta në total kapin shumën për shpronësim prej 43,462,518 euro. Në krahasim me vlerësimin e dorëzuar nga DTP, shuma e miratuar nga Qeveria paraqet një dallim prej mbi 12 milionë euro shtesë në vlerësim. Ky dallim vie për shkakun se për disa parcela me pronarë specifikë, në tabelat e miratuara nga Qeveria që dallojnë nga vlerësimi fillestar, është bërë dyfishimi i vlerës së shpronësimit duke rezultuar kësisoj në fryrje të kostos së përgjithshme të shpronësimit, dhe potencialisht në dëmtim të buxhetit. Si ministri, jemi të gatshëm që, përveç raportit të auditimit, t’i ofrojmë prokurorisë bashkëpunim të parezervë për t’u siguruar që keqbërësit të vihen para drejtësisë. Qytetarët duhet të ndihen të sigurt se ne do të bëjmë gjithçka që është e mundur për të parandaluar çdo abuzim të mundshëm me paranë publike dhe jemi të përkushtuar që rastet e tilla të dërgohen para organeve të rendit”, thuhet në komunikatë.

MFPT thekson se në linjë me prioritetet e Qeverisë, do të vazhdojë punën në mënyrë transparente e llogaridhënëse për të krijuar një sistem të qëndrueshëm e të besueshëm të menaxhimit të financave publike.

Lajmet

Begaj përkujton viktimat e sulmeve të 11 shtatorit në SHBA

Published

41 minutes ago

September 11, 2025

UBTnews

Presidenti i Shqipërisë, Bajram Begaj ka përkujtuar viktimat e sulmeve të 11 shtatorit 2001 në Shtetet e Bashkuara.

Ai shkroi në Facebook se “Shqipëria riafirmon qëndrimin e saj të vendosur kundër cdo forme terrorizmi dhe dhune”.

“Sot, me dhimbje të thellë, përkujtojmë viktimat e sulmeve terroriste të 11 shtatorit 2001 mbi qytetin e New Yorkut. Shqipëria riafirmon qëndrimin e saj të vendosur kundër çdo forme terrorizmi dhe dhune, kudo në botë, dhe shpreh solidaritetin e saj të plotë me familjet e viktimave, popullin dhe institucionet e Shteteve të Bashkuara”, shkroi Begaj në Facebook.

SHBA-ja përkujton rreth 3 mijë persona që vdiqën në sulmet terroriste të 11 shtatorit. Më 2001 fillimisht një aeroplan i rrëmbyer ishte përplasur mbi kullën veriore të Qendrës Botërore të Tregtisë në Nju Jork, ndërsa 17 minuta më vonë, një aeroplan tjetër pasagjerësh përplaset mbi kullën jugore.

Ekspertët shprehen se 11 shtatori 2001, ndryshoi shumë gjëra në botë. Këto ngjarje u bënë shkak për nisjen e një fushate të gjerë të udhëhequr nga SHBA-të kundër terrorizmit./D.B/KP

Lajmet

Pejë: Arrestohet një person për sulm dhe armëmbajtje pa leje

Published

43 minutes ago

September 11, 2025

UBTnews

Policia e Kosovës ka njoftuar se në Pejë, është arrestuar një i dyshuar mashkull kosovar nën akuzën për sulm.

Sipas raportit, i dyshuari në gjendje të dehur ka sulmuar një tjetër person, po ashtu mashkull kosovar. Gjatë kontrollit në shtëpinë e tij, policia ka gjetur dhe sekuestruar një pistoletë, gjashtë fishekë dhe një gëzhojë, ndërsa me vendim të prokurorit, i dyshuari është dërguar në mbajtje.

“Është arrestuar i dyshuari mashkull kosovar per shkak te dyshimit se në gjendje të dehur ka sulmuar viktimën mashkull kosovar. Gjatë kontrollit në shtëpinë e të dyshuarit kanë gjetur dhe sekuestruar një pistoletë, gjashtë fishekë dhe një gëzhojë. Me vendim të prokurorit, i dyshuari është dërguar në mbajtje.” thuhet në njoftim./D.B/UBTNews/Photo credits: KosovoInfo

Lajmet

Mitrovica e Veriut: Rastet e raportuara nga Policia

Published

49 minutes ago

September 11, 2025

UBTnews

Drejtoria Rajonale e Policisë në Mitrovicën e Veriut ka bërë të ditur se gjatë ditës së djeshme janë shënuar disa raste, përfshirë armëmbajtje pa leje, një vdekje të dyshimtë dhe një aksident trafiku.

Në Zubin Potok, policia ka arrestuar një person, pasi në shtëpinë e tij është gjetur një pushkë e cila është dorëzuar vullnetarisht. Pas konsultimeve me prokurorin, i dyshuari është liruar në procedurë të rregullt.

“Është arrestuar i dyshuari mashkull kosovar, pasi në shtëpinë e tij kanë sekuestruar një pushkë të cilën i dyshuari e ka dorëzuar vullnetarisht. Në konsultim me prokurorin, i dyshuari është liruar në procedurë të rregullt” thuhet në njoftim.

Në Zveçan, gjatë një kontrolli në shtëpinë e një të dyshuari tjetër, policia ka sekuestruar një pushkë gjysmë-automatike, 56 detonatorë elektrik, katër karikatorë, 700 fishekë dhe dy bajoneta. Me vendim të prokurorit, i dyshuari është dërguar në mbajtje.

“Është arrestuar i dyshuari mashkull kosovar pasi që gjatë kontrollit të shtëpisë së tij i janë gjetur dhe sekuestruar një pushkë gjysmë-automatike, 56 detonatorë elektrik, katër karikator, 700 fishek dhe dy bajoneta. Me vendim të prokurorit i dyshuari është dërguar në mbajtje.” thuhet në raport nga Policia e Kosovës.

Po ashtu, gjatë një kontrolli tjetër në Zveçan, policia ka gjetur dhe sekuestruar një pushkë gjahu, 12 fishekë, 15 gëzhoja, dy sfera të fishekëve të gjuetisë dhe një rrip me fishekë. Rasti është në hetim.

“Gjatë kontrollit të shtëpisë së të dyshuarit mashkull kosovar janë gjetur dhe sekuestruar një pushkë gjuetie, 12 fishekë, 15 gëzhoja, dy sfera të fishekëve të gjuetisë dhe një rrip përmbajtje e fishekëve.Rasti është duke u hetuar nga ekipet relevante policore.” thuhet në njoftim.

Në Leposaviq, mëngjesin e së enjtes, rreth orës 09:19, një burrë ka humbur jetën pasi traktori që po drejtonte dyshohet se është rrokullisur. Ekipet policore dhe ato mjekësore kanë dalë në vendin e ngjarjes, ku është konstatuar vdekja e tij. Trupi i pajetë, me vendim të prokurorit, iu është dorëzuar familjarëve. Rasti është duke u hetuar.

“Viktima mashkull kosovar derisa ishte duke drejtuar mjetin e punes (traktor), dyshohet se është rrokullisur dhe ka mbetur pa shenja jete. Njësitet policore bashkë me ekipin mjekësor kanë dalë në vendin e ngjarjes dhe nga ekipi mjeksor është konstatuar vdekja e viktimës. Lidhur me rastin është informuar edhe prokurori dhe në konsultim me të, trupi i pajetë u dorëzohet familjarëve. Rasti ne procedure hetimore.” thuhet në raport./D.B/UBTNews/Photo credit: PrishtinaInsight

Lajmet

Drejtuesit e institucioneve të Kosovës bënë homazhe në kujtim të viktimave të sulmeve terroriste të 11 shtatorit

Published

1 hour ago

September 11, 2025

UBTnews

Drejtuesit e institucioneve të Kosovës, presidentja Vjosa Osmani, kryeparlamentari Dimal Basha dhe kryeministri Albin Kurti, në kujtim të viktimave të sulmeve terroriste të 11 shtatorit në SHBA bënë homazhe pranë pllakës përkujtimore në oborrin e Qeverisë, pranë Kuvendit.

Ata vendosën kurora me lule pranë pllakës përkujtimore./D.B/EO