Lajmet

Miratohet Strategjia e Sigurisë 2022-2027

Kurti tha se synimi strategjik i Kosovës është anëtarësimi në NATO dhe BE.

Published

3 years ago

July 4, 2022

UBT.News

Qeveria e Kosovës në mbledhjen e sotme ka miratuar strategjinë e sigurisë për vitet 2022-2027, e cila është e dyta që nga shpallje e pavarësisë së Kosovës.

Kryeministri Albin Kurti tha se strategjia për sigurinë është hartuar në bashkëpunim dhe konsultim me të gjitha institucionet shtetërore, e në veçanti me ato të fushës së sigurisë. Sipas tij, kjo strategji i është nënshtruar procesit të konsultimit të brendshëm e të jashtëm, përfshirë edhe shteteve të QUINT-it.

“Kjo është strategjia ombrellë e sektorit të sigurisë ndaj një rreziku, kërcënimit dhe sfidat për sigurinë e vendit tonë. Njëkohësisht paraqet mundësitë dhe vizionin për të ardhmen tonë… Strategjia paraqet objektivat e ndërlidhura me interesat shtetërore, siç janë mbrojtja e sovranitetit dhe integritetit territorial, ruajtja e rendit kushtetues dhe sigurisë publike, siguria njerëzore dhe zhvillimi shoqëror, si dhe integrimi në strukturat euroatlantike dhe mekanizmat e tjerë ndërkombëtare. Synimi strategjik i Kosovës është anëtarësimi në NATO”, ka thënë Kurti.

Ai shtoi se synimi strategjik i Kosovës është anëtarësimi në NATO dhe BE, si parakusht për sigurinë dhe zhvillimin e qëndrueshëm të vendit tonë.

“Kosova do të aplikojë në Programin e Partneritetit për Paqe dhe anëtarësim në Kartën e Adriatikut, si dhe mekanizma të tjerë rajonal të sigurisë. Njëkohësisht, Kosova do të aplikojë për statusin kandidat dhe do të zbatojë reformat e nevojshme për të lehtësuar procesin e integrimit në BE”, ka thënë ai.

Kabineti qeveritar ka miratuar edhe udhëzimin administrativ për mbrojtjen e fëmijës kundër faqeve të internetit me përmbajtje pornografike dhe të atyre që dëmtojnë shëndetin dhe jetën e fëmijës.

“Me qëllim të mbrojtjes dhe kujdesit ndaj shëndetit të fëmijëve tanë, Ministria e Punëve të Brendshme ka hartuar këtë projekt-udhëzim administrativ, i cili do të definojë zbatimin dhe kompetencat e institucioneve relevante që të garantojnë zhvillim të shëndoshë të fëmijëve tanë. Ky projekt-udhëzim bazohet edhe në Ligjin për Mbrojtjen e Fëmijës dhe përmban fëmijët nga çdo përmbajtje e papërshtatshme që ndikon në zhvillimin fizik, kognitiv dhe emocional të fëmijës”, ka thënë Kurti.

Kabineti qeveritar në mbledhjen e sotme ka emëruar edhe bordin e Fondit të Sigurimeve Shëndetësore, i cili do të kryesohet nga Dafina Gexha-Bunjaku nga Ministria e Shëndetësisë. Ministri i Shëndetësisë, Rifat Latifi ka prezantuar përbërjen e bordit të këtij fondi.

“Propozoj sot që ta aprovojmë bordin e ri të Fondit të Sigurimeve Shëndetësore, me këtë përbërje: Dafina Gexha-Bunjaku nga Ministria e Shëndetësisë, Ahmet Ismaili nga Ministria e Financave dhe Transfereve, Klit Shala nga Ministria e Financave dhe Transfereve, Kastriot Meqa përfaqësues i Odës së Profesionistëve Shëndetësorë, Agreta Gashi përfaqësuese e Shërbimit Spitalor Klinik Universitar, Fahri Shabani, përfaqësues i Asociacionit të Komunave të Kosovës dhe Muhamed Alikodra, përfaqësues i Shoqatës së Pacientëve”, ka thënë Latifi.

Qeveria ka marrë vendim edhe për obligimin e bizneseve për shërbim të ujit të pijshëm nga rubineti.

“Propozoj aprovimin e vendimit që në rastet kur objektet e gastronomisë furnizohen nga ujësjellësi publik, pronari i biznesit nuk mund të ndalojë klientët të shërbehen nga uji i rubinetit. Në rastet kur objekti i gastronomisë pretendohet të furnizohet nga uji i puseve, rezervuarëve apo rrjeteve që nuk menaxhohet prej kompanive rajonale të ujit, pronari i biznesit obligohet që të hartojë dhe zbatojë planin e monitorimit operacional të cilësisë të ujit”, ka thënë Latifi.

Mes tjerash, është miratuar edhe nisma legjislative për ndryshimin dhe plotësimin e Ligjit për Noterinë. Ministrja e Drejtësisë, Albulena Haxhiu ka deklaruar se janë më shumë se nëntë komuna që nuk kanë noterë.

“Aktualisht janë më shumë se nëntë komuna të cilat nuk kanë noterë për shkak se një vendim, i cili ka rrëzuar një proces të provimit të noterisë, është ende pranë Gjykatës së Apelit. Prandaj, në këto rrethana të jashtëzakonshme ligji parasheh që ministri i Drejtësisë të ketë të drejtën e caktimit të noterit në një komunë përkatëse. Dhe duke pasur parasysh nevojat e qytetarëve për shërbime noteriale konsiderojmë si qeveri se i njëjti duhet të mbështetet”, ka thënë Haxhiu.

Ekzekutivi sot ka miratuar gjashtë nisma për lidhjen e marrëveshjeve ndërkombëtare me Pakistanin, Irlandën, Egjiptin, Jordaninë, Letoninë dhe Lituaninë për ripranimin e personave që qëndrojnë pa autorizim.

Lajmet

28 Nëntori pa kufij – Nga Shqipëria në Kosovë

Published

2 days ago

November 28, 2025

UBTnews

28 Nëntori është data që bashkon shqiptarët kudo në botë, pa kufij e pa dallime. Është data kur historia shqiptare merr frymë më fort dhe ku kujtesa kombëtare ndizet si një flakadan që udhëheq brezat e rinj.

Në këtë ditë, 113 vjet më parë, Shqipëria shpalli pavarësinë e saj. Ismail Qemali ishte në krye të procesit të shpalljes së pavarësisë. Dhe kreu i qeverisë së parë. Por, hija e trojeve shqiptare që mbetën jashtë kufijve ishte aty. Si shpresë dhe si mungesë.

Hija e Kosovës, gjithsesi!

E për Kosovën kjo datë ka peshë të dyfishtë – lidhet me dy momente të shenjta të historisë shqiptare.

Në këtë datë historike lindi një nga figurat më të mëdha të rezistencës kosovare, Adem Jashari. Ndërsa Prekazi i asaj kohe të vitit 1955 ishte një fshat i thjeshtë, pastaj duke kaluar në vitet e errëta të represionit, heroi Adem Jashari u bë një simboli i lirisë, zëri i qëndresës dhe zemra e Ushtrisë Çlirimtare të Kosovës (UÇK). Jeta dhe sakrifica e tij padyshim është shndërruar në betim për një popull të tërë.

Historia e familjes Jashari, ishte sakrifica e kthyer në një kapitull të rrugës drejt lirisë për Kosovën.

Po në këtë datë, kur frika ishte më e madhe, kur shumëkush nuk fliste hapur, dalja e Ushtrisë Çlirimtare të Kosovës për herë të parë publikisht, tregoi se Kosova nuk do qëndronte më e heshtur. Më figurat e Mujë Krasniqit, Daut Haradinajt e Rexhep Selimit, UÇK doli nga hija po me këtë datë, më 28 nëntor, si një mesazh që flamuri kuq e zi nuk valëvitej vetëm për Shqipëri, ai do rritej edhe në Kosovë, në zemrat e të gjithë shqiptarëve të Kosovës që ishin të vendosur të mos dorëzohen.

Pra, në këtë ditë, më 28 nëntor 1997, për shumë shqiptarë rezistenca nuk ishte e shpërndarë dhe e paorganizuar, ndërsa sot dalja e parë e UÇK-së kujtohet si një nga momentet më të rëndësishme të viteve ‘90. Ky moment mbetet i gdhendur në kujtesën kolektive si nisja e një etape drejt një Kosove të lirë.

Kështu, 28 nëntori për Kosovën nuk është vetëm festa e Flamurit, ajo është data kur gjaku, historia dhe identiteti kombëtar bashkohen në një. Është dita kur kujtojmë rrënjët tona, por edhe betejat e reja. Një datë e cila na rikujton se liria nuk ishte dhuratë, por amanet i hershëm. Një datë, në të cilën gjenerata të tëra festojnë lirshëm, gjithnjë duke kujtuar deceniet me radhë kur nuk mund të festohej haptazi, kur flamuri shqiptar ishte i ndaluar, kur për një “fjalë Shqipërie” mbusheshin burgjet me të rinj e të reja shqiptare.

Falë Adem Jasharit, falë UÇK-së, falë të gjitha lëvizjeve kombëtare shqiptare, të të gjitha kohërave – 28 Nëntori mbetet një ditë ku Shqipëria dhe Kosova bëhen një./UBTNews

lajme

UBT uron 28 Nëntorin – Ditën e Flamurit dhe Pavarësisë

Published

2 days ago

November 28, 2025

Driton Iseni

Rektori i UBT-së, Prof. Dr. Edmond Hajrizi, ka uruar studentët, pedagogët dhe gjithë bashkëkombësit shqiptarë për 28 Nëntorin, Ditën e Flamurit dhe të Pavarësisë së Shqipërisë.

Në mesazhin e tij, Rektori Hajrizi thekson rëndësinë historike të kësaj dite: ngritjen e flamurit kuq e zi mbi Kështjellën e Krujës nga Skënderbeu dhe shpalljen e Pavarësisë së Shqipërisë më 28 nëntor 1912 në Vlorë, si shenjë të qëndresës, sakrificës dhe ëndrrës për liri që çdo shqiptar e mban në zemër.

Ai nënvizon se kjo ditë nuk është vetëm një kujtesë historike, por edhe një thirrje për të ndërtuar të ardhmen. “Është përgjegjësia jonë të kultivojmë dijen, të zhvillojmë talentet dhe të edukojmë brezat e rinj që ata të jenë trashëgimtarët dinjitozë të këtij kombi,” thekson Rektori Hajrizi.

UBT beson se arsimi është flaka që do të ndezë Nëntorin e Tretë të kombit tonë – një Nëntor i dijes, i punës dhe i përkushtimit të rinisë. Të rinjtë janë fuqia që do të ruajë gjuhën, identitetin dhe vlerat kombëtare, duke ndërtuar një shoqëri të drejtë dhe të suksesshme.

Gëzuar 28 Nëntorin!

Lajmet

Kuvendi i Prishtinës diskuton në seancë të jashtëzakonshme për bllokadën e buxhetit

Published

2 days ago

November 27, 2025

UBTnews

Kuvendi Komunal i Prishtinës është mbledhur në seancë të jashtëzakonshme ku kryetari Përparim Rama ka kërkuar që të bëhet bartja e mjeteve në vlerë 28 milionë euro dhe votimin e buxhetit 2026.

Por asamblistët e VV-së kanë thënë se gjithë bllokimi i Prishtinës ka ndodhur për shkak të kryetarit.

“Urime të gjithë asamblistëve që janë zgjedhur dhe falënderim për ata që e kanë përfunduar, katër vite kanë qenë të rëndësishme dhe vendimtare te kryeqytetit. Edhe sot jemi në këtë seancë në shërbim të interesit publik. Para nesh kemi bartjen e mjeteve në vlerë 28 milionë euro dhe votimin e buxhetit për vitin 2026-të prioritet absolut janë qytetarët e kryeqyteti. Fondet do të shfrytëzohen menjëherë për pagat e punëtorëve dhe për shërbimet e kryeqytetit. Kërkojë edhe 35 milionë euro te cilat u takojnë qytetarëve me ligj duhet vullnet për miratim nga ministri i financave. Ju falënderoj për përgjegjësinë dhe zotohem para jush se do të jem i pranishëm në çdo veprim, nuk e mbrojmë interesin partiak po të qytetarëve”, tha ai.

Asamblisti i VV-së, Gëzim Sveçla i tha Ramës së i bakretuar ke ardh e me turp do të përfundosh.

“Jemi këtu sepse kryeqyteti është futur në krizën më të rëndë të menaxhimit jemi këtu sepse qyteti është bllokuar qytetarët kanë mbetur pa paga dhe autobusët janë ndalur dhe kryetari ka dërguar situatën në zero. Vetëm kur punëtorët e trafikut dolën në rrugë atëherë e kuptoj se bartja e mjeteve nuk bëhet në studio televizive por në kuvendin komunal. Kriza i duhet Përparim Ramës dhe LDK e përdori këtë strategji për fushatën lokale tash dëshiron ta përdor edhe për zgjedhjet lokale. Kur buxheti është miratuar ligji thotë komuna funksion me 1/12 te buxhetit paraprakë. Është e qartë se fajtori pse u vonua buxheti i Prishtinës është Përparim Rama, ai shpik miq imagjinar, shpik bllokada, u tha qytetarëve që Qeveria ua ka bllokuar mjete është gënjeshtër vetëm në nëntor dy alokime, për çfarë bllokade po flet, çerdhe i ke lënë pa rryme. Përparimi nuk është vetëm menaxher i keq është edhe borxhli i keq borxh operatorëve ekonomik, për rryme e për gjithçka derisa ka qenë Londër pasojat i ka bartur vetë. Kur zihen punët del merresh me emra të veçantë të VV-së të njëjtin njerëz për të cilët votove ne nuk kemi ndryshuar ti ke ndryshuar, nuk ka pasur parime kurrë. E din shumë mirë cka na ke thënë për LDK, për Lumir Abdixhikun”, tha ai.

Ndërsa Leutrim Retkoceri nga PDK ka thënë se ndërprerja e autobusëve rëndon më shumë jetën e qytetarëve.

“Mbledhja e jashtëzakonshme po zhvillohet në një kohë ku krizat financiare në Prishtinë po thellohen dhe po bëhet gjithnjë më serioze. Në një kohë kur ka rritje të çmimeve dhe kostos së shtrenjte dhe e ndërprerja e autobusëve kjo e rëndon më shumë jetën e qytetarëve të Prishtinës. PDK do të votojë në këtë seancë, ndëshkimi i një qyteti të tërë për shkak të mos arritjes objektive politike nuk ka vend në qeverisje dhe nuk duhet të tolerohet” , tha ai./EO

Lajmet

Ndërpritet greva pas lëshimit të mjeteve financiare për RTK-në

Published

2 days ago

November 27, 2025

UBTnews

Sindikata e Punëtorëve të RTK-së SPERTK njofton për ndërprerjen e grevës pas zhbllokimit të situatës me buxhetin e RTK-së dhe krijimin e mundësisë për adresimin e çështjeve të mbetura, që ndikojnë drejtpërdrejt në funksionimin e transmetuesit publik.

Pas protestave dhe grevës katërditore të zhvilluara nga punëtorët e RTK-së, Qeveria e Kosovës ka ndarë mjetet për pagat e punonjësve të RTK-së, raporton KosovaPress.

Sindikata thotë se punëtorët e RTK-së gjatë gjithë kësaj periudhe nuk kanë pasur komunikim adekuat nga ata që paguhen për sigurimin e stabilitetit të institucionit dhe pagesën e pagave, gjë që ka qenë për keqardhje dhe ka rënduar situatën, duke krijuar pasiguri dhe shqetësim të panevojshëm.

Për më tepër, sindikata falënderon Qeverinë dhe kryeministrin në detyrë për ndërmarrjen e hapave që çuan në zhbllokimin e situatës me buxhetin, si një veprim i domosdoshëm për stabilitetin e institucionit dhe ruajtjen e misionit të RTK-së si transmetues publik.

SPERTK përkujton se nëse gjatë janarit 2026 hasim sërish në situata të tilla, greva mund të rikthehet menjëherë dhe në çdo formë të nevojshme./KP