Lajmet

​Menaxhmenti i Telekomit pretendon se kompania operoi me fitim, kundërshtohet nga deputetja e LDK-së

Hana ka thënë se me menaxhmentin e ri është arritur të fitim 3 milionë euro Telekomi pa ndihmën e Qeverisë.

Published

on

Drejtues të Telekomit të Kosovës vlerësojnë se pas shumë viteve, më 2021 kjo kompani publike ka operuar me fitim dhe jo me humbje financiare si më parë.

Gjatë raportimit në Komisionin për Mbikëqyrjen e Financave Publike, ushtruesja e detyrës së kryeshefes ekzekutive të Telekomit, Burbuqe Hana ka thënë se me menaxhmentin e ri është arritur të fitim 3 milionë euro Telekomi pa ndihmën e Qeverisë.

Derisa konstatimet e Hanës i ka hedhur poshtë kryetarja e Komisionit, Hykmete Bajrami gjatë shqyrtimit të Raportit të Auditimit të pasqyrave financiare të Telekomit të Kosovës, për vitin 2021.

“Telekomi i Kosovës prej pas luftës shtetit të Kosovës në formë të dividendës, licencës dhe tatimeve i ka dhënë mbi 850 milionë euro. Ky menaxhment nuk e lejon që gjithë ajo dividendë që ka shkuar në shtet, për disa njerëz të papërgjegjshëm në menaxhment që kanë qenë, kanë pasur pasqyra të ndryshme për pos të vijimësisë. Nëse marrim pasqyrat financiare prej vitit 2016 humbje kanë qenë 51 milionë, pastaj 15 milionë më 2019, ndërsa në 2021 ne kemi mbërri me pasë fitim, jo humbje. Pra fitim me forca vetanake, pa ndihmë qeveritare… (56;35)Sa për informatë kjo është një prej të gjeturave të auditorit, për të cilën ne kemi punuar me shumë përkushtim. Ky është dokumentacioni i procesit të ristrukturimit të Telekomit, është si e gjetur e Zyrës Kombëtare të Auditimit për pozitat e dyfishuara, për pozitat e ushtruesve të detyrës, për çka ne kemi hyrë në ristrukturim për me i rregullu këto çështje. Kështu, që disa prej të gjeturave janë serioze, ndoshta nuk mundemi menjëherë me reagu”, tha ajo.

Deputetja nga LDK-ja Hykmete Bajrami tha se menaxhmenti i Telekomit po harron ndihmën financiare 10 milionë euro nga Qeveria e Kosovës për vitin 2021. Po ashtu për Bajramin mbetet shqetësuese mbajtja e 64 pozitave në Telekom me ushtrues detyre, përfshirë kryeshefin dhe zyrtarin e lartë financiar.

“Ju po theksoni që në vitin 2021 keni dalë me 3 milionë euro fitim, mirëpo po harroni që i keni marrë 10 milionë euro prej qeverisë. Nëse e kalkulojmë këtë, i bie që do të kishte me qenë 7 milionë euro humbje. Ajo çka mua më shqetëson dhe kisha kërkuar me ditë pse janë 64 pozita me ushtrues detyre. Pse nuk keni shpallur konkursin për me pas kryeshef për mos me pas ushtrues detyre. Zotëria për financa është ushtrues detyre, ku është problemi?”, thotë Bajrami.

Bordi pranoi se qw një kohë të gjatë ka pozita në Telekom me ushtrues detyre, por ky bord tashmë ka shpallur konkursin për kryeshef dhe zyrtarë kryesor financiar.

Ushtruesi i detyrës së drejtorit kryesor financiar në Telekom, Feim Kelmendi forcoi deklaratën e shefes së tij se kjo kompani ka pasur fitim. Kelmendi tha se fitimi i kompanisë po zhvlerësohet si rezultat i vendimeve të Arbitrazhit që kanë qenë në favor të kompanisë private “Dardafon”.

“Ka pasur keq interpretime që Telekomi si pasojë e keq menaxhimit ka shkaktuar humbje 10 milionë euro më 2021. Kjo është e pa vërtetë, Telekomi në vitin 2021 ka pasur me përmbyllur vitin me një fitim prej 3 milionë euro, por për shkak të një vendimi nga Arbitrazhi, që nuk lidhet me periudhën tonë të menaxhimit. Arbitrazhi burimin e ka në vitin 2009, kur është nënshkruar marrëveshja. Si pasojë e këtij vendimi, ne jemi detyruar me njohur një shpenzim 13 milionë euro. Pra, kjo e ka përmbysur situatën prej 3 milionë euro fitim, ta kthen në 13 milionë euro humbje. Kështu që nuk ka pasur në Telekom keqpërdorim të mjeteve financiare në vitin 2021, pra asnjë euro nuk ka pasur keqpërdorim”, tha ai.

Sfidë tjetër për Telekomin mbetet ndëshkimi me rreth 2 milionë euro nga ana e Administratës Tatimore të Kosovës, si rrjedhojë e pamundësisë për t’i paguar obligimet ndaj ATK-së.

“Për shkak të borxheve të mëdha dhe problemeve të trashëguara, nuk mundemi ne me i pasë çështjet e shkëputura prej të kaluarës. Si pasojë e obligimeve për me pagu “Dardafonin” për të cilin ne nuk kemi qenë përgjegjës, ne s’kemi mundur me ta paguajmë ATK-në. Në momentin që s’mundesh me pagu obligimet ndaj ATK-së, kërkohet me pagu kamata dhe ndëshkime për vonesa. Rreth 2 milionë euro janë kamata(ndëshkime) të ATK-së si pasojë e pamundësisë për t’i paguar”, tha ai.

Auditori ka evidentuar që Telekomi ka detyrime ndaj ATK-së mbi 12 milionë euro.

Ndërkaq deputetja e Vetëvendosjes, Mirlinda Sadiku ka thënë se në bazë të të gjeturave nga auditori në Telekom të shkaktuar edhe nga ish-udhëheqësit e kësaj kompanie, prokuroria do të duhej të nisë hetime dhe të arrestohen ata zyrtarë.

“Besoj që prokuroria me gjithë të gjeturat e Zyrës Kombëtare të Auditimit do të duhej të shkojë t’i marr këto dosje, sepse këta persona që e kanë sjellë në këtë gjendje Telekomin kanë një përgjegjësi dhe do të duhej të kishte çdo ditë lajme në media se si janë arrestuar zyrtarët e tillë”, tha ajo.

Në këtë Komision u përmend edhe largimi i disa punëtorëve në Telekom, si rezultat i ristrukturimit të kompanisë. Punëtorët që kanë lëshuar punën vullnetarisht kanë marrë nga 24 paga përnjëherë. 

Aktualitet

Rektori i UBT-së, Prof. Dr. Edmond Hajrizi pranohet anëtar në Akademinë Evropiane të Shkencave (EurASc)

Published

on

Themeluesi dhe Presidenti i UBT-së, Rektori, Prof. Dr. Edmond Hajrizi, është pranuar si anëtar në Akademinë Evropiane të Shkencave (European Academy of Sciences – EurASc).

European Academy of Sciences (EurASc) është një nga akademitë më prestigjioze në Evropë, që bashkon shkencëtarë dhe studiues të shquar nga e gjithë bota, me qëllim promovimin e ekselencës shkencore dhe teknologjike për të adresuar sfidat më të mëdha globale. Anëtarët e saj janë emra të njohur që kanë dhënë kontribute të mëdha në fushat përkatëse, përfshirë shumë fitues të çmimeve ndërkombëtare dhe nobelistë.

Ky është një vlerësim i rëndësishëm ndërkombëtar që njeh kontributin e jashtëzakonshëm të Prof. Hajrizit në fushën e arsimit të lartë, kërkimit shkencor, inovacionit dhe politikëbërjes në nivel rajonal dhe evropian.

“Pjesëmarrja ime si anëtar në Akademinë Evropiane të Shkencave është një vlerësim personal, por mbi të gjitha është një njohje për punën dhe përkushtimin afatgjatë të UBT-së në ndërtimin e një ekosistemi akademik dhe shkencor në përputhje me standardet evropiane. Ky është një hap i rëndësishëm drejt fuqizimit të rolit të Kosovës në hartën ndërkombëtare të dijes dhe inovacionit”, tha Rektori Hajrizi.

Akademia Evropiane e Shkencave (EurASc), në publikimin e saj në rrjetet sociale, ka vlerësuar lart kontributin e Prof. Dr. Edmond Hajrizi për përvojën e tij mbi dydekadëshe në ndërthurjen e akademisë me ekosistemet e inovacionit dhe zhvillimit ekonomik.

Nën udhëheqjen e tij strategjike dhe vizionare, UBT është konsoliduar si një nga institucionet më të avancuara të arsimit të lartë në Evropën Juglindore, duke u shndërruar në një qendër të rëndësishme për zhvillimin e inovacionit, teknologjisë dhe sipërmarrjes.

Si pjesë e angazhimeve të tij profesionale, Prof. Hajrizi ka udhëhequr me sukses dhjetëra projekte të financuara nga Bashkimi Evropian, si dhe ka kontribuar si këshilltar për institucione prestigjioze ndërkombëtare, duke promovuar transformimin digjital, prodhimin inteligjent dhe arsimin e orientuar drejt së ardhmes.

Ky pranim përfaqëson jo vetëm një sukses personal për Rektorin Hajrizi, por një arritje të rëndësishme për UBT-në dhe Kosovën në tërësi. Ai dëshmon se përkushtimi ndaj inovacionit, cilësisë akademike dhe vizionit global mund të sjellë njohje ndërkombëtare dhe ta vendosë Kosovën në hartën e qendrave të rëndësishme të dijes dhe teknologjisë.

Continue Reading

Lajmet

Liga e Kampionëve 2025-2026, 29 klube të kualifikuara

Published

on

Ka ende kohë deri në fillimin e sezonit të ri të Ligës së Kampionëve, megjithatë vështirë se ka ndonjë garë që gjeneron aq shumë pritje sa ky kompeticion. Edhe para se faza e ligës të fillojë më 16 shtator, ka disa data të rëndësishme në axhendë.

UEFA ka planifikuar tashmë shortin për fazën e ligës. Ai do të zhvillohet më 28 gusht në Nyon. Siç ndodhi vitin e kaluar, një program kompjuterik do ta kryejë procesin, pasi një short manual në formatin revolucionar do të ishte përtej mundësive.

Klubet do të ndahen në katër vazo me nga tetë ekipe secila sipas koeficientit të klubit të tyre, me Paris Saint-Germain, si fitues të Ligës së Kampionëve, që tashmë janë të vendosur në vazon e parë. Bayern (i 2-ti), Leverkusen (i 7-ti) dhe Dortmund (i 8-ti) nga Bundesliga janë midis tetë ekipeve të para. Një ekip nga vazoja e parë duhet të luajë kundër një ekipi tjetër nga vazoja e parë dhe klubeve të dyta secila nga vazot e dyta, të treta dhe të katërta në fazën e ligës.

Liga e Kampionëve 2025/26: Cilat klube janë gati për shortin?

Anglia : Liverpool , Arsenal , Manchester City, Chelsea, Tottenham, Newcastle

Spanjë : Barcelona , Real Madrid , Atlético Madrid, Athletic Club, Villarreal

Italia : Napoli, Inter, Atalanta, Juventus

Gjermani : Bayern Munich, Bayer Leverkusen, Eintracht Frankfurt , Dortmund

Francë : Paris Saint-Germain, Marseille, Monaco

Holanda : PSV, Ajax

Portugalia : Sporting CP

Belgjikë : Union Saint-Gilloise

Turqi : Galatasaray

Republika Çeke : Slavia Pragë

Greqi : Olimpiakosi

29 klube janë kualifikuar tashmë për shortin e fazës së ligës. Anglia dhe Spanja kanë siguruar secila nga një vend shtesë përmes renditjes vjetore të UEFA-s, kështu që Newcastle dhe Villarreal do të përfaqësohen. Tottenham është kualifikuar si fitues i Europa League, që do të thotë se Premier League do të ketë gjashtë klube.

Liga e Kampionëve 2025/26: Si do të luhen vendet e mbetura?

Vendet e mbetura do të përcaktohen përmes fazës kualifikuese dhe eliminatoreve.

Raundi i 1-rë kualifikues: 8/9 dhe 15/16 korrik 2025

Raundi i dytë kualifikues: 22/23 dhe 29/30 korrik 2025

Raundi i 3-të kualifikues: 5/6 dhe 12 gusht 2025

Playoff-et: 19/20 dhe 26/27. Gusht 2025

Raundi i parë kualifikues është tashmë në kulmin e tij. Megjithatë, vetëm klubet nga ligat më të ulëta do të garojnë atje. Megjithatë, në raundin e dytë kualifikues do të marrin pjesë klube të njohura si FC Copenhagen dhe RB Salzburg.

Vendimi se cilat klube do të avancojnë në fazën e ligës do të merret më 26 dhe 27 gusht me ndeshjet e kthimit të fazës eliminatore.

Continue Reading

Lajmet

​Laporta për Yamalin: Ka personalitet të fortë si Messi, është i rrallë

Published

on

Presidenti i Barcelonës, Joan Laporta, ka bërë një deklaratë të fuqishme në lidhje me talentin e jashtëzakonshëm të Lamine Yamal, duke e krahasuar atë me Lionel Messin jo vetëm për cilësitë teknike, por edhe për karakterin e tij të veçantë.

Në një prononcim për mediat, Laporta u shpreh: “Lamine Yamal ka një personalitet shumë të fortë, njësoj siç kishte edhe Messi në kohën e tij. Ai nuk është thjesht një lojtar i talentuar, por është i rrallë, një prej atyre futbollistëve që lindin rrallëherë.”

Presidenti katalanas vazhdoi me vlerësimet duke theksuar nivelin elitar në të cilin tashmë ndodhet adoleshenti spanjoll:

“Yamal është një gjeni i vërtetë i futbollit. Ka arritur një nivel shumë të lartë për moshën që ka dhe kjo e bën edhe më të jashtëzakonshëm. Ne te Barcelona jemi shumë krenarë që kemi një lojtar si ai në radhët tona.”

Lamine Yamal, vetëm 18 vjeç, ka shpërthyer me paraqitjet e tij për Barçën dhe përfaqësuesen e Spanjës, duke u bërë një ndër emrat më premtues në futbollin botëror. Krahasimi me Messin nga vetë presidenti Laporta vetëm sa e forcon imazhin e tij si trashëgimtar potencial i legjendës argjentinase në “Camp Nou”.

Continue Reading

Lajmet

​Drita prezanton përforcimin e ri

Published

on

Drita ka bërë një goditje të rëndësishme në merkato duke siguruar shërbimet e sulmuesit të njohur Kristal Abazaj. Lojtari me përvojë të madhe dhe cilësi të spikatura do të jetë tashmë pjesë e repartit ofensiv, duke i shtuar më shumë forcë dhe alternativë skuadrës nga Gjilani.

Pas një pune të përkushtuar dhe negociatash të suksesshme, drejtori sportiv Valon Zymberi arriti të finalizojë marrëveshjen me Abazajn, i cili ka firmosur një kontratë dyvjeçare me klubin.

Abazaj pritet të jetë një armë e fuqishme në dispozicion të trajnerit Ramadani, duke sjellë me vete jo vetëm eksperiencë, por edhe potencial për të bërë diferencën në fushë.

 

Continue Reading

Të kërkuara