Lajmet

​Mbrojtja e ish-krerëve të UÇK-së kërkon që Prokuroria ta dorëzojë dosjen paraprake në fillim të prillit

Published

5 years ago

on

Avokatët mbrojtës të ish-krerëve të Ushtrisë Çlirimtare të Kosovës, Hashim Thaçit, Kadri Veselit, Rexhep Selimit dhe Jakup Krasniqit, kërkuan nga Zyra e Prokurorit të Specializuar në Hagë që sa më shpejtë ta dorëzojë dosjen paraprake të lëndës, në mënyrë që ata të mund të përgatiten për hetimin.

Këtë kërkesë e paraqiti avokati i Veselit, Ben Emmerson, i cili kërkoi që dorëzimi i kësaj dosjeje të ndodhë në fillimit të prillit.

“Juve do iu sugjeroja që të jepni udhëzime që ju besoj ua kanë dhënë në procesin e konfirmimit në formën që parashikojnë rregullorja dhe kjo dosje paraprake t’i jepet mbrojtjes në formë fillestare në fillim të prillit. Dhe kjo sigurisht mund të ndryshohet kur prokuroria siguron prova të tjera dhe unë po e paraqes këtë propozim për ta vendosur në agjendë“, tha ai.

Prokurori Special, Jack Smith kërkoi që dorëzimi i dosjes paraprake të lidhet me datën e gjykimit, pasi kjo sipas tij rrezikon dëshmitarët. Smith tha se janë që sa më shpejtë të caktohet data e gjykimit e cila duhet të lidhet me datën e dorëzimit të dosjes paraprake.

“Janë viktimat në këtë rast, dëshmitarët në këtë rast që po presin të bëhet drejtësia dhe kanë pritur me vite për këtë. E dyta është realiteti që kemi 1 orë e gjysmë këtu dhe nuk është përmendur fare realiteti i frikësimit të dëshmitarëve, ky është realiteti i kësaj çështje dhe do të mbetet realitet dhe fakt që ka një hendek të madh në mes nxjerrjes së gjithë dokumenteve dhe datës së gjyqit, sepse kjo do të rrezikojë dëshmitarët, kjo është e vërteta dhe për këtë nuk është folur. Janë vendosur masa mbrojtëse, redaktime që iu janë bërë dokumenteve, por duhet të kuptohet që këto janë mjete për të zvogëluar rrezikun, por nuk e eliminojnë rrezikun komplet. Ne do të përdorim çdo mjet që është i mundur që kjo çështje të eci përpara dhe ne themi që data e dorëzimit të dosjes duhet të lidhet me datën e fillimit të gjykimit duke i dhënë mundësi atyre që të përgatiten dhe do të jetë një mjet menaxhimi për gjykatën në ecjen përpara. Nëse gjykata vendos kundër mbrojtjes në këtë çështje, mbrojtja ka dhënë indikacione se do t’i bëjnë qëndresë urdhrave të gjykatës. Kam frikë se mbrojtja po përpiqet ta vonojë këtë çështje, do e realizojë nëse vazhdojnë kështu. Duke pasur parasysh historinë e frikësimit të dëshmitarëve duhet ta kemi parasysh këtë kur bëjmë parashtrimet tona…Ne jemi për një gjykim sa më të shpejtë të caktohet një datë për gjykimin e cila do të lidhet me datën e dorëzimit të dosjes paraprake”, tha ai.

Në nisje të kësaj konference të tretë statusore, Prokuroria e Specializuar tha se është duke vazhduar nxjerrjen e materialeve, lidhur me dëshmitarët, ku u tha se lista do të bëhet publike për palët mbrojtëse në momentin e duhur.

Por lidhur me këtë reagoi avokati i ish presidentit Thaçi, David Hooper, i cili se tha se deri tani janë informuar për 124 dëshmitarë, të cilët Prokuroria i ka identifikuar vetëm me pseudonime. Ai kërkoi nga Prokuroria më shumë hollësira rreth listës së dëshmitarëve.

“Nga sistemet e nxjerrjes së materialeve me të cilët ne kemi punuar në gjykatat, Tribunalet tjera ky sistem këtu është më pak i dobishëm dhe ky është një problem sepse sigurisht mënyra se si bëhet nxjerrja e materialeve dhe ndihma që mund të marrësh nga materialet e tillë sidomos kur bëhet fjalë për materiale të shumta…Në këtë rast ka 124 dëshmitarë që janë bërë të njohur shumica e tyre me pseudonime, nuk na është dhënë ndonjë përmbledhje, nuk kemi as edhe pesë rreshta lidhur për çfarë do të diskutojnë këta dëshmitarë. Asnjë dëshmitar nuk është bërë i njohur bashkë me provat shoqëruese, sepse kur ka një dëshmitar duhet të ketë edhe prova të cilat lidhet me atë dëshmitar dhe jo të na lihet ne që ta lidhim dëshmitarin me dokumente të caktuara që lidhen me të. Mungojnë hollësitë në lidhje me tabelat mungojnë hollësitë dhe ZPS vazhdon të veprojë kështu sepse kështu e thotë në argumentet e tyre, mungojnë metodat lidhur me tabelat në bazë të Legal Flow janë disa pika që po t’i marrim së bashku krijojnë probleme”, tha Hooper.

Kurse, mbrojtja e Kadri Veselit, Ben Emmerson lidhur me nxjerrën e materialeve nga Prokuroria ka thënë se mund të jenë dy arsye prapa kësaj, një se ata që janë në Prokurori janë jokompetent për këtë punë, e që thotë se dyshon, dhe se e dyta është se kjo bëhet qëllimshëm vetëm për të dënuar me çdo kusht të akuzuarit.

Emmerson tha se Prokuroria i ka varrosur provat relevante në një mal provash jorelevante. Tutje ai tha sa janë rreth 34 vendngjarje të krimit dhe asnjëra prej tyre nuk është analizuar si duhet nga Prokuroria.

“Ne si mbrojtje nuk kemi pasur asnjë dosje paraprake të Prokurorisë shumë herë Prokuroria ka refuzuar të na jap dosje paraprake dhe do të na jap vetëm në momentin e fundit para gjykimit megjithëse që ajo mund të jetë gati që në maj apo qershor të këtij viti. Pra prokuroria e di se për çfarë bënë fjalë dosja e vetë sepse ata iu kanë dhënë këto dosje. Ajo që po bëjnë ata me ne është se i kanë shkarkuar të gjitha materialet në bazën e të dhënave i kanë redaktuar informacionet e rëndësishme dhe i kanë varrosur provat relevante në një mal provash dhe materiale të tjera që mund të jenë krejtësisht jo relevante. Ne si mbrojtje nuk po ankohemi kot se fakti është të ta bëjë mbrojtja punën që duhet ta bëjë, duhet ta ketë aktakuzën dhe ne duhet të shikojmë materiale të tëra për të kuptuar se çfarë po pretendon prokuroria aty dhe ka rreth 34 vendngjarje krimesh, secila prej tyre ka kronologjinë e vetë asnjëra prej tyre nuk është analizuar siç duhet nga prokuroria. Ato janë thjesht futur në një tufë materialesh të tërë dhe mbrojtja nuk është në gjendje të përgatitet ashtu siç duhet dhe të përgatisë dosjen e vetë. Ne kemi krijuar një ekip hetues i cili është i gatshëm të fillojë punën që nga fillimi i janarit dhe ne presim që do na duhet nga marsi apo mesi i prillit në mënyrë që të rindërtojmë nga materiali që na kanë hedhur për të bërë një lloj analize të çështjes të prokurorisë. Ne na duhet t’u themi hetuesve se çfarë pune të bëjnë dhe nuk e di nëse prokuroria nuk e di si ta bëjë punën dhe nuk i jep mundësi mbrojtjes ta bëjë punën si duhet”, tha ai.

Prokurorja Claire Laëson komentet e Emmerson i ka quajtur si një “retorikë”. Zyra e Prokurorit të Specializuar tha se së bashku me dorëzimin e materialeve te mbrojtja, ua ka dorëzuar edhe udhëzim specifik për këto materiale.

“Mbrojtja e zotëri Veseli foli për elemente shumë të përgjithshme sa i takon volumit kaotik, sa i takon materialeve që është vënë në dispozicion pa një udhëzim. Në fakt kjo është e pasaktë është fakt që mbrojtja e zotëri Veselit dhe parashtrimet e mbrojtjes së Veselit nuk janë gjë tjetër veçse një retorikë. Ndërkohë duhet të them se është diçka që e kemi dëgjuar nga mbrojtja e zotëri Veseli në shumë konferenca të procesit gjyqësor dhe nuk duhet të tolerohet më nga kjo gjykatë. Mbrojtja në fakt është pajisur me një udhëzim specifik lidhur me materialin e nxjerr në formatin e rregullës 83(3B) që është ekzaktësisht se udhëzimi që ka marr gjykatësi i procedurës paraprake. Për më tepër materialet janë nxjerr me rregullën specifike të cilat dëshmojnë në mënyrë të qartë në qoftë se mbi materialin është mbështetur ZPS-ja”, tha ajo.

Edhe avokati mbrojtës i Rexhep Selimit dhe i Jakup Krasniqit shprehën pakënaqësitë e tyre me mënyrën se si Prokuroria po nxjerr materialet për këtë rast gjyqësor.

Thaçi, Veseli, Selimi dhe Krasniqi nuk po marrin pjesë fizikisht në këtë seancë, por po e ndjekin atë përmes video-lidhjes.

Ish-presidenti i Kosovës, dy ish-kryeparlamentarët dhe shefi i deputetëve të Lëvizjes Vetëvendosje, përballjen me Gjykatën Speciale e nisën në fillim të muajit nëntor kur edhe u publikuan aktakuzat ndaj tyre, nën pretendimin se të njëjtit kanë kryer krime lufte dhe krime kundër njerëzimit.

Ata u dërguan në Hagë dhe po mbahen në paraburgim. Në paraqitjet e tyre të para, para gjykatësit të procedurës paraprake, të gjithë u deklaruan të pafajshëm për të gjitha pikat e aktakuzës.

Related Topics:
Continue Reading

Lajmet

Ditari: Çfarë ngjarjesh shënuan datën 16 maj 1993-1998?

Published

48 minutes ago

on

May 16, 2026

By

Lajmet e datës 16 maj pasqyrojnë jetën reale në Kosovë, në këtë periudhë shumë të rëndë. Nga represioni i përditshëm në fillimvitet e nëntëdhjeta deri te lufta e vitit 1998.

 (Foto: Pas gati dhjetë ditësh, u mor vesh se Bahri Fazliu ishte vrarë më 5 maj në kufirin Shqipëri-Mali i Zi, afër fshatit Vuthaj)

 16 maj 1994

Lajm i plotë:

Policia plagosi Zekë Hajrizin në oborrin e tij

Më 14 maj, rreth orës 11:00 në fshatin Strofc, policia serbe plagosi në oborrin e tij Zekë Hajrizin (38). Policia shtiu me automatik në Zekën derisa ai po bënte përpjekje për të ikur. Njoftohet se Zekë Hajrizi po kërkohej nga policia që prej dy javësh, nën pretekst se duhej të dorëzonte armën pa leje. Mirëpo ai nuk iu kishte përgjigjur thirrjes për t’u paraqitur në stacionin e policisë në Vushtrri.

Policia pasi e plagosi e dërgoi Zekën në stacionin e policisë në Prilluzhë e më vonë në stacion të policisë në Vushtrri.

Janë keqtrajtuar edhe anëtarët e familjes, duke përfshirë edhe babain Brahim Hajrizin (80) dhe të ëmën Nailen (75).

Anëtarët e familjes së të plagosurit kanë shkuar në spitalin e Mitrovicës për t’u interesuar, por përgjegjësit e atij spitali kanë deklaruar se Zeka nuk është pranuar në spital.

Supozohet se i plagosuri ende mbahet në stacionin e policisë.

Fshati Strofc i komunës së Vushtrrisë ka qenë objekt i ekspeditave të shpeshta ndëshkuese të forcave serbe. Më 14 maj, kur u plagos Zekë Hajrizi, policia bastisi dhe torturoi anëtarët e familjes së Selman Hasanit (djemtë Sokolin, Istrefin, Shabanin dhe Ilmiun), si dhe Ilmi Ademin (me të meta psikike) dhe të miturin Bekim Ademi (16).

 

Lajme të tjera:

Kryetari Rugova viziton disa vende evropiane

Të shtunën përfundoi “Mitingu i poezisë ’94”

“Deili Telegraf”: Presidenti shqiptar kërkon zgjidhjen e çështjes së Kosovës

Represioni në Kosovë

Nga shtëpia e shëndetit në Suharekë u dëbuan 11 punëtorë

Beogradi i shqetësuar për natalitetin e lartë të shqiptarëve në Kosovë

Drama shqiptare e TPK-së nuk merr pjesë në takimet “Joakim Vujiq”

Ballkani duhet t’u takojë vendeve të rajonit

Shqiptarët u akuzuan për marrëdhënie të këqija ndërnacionale në Medvegjë

Kosova është nën kontrollin e rreptë policor e ushtarak të Serbisë

 

 

16 maj 1995:

Lajm i plotë:

Ushtria serbe vrau një shtetas të Shqipërisë dhe plagosi një tjetër

 

Të shtunën (më 13 maj) në orën 17,30, në rajonin e piramidës kufitare D-14/2, rreth 30 metra thellësi të territorit të Shqipërisë, dy ushtarakë serbë vranë me armë zjarri Ferid Ramadan Vllaçën, 31-vjeçar dhe plagosën Meflan Halilhoxhën 48-vjeçar nga fshati Pakishtë, rrethi i Kukësit.

Në njoftimin e TVSH-së thuhej se ishin takuar ekspertët e dy vendeve dhe se ata kishin konstatuar se të dy bashkëfashtarët ishin qëlluar në befasi dhe pa asnjë shkak derisa kullosnin bagëtinë në territorin shqiptar.

Këtë e vërtetuan edhe provat materiale në vend të ngjarjes, njollat e shumta të gjakut rreth 30 metra në thellësi të territorit shqiptar si dhe një numër gëzhojash të armëve automatike në përdorim të ushtrisë serbe pesë deri gjashtë metra në thellësi të territorit shqiptar.

 

Lajme të tjera:

UE – me forca speciale për raste krizash

Ushtrime të përbashkëta të forcave speciale detare shqiptare e amerikane

Procesi ndaj Nevzat Halilit vazhdon pasnesër

Edhe dy ish-policë mohuan akuzën në Gjilan

Gjykimi i ish-policëve shqiptarë në Prizren vazhdon më 25 maj

Vazhdon paraburgimi i veprimtarëve në Kaçanik

Përfundoi Festivali i dhjetë i filmit shqiptar

Në Stokholm mbahet seminari për çështjen shqiptare në Ballkan

Dy mësimdhënës të SHMT “M. Beçikemi” në Vushtrri u dënuan me nga 10 ditë burg

Bastisje të policisë serbe në komunën e Podujevës

Java e rinisë evropiane në Strasburg

Përkujtohet shkrimtari Rexhep Elmazi

Beogradi përpiqet të krijojë problemin e paqenë të serbëve në Shqipëri

Gazetat serbe paralajmërojnë vendosjen e 10 mijë refugjatëve serbë në Kosovë

Pandeli Majko: “Për Kosovën të gjithë jemi të një mendimi”

Mitrovicë: Një shqiptarë u mor për herë të tetë në polici

Në Kosovë një rast i etheve hemorragjike

 

 

16 maj 1997:

 

Lajm i plotë:

Vrasja e qytetarit nga Gurbardhi i Malishevës ende e pasqaruar

 Pas vrasjes në rrethana të pasqaruara me armë zjarri më 13 maj të Kapllan Isuf Berishës (50), nga Gurbardhi i Malishevës, KI i Degës së LDK-së në Malishevë, sjell informata plotësuese.

I ndjeri në ditën kritike kishte dalë në fushë dhe nga persona të panjohur vritet me tre plumba nga pushka e gjuetisë, ndërsa trupi i tij është gjetur të nesërmen rreth orës 5:00.

Të afërmit e të ndjerit theksojnë se nuk dihet motivi i kësaj vrasjeje, pasi ai nuk kishte raporte të këqija me askënd.

Të përkujtojmë se viteve të fundit, policia serbe ka bastisur disa herë shtëpinë e të ndjerit Kapllan I. Berisha, si dhe e ka keqtrajtuar fizikisht me pretekst të kërkimit të armëve.

Pardje, policia serbe ua ka konfiskuar pushkët e gjuetisë katër vetave, ndërsa pronarët e tyre i ka urdhëruar që të paraqiten në polici. Bëhet e ditur se policia ka gjetur dy nga tre gëzhojat e plumbave me të cilët është vrarë Kapllani.

 

Lajm i plotë

Dhuna e përditshme në Kosovë

Gjilan: – Më 6 maj, policia serbe me pretekst të kërkimit të armëve kërkoi në shtëpitë e tyre babë e bir Nazim e Jakup Halitin nga Dobërçani.

Po këtë ditë, në stacionin e policisë serbe në Gjilan u mor në pyetje Sadri Daku, kryetar i Nëndegës VII të FR të LDK-së në Gjilan. Ai nga inspektorët serbë u pyet për një vizitë të tij kohë më parë në Shqipëri, si dhe u pyet për aktivitetin e Forumit të Rinisë. Atij iu kthye pasaporta e cila i qe marrë kohë më parë, ndërsa nga inspektorët serbë u kërcënua se në rast se vazhdon të merret me aktivitet do të likuidohet!

Pardje, në të ashtuquajturën bisedë informative u thirr edhe Naip Rexhepi, nënkryetar i Nendegës së LDK-së në Malishevë. Meqë ai nuk gjendej në shtëpi, policët serbë urdhëruan nënën e tij që Naipi të paraqitet në polici.

Lipjan: – Dje, policia serbe me pretekst të kërkimit të armëve ishte në shtëpinë e Elvis Selimit (20) në Banullë të Lipjanit. Meqë ai nuk gjendej në shtëpi, policia urdhëroi anëtarët e familjes së tij që Elvisi të paraqitet në stacionin e policisë serbe në Lipjan.

Njoftohet se Elvis Selimi është keqtrajtuar rëndë.

Istog: – Më 11 maj, policia serbe, me pretekst të dorëzimit të armëve mori në shtpinë e tyre babë e bir Hajriz e Hamdi Idrizajn nga Zhakovci, të cilët u dërguan në stacionin e policisë serbe në Istog. Nga Hamdiu policia kërkoi edhe një thikë, ndërsa më vonë edhe e keqtrajtoi fizikisht.

Po këtë ditë, në postkomandën e policisë serbe në Rakosh u mor në pyetje edhe Izet Haxhijaj nga Rakoshi.

Më 14 maj, policia mori në pyetje edhe Nexhmedin Haxhiaj (25) nga Rakoshi, i cili pa kurrfarë shkaku është keqtrajtuar fizikisht.

Pardje policia serbe mori në pyetje Nazmi Bytyçin, arkatar i KKF-së në Istog. Ai është pyetur kryesisht për punën e tij në KKF të Istogut, si dhe është urdhëruar që të paraqitet sërish më 16 maj në polici.

Vushtrri: – Dje, një patrullë e policisë serbe, me pretekst të kërkimit të armëve ishte në familjet e vëllezërve Beqir, Shaqir e Shaban Begu në Vushtrri. Ata u kërcënuan se nese nuk i dorëzojnë armët, policia do t’i kërkojë sërish.

Më 11 maj, policia serbe me pretekst se i ka dëmtuar pyjet, ishte në shtëpinë e Shaqir Asllanit në Beçuk. Ai u urdhërua që të paraqitet në polici së bashku me djalin e tij Sabriun, të cilët në polici u maltretuan rreth katër orë.

Mitrovicë: – Nga 30 prilli deri më 10 maj të këtij viti për çdo të dytën ditë është urdhëruar që të paraqitet në stacionin e policisë në Mitrovicë, Jetullah Hajdrai (42) nga lagjja Tavnik e Mitrovicës. Njoftohet se z. Hajdari po thirret me pretekst të dorëzimit të armëve.

Malishevë: – Gjatë muajit të kaluar policia sebe postkomandës së Kijevës dhe ajo e Rahovecit, me pretekst të kërkimit të armëve ishin në katër familje shqiptare.

Bëhet e ditur se në Drenoc të Malishevës janë bastisur dy familje, me të njëjtin pretekst, ndërsa gjatë muajit që shkoi policia ka kërkuar dhe ka mbajtur në stacionin e policisë nëntë veta nga kjo komunë.

 

Lajm i plotë:

Një qytetar nga Panorci i Malishevës u mor 25 herë në polici

Banush Sahitaj (60) nga Panorci, tash një kohë është në shënjestër të policisë serbe dhe ai deri tash është marrë në polici dhe është keqtrajtuar fizikisht rreth 25 herë, njofton KI i Degës së LDK-së në Malishevë.

Njoftohet se vitin e kaluar qytetarët serbë e malazezë ia kanë prerë mbi 1 hektar pyje, me pretekst se hapësira pyjore nuk ishte e tij!

 

Lajm të tjera:

Konferencë me gazetarë e kryetarit të Republikës dr. Ibrahim Rugova

Biseda rreth arsimit shqip në UNESCO

PE kërkon hapjen e Zyrës Informative në Prishtinë

KMDLNj: Në Kosovë, gjatë prillit, u vranë 3 dhe u keqtrajtuan 272 persona

Në Prishtinë filloi dënimi me burg i shqiptarëve që kanë blerë prona serbe

Parlamenti i Shqipërisë miratoi ligjin e zgjedhjeve, socialistët nuk morën pjesë në votim

Në Shqipëri krijohet Bashkimi për Demokracinë

U identifikua viktima e vetme e gjetur nga tragjedia e Otrantos

Shefi i ushtrisë serbe qëndroi në brezin kufitar me Shqipërinë

Festivali i recituesve “Presheva ’97” do të mbahet nga 22-24 maj

Mbahet Mitingu i 34-të i Poezisë

Tërmet në Shqipëri

Nga Instituti i Zveçanit inxhinierët shqiptarë largohen nga vendet e tyre të punës

 

 

16 maj 1998

Ora 14:30:

 

Lajm i plotë:

Forcat serbe vranë dy shqiptarë në Çitak të Skënderajt

Rifat Çitaku (55) dhe nipi i tij Muhameti (24) nga fshati Çitak u vranë dje rreth orës 10:00 nga pjesëtarët e forcave serbe që udhëtuan me një konvoj prej rreth 100 automjetesh nga Mitrovica në Skënderaj e pastaj në Rakosh të Istogut. Gjysh e nip u vranë pas shpine duke ikur nga pjesëtarët e forcave serbe.

Fadil Geci, kryetar i nëndegës së LDK-së në Llaushë i tha QIK-ut se forcat serbe ndërmorën dje prej orës 10 deri në 18:00 një aksion kundër fshatrave Çitak e Padalishtë. Z. Geci tha se për pasojat e aksionit në Padalishtë nuk ka të dhëna, ndërsa policia ka hyrë në fshatin Çitak dhe ka plaçkitur shtëpitë. Beqir Çitakut, i janë marrë dy vetura kombi Volsvagen me regjistrim dhe dokumente në rregull dhe çdo gjë e vlefshme në shtëpi. Beqirin e kanë marrë në stacion dhe e kanë kërkuar djalin e tij Naserin dhe i janë kërcënuar se gjoja në shtëpinë e tij po mban terroristë.

  1. Geci tha se janë gjtuajtur me armë shtëpitë e Hysen, Bajram, Shaqir, Sadri, Hamdi, Halit dhe Hajzer Çitakut.

Në një njoftim të Degës së LDK-së në Skënderaj thuhet se policët serbë vepruan në fshatin Çitak në stilin e hajnave, duke vjedhë çdogjë me vlerë nga shtëpitë e Zenel Sadik Loshit, Adem Tahir Shalës, Imer Hasan Shalës, Xhevdet Kadri Loshit, Gani Shalës, Haxhi Metë Zeqirit dhe Alush Qazim Loshit, të cilit ia plaçkitën veturën e tipit “Golf dysh”.

Në këtë njoftim thuhet se me plumbë pushkësh është goditur shtëpia e Demë Hasan Loshit, por për fat të mirë nuk është vrarë kush.

Në shtëpinë e Adem Shalës, pas kryerjes së aksionit, policia serbe me shkronja shqipe ka shkruar “UQK”. Dyshohet se në mesin e policëve ka pasur edhe kolaboracionistë shqiptarë nga komuna e Istogut.

Varrimi i dy personave të vrarë do të bëhet sot në varrezat e fshatit Çitak në ora 15.

 

Lajme të tjera:

Nuk është i saktë pohimi i mediumeve serbe për tre shqiptarë të vrarë në Rakosh

Granatime të fshatrave Kopiliq, Turiçec e Vojnikë

Thyerje të lokaleve zejtare në Skënderaj

Gjendje e rëndë në Deçan – sërish të shtëna drejt Baballoqit

Në hyrje të Podujevës policia keqtrajton kalimtarët

Nuk lejohet hyrja e kamionëve me mall në Kosovë

Snajperistët serbë u vendosën në një shtëpi të pabanuar në afërsi të Rahovecit

Rahovec: Policia serbe kidnapoi familjen shtatanëtarëshe të Zeqir Krasniqit

Në Rahovec nuk u mbajt protesta gjithëpopullore

Policët serbë shtinë në drejtim të fëmijëve

Kaçanik: Midis fshatrave Gërlicë e Epërme dhe Gabrricë policia serbe ka shtënë me armë zjarri

 

Lajm i plotë:

Bahri Fazliu u vra më 7 maj në Plavë

 

Në zonën e kufirit me Shqipërinë, në Plavë, më 7 maj është vrarë Bahri (Rrahman) Fazliu nga fshati Llaushë i komunës së Podujevës.

Siç njoftoi mbrëmë Televizioni Shqiptar, Bahriu ishte anëtar i Lëvizjes Kombëtare për Çlirimin e Kosovës dhe i Ushtrisë Çlirimtare të Kosovës. Në njoftim thuhej se ai ra heroikisht duke luftuar me forcat e agresorit serb.

Në njoftim thuhet se varrimi i tij do të bëhet në vendlindjen e tij, në Llaushë të Podujevës, pranë eshtrave të vëllait të tij Fahriut, i cili po ashtu ra heroikisht në vitin 1989, ndërsa për këtë opinioni do të njoftohet me kohë.

Organet e ushtrisë jugosllave Bahri Fazliun e kishin identifikuar si Fatmir Gashi. Trupi i tij pa jetë është mbajtur disa ditë në morgun e spitalit në Berane të Malit të Zi.

Ndërkohë, gazeta “Bujku” njofton sot se trupi i pajetë i Bahri Fazliut është varrosur pardje në varrezat e fshatit Vuthaj të komunës së Plavës me të gjitha nderimet tradicionale të shqiptarëve të kësaj ane.

 

Lajme të tjera:

Në protestën gjithëpopullore në Prishtinë morën pjesë rreth 100 mijë shqiptarë

Aeroplanët vëzhgues amerikanë “avaks” mbi territorin e Maqedonisë

Në Gostivar u varros polici maqedonas që ka luftuar në Drenicë

Shtatëvjeçari i plagosur – në shok dhomë

Të shtëna sporadike në Morinë, Ponoshec e Smolicë

Drejtuesit e Zyrës së Republikës së Kosovës në Bruksel u prit Senatin e Belgjikës

Raport mbi shkeljen e të drejtave dhe të lirive të njeriut në Kosovë gjatë muajit prill 1998

Të shtëna të policisë serbe midis fshatrave Gërlicë e Epërme dhe Gabrricë

UPSUP e çmon të papranueshëm dialogun pa ndërmjetësim ndërkombëtar

Civilët serbë keqtrajtuan dy të rinj shqiptarë

Policët serbë rrahën Bekim Sumën në Han të Elezit

Continue Reading

Lajmet

Prof. Blerim Canaj në “InsidePolitics with Anisa”: Demokracia në Kosovë mes formalitetit, liderëve të fortë dhe rolit të mediave

Published

18 hours ago

on

May 15, 2026

By

Në podcastin “InsidePolitics with Anisa I”, i ftuar ishte profesori i shkencave politike në UBT, Blerim Canaj, i cili foli për gjendjen e demokracisë në Kosovë dhe në rajon, duke ngritur dilema mbi mënyrën se si ajo funksionon në praktikë.

Canaj tha se nëse demokracia shihet nga këndvështrimi historik që nga Greqia antike, atëherë shqetësimet e filozofëve si Platoni dhe Aristoteli mund të jenë ende relevante edhe sot. Sipas tij, shpesh krijohet përshtypja se sot jetojmë në një demokraci formale.

“Kam përshtypjen se ne sot jetojmë në një demokraci formale. Kemi zgjedhje, dhe në Kosovë ato madje janë për t’u lavdëruar krahas rajonit, por demokracia nuk nënkupton vetëm votimin,” u shpreh ai.

Sipas Canajt, demokracia nuk kufizohet vetëm te votimi, por përfshin edhe funksionimin e shoqërisë civile dhe mediave. Ai theksoi se në realitetin ballkanik, rol të madh shpesh luan edhe fuqia financiare dhe mënyra se si ajo ndikon në proceset politike.

Në Ballkan shpesh rol të madh luan kush i ka paratë. Fatkeqësisht, në periudhën e zgjedhjeve shpesh shohim sulme ndaj mediave dhe përdorim të buxhetit të shtetit, gjë që e dëmton zgjedhjen e lirë dhe të barabartë,” tha ai.

Ai shtoi se në shumë raste kjo krijon avantazh për ata që kanë më shumë burime financiare dhe e deformon garën demokratike.

Duke folur për fenomenin e “liderëve të fortë”, profesori Canaj u shpreh se në shoqërinë tonë ende nuk mbizotërojnë partitë programore, por kulti i liderit. Sipas tij, kjo ka ndikuar që vëmendja të largohet nga programet politike dhe të fokusohet te individi.

“Nuk fokusohemi te programet politike, por te kulti i liderit. Dhe nga kjo shpesh prodhohen edhe deputetë që nuk janë të përgatitur sa duhet,” u shpreh ai.

Ai theksoi se kjo qasje ka sjellë edhe largimin e njerëzve profesionalë nga politika, pasi shpesh përballja me kandidatë më pak të përgatitur krijon frustrim. Sipas tij, kjo ka ndikuar në forcimin e kultit të liderit dhe në krijimin e një dinamike ku lideri shihet si figurë qendrore, pothuajse “si baba”, ndërsa mbështetësit ndihen pjesë e një strukture familjare politike.

Në pjesën për mediat, Canaj tha se ato kanë rol thelbësor në funksionimin e demokracisë dhe në informimin e qytetarëve. Ai i konsideroi mediat si një lloj “qeverie në vete”, për shkak të ndikimit që kanë në shoqëri dhe në politikë.

“Po të mos ishin mediat, njerëzit nuk do t’i dinin të mirat dhe të këqijat e një vendi. Unë mediat i shoh si një qeveri në vete,” u shpreh ai.

Sipas tij, një shoqëri që i sulmon mediat rrezikon të rrëshqasë drejt tendencave autokratike, ndërsa theksoi se pa media të lira dhe funksionale nuk mund të flitet për demokraci të mirëfilltë, pavarësisht sfidave dhe problemeve që mund të ekzistojnë brenda vetë mediave.

Continue Reading

Lajmet

Vizita e Marta Kos në Prishtinë: BE kërkon stabilitet politik, Kurti insiston në statusin e kandidatit

Published

20 hours ago

on

May 15, 2026

By

Komisionarja e Bashkimit Evropian për Zgjerim, Marta Kos, ka zhvilluar vizitën e saj të parë zyrtare në Kosovë, ku ka përcjellë një mesazh të qartë për spektrin politik që të gjejnë një gjuhë të përbashkët për t’i dhënë fund ngërçit të gjatë institucional dhe për të formuar institucione të qëndrueshme pas zgjedhjeve të qershorit. Gjatë qëndrimit në Prishtinë, Kos u prit fillimisht nga ushtruesja e detyrës së presidentit, Albulena Haxhiu, dhe më pas zhvilloi një takim me kryeministrin në detyrë, Albin Kurti.

Në një konferencë të përbashkët për media me kryeministrin në detyrë, komisionarja Kos vuri theksin te rëndësia e stabilitetit të brendshëm për procesin e integrimit evropian. Ajo bëri një thirrje të qartë për të gjithë aktorët politikë që të gjejnë një mënyrë për të kthyer stabilitetin institucional dhe kërkoi që, pas formimit të Kuvendit të ri, liderët të bashkohen për të zgjedhur edhe presidentin e ri përmes kompromisit.

Kos vlerësoi se Kosova ka një perspektivë të madhe evropiane dhe deklaroi se nuk ka siguri në Evropë pa Kosovën. Megjithatë, ajo tërhoqi vërejtjen se përsëritja e shpeshtë e zgjedhjeve ka krijuar një vit të humbur më 2025, duke ngadalësuar reformat kyçe dhe duke rënduar buxhetet shtetërore. Vizita e saj vjen në prag të zgjedhjeve të parakohshme parlamentare të caktuara për 7 qershor, të cilat janë të tretat me radhë që nga fillimi i vitit 2025.

Nga ana tjetër, kryeministri në detyrë, Albin Kurti, e cilësoi takimin si produktiv dhe të drejtpërdrejtë, duke e shfrytëzuar rastin për të ngritur sërish çështjen e statusit të vendit kandidat dhe hapjen e negociatave me bllokun.

Kurti kujtoi se kanë kaluar mbi 40 muaj që kur Kosova ka aplikuar për anëtarësim dhe se mbështetja publike për BE-në në vend qëndron vazhdimisht rreth 90%, duke qenë ndër më të lartat krahasuar me vendet e tjera. Ai po ashtu paralajmëroi se vakumi që lë Bashkimi Evropian në rajon synohet të mbushet nga aktorë të tjerë dashakeq që minojnë vlerat evropiane dhe rrezikojnë sigurinë e përbashkët, prandaj kërkoi që BE-ja të shtyjë përpara unitetin e brendshëm për avancimin e merituar të Kosovës.

Kosova mbetet vendi i vetëm në Ballkanin Perëndimor që ende nuk e ka marrë statusin e vendit kandidat që nga aplikimi i saj më 15 dhjetor të vitit 2022. Përveç krizës së brendshme politike, një nga pengesat kryesore për përparimin e saj mbetet mosnjohja e pavarësisë nga pesë shtetet anëtare të bllokut, që janë Greqia, Spanja, Rumania, Sllovakia dhe Qiproja.

Kjo ishte vizita e parë e Marta Kosit në Kosovë që nga marrja e mandatit të saj në Komisionin Evropian më 1 dhjetor 2024. Që nga ajo kohë, ajo kishte vizituar të gjitha shtetet e tjera të përfshira në procesin e zgjerimit, ndërsa mungesa e një vizite në Prishtinë gjatë vitit 2025 ishte arsyetuar nga zyrtarët evropianë me krizën politike dhe mungesën e institucioneve funksionale.

Continue Reading

Lajmet

REL: Shqipëria bëhet gati për të dërguar trupa në Gazë

Published

21 hours ago

on

May 15, 2026

By

Shqipëria po përgatitet për t’u angazhuar në Rripin e Gazës, në kuadër të Forcës Ndërkombëtare të Stabilizimit.

Ministri i Mbrojtjes i Shqipërisë, Ermal Nufi tha në një konferencë për mediat në Tiranë se një skuadër shqiptare ka parë situatën në terren.

“Në kuadër të angazhimit në Bordin e Paqes, Shqipëria ka marrë masa për shqyrtimin e situatës në Gaza. Rripi i Gazës është nën sigurinë e Forcave të Mbrojtjes së Izraelit [IDF] dhe çdo lloj inspektimi trupash atje bëhet përmes Forcës Ndërkombëtare Stabilizuese dhe ushtrisë izraelite. Kemi dërguar një skuadër për të parë nga afër vendndodhjen dhe situatën në terren, që të kuptojmë se ku dhe si mund të vendosemi”, u shpreh ai.

Forca Ndërkombëtare Stabilizuese buron nga një plan 20-pikësh i presidentit amerikan, Donald Trump, për t’i dhënë fund luftës mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – në Rripin e Gazës.

Nufi bëri të ditur se Shtabi i Përgjithshëm i Forcave të Armatosura të Shqipërisë ka përgatitur planin konkret që pritet të zhvillohet në disa nivele dhe faza sa i përket angazhimit të Shqipërisë në Gazë, por nuk zbuloi më shumë rreth tij.

Shefi i Shtabit të Përgjithshëm, Arben Kingji, tha se aktualisht Shqipëria është në fazën e procedimit dhe hartimit të praktikës dhe dokumenteve ligjore për dërgimin e trupave në mision.

“Shtabi i Përgjithshëm po bën vlerësimin e saktë në lidhje me misionin, detyrat, sigurinë e personelit, rregullat e angazhimit dhe mbështetjen logjistike. Kontingjenti i parë shqiptar që mund të dislokohet në Gazë do të jetë pjesë e shtabit të Forcës Ndërkombëtare Stabilizuese, ndërsa më pas do të shqyrtohet mundësia e një kontributi më të gjerë me trupa”, u shpreh Kingji.

Në fillim të majit u bë e ditur se një ekip ushtarësh të Kosovës është dërguar në Gazë, për të bërë vlerësimin e vendit ku do të veprojë si pjesë e misionit paqeruajtës.

Ministri Nufi theksoi se Shqipëria mbetet një aleate e palëkundur e NATO-s dhe një partnere aktive në sigurinë rajonale dhe ndërkombëtare.

Duke folur për bashkëpunimin në fushën e mbrojtjes mes Shqipërisë, Kosovës dhe Kroacisë – shtete që kanë nënshkruar një deklaratë bashkëpunimin në fushën e sigurisë dhe mbrojtjes vitin e kaluar – po hyn në një fazë më konkrete, me zhvillimin e tre stërvitjeve të përbashkëta ushtarake gjatë këtij viti.

“Dy stërvitje do të zhvillohen në Kroaci ku jemi në fazën e planifikimit, kemi dhënë dakordësinë për t’u zhvilluar stërvitjet. Po kështu, një stërvitje do të zhvillohet në Shqipëri. Nuk do të jenë vetëm tre shtete pjesëmarrëse [Shqipëri-Kosovë-Kroaci], por do të ketë edhe shtete të tjera nga NATO-ja, qoftë edhe shtete partnere me të cilat bashkëpunojmë”, tha Kingji.

Bashkëpunimin mes Prishtinës, Tiranës dhe Zagrebit, Serbia e sheh si aleancë kundër serbëve dhe Serbisë – pretendim që është hedhur poshtë nga shtetet nënshkruese të deklaratës për bashkëpunim.

Po ashtu, autoritetet e mbrojtjes bënë të ditur se Shqipëria ka nisur zyrtarisht përgatitjet për organizimin e samitit të NATO-s që do të mbahet vitin e ardhshëm në Tiranë.

“Kemi ngritur një task-forcë për zhvillimin e samitit të NATO-s. Nuk e kemi ende të përcaktuar vendndodhjen e samitit, por NATO merr masa të jashtëzakonshme sigurie për organizimin e këtyre ngjarjeve”, deklaroi ministri i Mbrojtjes i Shqipërisë, Ermal Nufi. /REL/

 

Continue Reading

Të kërkuara