OKB-ja vuri në dukje të martën se nuk mund të dërgojë ndihma humanitare në Rripin e Gazës pas mbylljes së pikave kufitare Rafah dhe Karem Abu Salim.

Zëdhënësi Stephane Dujarric citoi raportin e fundit të Zyrës së OKB-së për Koordinimin e Çështjeve Humanitare gjatë një konference për shtyp dhe theksoi se urdhrat e evakuimit nga forcat izraelite për palestinezët në Rafah lindor kanë “rezultuar në zhvendosjen e detyruar të dhjetëra mijëra njerëzve”.

Duke theksuar se banorët janë zhvendosur shumë herë gjatë shtatë muajve të fundit, Dujarric tha: “Civilët në Gaza duhet të mbrohen dhe të plotësohen nevojat e tyre themelore”.

Forcat izraelite lëshuan urdhra evakuimi të hënën për palestinezët në Rafahun lindor, shtëpia e 1.5 milionë palestinezëve të zhvendosur.

Dujarric theksoi nevojën për të siguruar kohën e duhur dhe një rrugë të sigurt me një destinacion përfundimtar të sigurt për ata që dëshirojnë të largohen.

Duke vënë në dukje se vendkalimet Rafah dhe Karem Abu Salim janë të mbyllura, Dujarric tha: “Kjo do të thotë se ne nuk mund të sjellim ndihmë humanitare, nuk mund të kemi akses në furnizime ushqimore. Ne duhet të trajtojmë më shumë se 3,000 fëmijë me kequshqyerje akute”.

Dujarric përmendi një sondazh të kryer nga UN Women dhe tha se ka të paktën 700,000 gra dhe vajza në Gaza, asnjëra prej të cilave nuk ka ku të shkojë.

Duke thënë se 93% e grave dhe vajzave nuk ndihen të sigurta në shtëpitë dhe strehimoret e tyre, sondazhi vuri në dukje se 80% e grave raportohet se vuajnë nga depresioni.

Gati 34,800 palestinezë janë vrarë në ofensivën e vazhdueshme të Izraelit në Gaza që nga tetori, tha të martën Ministria e Shëndetësisë e Gazës.

Izraeli akuzohet për gjenocid në një rast në Gjykatën Ndërkombëtare të Drejtësisë.

Një vendim i përkohshëm në janar tha se është “e besueshme” që Izraeli po kryen gjenocid në Gaza dhe urdhëroi Tel Avivin të ndalojë akte të tilla dhe të marrë masa për të garantuar ofrimin e ndihmës humanitare për civilët atje. /AA/

Sot mbahen zgjedhjet presidenciale dhe parlamentare në Maqedoninë e Veriut

Nga ora 07:00 janë hapur qendrat e votimit, kështu edhe ka filluar procesi i votimit për zgjedhjet parlamentare dhe presidenciale në Maqedoninë e Veriut.

Sa u përket qendrave të votimit, në vendvotimet që ka pasur probleme ose do të haset në te tilla gjatë ditës, procesi vazhdon edhe pas orës 19:00 për aq kohë sa ka zgjatur ndërprerja.

Për zgjedhjet presidenciale të drejtë vote kanë 1 milion e 814 mijë e 317 votues, ndërsa për zgjedhjet parlamentare ky numër është 1 milion e 815 mijë e 350 votues.

Hanan Balkhy, drejtoresha rajonale e Organizatës Botërore të Shëndetësisë për Mesdheun Lindor, tha se operacioni ushtarak i Izraelit në Rafah po vë në rrezik jetën e mbi 1.5 milion njerëzve, në mesin e tyre 600 fëmijë, dhe duhet të marrë fund tani.

Ajo shkroi në llogarinë e saj në “X” se pika kufitare në Rafah duhet të rihapet urgjentisht për të mundësuar kalimin e sigurt të ndihmave humanitare.

Ukraina dhe Rusia kanë akuzuar njëra-tjetrën për përdorimin e toksinave të ndaluara në fushën e betejës.

Organizata për Ndalimin e Armëve Kimike (OPCW), e cila ndodhet në Hagë, tha se të gjitha akuzat janë “të pamjaftueshme” për t’u vërtetuar.

Sipas OPCW-së, situata është e paqëndrueshme dhe jashtëzakonisht shqetësuese në lidhje me rishfaqjen e mundshme të përdorimit të kimikateve toksike si armë”. Asnjëra palë nuk i ka kërkuar OPCW-së të hetojë përdorimin e supozuar të armëve kimike.

Javën e kaluar, Rusia mohoi akuzat nga SHBA se ka përdorur agjentin mbytës kloropicrin kundër trupave ukrainase dhe ka përdorur agjentë të kontrollit të trazirave “si një metodë lufte”.

Sipas Konventës për Armët Kimike, çdo kimikat toksik i përdorur me qëllim të dëmtimit ose vdekjes konsiderohet armë kimike./UBTNews/