Lajmet

​LDK akuzon Arben Vitinë se i ka vjedhur programin për Prishtinën

Zogaj tha se do t’i marrin të gjitha masat ligjore për t’i dëshmuar pretendimet e tyre.

Published

on

Lidhja Demokratike e Kosovës, dega në Prishtinë, ka akuzuar Arben Vitinë se ka vjedhur programin për kryeqytetin. Sipas tyre, kandidati i Lëvizjes Vetëvendosje për Prishtinë ka bërë plagjiat projekteve të kandidatit të tyre Përparim Ramës, në projektin e lidhjes së lagjeve me qendrën, parkingjet dhe ridefinimin e qendrës së qytetit.

Shefi i shtabit zgjedhor të LDK-së në Prishtinë, Alban Zogaj, në një konferencë për media tha se do t’i marrin të gjitha masat ligjore për t’i dëshmuar pretendimet e tyre.

“Ditëve të fundit kemi qenë dëshmitarë të kopjimit që i është bërë projekteve të kandidatit tonë, Përparim Rama, nga ana e kundër kandidatit të tij nga Vetëvendosje, Arben Vitia, i cili u inkuadrua në garë ditë më parë, pa asnjë projekt, e pas një menaxhimi katastrofal të pandemisë. Kandidati ynë, Rama, ka kohë që ka shpalosur projektet e tij, të cilat do të kenë ndikim të jashtëzakonshëm në transformimin e Prishtinës, projekte të cilat i ka vizualizuar dhe i ka paraqitur para publikut përgjatë muajve të fundit. Ajo çka kemi parë mbrëmë në botimin e programit të Vitisë është plagjiat i projekteve të Përparim Ramës dhe vjedhje e të drejtës së autorit, dhe siç e dini, kjo është jo etike, por edhe e dënueshme”, tha ai.

Zogaj paraqiti edhe disa shembuj, ku sipas tij shihet qartazi kopjimi që Vitia i ka bërë programit të Ramës.

“Përparim Rama që një kohë të gjatë prezanton projektin që do të lidhin lagjet me qendrën e Prishtinës. Dje në projektin e Arben Vitsië janë të prezantuara me fjalë të njëjta platforma multifunksionale të cilat lidhin lagjet mes veti. Pra projektet unike që janë origjinale të Përparim Ramës prezantohen në programin e Arben Vitisë. Rasti i dytë është rasti i parkingjeve në Prishtinë, Rama ka muaj të tërë që prezanton projektet e tij për 6 parkingje kryesore në Prishtinë që janë të vendosura në pikat kyçe, njëra ndër to është projekti te rrethi i flamurit, te stacioni i autobusëve, një te Pallati i Rinisë, dhe një tjetër te Kodra e Trimave që është projekt origjinal i Ramës. Rasti i tretë eklatant është pjesa e ridefinimit të qendrës”, tha Zogaj.

Krahas kësaj, Zogaj tha se kandidati i LDK-së Përparim Rama i ka hyrë garës për ta transformuar Prishtinën dhe jo për t’u marrë me kundër kandidatë të tjerë.

“Ajo çka kemi thënë vazhdimisht, dhe është potencuar nga vetë Rama, është e saktë: arkitekti dhe urbanisti Rama i ka hyrë garës për Prishtinën për ta transformuar atë dhe për t’ia kthyer jetën qytetit dhe fshatrave në Komunën e Prishtinës. Deri më sot, nuk jemi marrë asnjëherë me kundër kandidatët e Përparim Ramës, sepse kemi besuar se qytetarët do ta vlerësojnë programin e qeverisjes dhe projektet konkrete te tij, por, sot, nuk mund të heshtim para një akti kaq të ulët, me të cilin synohet të mashtrohen qytetarët e Prishtinës. Ne e themi me kompetencë se asnjëri nga kundër kandidatët e Përparim Ramës as nuk ka aftësi, e as vizion për ta transformuar komunën tonë, kryeqytetin e Republikës, këtë e bën vetëm Përparim Rama”, tha Zogaj.

Zogaj ftoi qytetarët e Prishtinës që të bëjnë vetë vlerësimet dhe krahasimet e programeve qeverisëse, ku sipas tij, programi i tyre është shumë më i mirë se i të tjerëve.

Lajmet

Osmani takon presidenten e Zvicrës: Po e shkruajmë bashkë kapitullin e ri

Published

on

By

Presidentja Vjosa Osmani, ka nisur vizitën shtetërore në Zvicër, me ftesë të Këshillit Federal të Zvicrës.

Në një postim në Facebook, e para e shtetit tonë ka falënderuar për mikpritjen, miqësinë dhe nderimin presidenten zvicerane Karin Keller-Sutter.

Kjo vizitë e parë shtetërore në Zvicër që po fillon në rezidencën zyrtare të Këshillit Federal të Zvicrës është dëshmi se bashkë po shkruajmë kapitullin e ri të historisë së partneritetit midis shteteve dhe popujve tanë”, ka shkruar Osmani.

Continue Reading

Lajmet

Maqedonia e Veriut pritet të nënshkruajë marrëveshje për partneritetit strategjik me Britaninë

Published

on

By

Maqedonia e Veriut pritet të bëhet vendi i parë nga Ballkani Perëndimor që nënshkruan marrëveshje për partneritetit strategjik me Britaninë e Madhe.

Marrëveshja në vlerë rreth 6 miliardë euro pritet të nënshkruhet të enjten në Londër nga një delegacion i Qeverisë maqedonase, i udhëhequr nga zëvendëskryeministri Aleksandar Nikolovski.

Megjithatë, hollësitë e këtij partneriteti dhe kushtet sipas të cilave Maqedonia e Veriut do të marrë burimet financiare nga Britani, nuk janë bërë të ditura ende.

Autoritetet maqedonase dhe Londra e mohojnë se marrëveshja përfshin pranimin e emigrantëve në Maqedoni, të cilëve nuk u është pranuar azili në Britani.

Është diçka që nuk na ka shkuar kurrë në mendje dhe askush nuk na e ka kërkuar”, u tha kryeministri Hristijan Mickoski anëtarëve të partisë së tij VMRO DPMNE në Shkup, të dielën.

Për të, marrëveshja është “historike”, sepse qasja në 6 miliardë euro kredi të favorshme, “do të sjellë një revolucion investimesh në vend, një cikël investimesh vërtet historik, që do të thotë punë, ndërtim, zhvillim”, tha Mickoski, duke përmendur ndërtimin e hekurudhave, autostradave, spitaleve dhe konvikteve studentore.

Ambasadori britanik në Shkup, Mattheë Laëson, gjithashtu mohoi spekulimet për dërgimin e emigrantëve në Maqedoni, duke theksuar se bashkëpunimi në këtë fushë do të lidhet me luftën kundër rrjeteve kriminale dhe shkëmbimin e informacionit të inteligjencës./REL/

Continue Reading

Lajmet

Presidentja Osmani nis vizitën në Zvicër, pritet nga presidentja zvicerane

Published

on

By

Presidentja e Republikës së Kosovës, Vjosa Osmani, është pritur sot nga Presidentja e Konfederatës Zvicerane, Karin Keller-Sutter, në Lohn Manor – rezidenca zyrtare e Këshillit Federal të Zvicrës.

Kjo pritje u zhvillua në kuadër të vizitës shtetërore që Presidentja Osmani po realizon këto ditë në Zvicër.

Në takim me Presidenten Osmani janë edhe kryetari i Drenasit, Ramiz Lladrovci, kryetari i Obiliqit, Xhafer Gashi dhe Qemajl Aliu, kryetari i Komunës së Shtimes.

Pas takimit bilateral, Presidentja Osmani do të pritet me nderime ushtarake në Sheshin Federal në Bernë. Më pas, të dyja presidentet do të japin deklarata për media nga Ndërtesa e Parlamentit/Këshilli Federal.

Vizita do të vazhdojë me një konferencë të përbashkët për media të dy lidereve, ku pritet të diskutohen marrëdhëniet dypalëshe, bashkëpunimi ndërkombëtar dhe roli i diasporës kosovare në Zvicër.

Gjatë qëndrimit në Zvicër, Presidentja Osmani do të zhvillojë gjithashtu një takim me mërgatën shqiptare në qytetin e Gjenevës.

Continue Reading

Lajmet

Kryediplomatja evropiane Kallas këtë javë viziton Serbinë dhe Kosovën

Published

on

By

Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, do ta vizitojë Kosovën më 22 maj, në kuadër të një turneu që do ta nisë më 21 maj në Ballkanin Perëndimor, ka bërë të ditur Shërbimi Diplomatik i BE-së.

Kallas do të udhëtojë edhe në Serbi dhe në Maqedoninë e Veriut gjatë vizitës së saj të dytë në rajon, ka njoftuar Brukseli, të mërkurën.

Në Kosovë, përfaqësuesja e Lartë Kallas do të takohet me përfaqësues të partive politike dhe të organizatave të shoqërisë civile”, thuhet në një njoftim të BE-së.

Shefja e diplomacisë evropiane ka planifikuar të mbajë edhe një konferencë për media, më 22 maj.

Kallas do ta vizitojë Kosovën në kohën kur autoritetet kosovare po përsërisin thirrjet për heqjen e masave ndaj vendit nga ana e BE-së, madje kanë kërkuar që kjo të ndodhë para vazhdimit të dialogut për normalizim marrëdhëniesh me Serbinë.

BE-ja, në anën tjetër, ka kërkuar shtensionim situate në Kosovë, teksa Kosova po vazhdon me mbylljen e institucioneve paralele serbe në veri të vendit, gjë që ka nxitur reagimin e Brukselit.

Në Prishtinë, Kallas pritet të vizitojë edhe Misionin e BE-së për Sundim të Ligjit (EULEX), si dhe komandantin e misionit paqeruajtës të Organizatës së Traktatit të Atlantikut Verior (NATO) në Kosovë – KFOR, Enrico Barduani.

Vizita e Kallasit në Prishtinë këtë javë ishte paralajmëruar nga presidentja e Kosovës, Vjosa Osmani, e cila ka thënë se për shkak të vizitës së saj të planifikuar zyrtare në Zvicër nuk do të mund ta priste kryediplomaten evropiane në Kosovë.

Para vizitës në Kosovë, Kallas do të qëndrojë në Serbi.

BE-ja ka njoftuar se Kallas do ta takojë në Beograd presidentin Aleksandar Vuçiq, kryeministrin Gjuro Macut, si dhe ministrin e Jashtëm, Marko Gjuriq, atë për Integrime Evropiane, Nemanja Staroviq, dhe kryetaren e Kuvendit, Ana Bërnabiq, dhe grupet parlamentare opozitare.

Ndërkaq, kryediplomatja evropiane në Shkup do ta takojë kryeministrin Hristijan Mickoski, ka bërë të ditur Brukseli.

Në kryeqendrën maqedonase, Kallas “do ta hapë Dialogun e parë për Siguri dhe Mbrojtje ndërmjet BE-së dhe Maqedonisë së Veriut me ministrin për Punë të Jashtme dhe Tregti, Timço Mucunski”, ka njoftuar Shërbimi Diplomatik i BE-së./REL/

Continue Reading

Të kërkuara