Kryetari i Lëvizjes Vetëvendosje, njëherit edhe kandidati për kryeministër të Kosovës, Albin Kurti u ka bërë thirrje mërgatës shqiptare në Maqedoninë e Veriut që të regjistrohen meqë regjistrimi i popullsisë, amvisërive dhe banesave.

Kurti nëpërmjet një video-mesazhi ka kërkuar që secili qytetarë të regjistrohet duke theksuar se për të parën herë mërgata ka mundësi që procesin e regjistrimit ta realizojë nga vendi ku jeton.

“Në Maqedoninë e Veriut ka filluar procesi i regjistrimit të popullsisë amvisërive dhe banesave, ai ka filluar me 3 mars dhe përfundon me 21 prill. Regjistrimi regjistrohet 20 vjet pas atij të vitit 2002 sepse ai i vitit 2011 u anulua për arsye ende të panjohura nga regjimi i atëhershëm i Gruevskit. Për herë të parë mërgata jonë ka mundësi që procesin e regjistrimit ta realizojë nga vendi ku jeton pa qenë e detyruar si deri më tani që të marrë gjithë atë rrugë dhe të vijë në vendlindje për të regjistruar. Të drejtë për t’u regjistruar ka secili qytetarë me nënshtetësi të Maqedonisë së Veriut dhe që është i pajisur me numrin personal që përndryshe quhet numri amëz. Numrin amëz mund të gjeni në certifikatën e lindjes, certifikatën e të kurorëzuarve, në letërnjoftim dhe pasaportë. Meqë edhe me kushtetutën aktuale të drejtat politike të qytetarëve në Maqedoninë e Veriut diktohen dhe burojnë nga numrat regjistrimi i çdo qytetari është tejet i rëndësishëm”, thotë Kurti në një video-mesazh.

Kurti tutje ka thënë se do të vendosin qendrat e Lëvizjes Vetëvendosje të mërgatës në shërbim të qytetarëve të Maqedonisë së Veriut për t’iu asistuar në procesin e regjistrimit në internet.

“Shqiptarët janë një popull i lidhur për vendin, për truallin, për shtëpinë e për pronën e vet. Nga të dhënat zyrtare të Bankës Popullore të Maqedonisë së Veriut remitancat e mërgatës arrijnë deri në 2 miliardë euro në vit. Ne dimë se pjesa dërmuese e këtyre parave vijnë nga mërgata shqiptare, përshkak të diskriminimit institucional dhe ekonomik që është ushtruar ndaj shqiptarëve atje. Lëvizja jonë fitoi me një pjesëmarrje të fuqishme dhe të mrekullueshme të mërgatës duhet të krijojmë të njëjtin entuziazëm. Ne do të vendosim qendrat e Lëvizjes Vetëvendosje të mërgatës në shërbim të qytetarëve të Maqedonisë së Veriut për t’iu asistuar në procesin e regjistrimit në internet”, tha ndër tjera Kurti.

Regjistrim i diasporës përmes aplikacionit online mund të bëhet deri më 21 prill. Regjistrimi i popullsisë brenda vendit pritet të nisë më 1 prill dhe do të zgjasë deri më 21 prill.