Lajmet

​Kurti: Jemi të përkushtuar për avancimin e sistemit për menaxhimin e trafikut ajror

I pari i ekzekutivit theksoi rëndësinë që ka menaxhimi i trafikut ajror.

Published

4 years ago

on

Kryeministri i Republikës së Kosovës, Albin Kurti, së bashku me ministrin e Mjedisit, Planifikimit Hapësinor dhe Infrastrukturës, Liburn Aliu dhe zëvendësministrin e MMPHI, Hysen Durmishi, vizituan Agjencinë e Shërbimeve të Navigacionit Ajror. Kurti aty tha se do të bashkëpunojnë për të avancuar sistemin për menaxhimin e trafikut ajror.

I pari i ekzekutivit theksoi rëndësinë që ka menaxhimi i trafikut ajror, në mënyrë që Agjencia e Shërbimeve të Navigacionit Ajror dhe kontrolli ajror, të arrijë në nivel të shteteve evropiane.

I pari i Qeverisë përmendi edhe të arriturat të cilat janë vlerësuar, si zgjatja e pistës por edhe niveli i sistmemit 3B, derisa theksoi se është njoftuar nga drejtori i agjencisë për përgatitjet teknike të cilat po bëhen, që në të ardhmen të merret kontrolli i hapësirës ajrore.

“Drejtori Samir Bllacaku më njoftoi për përgatitjet teknike që janë duke u bërë në mënyrë që në të ardhmen të merret kontrolli i hapësirës ajrore të asaj që është mbi 6 mijë e 260 metra, me këtë rast do të kishim edhe përfitime financiare si shtet që vlerësohet të jenë diku në mes 6 dhe 7 milionë euro në vit. Dy të arriturat që janë vlerësuar me këtë rast është zgjatja e pistës por gjithashtu edhe niveli 3B i sistemit të aterrimit, i cili është shumë i avancuar. E vizituam edhe departamentin meteorologjik dhe Kullën e vrojtimit dhe pamë se si shkon procesi i vëzhgimit dhe mbikëqyrjes po ashtu duhet përmendur se është bërë shkurtimi i udhëtimit me qenë se janë hapur dy korridore të reja në Republikën e Shqipërisë dhe në këtë mënyrë nga Vjena kur shkon ose vije në Prishtinë kemi një udhëtim 15 minuta më të shkurtër, meqenëse nuk kemi nevojë të kalojmë në hapësirën e Maqedonisë së Veriut. Në veçanti e falënderojmë NATO-n dhe KROR-in për të gjithë kontributin e tyre për ASHNA-n dhe jemi të bindur që bashkëpunimi i mëtutjeshëm do të na shpije në përmbushjen e standardeve më të larta të kritereve të Bashkimit Evropian”, tha Kurti.

Ministri i Mjedisit, Planifikimit Hapësinor dhe Infrastrukturës, Liburn Aliu tha se si ide në projektet e reja është lidhja edhe me sistemin detar.

“Dua ta ndërlidh vetëm që transporti ajror është mënyrë e arsyeshme e transportit në përgjithësi. Do të synojmë që arritjet e mëtejme të zhvillimit të shërbimeve të navigimit ajror që do të bëhen nga kjo agjenci të mundësojnë kapacitetet tona ajrore për shtetin, të rriten edhe në fushën e transportit të mallrave. Kjo lidhet me mënyra tjera të sistemit tokësor, atij hekurudhor dhe automobilistik, përtej projekteve të reja, ta lidhim edhe me atë detar, me detin Adriatik. Të gjitha këto, ndërlidhja e tyre do të krijojë mundësi në vendin tonë për shkak se zona në regjionin e Prishtinës do të jetë zonë e distribuimit të mallrave të cilat vijnë nga transportet detare dhe të jenë të gatshme për të gjithë regjionin. Kjo do të sjellë mundësi të zhvillimit ekonomik dhe për këtë arsye e kemi marrë seriozisht realizimin e këtyre projekteve dhe si ministri do ta bëjmë punën tonë, kemi mbështetjen e kryeministrit dhe të Qeverisë dhe kemi qëllimin e Agjencisë së Shërbimit të Navigimit Ajror për realizimin e këtyre projekteve”, tha Aliu.

E drejtori i Agjencisë së Shërbimeve të Navigimit Ajror, Samir Bllacaku tha se agjencia për herë të parë është vizituar nga një kryeministër. Madje shtoi se kanë përkrahjen e ekzekutivit për projektet.

Related Topics:
Continue Reading

Lajmet

​Skuadra e Serie-A shkarkon trajnerin

Published

6 hours ago

on

November 4, 2025

By

Fiorentina e ka shkarkuar Stefano Piolin pas një humbjeje kundër Lecces, e cila e la ekipin në fund të tabelës së Serie A pa fitore, katër pikë, shtatë gola të shënuar dhe 16 të pësuar.

Trajneri i të rinjve Daniele Galloppa do të marrë përkohësisht përsipër detyrën, por kërkimi për një pasardhës të përhershëm do të fillojë menjëherë, ndërsa klubi kërkon të shmangë betejën për rënie nga kategoria.

“ACF Fiorentina mund të konfirmojë se Stefano Pioli është shkarkuar nga detyrat e tij si trajner i ekipit të parë”, thuhet në një deklaratë të klubit. “Klubi dëshiron ta falënderojë atë dhe stafin e tij për profesionalizmin e treguar gjatë kohës së tyre në Fiorentina.”

Daniele Galloppa do të marrë përkohësisht drejtimin e ekipit të parë, duke filluar nga seanca stërvitore e kësaj pasditeje.

Fitues i kampionatit të Serie A në sezonin 2021/22 me Milanin, Pioli ka përjetuar një rënie të ndjeshme në performancë dhe rezultate vitet e fundit.

Në vitin 2024, ai u punësua nga klubi saudit Al-Nassr, ku luajti Cristiano Ronaldo , por pati pak sukses në Arabinë Saudite./S.K/KP/

Continue Reading

Lajmet

KDI: Presidentja të ofrojë transparencë dhe qartësi për procesin e caktimit të mandatarit

Published

6 hours ago

on

November 4, 2025

By

Instituti Demokratik i Kosovës (KDI) ka kërkuar nga Presidentja e vendit që të sigurojë transparencë dhe qartësi në procesin e caktimit të mandatarit për formimin e Qeverisë, pas dështimit të votimit në Kuvend më 26 tetor.

Sipas KDI-së, Presidentja ka obligim që deri nesër, brenda afatit dhjetëditor të përcaktuar me nenin 95.4 të Kushtetutës, të zhvillojë konsultime me të gjitha partitë parlamentare për të vlerësuar mundësinë reale të krijimit të një shumice të re qeverisëse dhe shmangien e zgjedhjeve të reja.

KDI thekson se hapat e Presidentes duhet të jenë të arsyeshëm dhe transparentë, përfshirë publikimin e kritereve që do të udhëheqin vlerësimin e “gjasës më të madhe për formim të shumicës” dhe mënyrën e verifikimit të mbështetjes në Kuvend.

Sipas institutit, këto kritere janë thelbësore për të garantuar paanshmëri dhe respektim të rendit kushtetues, si dhe për të ruajtur besimin publik në institucionet demokratike./EO

Continue Reading

Lajmet

​Dybala mungon një muaj

Published

7 hours ago

on

November 4, 2025

By

Sulmuesi argjentinas Paulo Dybala do të mungojë të paktën për një muaj pas dëmtimit muskulor që pësoi në ndeshjen kundër Milanit të dielën.

Sipas Sky Sport Italia, ekzaminimet mjekësore kanë zbuluar një dëmtim të shkallës në bicepsin femoris të majtë. “La Gazzetta dello Sport” shkruan se ai do të humbasë pesë ndeshjet e ardhshme të Romës.

Dybala pritet të mungojë në takimet kundër Rangers, Udinese, Cremonese, Midtjylland dhe, me shumë mundësi, Napoli.

Trajneri Gian Piero Gasperini shpreson ta ketë sulmuesin gati më 30 nëntor kundër Napolit, por rikthimi i tij duket më i mundshëm në ndeshjen ndaj Cagliarit më 7 dhjetor./S.K/KP/

Continue Reading

Lajmet

Ndalohet importi i shpezëve dhe produkteve të tyre nga Italia

Published

7 hours ago

on

November 4, 2025

By

Agjencia e Ushqimit dhe Veterinarisë së Kosovës (AUV) ka njoftuar se ndalon përkohësisht importin e shpezëve, kafshëve të gjalla dhe produkteve të tyre me origjinë nga zonat e infektuara të Italisë.

Vendimi vjen pas raportimeve të Organizatës Botërore për Shëndetin e Kafshëve (WOAH) dhe Komisionit Evropian, të cilat konfirmojnë përhapjen e gripit të shpezëve (Avian Influenza – H5N1) në rajonet Emilia-Romagna dhe Lombardia.

Sipas AUV-së, importet lejohen vetëm nëse produktet vijnë nga ferma të pa prekura, të paktën 50 kilometra larg zonave të infektuara. Ndalesa hyn në fuqi menjëherë dhe do të qëndrojë aktive deri në një vlerësim të ri të situatës.

AUV njofton se po e monitoron nga afër situatën dhe do të informojë publikun dhe bizneset për çdo zhvillim të ri./EO

Continue Reading

Të kërkuara