Lajmet

​Kurti: Gjendja e komuniteteve nuk është e mirë

Kurti u zotua për përmirësimin e të drejtave të komuniteteve.

Published

on

Kryeministri Albin Kurti ka deklaruar se gjendja e komuniteteve romë, ashkalinjë e egjiptianë nuk është e mirë. Sipas tij, komunitet RAE po përballen me diskriminim, varfëri dhe mungesë të shanseve në aspektin socio-ekonomik. Në hapjen e samitit të parë të Ballkanit Perëndimor kundër diskriminimit racor, Kurti u zotua se një nga objektivat më të rëndësishme mbetet hartimi dhe zbatimi i politikave dhe legjislacionit për përmirësimin e të drejtave të komuniteteve.

Ai shtoi se ky samit ka për qëllim krijimin e praktikave të vendeve të ballkanit që të luftohet diskriminimi i komuniteteve.


“Ky samit ka për qëllim krijimin e një praktike të mbledhjes së akterëve kryesor për të diskutuar se si vendet e Ballkanit Perëndimor mund të luftojnë diskriminimin ndaj komuniteteve romë, ashkalinjë dhe egjiptianë, duke bashkëpunuar dhe ndarë praktikat më të mira institucionale, në mënyrë që të rritet mirëqenia e të përmirësohet cilësia e jetës së komuniteteve në vendet e rajonit tonë. Na duhet angazhim i përbashkët që të gjithë qytetarët tanë të ndjehen dhe të jenë pjesë e barabartë, si edhe vlerë e shtuar e shoqërisë. Krahas ndërgjegjësimit institucional si pikënisje, na duhet puna e përbashkët edhe me qytetarët. Pra, përgjegjësi institucionale, por edhe vetëdijësim shoqëror”, ka thënë Kurti.

Kurti u zotua se ekzekutivi do të vazhdojë përkushtimin për të përmirësuar kushtet socio-ekonomike përmes gjithëpërfshirjes dhe avancimit të komuniteteve.

“Ka ende shumë sfida, ngase gjendja e komuniteteve nuk është e mirë si nga aspekti i diskriminimit, po ashtu edhe nga ai i varfërisë edhe mungesa e shanseve në aspektin socio-ekonomik. Progresin e zhvillimit të shoqërive tona mund ta masim jo me atë se sa mirë jetojnë ata që kanë më së shumti, sepse ne e dimë që ata që kanë më së shumti ja bëjnë vetes qaren kollaj e shpejt. Por, ata të cilët kanë më së paku. Andaj si kryeministër i gjithë qytetarëve të Republikës së Kosovës pa dallim përkatësie etnike, feje apo prejardhje angazhohem për të gjithë njëlloj, por më së shumti e më së pari për ata të cilët kanë më së shumti nevojë”, ka shtuar Kurti.

Shefi i ekzekutivit në hapjen e këtij samiti ka shtuar se janë ndarë bursa për studentët e të tri komuniteteve me qëllim të përmirësimit dhe avancimit të gjendjes së tyre.

“Një nga objektivat më të rëndësishme të Qeverisë së Kosovës mbetet hartimi dhe zbatimi i politikave dhe legjislacionet që përmirësojnë dhe përmbushin të drejtat e të gjithë qytetarëve në vend, sidomos me fokus grupet më të margjinalizuara të shoqërisë. Po punojmë bashkë për të përmbushur synimet e programit të qeverisë, ku prioritet në kuadër të qëllimeve strategjike dhe objektivave operacionale të Zyrës së Kryeministrit është edhe përmirësimi dhe avancimi i gjendjes së komuniteteve romë, ashkalinjë dhe egjiptianë. Me këtë qëllim kemi ndarë bursa për 100 nxënës të komuniteteve romë, ashkalinjë dhe egjiptianë për studime në Fakultet të Edukimit… Po ashtu, kemi ndarë 500 bursa për studentët e komuniteteve romë, ashkalinjë dhe egjiptianë në drejtime të tjera të studimeve përveç edukimit”, ka përfunduar Kurti.

Drejtori e organizatës “Voice of Roma, Ashkali and Egyptians”, Isak Skenderi deklaroi se komunitetet nuk po gëzojnë të drejtat e tyre dhe po u mungojnë mundësitë.


“Sot në Kosovë, si kudo në vendet e Ballkanit Perëndimor, romët janë të bllokuar në një rreth vicioz përjashtimi. Ata nuk i gëzojnë të drejtat e tyre dhe u mungojnë mundësitë, pa mbrojtje, ata nuk janë të fuqizuar dhe një numër i madh i të rinjve romë përballen me mungesë të mundësive për të pasur qasje në hapësirë digjitale të shpejt të kërkuar nga tregu i punës në sektorin privat. Mungesa e njohurive për historinë e romëve, ashkalinjve dhe egjiptianëve dhe kulturës së tyre janë ndër shtypësit kryesor të antigjipsizmit në Kosovë. Antigjipsismi gjithmonë mohohet nga ofruesit e shërbimeve, të cilët pretendojnë se i trajtojnë të gjithë njësoj”, ka deklaruar ai.

Kryeministri Albin Kurti tha senjë pjesë e madhe e diskriminimit ndodhë për shkak se mbetet në heshtje e nuk raportohet. Platforma digjitale për mbrojtje nga diskriminimi për komunitet romë, ashkalinj dhe egjiptianë. Ai ka ftuar që të raportojnë rastet e diskriminimit në këtë platformë. 

Lajmet

Zhduket një person në Suharekë, Policia: Doli nga shtëpia me 1 tetor 25

Published

on

By

Zhduket një person në Suharekë. Sipas raportit të policisë, viktima mashkull ka dalë nga shtëpia dhe nuk dihet për vendndodhjen.

Është raportuar se viktima mashkull kosovar ka dalë nga shtëpia dhe nuk dihet për vendndodhjen e saj. Rasti nën hetime”, thuhet në raportin 24 orësh të Policisë së Kosovës./D.B/KP

Continue Reading

Lajmet

​Liga Konferenca, Drita nxjerr një pikë si mysafire

Published

on

Drita e Gjilanit ka nisur mbarë sezonin historik të klubit gjilanas në Ligën Konferenca duke luajtur baras në ndeshjen e parë në udhëtim ndaj skuadrës finlandeze KuPS.

Ndeshja u zhvillua në stadiumin Tammela në Tempere të Finlandës, me kapacitet prej tetë mijë ulësesh.

Polaku Piotr Parzyszek solli KuPS në epërsi në minutën e 74-të, pas asistimit nga Voutilainen.

Skuadra gjilanase u rikthye në lojë me golin e Albert Dabiqajt në minutën e 80-të, pas asistimit të Blerton Shejit.

Njëherësh Dabiqaj shënoi golin historik për Dritën në Ligën Konferenca pasi ky është goli i parë i skuadrës gjilanase në debutimin e saj në këtë ligë, e cila ka 36 ekipe evropiane,/S.K/KP/

Continue Reading

Botë

​SHBA gati të blejë aksione në kompanitë australiane të minierave

Published

on

Qeveria amerikane është gati të blejë aksione në kompanitë australiane të minierave si pjesë e një pakete për të financuar furnizimet me minerale dhe për të zvogëluar varësinë nga Kina, thanë udhëheqësit e biznesit australian pas një vizite në Uashington.

Oferta e qeverisë amerikane është pjesë e një plani për të krijuar zinxhirë furnizimi alternativë pas kufizimeve të eksportit të Kinës, raportojnë mediat amerikane.

Mineralet kryesore të teknologjisë përfshijnë litiumin, kobaltin dhe metalet e rralla të tokës, të nevojshme nga një gamë e gjerë industrish, duke përfshirë energjinë e pastër, gjysmëpërçuesit dhe armët.

Zyrtarët e qeverisë amerikane u kanë thënë kompanive të paraqesin oferta, duke vënë në dukje se kanë ndërmend të financojnë blerjen përmes kanaleve dhe programeve të ndryshme, tha Andrew Worland, drejtor ekzekutiv i International Graphite, e cila po ndërton një minierë dhe një fabrikë përpunimi në Australi.

Në shtator, përfaqësuesit e 15 kompanive australiane në sektorin kryesor të mineraleve, përfshirë Worland, vizituan Uashingtonin dhe Nju Jorkun për t’u takuar me zyrtarë amerikanë.

Ata u takuan gjithashtu me ish-drejtorin ekzekutiv të kompanisë minerare Newmont, David Copley, dhe Joshua Kroon, zëvendësndihmës sekretar për mineralet dhe metalet kryesore në Agjencinë e Tregtisë Ndërkombëtare të Departamentit të Tregtisë të SHBA-së.

Departamenti i Energjisë i SHBA-së bleu dje një aksion prej 5 për qind në Lithium Americas të Kanadasë dhe gjithashtu u bë pronar i një aksioni prej 5% në një minierë litiumi që kompania kanadeze po zhvillon në Nevada.

Australia është e gatshme t’u shesë aksione aleatëve, përfshirë Britaninë, aksione në rezervat e reja strategjike të mineraleve kryesore, për t’u lejuar atyre të zvogëlojnë varësinë e tyre nga Kina.

Qeveria australiane njoftoi krijimin e rezervave në fund të prillit, duke vënë në dukje se do të investojë 1.2 miliardë dollarë australianë (670 milionë euro) në këtë projekt me qëllim krijimin e një zinxhiri të ri furnizimi që mund të konkurrojë me Kinën dominuese.

Kina është prodhuesi kryesor në botë i 30 nga 50 mineralet e konsideruara si kryesore nga Shërbimi Gjeologjik i SHBA-së. Australia, nga ana tjetër, ka depozita që janë ndër më të mëdhatë në botë.

Pritet që këto rezerva të jenë temë kryesore e negociatave midis kryeministrit australian Anthony Albanese dhe presidentit amerikan Donald Trump më 20 tetor në Uashington./S.K/KP/

Continue Reading

Botë

​Kulla Eiffel mbyllet mes grevave mbarëkombëtare në Francë

Published

on

Kulla Eiffel u mbyll të enjten për shkak të një greve mbarëkombëtare në Francë nga sindikatat kryesore të vendit.

Protestuesit dolën në rrugët e më shumë se 200 qyteteve dhe qytezave në të gjithë Francën për të denoncuar shkurtimet e shpenzimeve dhe për të kërkuar taksa më të larta për të pasurit.

Në Paris, mijëra punëtorë, pensionistë dhe studentë filluan të marshonin të enjten pasdite nga Place d’Italie dhe një tabelë në Kullën Eiffel i informoi vizitorët se ishte mbyllur për shkak të grevës dhe kërkuan falje.

Sindikatat po i kërkojnë kryeministrit Sébastien Lecornu të braktisë masat e projektbuxhetit të propozuara nga paraardhësi i tij, të cilat përfshijnë ngrirje të mirëqenies sociale dhe masa shtrënguese që shumë thonë se do ta gërryejnë më tej fuqinë blerëse të punëtorëve me paga të ulëta dhe të klasës së mesme. Ato gjithashtu kërkojnë taksa më të larta për të pasurit.

Lecornu, i emëruar muajin e kaluar, ende nuk ka zbuluar detajet e planeve të tij buxhetore dhe ende nuk ka emëruar ministrat e qeverisë së tij, gjë që pritet në ditët në vijim.

SNCF, kompania kombëtare hekurudhore, tha se shërbimet e trenave me shpejtësi të lartë po funksiononin normalisht të enjten, ndërsa disa linja rajonale u prekën nga ndërprerje të pjesshme.

Në Paris, trafiku i metrosë ishte afër normales, por shumë trena udhëtimi po funksiononin me kapacitet të reduktuar.

Disa mësues dhe punonjës të kujdesit shëndetësor gjithashtu iu bashkuan grevës, e cila vjen pas protestave të muajit të kaluar.

Kujtojmë, më 18 shtator, mbi 500 mijë demonstrues marshuan në qytetet e vogla dhe të mëdha të Francës, përfshirë Parisin. Një javë më parë, një ditë aksionesh antiqeveritare në të gjithë Francën pa rrugët e mbuluara nga tymi, barrikadat në flakë dhe breshëri gazi lotsjellës mes fushatës “Blloko gjithçka”./S.K/KP/CBSNews/

Continue Reading

Të kërkuara