Çmimi “Ylli i javës” për javën e 31-të në Albi Mall Superligë i ka takuar sulmuesit të Llapit, Muhamet Hyseni.

Vlerësimi i më të mirit të javës është bërë nga Komisioni i veteranëve të futbollit në përbërje: Skender Krapa, Fatmir Mehmeti dhe Fisnik Ademi.

Ky komision vendosi që çmimi “Ylli i Javës” për xhiron e 31-të t’i takoj Muhamet Hysenit, i cili shënoi të dy golat për fitoren e skuadrës nga Podujeva në udhëtim ndaj Prishtinës.

Pasi mori këtë çmim, Hyseni u shpreh i lumtur që u vlerësua si më i miri i javës.

“Ndihem jashtëzakonisht mirë pasi që për herë të pestë shpallem “Ylli i Javës”, çmim ky që vjen pas paraqitjeve shumë të mira në vazhdimësi të të gjithë ekipit. Kjo po më ndihmon edhe mua të realizoj gola dhe të fitoj këtë çmim. Tek Llapi kemi një atmosferë fantastike dhe jemi shumë të bashkuar, andaj besoj që do ta mbyllim sezonin me trofeun e kampionit që e kemi si synim. Na mbetet që edhe këto pesë ndeshjet e fundit të japim maksimumin dhe t’i gëzojmë gjithë tifozët llapjanë dhe “Legjendat” – u shpreh Hyseni për faqen zyrtare të FFK-së.

Në duelin e fundit ndërmjet Ballkanit dhe FC Suharekës u shfaq një fotografi e yllit të Ballkanit, Nazmi Gripshi me fanellën e Suharekës, duke ngjallur kështu spekulime se ai mund të bëjë një lëvizje tek rivali i Ballkanit.

Për këto pretendime ka folur edhe trajneri i FC Suharekës, Arsim Thaçi i cili ka mohuar që skuadra e tij të ketë nisur bisedimet për transferimin mesfushorit nga Shqipëria edhe pse nuk e ka fshehur dëshirën që ta kishte atë në skuadrën e tij.

“Unë dhe secili trajner do të kishim dëshirë ta kishim Gripshin në ekip sepse vërtetë ka treguar cilësi të jashtëzakonshme me Ballkanin, por nganjëherë gjërat varen edhe nga lojtarit dhe rrethanave të tjera, jo vetëm prej dëshirës së trajnerit apo klubit. Kështu që ajo që është e vërtetë duhet të deklarojë se nuk besoj asnjë prej klubit tonë, as për Gripshin, por Endrit Krasniqi që ka dalë se ka filluar negociata me Suharekën, nuk ka asnjë lojtar që filluar negociata me Suharekën dhe nuk besoj që do të fillojë pa përfunduar kampionati” – ka thënë Thaçi.

Përndryshe, FC Suhareka është liderë e grupit A të Ligës së Parë me 50 pikë dhe është shumë afër titullit kampion dhe inkuadrimit në Superligën e Kosovës.

Rapid Bucurest mund të humbasë një nga lojtarët më të rëndësishëm të skuadrës që ka në këtë sezon. Bëhet fjalë për Ermal Krasniqin i cili të cilin ka një ofertë nga Bundesliga. I transferuar nga Cluj në fillim të këtij viti, sulmuesi kosovar mund të largohet nga kampionati romun në verë, sipas raportimeve të mediave në Rumani.

“Rapid ka marrë një ofertë për transferimin e Krasniqit. E kemi fjalën për Werder Bremenin, vendin e 10-të në Bundesligë. “Rapidistët” kërkojnë për Ermal Krasniqin 3 milionë euro plus një përqindje prej 20% për një transferim të mundshëm. Të shohim nëse palët arrijnë marrëveshje” – ka thënë gazetari Horia Ivanovici, për “FANATIK”.

Sulmuesi 25-vjeçar ka luajtur 13 ndeshje me fanellen e Rapid Bucurestit ku edhe ka shënuar pesë gola dhe ka dhuruar tri asistime. Teksa, çmimi i tij në tregun e transferimeve arrin në shifrën e 1.5 milionë eurove.

Trajneri i Tottenhamit, Ange Postecoglou e ka konfirmuar se mbrojtësi i krahut, Destiny Udogie do të mungojë në Kampionatin Evropian Euro 2024.

Javën e kaluar u bë e ditur se Udogie nuk do të mund ta ndihmojë Kombëtaren e Italisë në Euro 2024 si pasojë e lëndimit, ndërsa ky lajm u konfirmua sot.

Postecoglou e konfirmoi se Udogie do të mungojë në Euro 2024, dhe plani i Tottenhamit për të është që ai të rikthehet në stërvitje në muajin korrik.