Lajmet

KMDLNj: Marrëveshja për trafikim të të burgosurve me Danimarkën është raciste

KMDLNj në reagim thekson se në Kosovë do të përballen me probleme të vizitave.

Published

3 years ago

September 18, 2023

UBT news

Këshilli për Mbrojtjen e të Drejtave e të Lirive të Njeriut ka reaguar sërish lidhur me marrëveshjen e Ministrisë së Drejtësisë dhe autoriteteve të Danimarkës, duke thënë se të burgosurve që do të vendosen dhunshëm në Kosovë nga Danimarka do t’iu shkelen të drejtat e njeriut duke filluar nga trajtimi në baza raciste që ua bëjnë autoritetet daneze.

KMDLNj në reagim thekson se në Kosovë do të përballen me probleme të vizitave sidomos për fëmijët e tyre dhe anëtarët e moshuar të familjes.

“Do të kenë probleme të trajtimit të rasteve të rënda shëndetësore të cilat nuk do të trajtohen brenda Burgut të Gjilanit. Do të kenë problem të komunikimit me stafin sikur edhe të përshtatjes në një mjedis tjetër social. Do të jetë problem i shfrytëzimit të beneficioneve dhe probleme tjera”, thuhet në reagim.

Reagim i KMDLNj – së:

Rikujtim i KMDLNj-së për deputetët e Kuvendit të Kosovës

MARRËVESHJA PËR TRAFIKIM TË TË BURGOSURVE ME DANIMARKËN ËSHTË DISKRIMINUESE DHE RACISTE!

Ministri i Drejtësisë së Danimarkës, i shoqëruar me Komisionin për Legjislacion të atij vendi ishte për vizitë në Qendrën e Paraburgimit në Pasjak të Gjilanit për të vizituar vendin ku, sipas një marrëveshjeje të nënshkruar më parë, do të vendosen mbi 300 të burgosur dhe të dënuar nga Danimarka, asnjë nga ta nuk është shtetas i Danimarkës por nga shtetet e treta e që janë dënuar në Danimarkë por se ky shtet, nga pozitat e trajtimit puro racist i dërgon në një shtet tjetër duke mos bërë përpjekje fare t’i risocializojë ata. Arsyetimi i Danimarkës është mashtrues sepse, sipas tyre nuk paska kapacitete të mjaftueshme për t’i vendosur dhe ekzekutuar dënimet për shtetasit e shteteve të treta kurse, po në të njëjtën kohë paska kapacitete të mjaftueshme të mbajnë në institucionet korrektuese të gjithë shtetasit e Danimarkës. Prej kohës kur është nënshkruar marrëveshja midis Danimarkës dhe Kosovës, autoritetet daneze kanë pasur kohë të mjaftueshme sikur edhe mundësi të mëdha materiale ta ndërtojnë një burg në Danimarkë apo të përshtatin një objekt ku do t’i vendosnin të dënuarit, asnjëri nga ta shtetas i Danimarkës. Por qëllimi është se qartazi nuk duan të merren me ta prandaj ua shesin Kosovës për një afat 10 vjeçar, me një kompensim 210 milionë euro që kur të përpjesëtohet dhe hiqen investimet del të jetë një shumë e papërfillshme.

Arsyetimi tjetër ishte dhe është politik; se Danimarka e paska njohur Kosovën që në fillim, se Hans Hakerup paska qenë kryeadministrator i Kosovës dhe broçkulla tjera kurse, dje, ministri danez i drejtësisë tha se Danimarka do ta ndihmojë Kosovën në proceset integruese në BE–e dhe anëtarësim në Këshill të Evropës gjëra që nuk kanë fare të bëjnë me të burgosurit nga Danimarka që do të transferohen në Kosovë. Madje, po të ishte Kosova anëtare e Këshillit të Evropës kjo marrëveshje as që do të jetësohej shkaku se shkelë të drejtat e njeriut të personave të privuar nga liria në baza etnike dhe racore. Nuk është e vërtetë se trajtimi i të burgosurve ka qenë përcaktues që Danimarka ka vendosur për Kosovën e jo për ndonjë shtet tjetër. E vërteta është se asnjë shtet nuk ka pranuar as të bisedojë për këtë çështje sepse kjo marrëveshje, ashtu siç është e përligj trafikimin me qenie njerëzore sikur edhe krijimin e një sistemi paralel korrektues brenda një shteti. Në rastin konkret në Kosovë do të kemi dy sisteme korrektuese, ai që është aktualisht në fuqi sipas Ligjit për Ekzekutim të Sanksioneve Penale të Kosovës dhe sistemi paralel korrektues për Burgun e Gjilanit që punon sipas Ligjit për Ekzekutim të Sanksioneve Penale të Danimarkës. Të burgosurit e importuar nga Danimarka do të trajtohen sipas ligjeve të Danimarkës ku standardet janë shumë më të larta se në Kosovë, në të gjitha aspektet; shëndetësorë, ushqimit, trajtimit, kushteve fizike, beneficioneve, vizitave, aktiviteteve sportive dhe kulturore etj. Nga Ministria e Drejtësisë doli një “zotim“ se të burgosurit nga Danimarka do të trajtohen mirë në Kosovë në kohën që këta nuk do të pyeten për asgjë sepse ligjet e Kosovës vdesin brenda Burgut të Gjilanit ku do të jenë në fuqi ligjet e Danimarkës. Është ndoshta paradoksale por të burgosurit që i janë shitur Kosovës nga Danimarka do të kenë trajtim shumë më të mirë dhe kushte më të mira se që do t’i kenë oficerët e Shërbimit Korrektues të Kosovës. Mos të flasim për krahasim me të privuarit nga liria kosovarë dhe të huaj që e vuajnë dënimin në burgjet e Kosovës.

Me këtë marrëveshje humbësit më të mëdhenj do të jenë personat e privuar nga liria në Kosovë që, as përsëafërmi nuk do të trajtohen sikur të burgosurit e importuar nga Danimarka, në asnjë aspekt. Në aspektin afatgjatë, Shërbimi Korrektues i Kosovës do të jetë humbës i padiskutueshëm sepse për shkak të dallimeve jonormale të trajtimt brenda një sistemi unik juridik të një vendi, këta do të përballen me revolten e të dënuarve vendas. Pastaj, të burgosurit nga Burgu i Gjilanit duhet të vendosen në qendra të tjera që e ruajtjen e një mjedisi social përmes vizitave dhe takimeve me familjarë. Brenda SHKK –së, nuk po ka guxim të kundërshtohet kjo marrëveshje shkaku se mund t’i humbin vendet e punës sikur që në skenë tani është një garniturë karrieristësh që nuk marrin fare vesh me punën e Shërbimit Korrektues prandaj po favorizojnë bashkëpunëtorë me një të kaluar aspak të mirë e që shumë e kanë dëmtuar Shërbimin Korrektues të Kosovës, i cili, përkundër ndërhyrjeve të vazhdueshme politike, ka qenë shërbim shumë i mirë dhe i suksesshëm, krahasuar me vendet e rajonit. Tash, ndërhyrjet politike në punën e Shërbimit Korrektues të Kosovës janë kapitale.

Të burgosurve që do të vendosen dhunshëm në Kosovë nga Danimarka do t’iu shkelen të drejtat e njeriut duke filluar nga trajtimi në baza raciste që ua bëjnë autoritetet daneze. Në Kosovë do të përballen me probleme të vizitave sidomos për fëmijët e tyre dhe anëtarët e moshuar të familjes. Do të kenë probleme të trajtimit të rasteve të rënda shëndetësore të cilat nuk do të trajtohen brenda Burgut të Gjilanit. Do të kenë problem të komunikimit me stafin sikur edhe të përshtatjes në një mjedis tjetër social. Do të jetë problem i shfrytëzimit të beneficioneve dhe probleme tjera.

Ministria e Drejtësisë e Kosovës po mundohet të bind deputetët e Kuvendit të Kosovës se kjo është marrëveshje ndërkombëtare, se është e dobishme për Kosovën prandaj duhet ta votojnë pa asnjë kundërshtim.

Deputetët e Kuvendit të Kosovës duhet ta kenë të qartë se kjo marrëveshje legalizon një sistem tjetër, të një shteti tjetër të Ligjit për Ekzekutim të Sanksioneve Penale të të cilin nuk do ta pranonte asnjë shtet normal. Duket se deputetët e Kuvendit të Kosovës nuk e kanë të qartë se çka po votojnë dhe se çfarë dëmi po i shkaktojnë Shërbimit Korrektues të Kosovës dhe se me votimin e kësaj Marrëveshjeje ata, në fakt po e legalizojnë një trajtim racist të personave të privuar nga liria duke i trajtuar të burgosurit e Kosovës si të burgosur të rendit të dytë krahasuar me ata të Danimarkës. Në këtë mënyrë do të bëhen pjesë aktive e shkeljes së të drejtave të njeriut të personave të privuar nga liria. Në fund të fundit, gjatë zgjedhjeve deputetët nuk e kërkojnë votën e të burgosurve nga Danimarka por votën e të burgosurve nga Kosova prandaj edhe përfaqësojnë dhe duhet t’i mbrojnë interesat e votuesve të tyre, të burgosurve nga Kosova.

Nuk ka shtet në botë që ka funksionuar një marrëveshje e tillë. Madje, edhe një marrëveshje e dy shteteve nordike që kanë vlera të njëjta demokratike në trajtimin e personave të privuar nga liria ka zgjatur vetëm një vit e gjysmë.

KMDLNj–ë e kundërshton fuqishëm këtë marrëveshje dhe, në një kohë të përshtatshme do t’i drejtohet të gjitha organizatave ndërkombëtare për të drejtat e njeriut sikur edhe autoriteve daneze.

Vota për këtë Marrëveshje është votë për racizmin dhe për diskriminimin e personave të privuar nga liria. Prandaj, analizojeni mirë këtë marrëveshje, sidomos pasojat që do të jenë të pashmangshme për Shërbimin Korrektues të Kosovës dhe për të privuarit dhe të dënuarit kosovarë.

Nëse votohet kjo marrëveshje, atëherë do të jetë legalizim i Zajednicës daneze në sistemin Korrektues të Kosovës ku do të kemi dy sovranitete korrektuese brenda një shteti të vetëm.

Vendi

Kurti pret ekipin e OKB-së: Diskutohet Plani Strategjik 2026–2030 dhe forcimi i bashkëpunimit

Published

2 hours ago

March 31, 2026

UBTNews

Kryeministri i Republikës së Kosovës, Albin Kurti, priti sot në një takim Ekipin e Kombeve të Bashkuara në Kosovë (UNKT), të udhëhequr nga Koordinatori për Zhvillim, Stephen O’Malley. Gjatë këtij takimi, vëmendje kryesore iu kushtua prioriteteve të Planit Strategjik të UNKT-së për periudhën 2026–2030, si dhe zbatimit të Agjendës 2030 për zhvillim të qëndrueshëm.

Kryeministri Kurti vlerësoi lart faktin që prioritetet e këtij plani janë në përputhje të plotë me agjendën kombëtare të zhvillimit, duke mirëpritur vazhdimësinë e mbështetjes së OKB-së në vend. Gjatë diskutimit, ai vuri në dukje se ky partneritet është dëshmuar edhe përmes veprimeve konkrete financiare.

“Qeveria ka kontribuar edhe përmes bashkëfinancimit në programet e OKB-së në vend, duke nënvizuar përkushtimin e fortë të Kosovës ndaj bashkëpunimit me këtë organizatë,” ka thënë Kurti.

Nga ana tjetër, përfaqësuesit e UNKT-së prezantuan synimet për vitin 2026, duke shprehur gatishmërinë për të mbështetur institucionet e Kosovës si në aspektin zbatues, ashtu edhe në atë normativ. Fokus i veçantë në bisedë u vu mbi reformat dhe forcimin e kapaciteteve institucionale, ku agjencitë e OKB-së mund të japin kontributin e tyre profesional.

“Jemi të gatshëm të mbështesim Qeverinë në forcimin e kapaciteteve institucionale dhe avancimin e reformave, duke u fokusuar në fushat ku agjencitë tona mund të japin kontributin më të madh,” u theksua nga ana e përfaqësuesve të UNKT-së.

Takimi u përmbyll me dakordimin e të dyja palëve për të forcuar më tej mekanizmat e koordinimit dhe për të vazhduar bashkëpunimin e ngushtë në dobi të proceseve zhvillimore të vendit.

Vendi

27 vjet nga mizoria serbe në Rahovec e Malishevë, Osmani: Pa drejtësi s’ka paqe

Published

2 hours ago

March 31, 2026

UBTNews

Sot, kur shënohet 27-vjetori i masakrës së Pastaselës së Rahovecit dhe asaj në Burim të Malishevës, Presidentja e Kosovës, Vjosa Osmani, ka rikujtuar viktimat e krimeve barbare të kryera nga regjimi serb në marsin e vitit 1999.

Përmes një komunikate për media, Presidentja Osmani ka theksuar se këto akte ishin pjesë e një makinerie vrasëse që synonte shfarosjen e popullit shqiptar, duke rikujtuar se më 31 mars 1999, në fshatin Pastaselë të Rahovecit, forcat serbe ekzekutuan brutalisht 106 civilë të pafajshëm.

E para e shtetit u shpreh se në Pastaselë u shpërfaqën përmasat e një mizorie që tejkalon çdo kufi njerëzor, duke e cilësuar këtë si një akt të qëllimshëm kundër jetës, dinjitetit dhe vetë ekzistencës së një populli.

“Në Pastaselë të Rahovecit, 106 civilë të pafajshëm u masakruan nga regjimi gjenocidal i Serbisë, duke shpërfaqur përmasat e një mizorie që tejkalon çdo kufi njerëzor. Ishte një akt i qëllimshëm kundër jetës, dinjitetit dhe vetë ekzistencës së një populli,” u shpreh Osmani.

Ajo kujtoi gjithashtu se nga kjo masakër mbijetuan vetëm 13 persona, të cilët sot mbajnë mbi supe peshën e rëndë të dëshmisë për tmerrin e përjetuar.

Në të njëjtën ditë, makineria vrasëse e Serbisë goditi edhe fshatin Burim të Malishevës, ku u ekzekutuan mizorisht 42 civilë të tjerë.

Presidentja potencoi se pa drejtësi nuk mund të ketë paqe të qëndrueshme, duke bërë thirrje që autorët e këtyre krimeve të dalin para përgjegjësisë dhe duke përfunduar mesazhin e saj me nderimin se qoftë i përhershëm kujtimi për të rënët për liri.

Vendi

REL: Tarifat e reja të rrymës shtyhen për 1 maj

Published

2 hours ago

March 31, 2026

UBTNews

Tarifat e reja të energjisë elektrike të parapara të hyjnë në fuqi më 1 prill, pritet të shtyhen deri më 1 maj, ka bërë të ditur kryesuesi i bordit të Zyrës së Rregullatorit për Energji (ZRRE), Ymer Fejzullahu.

“Tarifat aktuale të energjisë elektrike do të mbesin në fuqi gjatë muajit prill, ndërsa tarifat e reja pritet të hyjnë në fuqi më 1 maj”, tha Fejzullahu për Radion Evropa e Lirë.

ZRRE-ja bën shqyrtimin dhe përcaktimin vjetor të tarifave të energjisë elektrike, të cilat zakonisht shpallen më 1 prill dhe vlejnë deri më 31 mars të vitit pasues.

Tre operatorët energjetikë në Kosovë, në muajin janar të këtij viti kanë kërkuar rritjen e tarifave të rrymës për vitin 2026.

Rritja e çmimit të rrymës është kërkuar nga Operatori për Furnizim me Energji Elektrike (KESCO), Operatori i Sistemit, Transmisionit dhe Tregut (KOSTT) dhe Kompania për Distribuim të Energjisë Elektrike në Kosovë (KEDS).

KESCO ka kërkuar rritje mbi 20 për qind të tarifave të energjisë elektrike për vitin 2026, por nga ZRRE-ja thanë se ende nuk ka ndonjë shifër se sa do të jetë përqindja e rritjes së çmimit.

Për rritjen e kësaj përqindjeje, KESCO është thirrur në sasinë e madhe të importit të energjisë elektrike.

Po ashtu, Korporata Energjetike e Kosovës, (KEK), thuhet në aplikim, ka paraparë vazhdimin e projekteve të rehabilitimit të njësive gjeneruese, kësaj radhe në termocentralin Kosova B, njësia B1, me një kohëzgjatje të planifikuar prej rreth tetë muajsh, krahasuar me pesë muaj më 2025 për njësinë B2.

Kjo situatë sipas KESCO-s pritet që të kufizojë edhe prodhimin vendor dhe të rrisë varësinë nga importi.

Arsye tjetër në dokument përmendet edhe rritja e pagës minimale nga Qeveria e Kosovës.

Zyrtarë të ZRRE-së, në janar të këtij viti, kanë thënë për Radion Evropa e Lirë se “kërkesat do t’iu nënshtrohen shqyrtimit dhe se do të aprovohen vetëm kostot që vlerësohen si të arsyeshme”.

Sipas aplikimit të dorëzuar në ZRRE, KESCO ka kërkuar që të hyrat e lejuara maksimale për vitin e ardhshëm të jenë 528.78 milionë euro.

Vitin e kaluar, KESCO kishte kërkuar të hyra të lejuara maksimale rreth 448 milionë euro, ndërsa ZRRE-ja kishte aprovuar rreth 436 milionë euro.

Ndërkaq, KEDS-i ka kërkuar 235 milionë euro apo 21 milionë euro më shumë se sa kërkesa fillestare e vitit të kaluar që ishte 214 milionë euro. Ndërsa, vitin e kaluar, ZRRE-ja i kishte aprovuar këto të hyra në vlerën prej 180.653 milionë euro.

Kurse kërkesa e KOSTT-it, që tha se synon të ofrojë shërbime më cilësore për konsumatorët, është mbi 99 milionë euro, nga rreth 102 milionë euro sa ishte vitin e kaluar. Vitin paraprak, ZRRE-ja kishte aprovuar këto të hyra në vlerën prej 88 milionë euro.

Vitin e kaluar, ZRRE-ja kishte miratuar rritje të tarifave për 16.1 për qind krahasuar me vitin paraprak.

Sipas tarifave aktuale, konsumatorët që shpenzojnë deri në 800 kilovat në orë në muaj paguajnë 9.05 centë për kilovat, ndërsa ata që shpenzojnë mbi këtë prag paguajnë 15.43 centë për kilovat.

Kurse tarifat e lira që shfrytëzohen gjatë natës nga ora 23:00 deri në 08:00 të mëngjesit, konsumatorët për një kilovat paguajnë 3.88 centë për ata që shpenzojnë deri në 800 kilovatë.

Ndërkaq, ata që shpenzojnë më shumë se 800 kilovatë paguajnë 7.28 centë për kilovat./REL/

Lajmet

BBC: “Kosova në eufori” – Ndeshja me Turqinë konsiderohet dita më e madhe që nga Pavarësia

Published

3 hours ago

March 31, 2026

UBTNews

Mediumi prestigjioz britanik, BBC, i ka kushtuar një vëmendje të jashtëzakonshme përballjes së sontme të “Dardanëve”, duke e cilësuar rrugëtimin e Kosovës si një histori suksesi që ka lënë pa fjalë botën e futbollit.

Nga izolimi te pragu i Botërorit

BBC shkruan se vetëm dhjetë vjet më parë, Kosova nuk kishte luajtur asnjë ndeshje kualifikuese, ndërsa sot gjendet vetëm 90 minuta larg pjesëmarrjes në Kampionatin Botëror 2026. Ky progres cilësohet si “i pabesueshëm” për një komb që u njoh nga FIFA dhe UEFA vetëm në vitin 2016.

“Fadil Vokrri” i vogël për ëndrrën e madhe

Në artikull citohet përzgjedhësi Franco Foda, i cili tregon për kërkesën e çmendur të tifozëve për të qenë të pranishëm në stadiumin e kryeqytetit:

“Kemi një stadium vetëm për 13,000 spektatorë, por po të ishte e mundur, do të ishin 100,000. Të martën kemi një lojë historike. Jemi në eufori, por duhet të luajmë me qetësi,” ka thënë Foda për BBC.

Më shumë se futboll: Pesha historike

Për shumë kosovarë, kjo ndeshje tejkalon sportin. Analisti Arben Berisha, në një prononcim për BBC-në, ka theksuar rëndësinë kombëtare të këtij momenti:

“Disa e kanë quajtur të martën ditën më të madhe në historinë e Kosovës që kur u shpall pavarësia në vitin 2008. Kjo mund të jetë dita e tretë historike: Çlirimi në 1999, Pavarësia në 2008 dhe tani kualifikimi në Botëror.”

Rrugëtimi i vështirë dhe krenaria kombëtare

BBC ka biseduar edhe me ish-kapitenin Anel Rashkaj, i cili kujton kohërat kur lojtarët duhej të luftonin me klubet e tyre vetëm për t’u lejuar të veshin fanellën e Kosovës:

“Kemi kaluar kohë shumë të vështira me luftën dhe problemet ekonomike. Kombëtarja u ka dhënë këtyre njerëzve ndjenjën se jemi të fortë, se mund të bëjmë emër në Evropë. Na bën krenarë që njerëzit shohin se kosovarët kanë shumë për t’i dhënë botës,” u shpreh Rashkaj.