Lajmet

Kërkohet zgjatja e afatit të Komisionit Qeveritar për Njohjen e Statusit të viktimave të dhunës seksuale, qeveria nuk përgjigjet

Katër organizatat e licencuara po kërkojnë nga kryeministri që të zgjatet mandati i këtij komisioni të paktën për pesë vjet.

Published

3 years ago

March 18, 2022

Betim Gashi

Në fund të prillit përfundon mandati i Komisionit Qeveritar për Njohjen e Statusit të Viktimave të dhunës seksuale. Gratë dhe burrat nga Kosova që janë dhunuar seksualisht gjatë luftës së fundit në Kosovë, kanë mundësi për të aplikuar pranë këtij komisioni deri në shkurt të vitit të ardhshëm. Katër organizatat e licencuara po kërkojnë nga kryeministri që të zgjatet mandati i këtij komisioni të paktën për pesë vjet, në mënyrë që mos të krijohet vakuum ligjor për shqyrtimin e rasteve që kërkojnë njohjen e statusit të viktimës së dhunës seksuale.

E lidhur me këtë, që nga dita e djeshme, KosovaPress ka tentuar që të marrë një përgjigje nga qeveria në rast se do të zgjatet ky mandat, por të njëjtit nuk janë përgjigjur.

Udhëheqësja e Qendrës Kosovare për Rehabilitimin e të Mbijetuarve të Torturës, Feride Rushiti thotë për KosovaPress se në rajon mekanizma të tillë nuk kanë afat kohor.

“Kemi kërkuar që t’i zgjatet mandati Komisionit Qeveritar për Njohjen dhe Verifikimin e Statusit të viktimave të dhunës seksuale nga kryeministri për faktin që ky mandat skadon me 28 prill të këtij viti. Për të mos u krijuar një vakuum ligjor ose në pamundësi që anëtarët që janë pjesë e këtij komisioni që të mos kenë mandat për të nënshkruar vendime dhe për t’i shqyrtuar lëndët, ne kemi krijuar në mënyrë urgjente, pasi që edhe prilli po ofrohet që të merren hapa konkret që Qeveria të zgjat mandatin e komisionit qeveritar të paktën në afat pesëvjeçar. Në mënyrë që të mbijetuarit e dhunës seksuale të luftës të cilët janë të gatshëm që të aplikojnë për tu njohur statusi i tyre”, deklaron Rushiti për KosovaPress.

Deri në muajin shkurt kanë aplikuar mbi 1600 gra e burra, ku kanë deponuar historitë e tyre të para më shumë se 23 vitesh.

Drejtoresha Feride Rushiti shprehet se krimet e luftës nuk parashkruhen e as afatizohen.

“Krimet e luftës nuk parashkruhen e as afatizohen dhe e drejta në krime të luftës, siç janë viktimat e dhunës seksuale nuk do të duhej të ishin të afatizuara në një periudhë kohore pesëvjeçare. Ne këtë çështje e kemi adresuar edhe më herët si organizata pranë institucioneve relevante, qoftë në Zyrën e Kryeministrit, qoftë në Komisionin për të Drejtat e Njeriut në parlament, qoftë në mekanizma të tjerë të shtetit. Dhe ka pasur një gatishmëri edhe pse ende konkretisht nuk është bërë asgjë”, shton drejtoresha e QKRMT-së.

Për viktimat e dhunës seksuale të cilët po jetojnë me plagët e luftës, Rushiti thotë se po tentojnë të krijojnë mundësi që të fitojnë të drejtën për benefite pa afat të caktuar.

“Në qoftë se nuk zgjatet mandati para kësaj periudhe kohore, realisht anëtarët e komisionit nuk kanë mandat për të shqyrtuar lëndët. Nuk kanë mandat për të marrë vendim, për të kërkuar personin ose të mbijetuarin për të ardhur në intervistë. Thjesht bie mandati i komisionit, kështu që kjo do të krijonte një vakuum ligjor edhe një amulli tek të mbijetuarat. Edhe kjo pritje që edhe tashmë është e stërzgjatur edhe më shumë do ta rriste”, thekson ajo.

Komisioni Qeveritar për Njohjen dhe Verifikimin e Statusit të Personave të Dhunuar është përcaktuar me vendim të qeverisë me 28 prill të vitit 2017 dhe skadon këtë vit. Ndërkaq, ky komision ka filluar punën zyrtarisht në shkurt të vitit 2018.

Organizatat Anëtare të Platformës Bëhu Zëri Im janë Qendra Kosovare për Rehabilitimin e të Mbijetuarve të Torturës; QPDG – Qendra për Promovimin e Drejtave të Grave; Medica Gjakova dhe Medica Kosova.

Lajmet

KQZ: Fillon periudha për aplikim të partive për zgjedhjet lokale

Published

5 hours ago

June 26, 2025

UBTNews

Komisioni Qendror i Zgjedhjeve (KQZ) ka hapur zyrtarisht periudhën për aplikim të subjekteve politike që synojnë të marrin pjesë në zgjedhjet lokale të 12 tetorit 2025. Afati për aplikim do të zgjasë 49 ditë, deri më 13 gusht.

Zëdhënësi i KQZ-së, Valmir Elezi, ka bërë të ditur se për të lehtësuar këtë proces, aplikimi do të mund të bëhet online përmes platformës elektronike të KQZ-së.

“Duke filluar nga sot, subjektet politike mund të aplikojnë për certifikim për pjesëmarrje në zgjedhje. Gjatë kësaj periudhe, ato duhet të dorëzojnë edhe listën me emrat e kandidatëve për kryetarë të komunave dhe për kuvendet komunale”, tha Elezi.

Ai shtoi se vendimi për llojin e pjesëmarrjes dhe për komunat ku do të garojnë i mbetet në dorë secilit subjekt politik. “Subjektet politike mund të vendosin nëse duan të garojnë vetëm për kryetar komune, për kuvend komunal ose për të dyja”, deklaroi Elezi.

Lajmet

Falsifikim parash në Prishtinë, arrestohet një person

Published

5 hours ago

June 26, 2025

UBTNews

Njësia për Hetimin e Krimeve Ekonomike në Prishtinë ka ndaluar një person nën dyshimin për prodhim të parasë së falsifikuar. Sipas raportit 24-orësh të Policisë së Kosovës, i dyshuari është arrestuar pas një pune operative hetimore.

Me urdhër të prokurorit, është kryer bastisje në banesën e të dyshuarit, ku janë sekuestruar materiale të ndryshme që shërbenin për prodhimin e kartëmonedhave false. Në mesin e provave të konfiskuara janë: 135 fletë formati A4 me fotokopje të kartëmonedhave të ndryshme, një xham me holograme të prera, një skalper dhe vizore, katër ngjitës, shirit izolues, një printer, një telefon dhe një shumë parash në vlerë prej rreth 4,796 euro.

Pas intervistimit, me vendim të prokurorit, i dyshuari është dërguar në mbajtje.

Lajmet

Gjashtë raste dhune në familje brenda një dite, tre të dyshuar në mbajtje

Published

5 hours ago

June 26, 2025

UBTNews

Në raportin 24-orësh të Policisë së Kosovës janë evidentuar gjithsej gjashtë raste të dhunës në familje në qytete të ndryshme të vendit. Rastet përfshijnë dhunë fizike dhe psikike, ndërsa në disa prej tyre janë ndërmarrë masa ligjore ndaj të dyshuarve.

Në Prishtinë janë regjistruar dy raste. Në një rast, një grua ka raportuar se bashkëshorti i saj ka ushtruar dhunë psikike ndaj saj pas një mosmarrëveshjeje. Palët janë shoqëruar në stacionin policor dhe rasti është proceduar në procedurë të rregullt. Në një rast tjetër, një burrë është arrestuar pasi dyshohet se ka sulmuar fizikisht partneren me të cilën bashkëjeton. I njëjti është dërguar në mbajtje me vendim të prokurorit.

Në Ferizaj, është arrestuar një person pasi nëna e tij ka raportuar se i dyshuari, nën ndikim të alkoolit, kishte fyer dhe shtyrë atë. Pas intervistimit, i dyshuari është dërguar në mbajtje.

Në Pejë, është raportuar se një grua ka qenë viktimë e keqtrajtimit fizik nga i dashuri i saj. I dyshuari nuk është gjetur në vendbanimin e tij dhe rasti është duke u hetuar.

Në Vitomiricë, është arrestuar një person nën dyshimin se kishte ushtruar dhunë psikike ndaj babait të tij. I njëjti është dërguar në trajtim psikiatrik dhe më pas i është caktuar masa e ndalimit për 48 orë me vendim të prokurorit.

Në Mitrovicën e Jugut, është raportuar se një grua ka qenë viktimë e dhunës nga bashkëshorti i saj. Është bërë bastisje në shtëpinë e të dyshuarit, por nuk është gjetur ndonjë provë dhe nuk është raportuar për ndonjë arrestim.

Lajmet

Rreth 2200 tiketa trafiku brenda 24 orëve, 30 persona të arrestuar

Published

5 hours ago

June 26, 2025

UBTNews

Gjatë 24 orëve të fundit Policia e Kosovës ka shqiptuar gjithsej 2182 tiketa trafiku.

Gjatë së njëjtës periudhë janë regjistruar 71 aksidente trafiku, prej të cilave 22 kanë përfunduar me persona të lënduar, ndërsa 49 me dëme materiale. Fatmirësisht, nuk është raportuar asnjë aksident me fatalitet.

Në aspektin e rendit dhe sigurisë publike, 30 persona janë arrestuar, ndërsa 14 prej tyre janë dërguar në mbajtje. Po ashtu, dy persona janë futur në vuajtje të dënimit, ndërsa nuk është raportuar asnjë rast ndalimi policor.

Policia ka theksuar rëndësinë e respektimit të rregullave të trafikut, si dhe bashkëpunimin e qytetarëve për të parandaluar incidentet që rrezikojnë jetën dhe sigurinë publike.