Kombëtarja e Kosovës në volejboll për vajza ka regjistruar edhe fitoren e dytë radhazi në ndeshjet miqësore ndaj Kombëtarës së Shqipërisë në volejboll për vajza, duke triumfuar me rezultat 3:1 në përballjen e zhvilluar në Fark të Shqipërisë.

Ndeshja u zhvillua në kuadër të përgatitjeve për CEV Volleyball European League 2026, ku Kosova synon të paraqitet sa më e përgatitur në sfidat zyrtare të muajit qershor.

Vashat kosovare treguan lojë të mirë, stabilitet dhe organizim në parket, duke konfirmuar progresin e ekipit nën drejtimin e shtabit teknik të udhëhequr nga përzgjedhësi Lorik Ilazi. Në staf janë edhe ndihmësit Ylli Kadriu dhe Vlora Berisha, ndërsa së fundmi ekipit i është bashkuar edhe trajneri spanjoll Alberto Ruiz Rubio.

Kosova do të zhvillojë gjashtë ndeshje gjatë muajit qershor në kuadër të European League 2026. Fillimisht do të përballet me Kombëtarja e Spanjës në volejboll për vajza më 6 qershor, më pas ndaj Kombëtarja e Bosnjë dhe Hercegovinës në volejboll për vajza më 7 qershor.

Më 12 qershor, Kosova luan kundër Kombëtarja e Greqisë në volejboll për vajza, më 14 qershor përballet me Kombëtarja e Portugalisë në volejboll për vajza, ndërsa më 19 dhe 21 qershor do të luajë ndaj Kombëtarja e Malit të Zi në volejboll për vajza dhe Kombëtarja e Hungarisë në volejboll për vajza.

Federata e Volejbollit e Kosovës ka falënderuar Federata Shqiptare e Volejbollit për bashkëpunimin dhe organizimin e ndeshjeve miqësore, të cilat konsiderohen shumë të rëndësishme për përgatitjen e të dy kombëtareve.

Mbrojtësi i Kosovës, Florent Hadërgjonaj, po vazhdon të marrë vlerësime të mëdha në mediat turke pas një sezoni të shkëlqyer me Alanyaspor.

Mediumi turk “SonDakika” ka shkruar të hënën se 31-vjeçari zhvilloi një nga edicionet më të mira të karrierës së tij gjatë sezonit 2025/26, duke u shndërruar në një prej futbollistëve më të rëndësishëm të skuadrës.

Përveç sigurisë në repartin defensiv, Hadërgjonaj impresionoi edhe në fazën sulmuese. Ai e mbylli sezonin me statistika mbresëlënëse, duke realizuar nëntë gola dhe duke kontribuar me 11 asistime në të gjitha garat.

Sipas “SonDakika”, reprezentuesi kosovar ishte një nga lojtarët kyç në pikët e grumbulluara nga Alanyaspori këtë sezon dhe hyri në histori si një nga mbrojtësit më produktivë jo vetëm të klubit, por edhe të Superligës turke.

Hadërgjonaj është pjesë e Alanyasporit që nga vera e vitit 2023, ndërsa kontrata e tij me klubin turk skadon në vitin 2027.

Te skuadra turke aktivizohet edhe mbrojtësi tjetër kosovar, Fidan Aliti.

Federata e Futbollit e Kosovës në bashkëpunim me sponsorin zyrtar të Superligës, Albi Mall, ka ndarë çmimin tradicional “Ylli i Javës” për xhiron e 35-të të elitës së futbollit kosovar.

Ky vlerësim i është dhënë futbollistit të KF Drenica, Kreshnik Uka, pas paraqitjes së tij të jashtëzakonshme në fitoren dramatike 3-2 ndaj KF Ferizaj.

Uka ishte protagonisti kryesor i takimit, duke realizuar dy gola dhe duke kontribuar edhe me një asistim, në një ndeshje shumë të rëndësishme për skuadrën e tij në luftën për mbijetesë.

Vlerësimi për “Yllin e Javës” është bërë nga Komisioni i Veteranëve të Futbollit, i cili e veçoi mesfushorin e Drenicës si lojtarin më të dalluar të javës në Superligë.

Pas marrjes së çmimit, Kreshnik Uka u shpreh i lumtur për kontributin e tij dhe rëndësinë e triumfit ndaj Ferizajt.

Ai theksoi se çdo ndeshje në stinorin pranveror ka qenë si finale për Drenicën dhe se skuadra ishte e vetëdijshme për vështirësinë e përballjes, pavarësisht pozitës së kundërshtarit në tabelë.

Uka gjithashtu falënderoi bashkëlojtarët, stafin teknik dhe tifozët për mbështetjen, ndërsa shtoi se skuadra do të kërkojë fitore edhe në ndeshjen e fundit ndaj FC Prishtina për t’iu shmangur barazhit dhe për të siguruar mbijetesën direkte në elitë.