UBT do të organizojë për herë të parë Konferencën Ndërkombëtare për Mjekësinë Sportive (IC-SM 2025), e cila do të mbahet nga 23 – 25 tetor 2025 në Parkun Shkencor, Inovativ dhe Teknologjik të UBT-së, në Lipjan. Kjo konferencë zhvillohet në kuadër të edicionit të 14-të të Konferencës Ndërkombëtare të UBT-së dhe vjen si platformë unike për shkëmbimin e njohurive dhe përvojave në fushën e mjekësisë sportive.

IC-SM 2025 është një konferencë ndërkombëtare ku pritet të marrin pjesë studiues të njohur, akademikë, doktorantë, profesionistë dhe ekspertë të fushës së mjekësisë sportive dhe shëndetit publik. Ajo do të shërbejë si një urë bashkëpunimi midis komunitetit akademik, institucioneve ndërkombëtare dhe organizatave sportive për të avancuar kërkimet dhe praktikat moderne në këtë disiplinë gjithnjë e më të rëndësishme.

Temat kryesore të konferencës

Konferenca do të mbulojë një gamë të gjerë temash, ndër to:

• Mjekësia klinike sportive dhe rehabilitimi
• Menaxhimi i sëmundjeve kronike dhe popullatat e veçanta
• Aspektet neurologjike dhe psikologjike të sportit
• Shëndeti publik, ushqyerja dhe farmacologjia
• Teknologjia, etika dhe trendet e së ardhmes
• Konsideratat kardiovaskulare dhe biomekanike

Pjesëmarrës eminentë

Konferenca do të mbledhë në Prishtinë personalitete botërore të fushës së mjekësisë sportive, si:

• Prof. Dr. Fabio Pigozzi – President i Federatës Ndërkombëtare të Mjekësisë Sportive (FIMS) dhe lider global në shëndetin olimpik
• Prof. Dr. Norbert Bachl – Nënkryetar i FIMS, specialist në fiziologjinë e ushtrimeve dhe mjekësinë sportive, Universiteti i Vjenës
• Annika Hangleiter – Menaxhere projektesh në Wearables Technologies AG, ligjëruese në Universitetin e Aplikuar të Mynihut
• Prof. Dr. Gobert von Skrbensky – Specialist i ortopedisë dhe traumatologjisë, Austri

Programi dhe struktura

Konferenca nis më 23 tetor 2025 me ceremoninë solemne të hapjes së edicionit të 14-të të Konferencës Ndërkombëtare të UBT-së dhe pritjen e pjesëmarrësve në UBT Smart City.

Më 24 tetor 2025, do të mbahet sesioni kryesor me fjalimet e ligjëruesve eminentë ndërkombëtarë dhe shqiptarë, ku do të trajtohen tema që lidhen me shëndetin e sportistëve, parandalimin e sëmundjeve, teknologjitë e reja në sport dhe ndërthurjen e tyre me inovacionet shkencore. Po ashtu, do të zhvillohen prezantime të punimeve shkencore të rishikuara nga kolegët, duke ofruar një hapësirë të rëndësishme për studiuesit e rinj dhe profesionistët e fushës.

Dita e fundit, më 25 tetor 2025, do të përfshijë një vizitë kulturore në vendet historike dhe me rëndësi në Prishtinë, duke kombinuar shkencën me kulturën dhe traditën vendore.

Mbështetja institucionale

Konferenca organizohet nga UBT në bashkëpunim me:

• Shoqatën e Mjekësisë Sportive dhe Ushtrimeve të Kosovës (KASEM)
• Federatën Ndërkombëtare të Mjekësisë Sportive (FIMS)
• Komitetin Olimpik të Kosovës
• Rrjetin Universitar të Ballkanit Perëndimor SHAPE Project – Sport, Health, and the People

Afatet e rëndësishme

Afati për dorëzimin e abstrakteve: 10 tetor 2025

Njoftimi i pranimit: 17 tetor 2025

Afati i regjistrimit të hershëm: 17 tetor 2025

Afati i regjistrimit të vonuar: 20 tetor 2025

Afati i dorëzimit të punimeve të plota: 14 nëntor 2025

IC-SM 2025 shënon një hap të madh për Kosovën dhe rajonin, duke e vendosur UBT-në dhe Prishtinën si një qendër të rëndësishme shkencore dhe sportive në nivel ndërkombëtar.

Sulmuesi kosovar, Vedat Muriqi, u konsiderua hero i Mallorcës pasi e shpëtoi nga humbja nga Atletico Madridi.

Mallorca dhe Atletico Madridi ndanë pikët pas barazimit prej 1-1, ku fillimisht mysafirët kaluan në epërsi me anë të Gallagher i cili realizoi për 0-1 në minutën e 79-të.

Por, festa e madrilenëve u prish vetëm gjashtë minuta më vonë pasi Muriqi realizoi gol të bukur me kokë për ta vënë sërish baraspeshën në fushë.

Me golin e sotëm, Muriqi arrin në shifrën prej katër golave të shënuara në pesë xhirot e para të La Ligës, e që aktualisht është golashënuesi i dytë më i mirë në La Liga, pasi mbi të është vetëm ylli Kylian Mbappe me pesë gola.

Mallorca gjendet në pozitën e 19-të me vetëm dy pikë, me pesë gola të shënuara në total, ku katër prej tyre janë të Muriqit, teksa Atletico Madridi gjendet në pozitën e 12-të me gjashtë pikë./S.K/KP/

KB Trepça sonte do të përballet me kampionin e Holandës, Heroes Den Bosch, në çerekfinale të kualifikimeve për Ligën e Kampionëve në Basketboll.

Kualifikimet po mbahen në Samokov të Bullgarisë, ku ‘Xehetarët’ do të kenë përkrahjen e shumë mitrovicasve.

Nëse kampionët e Kosovës kalojnë këtë pengesë, atëherë në gjysmëfinale do të përballen me fituesin e ndeshjes Bakken Bears (Danimarkë) dhe BC Kutaisi 2010 (Gjeorgji).

Për të qenë pjesë e grupeve në Ligën e Kampionëve për herë të parë, ‘Xehetarët’ duhet të fitojnë tri ndeshje. Nëse nuk arrijnë të fitojnë, atëherë do të garojnë në grupet e FIBA Europe Cup, sikur edicionin e kaluar.

Sfida sonte zhvillohet nga ora 20:00./S.K/KP/

Real Madridi nuk do të marrë pjesë në ceremoninë e ndarjes së çmimeve “Topi i Artë 2025”, e cila zhvillohet sonte në Teatrin Chatalet të Parisit.

Vendimi vjen si pasojë e qëndrimit të prerë të presidentit Florentino Perez, i cili ka ndërhyrë personalisht për të refuzuar çdo prani të klubit në këtë ngjarje.

Sipas “The Athletic”, ky bojkot është i dyti radhazi nga ana e madrilenëve.

Vitin e kaluar, Perez vendosi të mos marrë pjesë pasi mësoi paraprakisht se Vinicius Jr. nuk do ta fitonte çmimin kryesor, i cili në vend të tij iu dha Rodrit. Edhe këtë herë, pavarësisht nominimeve të shumta, Real Madridi nuk do të ketë përfaqësim zyrtar në gala.

Perez dyshon se vendimi i vitit të kaluar ishte i ndikuar nga qëndrimi i UEFA-s, për shkak të mbështetjes së Real Madridit ndaj projektit të Superligës Evropiane.

Si pasojë, sezonin e kaluar klubi nuk pranoi as çmimet e Trajnerit të Vitit dhe Klubit të Vitit.

Edhe pse disa zëra brenda klubit shprehin zhgënjim për këtë qëndrim të ashpër, Perez mbetet i vendosur. Kështu, në Paris nuk do të jenë të pranishëm as përfaqësues të klubit, as lojtarët e nominuar: Vinicius Jr., Jude Bellingham dhe Kylian Mbappe për “Topin e Artë”, Thibaut Courtois për trofeun Yachine dhe Dean Huijsen për trofeun Kopa.

Ceremonia e “Topit të Artë 2025” nis sonte në orën 20:00 në kryeqytetin francez./S.K/KP/