Omar Abdulkadir Artan, i cili pritej të bëhej somalezi i parë që do të drejtonte ndeshje në një Kupë Bote, është hequr nga lista e arbitrave të Kampionatit Botëror 2026 pasi autoritetet amerikane i mohuan hyrjen në Shtetet e Bashkuara të Amerikës.

Artan, i shpallur “Gjyqtari i Vitit 2025” në Afrikë për kategorinë e meshkujve, ndodhet aktualisht në Turqi, pasi u ndalua të hynte në Aeroportin Ndërkombëtar të Miamit. Sipas raportimit të BBC-së, autoritetet amerikane të imigracionit nuk kanë dhënë një arsye zyrtare për riatdhesimin e tij. Megjithatë, Somalia figuron në listën e vendeve ndaj të cilave administrata e presidentit Donald Trump ka vendosur kufizime udhëtimi.

Pas komunikimeve me autoritetet amerikane, FIFA konfirmoi se arbitri somalez nuk do të mund të marrë pjesë në Botëror.

“FIFA mund të konfirmojë se gjyqtari Omar Abdulkadir Artan nuk do të jetë në gjendje të drejtojë ndeshje në Kupën e Botës pasi iu mohua hyrja në Shtetet e Bashkuara”, thuhet në deklaratën e organit qeverisës të futbollit botëror.

FIFA sqaroi se nuk ka rol në procedurat e imigracionit të vendit organizator dhe se është informuar nga autoritetet amerikane se statusi i Artanit nuk do të ndryshojë për momentin.

“Në përputhje me praktikat e ngjarjeve të mëparshme të FIFA-s, qeveria e vendit organizator ka fjalën përfundimtare lidhur me lëshimin e vizave dhe lejimin e hyrjes në territorin e saj”, thuhet më tej në reagimin e FIFA-s.

Një këshilltar i lartë në Ministrinë e Rinisë dhe Sportit të Somalisë konfirmoi për BBC se Artan kishte udhëtuar me dokumentacion të rregullt dhe se, për t’ia lehtësuar udhëtimin, autoritetet somaleze i kishin lëshuar edhe pasaportë diplomatike pas problemeve të mëhershme me vizat.

Vetë Artan reagoi për agjencinë Reuters, duke deklaruar se mbetet i fokusuar në të ardhmen pavarësisht zhgënjimit.

“Dua të falënderoj FIFA-n dhe Konfederatën Afrikane të Futbollit për gjithë mbështetjen. Premtoj se do të vazhdoj ta mbaj në nivel të lartë arbitrimin tim, ndërsa fokusohem në sfidat e ardhshme”, ka thënë ai.

Arbitri somalez u ka uruar sukses kolegëve të tij në Kupën e Botës dhe ka shprehur shpresën se do t’u bashkohet atyre në kompeticionet e ardhshme ndërkombëtare.

Ndërkohë, Andrew Giuliani, drejtues i Task-Forcës së Shtëpisë së Bardhë për Kupën e Botës, deklaroi për BBC se vendimi i autoriteteve kufitare amerikane ishte i drejtë dhe se ai e mbështet atë, pa dhënë detaje shtesë.

Artan ishte njëri nga 52 gjyqtarët e përzgjedhur nga FIFA për Kampionatin Botëror 2026. Ai mban stemën e FIFA-s që nga viti 2018 dhe ka drejtuar ndeshje në kompeticione prestigjioze, përfshirë Kupën e Kombeve të Afrikës.

Tetë vjet pas ndarjes nga jeta të legjendës së futbollit kosovar, Fadil Vokrri, figura e tij vazhdon të mbetet e gjallë në kujtesën e sportdashësve dhe të gjithë atyre që e njohën kontributin e tij të jashtëzakonshëm për futbollin dhe shtetndërtimin sportiv të Kosovës.

Me rastin e tetëvjetorit të vdekjes së tij, presidenti i Federatës së Futbollit të Kosovës, Agim Ademi, ka publikuar një mesazh përkujtimor, duke e vlerësuar Vokrrin si një prej personaliteteve më të rëndësishme në historinë e sportit kosovar.

Sipas Ademit, Vokrri nuk ishte vetëm një futbollist i madh dhe një ikonë e gjelbërimit kosovar, por edhe arkitekti i njohjes ndërkombëtare të futbollit të Kosovës, duke udhëhequr procesin historik të anëtarësimit në UEFA dhe FIFA.

“Ka emra që nuk i përkasin vetëm historisë, por bëhen pjesë e identitetit të një kombi. E një emër i tillë është padyshim Fadil Vokrri. Sot, tetë vjet më vonë, kujtimi për të mbetet po aq i fortë sa dita kur na la”, ka shkruar Ademi.

Ai ka theksuar se trashëgimia e Vokrrit vazhdon të jetë burim frymëzimi për brezat e rinj të futbollistëve dhe sportistëve kosovarë, ndërsa numri 9, që ai e mbajti me krenari gjatë karrierës së tij, mbetet simbol i suksesit, lidershipit dhe përkushtimit ndaj futbollit të Kosovës.

“Fadil Vokrri mbetet më shumë se një emër në historinë e futbollit tonë. Ai është frymëzim, krenari dhe pjesë e përhershme e identitetit të futbollit të Kosovës”, ka përfunduar Ademi në mesazhin e tij përkujtues.

Fadil Vokrri ndërroi jetë më 9 qershor 2018, duke lënë pas një trashëgimi të jashtëzakonshme si në fushën e blertë ashtu edhe në drejtimin e futbollit kosovar. Emri dhe vepra e tij vazhdojnë të zënë një vend të veçantë në historinë sportive të Kosovës.

Foto: Kosovapress

Presidenti i Federatës së Futbollit të Kosovës (FFK), Agim Ademi, është nisur drejt Mexico City, qytetit ku dhjetë vjet më parë Kosova shkroi një nga kapitujt më të rëndësishëm në historinë e saj sportive, duke u pranuar në Kongresin e FIFA-s si anëtare me të drejta të plota e familjes botërore të futbollit.

Me ftesë të presidentit të FIFA-s, Gianni Infantino, kreu i FFK-së do të jetë pjesë e ceremonisë dhe ndeshjes hapëse të Kupës së Botës 2026, ku do të përballen Meksika dhe Afrika e Jugut. Ademi do të jetë në mesin e drejtuesve të federatave kombëtare nga e gjithë bota që do të marrin pjesë në këtë ngjarje madhore të futbollit.

Gjatë qëndrimit në Shtetet e Bashkuara të Amerikës, presidenti Ademi do të marrë pjesë edhe në Samitin e FIFA-s që do të organizohet në Miami, ku pritet të diskutohen zhvillimet dhe projektet më të rëndësishme të futbollit global. Po ashtu, ai do të ndjekë nga afër disa prej ndeshjeve të fazës së grupeve të Kampionatit Botëror.

Pas përfundimit të këtyre aktiviteteve, Ademi do të rikthehet në Kosovë. Megjithatë, ftesa e presidentit Infantino për të vazhdon edhe për fazën vendimtare të turneut, pasi presidenti i FFK-së do të jetë i pranishëm edhe në ndeshjet gjysmëfinale dhe në finalen e madhe të Kupës së Botës 2026.

Shtëpia e futbollit evropian, UEFA, ka reaguar pas lajmit të rëndë për vdekjen tragjike të futbollistit kosovar, Fatjon Bunjaku, duke i shprehur ngushëllimet e saj Federata e Futbollit e Kosovës dhe familjes së tij.

22-vjeçari humbi jetën në një aksident tragjik trafiku, duke lënë në pikëllim familjarët, miqtë, bashkëlojtarët dhe gjithë komunitetin e futbollit në Kosovë.

Përmes një mesazhi publik, UEFA shprehu solidaritetin dhe mbështetjen e saj në këto momente të vështira.

“Shprehim ngushëllimet tona më të sinqerta dhe mbështetjen për FFK-në pas ndarjes nga jeta të 22-vjeçarit Fatjon Bunjaku”, thuhet në reagimin e UEFA-s.

Mesazhi i institucionit më të lartë të futbollit evropian vjen pas shumë reagimeve të tjera nga klube, futbollistë dhe institucione sportive, të cilat kanë nderuar kujtimin e ish-reprezentuesit të Kosovës U21.

Ndarja e parakohshme nga jeta e Fatjon Bunjakut ka tronditur opinionin sportiv në Kosovë, ndërsa mesazhet e ngushëllimit dhe homazhet për të po vazhdojnë të vijnë nga e gjithë bota e futbollit.

Prehu në paqe, Fatjon Bunjaku.