Lajmet

Hoxhaj: Kosova ka nevojë të udhëhiqet nga Partia Demokratike e Kosovës

Published

6 years ago

December 28, 2020

Betim Gashi

Ushtruesi i detyrës së kryetarit të PDK-së, njëherësh kandidat për postin e kryeministrit, Enver Hoxhaj, njoftoi sot se analisti Faton Abdullahu ka aderuar në PDK.

Ai me këtë rast tha se PDK si subjekt i madh politik po hapet edhe për intelektualët jashtë partisë, të cilët do ta kenë vendin e merituar në këtë parti.

“Kosova po kalon në faza të vështira politike. Shteti ynë, i ndërtuar mbi shumë sakrifica, sot gjendet në udhëkryq të madh politik, ekonomik dhe social. E kërcënuar së brendshmi nga popullizmi dhe qeverisja e dobët, dhe së jashtmi nga goditja ndaj UÇK-së dhe shtetësisë.. Dhe asnjëherë nuk ka pasur nevojë më shumë se sa vitet e fundit që Kosova ka nevojë të udhëhiqet nga Partia Demokratike e Kosovës”, tha ai.

Hoxhaj tha se për ta parandaluar zhbërjen e shtetit, PDK-ja do të garojë në këto zgjedhje në aleancë të gjerë me qytetarët dhe ekspertët e fushave të ndryshme, që mund ta ndihmojnë vendin në këto momente vendimtare.

“PDK-ja po kthehet edhe një herë te baza, po dëgjon pulsin e qytetarit, po i ndjen kërkesat e tij dhe po e krijon një bllok të gjerë opozitar për ta parandaluar zhbërjen e shtetit dhe kthimin e shtetit në binarët e zhvillimit ekonomik dhe bashkëpunimit me aleatët perëndimorë. Blloku i madh opozitar i koalicionit mes PDK-së dhe qytetarit është garancia e vetme për ta ruajtur shtetin, dhe mbi të gjitha është forca e vetme për ta rimëkëmbur Kosovën edhe në planin politik edhe atë ekonomik dhe kombëtar”, tha Hoxhaj.

Hoxhaj ka thënë se Faton Abdullahu do të jetë pjesë e listës për deputet, ndërsa thotë se edhe nuk do të ketë persona me aktakuza në Partinë Demokratike të Kosovës. Ai ka ftuar edhe partitë tjera ta respektojnë vendimin e Kushtetueses që të mos kenë persona me aktakuzë në zgjedhjet e reja parlamentare.

“Abdullahu i bën nder të madh listës së Partisë Demokratike të Kosovës me të cilën garojmë në këto zgjedhje dhe është prej emrave më emblematikë të mendimit politik në Kosovë dhe do të jetë pjesë e listës. Te përbërja e listës natyrisht që ne do të respektojmë kodin etik, i cili ka qenë meritë e kryetarit të partisë, Veselit. Integriteti i listës dhe listës me duar të pastra do të jetë kriter kryesor për të gjithë ata që hyjnë në listën e PDK-së, dhe presim që partitë tjera politike nuk e kanë marrë këtë praktikë në të kaluarën, ta marrin në konsideratë ose do të jenë të detyruar për shkak të Gjykatës (Kushtetuese) që ta marrin në konsideratë”, ka thënë Hoxhaj.

Ndërkaq, Faton Abdullahu tha se ka vendosur t’i bashkëngjitet PDK-së, pasi kjo parti ka hapur dyert për ide dhe njerëz të ri për ndryshime të mëdha.

“Unë jam i bindur se një parti politike vlerësohet nga rrënjët. Unë ju besoj rrënjëve të PDK-së, sepse besoj te vlerat e luftës, tek UÇK -ja. UÇK është margaritar i qytetërimit evropian. Ushtria Çlirimtare e Kosovës ka krijuar miqësi me botën perëndimore me pushkë në dorë. Ushtria Çlirimtare e Kosovës ka lëvizur kufijtë në Ballkan, ato u shtyn tutje në të mirë të interesave euro-atlantike dhe në dëm të Rusisë dhe aleatëve të saj. Unë besoj palëkundshëm në këto rrënjë të PDK-së ashtu sikurse besoj se degët e këtij trungu edhe mund të krasiten për t’u bërë më të mira e më të shëndosha. PDK më ka bindur sot më shumë se kurrë se aty ku ka popullizëm, aty ajo di të vendosë pragmatizëm, aty ku ka frikë dhe hezitim, ajo di dhe mund të kthejë guxim, aty ku ka zhgënjim, aty di të kthejë shpresë e besim dhe aty ku ka ndarje e përçarje di dhe mund të kthejë unitet.”, tha Abdullahu.

Sipas Abdullahut, PDK-së i është bërë një ‘hile’ e madhe pasi ajo po hyn në garën zgjedhore pa kryetarin e saj Kadri Veselin, por që punët e filluara mbarë nga ai, idetë për reforma e ndryshime, strategjinë për ta luftuar krimin e korrupsionin dhe riparimi i raporteve me aleatët e vendit, do t’i shtyjë përpara më fuqishëm se kurrë kandidati për kryeministër, Enver Hoxhaj.

“Kosovës i duhet një kryeministër si Hoxhaj që e kupton drejtë e mirë gjuhën euro-atlantike. Sot, Hoxhaj është këtu sepse tek ai PDK e ka pa njeriun që krijon balancën e nevojshme, duke u bazuar me korrektësi dhe po krijon unitet që është i nevojshëm edhe për partinë. Një kryeministër i kësaj natyre i duhet Kosovës në kohën kur neve po na duhen balancat politike, uniteti për t’u përballur me të këqijat që ka Kosova, por edhe ato që po na vijnë nga Serbia”, tha Abdullahu./KP

Related Topics:pdk Enver Hoxhaj Partia Demokratike e Kosovës

Up Next

Shqipëri, 11 të vdekur dhe 318 raste pozitive

Don't Miss

Kuvendi ratifikoi dy marrëveshje ndërkombëtare

Lajmet

Konferenca e përbashkët: PDK dhe AAK nesër në Kuvend

Published

53 minutes ago

August 13, 2026

UBTNews

Deputeti i Partisë Demokratike të Kosovës, Arian Tahiri, dhe ai nga radhët e Aleancës për Ardhmërinë e Kosovës, Besnik Tahiri, kanë mbajtur një konferencë të përbashkët për media lidhur me vazhdimin e seancës konstituive të Kuvendit të Kosovës.

Gjatë konferencës, Arian Tahiri bëri të ditur se Aleanca i është përgjigjur pozitivisht ftesës së PDK-së dhe shprehu shpresën se njësoj do të veprojnë edhe subjektet e tjera politike.

Ai i bëri ftesë publike kryesuesit të seancës, Avni Dehari, si dhe Lëvizjes Vetëvendosje, duke i akuzuar se po e pengojnë konstituimin e Kuvendit përmes mosftimit të seancës, e cila sipas tij është obligim ligjor e kushtetues që të thirret çdo 48 orë. Deputeti i PDK-së konfirmoi se partia e tij do të jetë e pranishme në sallën e Kuvendit të premten nga ora 11:00, duke pritur që aty t’i bashkohen edhe tjerët.

Nga ana e tij, Besnik Tahiri i Aleancës konfirmoi gjithashtu praninë e subjektit të tij në Kuvend në të njëjtin orar. Ai bëri me dije se në koordinim me partitë e tjera opozitare i kanë dërguar kërkesë zyrtare kryesuesit Avni Dehari për një takim koordinues, por deri më tani nuk kanë marrë asnjë përgjigje.

Përfaqësuesi i AAK-së nënvizoi se po dëshmohet një fillim i shpërbërjes së institucioneve, prandaj do të ndjekin të gjitha rrugët institucionale përpara se të ndërmarrin hapa të tjerë politikë në shërbim të kthimit të rendit kushtetues./E.A/

Lajmet

Sekuestrohen mijëra euro te i dyshuari për spiunazh në Dragash

Published

1 hour ago

August 13, 2026

UBTNews

Shtetasi i Kosovës, Fehim Sali, i cili u arrestua të enjten në pikën kufitare në Merdarë nën dyshimin për kryerjen e veprës penale “Spiunazh”, është ndaluar për 48 orë me aktvendim të Prokurorisë Speciale.

Në kuadër të hetimeve, hetuesit policorë nga Drejtoria për Hetimin e Krimit të Organizuar dhe Krimeve të Rënda kanë zbatuar një urdhërkontroll në vendbanimin e të dyshuarit në Dragash.

Përmes një komunikate të përbashkët të Policisë së Kosovës dhe Prokurorisë Speciale, bëhet e ditur se gjatë bastisjes janë gjetur dhe sekuestruar këto prova materiale: 39,500 euro para të gatshme; 500 dinarë para të gatshme; 4 telefona celularë; Dokumente të ndryshme relevante për rastin.

Prokuroria Speciale njoftoi se brenda afatit të përcaktuar ligjor do të parashtrojë kërkesë në Gjykatën Themelore në Prishtinë për caktimin e masës së paraburgimit ndaj të dyshuarit.

Institucionet e sigurisë dhe të drejtësisë në Kosovë konfirmuan se mbeten të angazhuara plotësisht për ndërmarrjen e të gjitha veprimeve të nevojshme ligjore lidhur me zbardhjen e këtij rasti. /E.A/

Lajmet

Qeveria ndan 100 mijë euro për DokuFestin

Published

1 hour ago

August 13, 2026

UBT News

Qeveria në detyrë e Kosovës ka ndarë 100 mijë euro për mbështetjen e realizimit të Festivalit Ndërkombëtar të Filmit Dokumentar dhe të Shkurtër “DokuFest”.

Vendimi është marrë në mbledhjen e 32-të të Qeverisë, të mbajtur më 13 gusht 2026.

Sipas Qeverisë, mbështetja financiare për DokuFestin konsiderohet investim në promovimin ndërkombëtar të Kosovës, pasi festivali çdo vit sjell në Prizren artistë, profesionistë të industrisë së filmit, media dhe vizitorë nga vende të ndryshme të botës.

Në arsyetimin e vendimit thuhet se DokuFesti krijon mundësi për prezantimin e kulturës, krijimtarisë dhe identitetit të Kosovës para publikut ndërkombëtar.

Qeveria vlerëson se festivali, përmes shtrirjes dhe reputacionit të tij ndërkombëtar, kontribuon edhe në promovimin e Kosovës si vend me skenë të zhvilluar kulturore, potencial turistik dhe kreativ, si dhe në diplomacinë publike e kulturore të vendit.

Në të njëjtën mbledhje, Qeveria ka miratuar edhe vendime për emërimin e komisioneve të pranimit për pozita të larta drejtuese në institucione dhe agjenci të ndryshme shtetërore./A.K/

Lajmet

Kapitull i ri për Lakers: Shitje rekord prej 12.5 miliardë dollarësh

Published

1 hour ago

August 13, 2026

UBTNews

Klubi i njohur i basketbollit, Los Angeles Lakers, pritet të shitet për shumën rekord prej 12.5 miliardë dollarësh, në një marrëveshje historike që do të ndryshojë pronësinë e një prej skuadrave më ikonike të NBA-së.

Blerësit e rinj pritet të jenë Josh Kushner, themelues i kompanisë së investimeve “Thrive Capital”, dhe Bob Iger, ish-drejtori ekzekutiv i “Disney”. Ata janë në proces të marrjes së aksioneve kontrolluese të klubit.

Më parë, Mark Walter, i cili mori shumicën e aksioneve të Lakers nga familja Buss, kishte investuar rreth 10 miliardë dollarë në klub. Marrëveshja e tij u miratua nga Bordi i Guvernatorëve të NBA-së në tetor të vitit 2025.

Kushner dhe Iger kanë shprehur kënaqësinë për mundësinë e drejtimit të Lakers, duke theksuar synimin për të ruajtur traditën e klubit dhe për ta rikthyer atë në majat e basketbollit amerikan. /A.M/