Lajmet

​Hoxhaj: Kosova ka nevojë të udhëhiqet nga Partia Demokratike e Kosovës

Published

5 years ago

on

Ushtruesi i detyrës së kryetarit të PDK-së, njëherësh kandidat për postin e kryeministrit, Enver Hoxhaj, njoftoi sot se analisti Faton Abdullahu ka aderuar në PDK.

Ai me këtë rast tha se PDK si subjekt i madh politik po hapet edhe për intelektualët jashtë partisë, të cilët do ta kenë vendin e merituar në këtë parti.

“Kosova po kalon në faza të vështira politike. Shteti ynë, i ndërtuar mbi shumë sakrifica, sot gjendet në udhëkryq të madh politik, ekonomik dhe social. E kërcënuar së brendshmi nga popullizmi dhe qeverisja e dobët, dhe së jashtmi nga goditja ndaj UÇK-së dhe shtetësisë.. Dhe asnjëherë nuk ka pasur nevojë më shumë se sa vitet e fundit që Kosova ka nevojë të udhëhiqet nga Partia Demokratike e Kosovës”, tha ai.

Hoxhaj tha se për ta parandaluar zhbërjen e shtetit, PDK-ja do të garojë në këto zgjedhje në aleancë të gjerë me qytetarët dhe ekspertët e fushave të ndryshme, që mund ta ndihmojnë vendin në këto momente vendimtare.

“PDK-ja po kthehet edhe një herë te baza, po dëgjon pulsin e qytetarit, po i ndjen kërkesat e tij dhe po e krijon një bllok të gjerë opozitar për ta parandaluar zhbërjen e shtetit dhe kthimin e shtetit në binarët e zhvillimit ekonomik dhe bashkëpunimit me aleatët perëndimorë. Blloku i madh opozitar i koalicionit mes PDK-së dhe qytetarit është garancia e vetme për ta ruajtur shtetin, dhe mbi të gjitha është forca e vetme për ta rimëkëmbur Kosovën edhe në planin politik edhe atë ekonomik dhe kombëtar”, tha Hoxhaj.

Hoxhaj ka thënë se Faton Abdullahu do të jetë pjesë e listës për deputet, ndërsa thotë se edhe nuk do të ketë persona me aktakuza në Partinë Demokratike të Kosovës. Ai ka ftuar edhe partitë tjera ta respektojnë vendimin e Kushtetueses që të mos kenë persona me aktakuzë në zgjedhjet e reja parlamentare.

“Abdullahu i bën nder të madh listës së Partisë Demokratike të Kosovës me të cilën garojmë në këto zgjedhje dhe është prej emrave më emblematikë të mendimit politik në Kosovë dhe do të jetë pjesë e listës. Te përbërja e listës natyrisht që ne do të respektojmë kodin etik, i cili ka qenë meritë e kryetarit të partisë, Veselit. Integriteti i listës dhe listës me duar të pastra do të jetë kriter kryesor për të gjithë ata që hyjnë në listën e PDK-së, dhe presim që partitë tjera politike nuk e kanë marrë këtë praktikë në të kaluarën, ta marrin në konsideratë ose do të jenë të detyruar për shkak të Gjykatës (Kushtetuese) që ta marrin në konsideratë”, ka thënë Hoxhaj.

Ndërkaq, Faton Abdullahu tha se ka vendosur t’i bashkëngjitet PDK-së, pasi kjo parti ka hapur dyert për ide dhe njerëz të ri për ndryshime të mëdha.

“Unë jam i bindur se një parti politike vlerësohet nga rrënjët. Unë ju besoj rrënjëve të PDK-së, sepse besoj te vlerat e luftës, tek UÇK -ja. UÇK është margaritar i qytetërimit evropian. Ushtria Çlirimtare e Kosovës ka krijuar miqësi me botën perëndimore me pushkë në dorë. Ushtria Çlirimtare e Kosovës ka lëvizur kufijtë në Ballkan, ato u shtyn tutje në të mirë të interesave euro-atlantike dhe në dëm të Rusisë dhe aleatëve të saj. Unë besoj palëkundshëm në këto rrënjë të PDK-së ashtu sikurse besoj se degët e këtij trungu edhe mund të krasiten për t’u bërë më të mira e më të shëndosha. PDK më ka bindur sot më shumë se kurrë se aty ku ka popullizëm, aty ajo di të vendosë pragmatizëm, aty ku ka frikë dhe hezitim, ajo di dhe mund të kthejë guxim, aty ku ka zhgënjim, aty di të kthejë shpresë e besim dhe aty ku ka ndarje e përçarje di dhe mund të kthejë unitet.”, tha Abdullahu.

Sipas Abdullahut, PDK-së i është bërë një ‘hile’ e madhe pasi ajo po hyn në garën zgjedhore pa kryetarin e saj Kadri Veselin, por që punët e filluara mbarë nga ai, idetë për reforma e ndryshime, strategjinë për ta luftuar krimin e korrupsionin dhe riparimi i raporteve me aleatët e vendit, do t’i shtyjë përpara më fuqishëm se kurrë kandidati për kryeministër, Enver Hoxhaj.

“Kosovës i duhet një kryeministër si Hoxhaj që e kupton drejtë e mirë gjuhën euro-atlantike. Sot, Hoxhaj është këtu sepse tek ai PDK e ka pa njeriun që krijon balancën e nevojshme, duke u bazuar me korrektësi dhe po krijon unitet që është i nevojshëm edhe për partinë. Një kryeministër i kësaj natyre i duhet Kosovës në kohën kur neve po na duhen balancat politike, uniteti për t’u përballur me të këqijat që ka Kosova, por edhe ato që po na vijnë nga Serbia”, tha Abdullahu./KP

Related Topics:
Continue Reading

Lajmet

Rektori Hajrizi merr pjesë në pritjen e organizuar nga Ambasada e Kosovës në SHBA

Published

2 hours ago

on

February 5, 2026

By

Rektori i UBT-së, Prof. Dr. Edmond Hajrizi, mori pjesë në pritjen e organizuar nga Ambasadori i Kosovës në SHBA, z. Ilir Dugolli, për delegacionin nga Kosova që po merr pjesë në Lutjet Nacionale të Mëngjesit në Washington.

Gjatë këtij takimi, Rektori Hajrizi pati mundësinë të takohet me deputetë, sipërmarrës, përfaqësues të komunitetit dhe medias, si dhe personalitete të tjera nga jeta akademike dhe institucionale, duke forcuar lidhjet ndërkombëtare dhe duke përfaqësuar Kosovën në një nivel institucional dhe akademik.

Continue Reading

Lajmet

Shqipëria lejon rihapjen e TikTokut

Published

4 hours ago

on

February 5, 2026

By

Qeveria e Shqipërisë ka sqaruar vendimin e 3 shkurtit për rikthimin e TikTok pas gati një viti mbylljeje.

Në sqarim thuhet se vendimi u mor pas një rivlerësimi institucional dhe adresimit të shqetësimeve që lidhen me sigurinë publike, sociale dhe digjitale, veçanërisht për fëmijët dhe të rinjtë.

Qeveria bën me dije se bashkëpunimi i autoriteteve shqiptare me përfaqësuesit e platformës është institucionalizuar dhe se fokusi është zhvendosur nga ndalimi i aksesit në monitorim aktiv dhe përgjegjësi të përbashkët për sigurinë digjitale.

“Sot, autoritetet shqiptare janë në partneritet me përfaqësuesit e TikTok, për filtrat mbrojtës përmes fjalëve kyçe, kontrollet e përmbajtjes dhe modalitetet më efikase të raportimit dhe trajtimit të shkeljeve.

Ky vendim shënon kalimin nga masa kufizuese në një fazë monitorimi aktiv, bashkëpunimi ndërinstitucional dhe përgjegjësie të përbashkët me platformat digjitale”, thuhet në njoftimin e Agjencia për Media dhe Informim .

Njoftimi:

Agjencia për Media dhe Informim sqaron median dhe opinion publik në lidhje me vendimin e Këshillit të Ministrave datë 03.02.2026 për heqjen e masave të përkohshme për ndalimin e aksesit në platformën online TikTok

Heqja e masave të përkohshme për ndërprerjen e aksesit në platformën online TikTok është rezultat i një rivlerësimi institucional dhe i adresimit konkret të shqetësimeve që lidhen me sigurinë publike, sociale dhe digjitale, veçanërisht për fëmijët dhe të rinjtë.

Masa e miratuar nga Këshilli i Ministrave në mars 2025 u konceptua dhe u zbatua si një ndërhyrje e parandaluese, në funksion të mbrojtjes së interesit publik dhe adresimit të shqetësimeve të evidentuara gjatë asaj periudhe. Ajo shërbeu edhe për të hapur një dialog të drejtpërdrejtë dhe konstruktiv me platformën, duke vendosur bazat për mekanizma të rinj sigurie, të cilët më parë nuk ishin të pranishëm. Sot, autoritetet shqiptare janë në partneritet me përfaqësuesit e TikTok, për filtrat mbrojtës përmes fjalëve kyçe, kontrollet e përmbajtjes dhe modalitetet më efikase të raportimit dhe trajtimit të shkeljeve.

Ky vendim shënon kalimin nga masa kufizuese në një fazë monitorimi aktiv, bashkëpunimi ndërinstitucional dhe përgjegjësie të përbashkët me platformat digjitale.

Paralelisht, po punohet për hartimin e një plani të mirëfilltë komunikimi dhe ndërgjegjësimi, të fokusuar te fëmijët, të rinjtë, prindërit dhe mësuesit, për përdorimin e sigurt dhe të përgjegjshëm të platformave online. Qëllimi është i qartë dhe i orientuar drejt edukimit digjital, mbrojtjes reale dhe ndërtimi i një kulture sigurie në hapësirën online.

Kjo qasje e balancuar synon të garantojë lirinë e aksesit, duke vendosur njëkohësisht interesin e sigurisë dhe mirëqenies së të rinjve në qendër të politikave publike. /REL/

 

Continue Reading

Lajmet

Presidentja Osmani takon Kryetaren e Autoritetit të Kulturës dhe Arteve në Emiratet e Bashkuara Arabe

Published

5 hours ago

on

February 5, 2026

By

Presidentja e Kosovës Vjosa Osmani-Sadriu, gjatë qëndrimit në Emiratet e Bashkuara ka takuar Sheikha Latifa bint Mohammed bin Rashid Al Maktoum, Kryetare e Autoritetit të Kulturës dhe Arteve.

Osmani është shprehur se Kosova dhe Emiratet e Bashkuara Arabe kanë hapësirë për mundësi bashkëpunimi në shumë fusha.

“Kosova dhe Emiratet e Bashkuara Arabe kanë më shumë sesa miqësi: kanë hapësirë për të hapur kapituj të rinj bashkëpunimi edhe në në kulturë, krijimtari, art dhe inovacion”, shkruan Osmani.

Qëllimi i vizitës së Presidentes Osmani në Emiratet e Bashkuara Arabe ishte për Samitin Botëror të Qeverisjes, ku morën pjesë edhe shumë lider tjerë botëror.

Continue Reading

Lajmet

Në Forumin e Sigurisë në Kongresin Amerikan kërkohet anëtarësimi i Kosovës në NATO

Published

7 hours ago

on

February 5, 2026

By

Përfaqësues të partive opozitare nga Kosova dhe zyrtarë nga Shqipëria kanë kërkuar anëtarësimin e Kosovës në NATO, gjatë Forumit për Sigurinë të mbajtur në Capitol Hill, në Kongresin Amerikan.

Në këtë forum, ku morën pjesë kongresistë dhe diplomatë amerikanë, u theksua se integrimi i Kosovës në Aleancën Veriatlantike është domosdoshmëri për sigurinë dhe stabilitetin në rajon.

Lideri i Aleancës për Ardhmërinë e Kosovës, Ramush Haradinaj, tha se Kosova është e gatshme për anëtarësim në NATO dhe se koha për këtë hap është tani.

“Porosia ime në Kongresin Amerikan, në kuadër të Forumit Ndërparlamentar të Sigurisë në Capitol Hill, ishte e shkurtër: ‘Koha është tani’. Kosova ka implementuar planin dhjetëvjeçar për zhvillimin e Ushtrisë së saj, në bashkëpunim të ngushtë me Shtetet e Bashkuara të Amerikës”, ka thënë ai.

Tutje, Haradinaj u shpreh se ushtria e Kosovës, ashtu si edhe institucionet e tjera të sigurisë, bazohen në standardet e NATO-s dhe të SHBA-së.

Ai shtoi se Kosova është e gatshme të kontribuojë në fushën e sigurisë dhe për anëtarësim në NATO.

Kërkesë të njëjtë ka shprehur edhe deputeti i PDK-së, Enver Hoxhaj, ish-ministër i Punëve të Jashtme i Kosovës.

“Në fjalën time në Capitol Hill kërkova që Kosova të anëtarësohet në NATO. Siguria e Ballkanit është sot çështje kyçe e sigurisë evropiane”, ka shkruar Hoxhaj.

Në këtë forum ka marrë pjesë edhe Kryetari i Kuvendit të Shqipërisë, Niko Peleshi, i cili ka kërkuar anëtarësimin e Kosovës në NATO, duke e cilësuar rajonin si një hapësirë gjeopolitike të ndjeshme ndaj kërcënimeve hibride dhe ndërhyrjeve të huaja.

“Ballkani Perëndimor mbetet i ndjeshëm në aspektin gjeopolitik, i ekspozuar ndaj përpjekjeve të huaja për të minuar stabilitetin, për të dobësuar institucionet demokratike dhe për të shkatërruar besimin te rruga Euro-Atlantike. Ky realitet kërkon vigjilencë, qëndrueshmëri dhe qartësi strategjike. Integrimet euroatlantike dhe anëtarësimi i Kosovës në NATO janë të domosdoshme për sigurinë dhe stabilitetin në rajon”, ka thënë ai.

Pjesë e Forumit për Sigurinë kanë qenë edhe deputetë nga Shqipëria, Maqedonia e Veriut, si dhe një numër i madh kongresistësh dhe diplomatësh amerikanë.

E.A.

Continue Reading

Të kërkuara