Lajmet

​Haxhiu bën thirrje që të ndërpritet greva e punëtorëve të administratës në institucionet e drejtësisë

Sipas saj, si ministri po punojnë në adresimin e kërkesave të tyre.

Published

4 years ago

on

Ministrja e Drejtësisë, Albulena Haxhiu, iu bëri thirrje punëtorëve të administratës së institucioneve të drejtësisë që të ndërpresin grevën. Sipas saj, si ministri po punojnë në adresimin e kërkesave të tyre, ndërsa shtoi se me këto greva po vuajnë qytetarët.

Këto komente, ministrja Haxhiu i bëri në tryezën e organizuar nga Demokraci Plus me temë “Përmirësimi i zbatimit të drejtësisë procedural në gjykatat themelore të Kosovës: sfidat dhe mundësitë”.

“Si ministre e Drejtësisë i bëj thirrje stafit të institucioneve të drejtësisë që të ndërpresë grevën për faktin se ne jemi duke punuar që t’i realizojmë kërkesat që kanë, ne jemi duke punuar edhe në Projektligjin për paga edhe në Projektligjin për administratën e sistemit të drejtësisë. Dhe nuk ka arsye për momentin që të hyhet në grevë sepse kështu po e vuajnë qytetarët të cilët kanë shumë nevoja dhe ato nevoja nuk po mund t’i realizojnë për shkak të grevës. Asnjëherë nuk them që greva nuk është e drejtë, janë në të drejtën e tyre demokratike por për sa kohë institucionet e Kosovës po adresojnë kërkesat që ata i kanë konsideroj që greva duhet të ndërpritet”, tha ajo.

Tutje ministrja e Drejtësisë, Albulena Haxhiu u shpreh se sistemi gjyqësor në Kosovë po vazhdon të ballafaqohet me lëndët e grumbulluara. Ajo deklaroi se mbesin të përkushtuar në reformat në drejtësi dhe zgjidhjen e këtyre problemeve në sistem.

“Një nga çështjet më kritike me të cilat përballet gjyqësori i Kosovës aktualisht janë lëndët e vjetra, pra ato të grumbulluara dhe jam e njoftuar se KGJK e ka trajtuar me prioritet këtë dhe ka bërë një plan konkret se si kjo të adresohet… Raportet e Komisionit Evropian për Kosovën por edhe raportet e organizatave të shoqërisë civile por edhe ato tjera ndërkombëtare në mënyrë të vazhdueshme theksojnë si problem çështjen e grumbullimit të lëndëve sidomos të lëndëve civile dhe me këtë problem mendoj se në baza ditore jemi duke u përballur si Ministri e Drejtësisë… 06\11 Si ministri, në kuadër të reformave të sistemit të drejtësisë i kemi dhënë edhe fokus të veçantë mbrojtjes themelore procedurale të njeriut për faktin se ne kemi themeluar si MD grupin punues që ka për mandat që ta hartojë koncept-dokumentin që ka për qëllim realizimin e të drejtave civile të qytetarëve të Kosovës. Pra, grupi punues është duke adresuar këtë problem dhe në këtë drejtim me koordinim me institucionet relevante, me partnerët ndërkombëtarë si dhe përfaqësuesit nga shoqëria civile përveç që jemi duke adresuar që lëndët të adresohen në afat kohor, po ashtu është duke u diskutuar edhe çështja e kompensimit të palëve në rast kur iu shkelen e drejtat e tyre, kur ka vonesa në gjykata”, tha ajo.

Kryesuesi i Këshillit Gjyqësor të Kosovës, Albert Zogaj u shpreh i bindur që procesi i rekrutimit të gjyqtarëve dhe bashkëpunëtorëve profesionalë që po ndodh aktualisht në KGJK është transparente. Ai njoftoi se tashmë KGJK ka miratuar strukturën e re të gjykatave sa i takon zyrave për informim dhe kjo beson se do të ndikojë në rritjen e transparencë së sistemit gjyqësor.

“Falë këtij angazhimi dhe kësaj qasje sistematike të sistemit gjyqësor ne kemi arritur për një periudhë të shkurt me dhënë shembuj të ndryshimeve substanciale në sistemin gjyqësor dhe për këtë rast po e shfrytëzoj duke qenë koincidencë që po zhvillohet tani rekrutimi i gjyqtarëve dhe jam shumë i bindur që në 20 vite kemi arritur të zhvillojmë sistemin më transparent të rekrutimit të gjyqtarëve dhe bashkëpunëtorëve profesionalë dhe në kuptimin profesional jam shumë i gëzuar sepse me këtë javë dhe javën e kaluar po dëshmohet gjatë intervistimit se kemi kandidatë me integritet të lartë profesionalë dhe moralë gjë që neve na bënë të besojmë që në të ardhmen do të kemi një sistem i cili përveç të tjera do jetë një indikator i fuqishëm i kthimit të besimit të publikuar në sistemin gjyqësor”, tha Zogaj.

Drejtoresha e Misionit të USAID-it në Kosovë, Zeinah Salahi, tha se me progresin që ka realizuar Kosova ka treguar gatishmërinë për të forcuar sundimin e ligjit, dhe në këtë drejtim u shpreh se ndihmë po ofron edhe USIAD. Por ajo kërkoi tutje që gjykatat në Kosovë të vazhdojnë të përmirësojnë procedurat, pasi vetëm përmes një sistemi të fortë të drejtësisë tregon se shoqëria po i përgjigjet nevojave të qytetarëve.

“86% të përdoruesve kanë raportuar se janë të kënaqur me shërbimet që kanë marrë, ndërsa kjo statistikë mjaftë inkurajuese është në kontrast të ashpër me hulumtimin sa i përket drejtësisë procedurale në Kosovë që UNDP, e cila u publikua këtë muaj, e cila gjeti që vetëm 39.3% është kënaqshmëria me performancën e gjykatave dhe ky dallim dramatik në mes të perceptimit publik dhe realitetit nga përvojat e përdoruesve dhe kënaqshmërisë së qytetarëve është dallim i vrazhdë dhe në bazë të kësaj mund të përfundojnë se qytetarët dhe publiku nuk janë të vetëdijshëm për përmirësimet që janë bërë në sistem dhe efikastitet… 02.41 Gjykatat duhet të vazhdojnë me përmirësimin e procedurave si ajo ndaj qasjeve siç është ajo për përmirësimin e drejtësisë procedurale dhe përmirësimit të qasjes dhe përmirësimit të metodave të informacionit. Një sistem i fortë i drejtësisë është një mjet i cili shoqëria i përgjigjet nevojave të qytetarëve dhe ne jemi duke punuar në USAID”, tha ajo.

Related Topics:
Continue Reading

Lajmet

REL: Prokuroria serbe thotë se BIA nuk i është përgjigjur kërkesës për ta marrë në pyetje Vuçiqin në rastin “Panda”

Published

3 hours ago

on

July 30, 2026

By

Prokuroria për Krimin e Organizuar në Serbi ka bërë të ditur se Agjencia e Inteligjencës dhe Sigurisë nuk u është përgjigjur kërkesave për zhvillimin e bisedave me presidentin serb, Aleksandar Vuçiq, si dhe me ish-drejtuesit e Sigurimit të Shtetit, Jovica Stanishiq dhe Franko Simatoviq, në kuadër të hetimeve për vrasjen e gjashtë të rinjve serbë në kafenenë “Panda” në Pejë në vitin 1998, raporton Radio Evropa e Lirë.

Në një përgjigje për REL-in, Prokuroria tha se ka kërkuar në disa raste nga BIA që të zhvillojë biseda me personat e propozuar për të verifikuar nëse ata posedojnë informacione të rëndësishme për hetimin, por deri më tani nuk ka marrë asnjë përgjigje.

Sipas Prokurorisë, veprimet e mëtejshme do të varen nga raporti që pritet të dorëzohet nga BIA.

Kërkesa për marrjen në pyetje të Vuçiqit, Stanishiqit dhe Simatoviqit është paraqitur nga avokati i familjeve të viktimave, Ivan Niniq, i cili argumenton se ata mund të kenë njohuri të rëndësishme për rastin. Në veçanti, Vuçiq ka deklaruar disa herë publikisht se ekzistojnë informacione lidhur me vrasjet në kafenenë “Panda”, ndërsa në vitin 2013 kishte thënë se nuk kishte prova që autorë të krimit ishin shqiptarët dhe se opinioni publik serb do të përballej me “të vërteta të tmerrshme”.

Në kërkesën drejtuar Kryeprokurorit Publik, Niniq ka kërkuar gjithashtu që të verifikohen pretendimet se Radomir Boban Baqoviq mund të jetë autori i drejtpërdrejtë i masakrës. Këto pretendime u publikuan së fundmi në një video në rrjetin social Telegram nga shtetasi malazez në arrati, Milosh Medenica.

Prokuroria bëri të ditur se Baqoviqi nuk është marrë asnjëherë në pyetje në lidhje me këtë rast, pasi deri më tani nuk është konsideruar dëshmitar i besueshëm në hetim.

Autoritetet serbe theksuan se hetimet, të nisura në vitin 2016, vazhdojnë ende, pasi nuk janë siguruar prova të mjaftueshme për të krijuar dyshim të bazuar mbi autorët e krimit. Prokuroria shtoi se është e gatshme t’i paraqesë Prokurorisë Supreme Publike një raport të plotë mbi veprimet e ndërmarra deri më tani.

Më 14 dhjetor 1998, pesë nxënës të shkollës së mesme dhe një studente u vranë kur persona të armatosur hynë në kafenenë “Panda” në Pejë dhe hapën zjarr. Në atë kohë, autoritetet serbe arrestuan disa shqiptarë nën dyshimin për përfshirje në krim, por ata u liruan një vit më vonë nga Gjykata në Beograd për mungesë provash./REL/

D.L

Continue Reading

Lajmet

Himarë, humb jetën 65-vjeçari pasi dyshohet se u plagos nga shpërthimi i dinamitit gjatë peshkimit

Published

4 hours ago

on

July 30, 2026

By

Një 65-vjeçar ka humbur jetën të enjten në zonën e Porto Palermos, në Himarë, pasi dyshohet se u plagos rëndë nga shpërthimi i një lënde plasëse që po e përdorte për peshkim, raporton KosovaPress.

Sipas Policisë së Shtetit, ngjarja ka ndodhur rreth orës 09:00, kur shtetasi me inicialet P.M., 65 vjeç, dyshohet se u lëndua nga shpërthimi i një lënde plasëse (dinamit) gjatë peshkimit.

I plagosuri u transportua menjëherë për trajtim mjekësor në Qendrën Shëndetësore të Himarës, por nuk arriti t’u mbijetojë plagëve dhe ndërroi jetë.

Grupi hetimor, nën drejtimin e Prokurorisë, po vazhdon veprimet për zbardhjen dhe dokumentimin e plotë të rrethanave të kësaj ngjarjeje.

D.L

Continue Reading

Lajmet

Arrestohet edukatorja në Tiranë, dyshohet se ushtroi dhunë ndaj një fëmije 2-vjeçar

Published

5 hours ago

on

July 30, 2026

By

Një edukatore e një kopshti privat në Tiranë është arrestuar në flagrancë, nën dyshimin se ka ushtruar dhunë fizike ndaj një fëmije 2-vjeçar,raporton KosovaPress.

Sipas njoftimit të Policisë së Tiranës, e dyshuara me inicialet B.H., 32 vjeçe, e cila punonte si edukatore në këtë institucion, dyshohet se ka ushtruar dhunë ndaj të miturit në ambientet e kopshtit ku punonte.

“Specialistët për Hetimin e Krimeve në Komisariatin e Policisë Nr. 4 arrestuan në flagrancë shtetasen B.H., 32 vjeçe, me detyrë edukatore në një kopsht privat, pasi dyshohet se ka ushtruar dhunë fizike ndaj një të mituri 2-vjeçar, në ambientet e kopshtit ku punonte”, thuhet në njoftimin e Policisë së Tiranës.

Materialet procedurale i janë referuar Prokurorisë për veprime të mëtejshme hetimore, ndërsa policia ka bërë të ditur se po vazhdon punën për dokumentimin e plotë të rrethanave të rastit.

D.L

Continue Reading

Lajmet

Haxhiu nga Zubin Potoku: Mbetjet e gjetura janë me prejardhje njerëzore, të ruhet integriteti i hetimeve

Published

6 hours ago

on

July 30, 2026

By

Ushtruesja e detyrës së presidentes së vendit, Albulena Haxhiu, ka vizituar lokacionin në fshatin Kalludër të Zubin Potokut, ku institucionet e Kosovës po zhvillojnë gërmime në kërkim të personave të zhdukur me dhunë gjatë luftës së fundit në Kosovë, raporton Ekonomia Online.

Haxhiu tha se në terren po angazhohen institucionet përgjegjëse për zbardhjen e fatit të personave të zhdukur.

“Sot, bashkë me nënkryetaren, ministren Bogujevci, jemi këtu në fshatin Kalludër, për të parë nga afër punën e ekipeve tona në kërkim të së vërtetës për personat e zhdukur me dhunë gjatë luftës së fundit në Kosovë.

Më lejoni që së pari të falënderoj institucionet e Republikës së Kosovës për përfshirjen në këtë proces, secilin institucion në veçanti: nga Policia, nga Prokuroria, nga Komisioni për Personat e Zhdukur me Dhunë gjatë luftës së fundit në Kosovë, po ashtu nga IML-ja, por edhe secilin institucion tjetër që po e bëjnë angazhimin më të madh për të ardhur deri te e vërteta. Tash ajo çfarë është konfirmuar është që mbetjet janë me prejardhje njerëzore. Tani duhet të presim punën e institucioneve kompetente për ekzaminime dhe për identifikim”, ka thënë ajo.

Haxhiu, ka bërë thirrje që të ruhet integritetit i hetimeve.

“Ajo çfarë është e rëndësishme ta theksoj është që secili nga ne, institucionet e Republikës së Kosovës, përfshirë këtu edhe mediat, duhet të kujdesemi që ta ruajmë integritetin e hetimeve, sepse kjo është një çështje shumë e ndjeshme, e po ashtu të kemi konsideratë për familjet që presin informacione se çfarë po ndodh në këtë terren”, ka shtuar ajo.

Haxhiu tha se çështja e personave të zhdukur me dhunë mbetet plagë e hapur edhe më shumë se 25 vjet pas përfundimit të luftës.

“Ajo çfarë duhet të theksoj po ashtu është që personat e zhdukur me dhunë gjatë luftës në Kosovë — pra gjatë luftës së fundit në Kosovë — është plaga më e madhe me të cilën po përballemi edhe sot. Pra, përkundër faktit që kanë kaluar mbi 27 vite nga periudha e luftës, ne përballemi me pasojat e asaj lufte. Për sa kohë këtu po bëhet përpjekje maksimale për të kuptuar se ku janë personat e zhdukur me dhunë, vazhdojmë të përballemi me gjuhë urrejtjeje, me retorikë shoviniste, me mohim të krimeve, e po ashtu me pretendime me pretendime territoriale ndaj Republikës së Kosovës nga krerët e institucioneve në Serbi”, ka shtuar ndër të tjera Haxhiu./A.K/

Continue Reading

Të kërkuara