Kryetari i Aleancës për Ardhmërinë e Kosovës (AAK), Ramush Haradinaj, ka kujtuar e nderuar dëshmorët e martirët e rënë me 21 maj të vitit 1999 në Kaçanik. Haradinaj ka thënë se Kaçaniku me rrethinë i doli zot atdheut në çdo etapë.

“Në skaj të Kosovës, Kaçaniku me rrethinë i doli zot Atdheut në të gjitha etapat. Kjo trevë e dëshmoi veten edhe në luftën e fundit për liri. Sot, kisha nderin të jem në mesin e banorëve të Runjevës dhe Stagovës së Kaçanikut, ku mu bë një pritje e ngrohtë nga zemra. Përjetova ndjenja dhimbjeje por edhe krenarie deri sa bashkë me familjarë të dëshmorëve e martirëve dhe bashkëluftëtarë, nderuam dëshmorët; Kemajl Thaqi dhe Ekrem Gudaqi, të cilët ranë nën udhëheqjen e Komandantit tanimë Hero i Kosovës, Agim Bajrami. Po ashtu, me respektin më të lartë, nderuam martirët e rënë më 21 Maj 1999; Hanife Jaha, Selvije Krivanjeva, Baki Bela, Hanife Gudaqi, Ramush Jaha, Ibush Rrushi, Ramadan Dashi, Fahri Mani, Bahrije Elezi, Sevdije Guri, Hamdi Dashi, Brahim Dashi dhe Fitim Gudaqi”, ka thënë Haradinaj.

Haradinaj ka shtuar se aleanca jonë me ShBA-të dhe vendet e tjera të NATO-s nuk është thjesht një partneritet strategjik, është zotim për të hapur rrugët e suksesit dhe përparimit për brezat e ardhshëm.

“Trashëgimia që e lanë pas, të na shërbejë si shtytës në përpjekjet tona për një Kosovë të sigurtë. Aleanca jonë me Shtetet e Bashkuara të Amerikës dhe vendet e tjera të NATO-s nuk është thjesht një partneritet strategjik, është zotim për të hapur rrugët e suksesit dhe përparimit për brezat e ardhshëm. Le të punojmë krah për krah, të rreshtuar dhe të bashkuar në synimet tona, në përkushtimin tonë për Kosovën në NATO. Kjo është detyrë për ne. Lavdi e përjetshme të rënëve për liri. Heroizmi i tyre u trashëgoftë ndër breza!”, është shprehur Haradinaj.

Komisioni Hetimor Parlamentar lidhur me nivelin e menaxhimit të marrëdhënies së punës të anëtarëve të Shërbimit të Jashtëm dhe zyrtarëve të Ministrisë së Punëve të Jashtme dhe Diasporës, nuk ka arritur t’i votojë ekspertët që do të angazhohen për hetime.

Arsyeja e këtij dështimi ishte mospajtueshmëria ndërmjet pozitës dhe opozitës për numrin e saktë të ekspertëve. Pozita kërkoi dy ekspertë, ndërsa nga opozita u kërkuan të jenë tre ekspertë.

Deputetja e Partisë Demokratike të Kosovës, Ariana Musliu-Shoshi, tha se emrat e propozuar janë gati veçse kërkojnë miratimin e deputetëve.

“Ne e kemi dorëzuar CV-në e anëtarëve, janë të printuara nëse është nevojshme edhe me emër mundem por mendoj qe duhet t’i votojmë në pako të tre ekspertet ashtu siç jemi marr vesh në mbledhjen kaluar”, tha ajo.

Por për numrin e ekspertëve nuk u pajtua Lëvizja Vetëvendosje. Deputetja e kësaj partie, Fitore Pacolli, kërkoi që të mos jenë më shumë se dy ekspertë.

“Çdo vendim që merret në komision është vendim që votohet nuk kemi votuar të kemi tre ekspertë, mendojmë që propozimi ynë është të shkojmë me dy ekspert, një propozim i juaj si opozitë e një ne si pozitë”, tha Pacolli.

Votim sa më të shpejtë të ekspertëve kërkoi edhe deputetja e Lidhjes Demokratike e Kosovës, Vlora Dumoshi.

“Unë mendoj që tre ekspertë nuk janë shumë, e dimë që ka një punë të madhe. Ne kemi ardh me një ekspert, me një emër të ekspertit të pavarur dhe propozojmë në pako t’i votojmë ne po i dorëzojmë CV-të e tyre dhe të mos jetë problematikë, një apo dy ekspertë”, tha Dumoshi.

Ndonëse ky diskutim zgjati për një orë, votimi i tyre u shtye për një mbledhje tjetër.

Deklaratën e kryeministrit Albin Kurti se për katër vjet ka krijuar rreth 90 mijë vende të reja të punës, opozita po e sheh si manipulim me shifra dhe tentim për të shpërndarë mjegull tek qytetarët për të mbuluar dështimet e qeverisjes së tij.

Anëtari i Kryesisë së LDK-së, Berat Rukiqi, ka thënë se kjo qeveri që nga fillimi ka manipuluar me të dhënat ekonomike.

“Kur të përmend dikush një shifër duhet edhe të analizohet konteksti i shifrës, pra përmbajtja se çfarë ka brenda saj. Kryeministri, realisht njihet si manipulues i shifrave, numrave, krejt kjo qeveri është e karakterizuar me nevojën e vazhdueshme të manipulimit të të dhënave ekonomike edhe të atyre që janë shumë të dukshme në raportet ndërkombëtare, fare të mos flasim për ato të cilat janë realisht dhe numra zyrtarë të agjencisë që janë pjesë e kryeministrisë. Pra që janë pjesë e agjencisë së statistikave”, ka thënë Rukiqi.

Tutje ish-kryetari i Odës Ekonomike të Kosovës, ka thënë se shpeshherë kryeministri dhe ministrat e tij në mënyrë të vazhdueshme kanë tentuar të krijojnë mjegull sa i përket situatës reale ekonomike duke prezantuar shifra në disa raste të gabuara, e në disa raste krahasime të paqëndrueshme.

“Shembull, kryeministri fare se përmend që mbi 25 mijë vende pune përkohësisht kanë humbur gjatë pandemisë e pastaj janë kthyer për shkak se ekonomia ka qenë e mbyllur, kush është hap e pastaj janë kthyer, ky e merr edhe këtë shifër e fut në këtë që e përmend dhe në të njëjtën kohë krenohet me diçka që realisht ka qenë e vazhdueshme. Kësisoj është një shifër e cila në vete është e manipuluar për shkak se i shtohet atij një numër që gjatë pandemisë i kanë humbur vendet dhe janë kthyer. E dyta brenda vetës përfshin formalizim të vende të punës”, theksoi anëtari i kryesisë së LDK-së.

Ndërsa deputeti i Partisë Demokratike të Kosovës, Rashit Qalaj, e quan shifër që ka për qëllim shpërndarjen e mjegullës tek qytetarët dhe për të mbuluar stagnimin e shtetit nën qeverisjen e Kurtit.

“Ai specifikisht të tregoj se cilat janë ato vende të punës, unë çka e di mund ta them sipas informatave që i kam unë nga Ministria e Financave janë edhe 6 mijë vende të lira të punës. Pra, kryeministri Kurti nuk është duke arritur vendet e lira t’i plotësojë, mirëpo ai në vazhdimësi jep informata të pasakta, vetëm me shpërnda mjegull të qytetarët e Kosovës, sepse ju e dini që Kosova ka stagnuar në të gjitha fushat”, ka thënë Qalaj.

Fundjavën që shkoi, gjatë prezantimit të skemës së re të asistencës sociale, kryeministri Albin Kurti, ka thënë se në katër vitet e fundit, në Kosovë janë krijuar rreth 90 mijë vende të reja të punës.

“Nga 331,742 vende pune në mbyllje të vitit 2019, në fund të vitit 2023, pra për një periudhë 4 vjeçare, kemi 419,126 vende pune apo mbi 87 mijë vende pune më shumë apo mbi 26 për qind”, kishte thënë Kurti.

Auditorja e Përgjithshme e Zyrës Kombëtare të Auditimit (ZKA), Vlora Spanca, ka thënë se gjatë vitit të kaluar janë kryer 107 Auditime Financiare dhe të Pajtueshmërisë të pasqyrave vjetore financiare.

Gjatë raportimit në Komisionin për Mbikëqyrjen e Financave Publike, Spanca tha se ZKA-ja ka arritur t’i përmbush të gjitha kërkesat dhe afatet ligjore për punën audituese me rezultatet përkatëse. Spanca ka thënë se bashkëpunim kanë edhe me Prokurorinë e Shtetit, ku nga viti 2018, kanë dërguar mbi 300 raste të dyshuar për mashtrim e korrupsion. Ajo tha se duke kryer auditime dhe publikuar 125 raporte të auditimit të fushave financiare/pajtueshmërisë, si dhe të performancës.

“Gjatë vitit 2023, janë kryer 107 Auditime Financiare dhe të Pajtueshmërisë të pasqyrave vjetore financiare, objektivë e të cilave ishte të ofrojmë siguri të arsyeshme nëse pasqyrat financiare si tërësi nuk përmbajnë keçdeklarime materiale, si dhe të ofrojmë opinionin e auditimit në lidhje me këto pasqyra. Përveç, opinionit, ne kemi shprehur konkluzionin e auditimit për pajtueshmërinë me legjislacionin e zbatueshëm përkatës. Këto auditime kanë përfshirë të gjitha organizatat buxhetore përfshirë nivelin qendror, nivelin lokal dhe institucionet e pavarura, mandej një numër të konsiderueshëm të ndërmarrjeve publike si dhe projektet e financuara nga donatorë siç janë Banka Botërore dhe DEMOS – projekti Helvetas”, tha Spanca.

Spanca ka deklaruar se Raportet e auditimit për vitin 2023 kanë identifikuar mangësi të ndryshme, disa prej të cilave i veçoi para anëtarëve të këtij komisioni.

“Në Organizatat buxhetore. Cilësia e raportimit financiar ende vazhdon të mos jetë në nivelin e pritur për shkak se nga 86 auditimet e pasqyrave vjetore financiare, 33 sosh kishin keq deklarime materiale të cilat kanë rezultuar me opinion të modifikuar/kualifikuar. Ndërsa 53 të tjera kanë rezultuar me opinion të pamodifikuar. Megjithatë, krahasuar me vitin e kaluar cilësia e raportimit financiar është përmirësuar për shkak se në vitin 2022 janë 13 organizata buxhetore më pak të cilat kanë marrë opinion të modifikuar. Prezantimi i saktë dhe i plotë i informatave financiare e rrit besueshmërinë e lexuesve ndaj raportimit financiar. Përveç këtyre, ZKA ka evidentuar çështje që lidhen me kontrollet dhe menaxhimin financiar si: Planifikim dhe realizim të buxhetit, rritje e llogarive të arkëtueshme, detyrimet e papaguara dhe kontigjente, pagesat sipas vendimeve gjyqësore dhe përmbarimore, si dhe pasuritë jo financiare. Te Ndërmarrjet Publike-Cilësia e raportimit financiar edhe pse krahasuar me vitin e kaluar është përmirësuar, ende vazhdon të mos jetë në nivelin e pritur. Nga 11 auditimet e pasqyrave financiare të këtyre ndërmarrjeve, vetëm tek 1 është dhënë opinion i pamodifikuar, ndërsa tek 10 të tjera opinion i modifikuar (7 të kualifikuar dhe 3 të kundërta)”, deklaroi ajo.

Punë të mirë, Spanca ka thënë se po bëjnë edhe në adresimin e rasteve me mundësi potenciale për mashtrim e korrupsion. Si rezultat i kësaj, gjatë vitit 2023, kanë dorëzuar në Prokurorinë e Shtetit 51 raste me elemente potenciale të veprave penale

“Në përputhje me standardet ndërkombëtare dhe detyrimet tjera ligjore, ZKA edhe gjatë vitit dhe 2023 fokus të rëndësishëm i ka  dhënë trajtimit dhe adresimit të çështjeve më mundësi potenciale për mashtrim e korrupsion. Nga rezultatet e nxjerra në vitin 2023, kemi dërguar në Prokurori të Shtetit 51 raste me elemente potenciale të veprave penale, mashtrimit dhe korrupsionit, si dhe 3 raporte të auditimit në tërësi. Ndërsa, nga viti 2018 kemi dërguar ne Prokurori te Shtetit, mbi 300 raste me dyshime për mashtrim e korrupsion. Nga gjithsejtë këto raste, nga Prokurori i Shtetit në përputhje me marrëveshjen e bashkëpunimit kemi pranuar informata kthyese për 143 raste ( raste janë për vite të ndryshme). Sipas këtyre informatave: janë ngritur vetëm 3 aktakuza, 81 raste janë në proces të hetimit (pra janë ndërmarrë veprimet hetimore) dhe për 59 raste me raport të Prokurorit rastet janë mbyllur”, shtoi ajo.