Lajmet

Haradinaj kujton heroinën Aze Brahimaj

Haradinaj po ashtu ka kujtuar edhe tre të tjerë të rënë me 3 gusht 1998.

Published

2 years ago

August 3, 2023

Betim Gashi

Kryetari i Aleancës për Ardhmërinë e Kosovës (AAK), Ramush Haradinaj, ka kujtuar heroinën Aze Brahimaj në 25-vjetorin e përjetësimit. Haradinaj po ashtu ka kujtuar edhe tre të tjerë të rënë me 3 gusht 1998.

“Në 25 – vjetorin e rënies, nderojmë heroizmin e nënës Aze, e gjithashtu sakrificën e nënës së saj Zize Syla dhe të rënëve të tjerë të 3 gushtit 1998, Idriz Gucati, Sejdi e Arif Kasumaj. Një nënë luftëtare si ajo, është unike në historinë tonë të re dhe sot kur e kujtojmë me pietet, duhet të vëmë në pah se lavdia e UÇK-së nuk do ta kishte përmasën që e ka pa nënat tona të papërkulura. Trimëria, guximi dhe vendosmëria e saj deri në vetëmohim, e bën të veçantë dhe të paharruar në kujtimin e brezave”, shkroi Haradinaj.

Kontributi i nënë Azës, në luftën për çlirimin e Kosovës vlerësohet i madh. Gjyshja e Ramush Haradinajt nga ana e nënës, në radhët e UÇK-së bashkë me krejt familjen ishte inkuadruar qysh në vitin 1996.

Me krijimin e celulave të para të UÇK-së, në Dukagjin, ajo priti në shtëpinë e saj, i strehoi, ju dha bukë, luftëtarëve çlirimtarë më vonë dëshmorë të kombit si: Zahir Pajaziti, Mujë Krasniqi, Fehmi e Xhevë Lladrovci, Luan e Shkelzen Haradinaj, Abedin Rexha, Bedri Shala, ABEJA-ja, Xheladin Gashi, Xhelal Hajda, pastaj edhe Sylejman e Rexhep Selimit, Ramush e Daut Haradinaj, Kadri Veseli e Hashim Thaçi, Sahit e Musë Jasharit, Nait Hasani, e shumë të tjerë. Të gjithë këta e të tjerë nëna Azë i priste i përcillte, u jepte bukë, u jepte moral për luftën.

Ndihmesë të madhe luftës çlirimtare i dhanë edhe njësitë logjistike që shërbenin në zonat e lira pranë komandave, pastaj njësitë mobile që bënin lidhjet me logjistikën nëpër vende të ndryshme. Një kontribut të tillë dha edhe Azë Brahimaj, e cila shumë herë gjatë veprimtarisë së saj ilegale e legale kishte rrugëtuar nëpër vende të ndryshme të Kosovës, për të kontaktuar me grupe dhe për të mbajtur lidhjet e tyre si atë të Jabllanicës e Gllogjanit e të tjera.

Kur luftëtarët çlirimtarë nuk kishin mundësi lëvizjeje, në rrethana të caktuara të luftës, sidomos gjatë ditës kur ndodheshin në ndonjë bazë, ishte nëna Azë, ajo që shkonte e dërgonte porositë e caktuara, njëjtë sikur kishte vepruar në Prekaz, Sala Jashari.

Me mund dhe pa u kursyer në moshën e saj të pleqërisë, ajo gatuante bukë dhe u mbante lidhje luftëtarëve të lirisë, që qëndronin me ditë e javë në shtëpinë e saj. Ajo mbahej krenare për bijtë luftëtarë, për Lahiun që ishte pjesë e kreut të luftës, për nipat në Gllogjan të cilët mbanin mbi supe fatin e luftës në Dukagjin. E vetëdijshme për pozitën me të cilën e kishte ballafaquar koha, ajo kishte marrë vendimin e saj definitiv, të qëndronte në shtëpi dhe ta mbronte konakun e burrit e të vetin, ku kishte lindur e rritur bijtë e bijat dhe ku kishte jetuar me nder e dinjitet.

Me 2 gusht të vitit 1998 në ofensivën që ndërmori ushtria serbe, nëna Aze nuk pranoi të largohej nga shtëpia. Ajo kishte ndarë mendjen me kohë dhe donte të qëndronte në shtëpi e të ishte krah për krah me djemtë e saj, që luftëtarëve të lirisë të mos u mungonte buka. Me 3 gusht të vitit 1998 forcat vrastare e vranë në oborr të shtëpisë, së bashku me nënën e saj Zizën, 100 vjeçare, e cila ndodhej te bija e saj.

Atë ditë nëna Azë e shpagoi veten. Ajo i zbrazi dy bombat e dorës, që i kishte ruajtur me muaj për një sulm të tillë. Nëna Azë u bë e pavdekshme me veprat e saja. Ajo vuri vetën në shërbim të interesave të kombit, nuk u kursye për asgjë deri në momentin e fundit të jetës së saj.

Pas vdekjes, është dekoruar me mirënjohje nga ish-presidentët Atifete Jahjaga dhe Hashim Thaçi.

Related Topics:AAK heroina Ramush Haradinaj

Up Next

Tërmeti godet Turqinë

Don't Miss

Katër raste të dhunës në familje brenda 24 orëve

Lajmet

Shëndeti i zorrëve, si ta mbroni sistemin tretës?

Published

17 minutes ago

July 11, 2025

UBT News

Gjatë dy dekadave të fundit, studimet kanë treguar se shëndeti i zorrëve ndikon drejtpërdrejt në mirëqenie, përmes mekanizmave që përfshijnë sistemin imunitar, mendor, humorin, lëkurën dhe madje edhe zhvillimin e sëmundjeve si kanceri.

Në një kohë kur stili i jetës modern përfshin konsum të ushqimeve të përpunuara, mungesë gjumi dhe stres të vazhdueshëm, është e rëndësishme të dini si të mbroni sistemin tretës, përpara se trupi të dërgojë sinjale alarmi.

Luftoni stresin

Stresi kronik është një nga faktorët më dëmtues për shëndetin e zorrëve. Ulni nivelet e ankthit përmes teknikave relaksuese si:

meditimi, joga, ecja në natyrë
masazhe relaksuese
kalimi i kohës me njerëz të dashur ose kafshë shtëpiake
dhe pse jo, duke qeshur – një refleks që sjell përfitime të shumta për trupin.

Përmirësoni cilësinë e gjumit

Mungesa prish ekuilibrin e zorrëve, dhe kjo, në kthim, ndikon negativisht në cilësinë e gjumit. Flini 7-8 orë çdo natë, në mënyrë të pandërprerë. Nëse kjo nuk është e mundur, kërkoni ndihmën e një specialisti.

Mos hani me nxitim

Përtypja e ngadaltë dhe e mirë i jep organizmit kohën e duhur për tretje e thithje të lëndëve ushqyese. Kjo zakon sjell përfitime kundër fryrjes, dispepsisë dhe problemeve të tjera gastrointestinale.

Qëndroni të hidratuar

Konsumoni mjaftueshëm ujë gjatë ditës për të forcuar mukozën e zorrëve dhe për të ruajtur ekuilibrin e mikrobiomës – komunitetit të baktereve të dobishme që jetojnë në zorrët tona.

Konsideroni probiotikët dhe prebiotikët

Prebiotikët janë fibra bimore të patretshme që ushqejnë probiotikët. Probiotikët janë mikroorganizma të gjallë që mbështesin florën bakteriale të zorrëve.

Mund të merren përmes ushqimeve ose suplementeve, por gjithmonë me rekomandimin e mjekut për të siguruar dozat dhe përbërjen e duhur.

Kontrolloni për ndjeshmëri ushqimore

Simptoma si fryrje, dhimbje barku, diare, skuqje të lëkurës, të përziera, lodhje apo refluks mund të tregojnë intolerancë ndaj ushqimeve. Mbani një ditar ushqimor për të identifikuar dhe shmangur ato që ju shkaktojnë probleme.

Adoptoni një plan të shëndetshëm ushqimor

Ndryshimet e thjeshta në dietë mund të sjellin përmirësime të ndjeshme. Filloni duke:

shmangur ushqimet e përpunuara dhe me përmbajtje të lartë sheqeri apo yndyre
shtuar më shumë fibra bimore dhe proteina të dobëta
duke konsumuar ushqime të tilla si:
– Të pasura me fibra: bishtajore, fasule, bizele, tërshërë, banane, manaferrat, asparagus, pras

– Hudhër dhe qepë: me veti antiinflamatore dhe imuno-fortuese

– Ushqime të fermentuara: kimchi, lakër turshi, kos, miso, kefir – burime natyrale të probiotikëve

Shëndeti i zorrëve është shumë më tepër se tretje e mirë është themeli i mirëqenies suaj mendore dhe fizike. Kujdesuni për të përditë, sepse ndikon në çdo aspekt të jetës suaj.

Lajmet

Vdes një person nga aksidenti në rrugën Prishtinë-Podujevë

Published

17 hours ago

July 10, 2025

UBTnews

Një person ka vdekur dhe katër të tjerë janë lënduar nga aksidenti që ka ndodhur mes një veture dhe traktori në rrugën Prishtinë-Podujevë.

Policia e Kosovës konfirmoi për KosovaPress se aksidenti ka ndodhur rreth orës 14:00.

“Si pasojë e aksidentit në vendin e ngjarjes ka humbur jetën një person dhe janë lënduar katër të tjerë. Personat e lënduar janë dërguar për tretman mjekësor ndërkohë që me rastin po merret njësiti i trafikut rajonal”.

Lajmet

Range Rover tashmë ka një logo të re

Published

17 hours ago

July 10, 2025

UBT News

Range Rover ka një logo të re. Megjithëse, një që nuk do ta shihni në një veturë.

Logo u shfaq kohëve të fundit për investitorët dhe është zhvilluar si një simbol për vendet ku nuk përshtatet shenja e njohur e markës si p.sh në një etiketë dhe brenda hapësirave të ngjarjeve ku një emblemë është më e përshtatshme.

Ndryshe, ajo që Range Rover po bën këtu nuk është pa precedent. BMW pesë vjet më parë debutoi një version të ri të logos së saj ikonike që e përdor në markë, por jo në vetura. Shumë marka makinash po debutojnë gjithashtu logo të reja.

Vetëm javën e kaluar, pamë për herë të parë logon e re të Bentley. Dhe Jaguar mori një logo të re si pjesë e transformimit total që është duke u zhvilluar aktualisht. Ky do të jetë një vit i madh për Range Rover, me mbërritjen e afërt të modelit kryesor tërësisht elektrik.

Do të duket identik me Range Rover-in e madh me benzinë. Logo dhe gjithçka.

Lajmet

KQZ miraton 566 kërkesa për ndërrim të qendrave të votimit

Published

18 hours ago

July 10, 2025

UBTnews

Në mbledhjen e Komisionit Qendror të Zgjedhjeve të mbajtur të enjten, më 10 korrik, u bë e ditur se është duke u zhvilluar periudha për ndërrimin e Qendrës së Votimit brenda komunës, për zgjedhjet lokale që do të mbahen me 12 tetor. Nga 28 qershori deri më 9 korrik 2025, janë pranuar 633 kërkesa – prej të cilave 566 janë aprovuar, ndërkaq 66 të tjera janë refuzuar.

Drejtori në Zyrën për Regjistrim, Certifikim dhe Kontrollin Financiar të Subjekteve Politike, Besnik Buzhala tha se janë refuzuar për shkak se nuk kanë bashkangjitur fotografinë e tyre duke mbajtur në dorë dokumentin identifikues.

“Periudha e shërbimeve të votuesve e cila ka filluar me datë 28 qershor dhe deri dje me datë 9 korrik 2025 në orën 16:00 janë parashtruar gjithsej 633 kërkesa për ndërrimin e qendrës së votimit nga të cilat 566 janë aprovuar, ndërsa 66 janë refuzuar për shkak se votuesit nuk kanë bashkangjitur fotografinë së bashku me dokumentet identifikues në dorë”, tha Buzhala.

Po ashtu, anëtarët e KQZ-së, u njoftuan nga Buzhala edhe për periudhën e aplikimit online për certifikimin e subjekteve politike dhe kandidatëve të tyre, e cila ka filluar më 26 qershor dhe do të përfundojë më 13 gusht 2025.

Deri më tani, Zyra për Regjistrim, Certifikim dhe Kontrollin Financiar të Subjekteve Politike u ka krijuar qasje në platformën për certifikim 47 subjekteve politike të regjistruara, 6 iniciativave qytetare dhe 1 kandidati të pavarur.

“Po ashtu periudha e aplikimit për certifikimin e subjekteve politike dhe kandidatëve të tyre që ka filluar me datë 26 qershor dhe do të përfundoj më 13 gusht 2025. I kemi shpërnda të gjitha të dhënat për hapjen e llogarive me qëllim të aplikimit për certifikim. Deri më datën 9 korrik 2025 janë hapur llogari të cilat janë aktive për 47 subjekte politike të regjistruara, gjashtë iniciativa qytetare dhe një kandidat të pavarur, totali i llogarive të hapura në total është 54”, tha Buzhala.

Anëtari i KQZ-së nga PDK-ja, Ilir Gashi, kërkoi nga Buzhala që në mbledhjen e radhës të ketë një raport shtesë për buxhetin shtesë për dërgimin e fletëvotimeve te qytetarët në diasporë, për të shikuar se a ka buxhet të mjaftueshëm.

“Po bëhen pothuajse katër javë që keni dërguar një kërkesë shtesë në institucione të Kosovës për me nda një buxhet shtesë për faktin se në rregulloret tona, ne kemi parapa që fletëvotimet e qytetarëve tanë në diasporë tua dërgojmë secilit në shtëpitë e tyre. Ky operacion kërkon buxhet shtesë dhe është një operacion i cili ka për synim të kthimit të integritetit të procesit në diasporë. Prandaj unë mendoj që ju do të duhej në mbledhjen e radhës të na bini një raport shtesë të detajuar sa i përket kësaj çështje sepse mos ndarja e këtij buxheti nënkupton edhe mos mundësinë e realizimit ë këtij operacioni. Ju duhet të na tregoni se a do të mundemi t’i tërheqim fletëvotimet me një operator të suksesshëm apo do të përballemi me problematikën e njëjtë”, theksoi Gashi.

KQZ u njoftua se është përzgjedhur operatori fitues në procesin e prokurimit “Auditimi i raporteve financiare të fushatës së zgjedhjeve për Zgjedhjet për Kuvendin e Kosovës 2025”. Së shpejti, auditorët do të fillojnë auditimin e raporteve financiare të subjekteve politike dhe raportet e audituara do të publikohen nga KQZ.

Gjithashtu në këtë mbledhje u miratua edhe vendimi për çregjistrimin e partisë politike “Lëvizja për Bashkim” e cila ka paraqitur në Zyrën për Regjistrim, Certifikim dhe Kontrollin Financiar të Subjekteve Politike (ZRCKFSP) vendimin dhe dokumentacionin mbështetës për pushimin e të gjitha aktiviteteve politike.

Pas këtij vendimi, Zyra do të njoftojë Bankën Qendrore të Kosovës për bllokimin dhe deri në mbylljen e llogarisë bankare dhe Administratën Tatimore për fshirjen e numrit fiskal.