Kulturë

​Hapet ekspozita “Raffaello portertist” në Muzeun Kombëtar të Kosovës

Në muret e Muzeut të Kosovës janë vendosur 14 portrete në përmasa origjinale të artistit italian, Raffaello.

Published

on

Në mesin e shumë vendeve të botës edhe në Kosovë është bërë hapja e ekspozitës “Raffaello portretist”. Në muret e Muzeut të Kosovës janë vendosur 14 portrete në përmasa origjinale të artistit italian, Raffaello. Mes teknologjisë së re dhe klasikes, kjo ekspozitë po cilësohet të jetë e nivelit ndërkombëtar.

Ministri i Kulturës, Rinisë dhe Sportit, Hajrulla Çeku tha se kjo ngjarje shënon një bashkëpunim kulturor mes Kosovës dhe Italisë, duke shtuar se është e rëndësishme që në vend po ekspozohen veprat e artistit botëror italian.

“Portretet që kemi sot këtu na sjellin dimension të paraqitjes artistike. Unë jam shumë i lumtur që si MKRS, si institucione shtetërore të kulturës edhe si Muze i Kosovës, kemi mundësi me qenë e pjesë e organizimeve të tilla dhe projekteve të rëndësishme të nivelit ndërkombëtar. Pasi që kjo është një ekspozitë lëvizëse, ka lëvizur në gjithë botën dhe do të lëvizë edhe në vende të tjera. Jemi të lumtur që jemi pjesë e një organizimi të këtillë ndërkombëtar”, ka thënë Çeku.

Zëvendësshefi i Misionit të Italisë në Kosovë, Ugo Ferrero ka thënë se kjo ekspozitë do të jetë e hapur deri më 10 tetor. Ai u ka bërë thirrje qytetarëve që të shohin këtë ekspozitë me veprat më të rëndësishme të Raffaellos.

“Si ambasadë italiane këtu në Kosovë, në Prishtinë jemi shumë të lumtur që më në fund e kemi hapur këtë ekspozitë në Muzeun Kombëtar të Kosovës, në bashkëpunim me muzeun dhe Ministrinë e Kulturës, ne mendojmë se hapja e kësaj ekspozite, duke respektuar të gjitha masat antiCOVID është shumë e rëndësishme, dhe kultura duhet të fillojë…, natyrisht duke respektuar të gjitha masat, që janë në fuqi dhe duke sjellë këtu një nga kryeveprat, një nga artistët më të rëndësishëm italianë Rafaelo, me këtë ekspozitë që përfshinë klasiken dhe teknologjitë e reja, është vërtet e rëndësishme”, ka thënë ai.

Ndërsa, drejtori i Muzeut të Kosovës, Ajet Leci tha se ekspozimi i 14 portreteve në ambientet e tyre, ka rëndësi të veçantë për Muzeun e Kosovës.

“Ne me Ambasadën e Italisë kemi pasur edhe bashkëpunime të mëhershme, që besoj që këto bashkëpunime do t’i kemi edhe në të ardhmen. Ne paraprakisht biseduam me zëvendës-ambasadorin që të kemi aktivitete të përbashkëta në të ardhmen”, u shpreh ai.

Ndër portretet që bien në sy janë “Portreti i Baldassarre Castiglione” (Luvri) dhe “Portreti Zonja me njëbrirësh” (Galeria Borghese). Kjo ekspozitë është e hapur nga ora 10 e mëngjesit deri në orën 18:00.

Ekspozita është realizuar me mbështetjen e Ambasadës së Italisë në Prishtinë, Institutit italian të Kulturës në Tiranë dhe Ministrisë së Kulturës, Rinisë dhe Sportit të Kosovës. Ekspozita, e cila tashmë ka ndaluar në Tunizi, Turqi dhe Finlandë, pas Kosovës do të vazhdojë në Maqedoninë e Veriut. 

Lifestyle

Rituali ideal i përgatitjes së lëkurës në moshë për një grim të qëndrueshëm

Published

on

Përgatitja e lëkurës është çelësi për një grim të përsosur, sidomos kur koha kalon dhe lëkura ndryshon.

Formulat e lehta dhe produktet e synuara ndikojnë në qëndrueshmërinë dhe freskinë e grimit tuaj, duke e bërë më të lëmuar dhe natyral.

Një lëkurë e pastër dhe e shëndetshme është baza e çdo rutine grimi, pa marrë parasysh moshën. Me kalimin e viteve, rutina para aplikimit duhet të përshtatet për të ruajtur rezultatin e dëshiruar.

Përgatitja e duhur mund të bëjë ndryshimin mes një grim natyral, të përditshëm, dhe një pamjeje glamuroze për raste speciale.

Pse është e rëndësishme përgatitja e lëkurës?

Hapi i parë përcakton nëse grimi do të duket i freskët dhe i qëndrueshëm. Lëkura e hidratuar redukton dukshmërinë e rrudhave e pengon grumbullimin e produktit, përdorimi i produkteve të përshtatura me shenjat e plakjes ndihmon në mbushje, zbutje dhe mbrojtje të lëkurës.

Produktet që duhen shmangur

Pilingjet e ashpra dhe eksfoliantët fizikë që irritojnë lëkurën dhe shtojnë teksturë të panevojshme.

Kremrat e rëndë nën pudër që mund të shkaktojnë rrëshqitje të produktit.

Primerët që mbushin poret ose ato matifikues, sepse mund të theksojnë strukturën e lëkurës në moshë.

Produktet që duhen përdorur

Rituali bazë përfshin pastrim, piling të butë, hidratim dhe mbrojtje SPF.

Për lëkurën në moshë, rekomandohet përdorimi i produkteve të synuara:

Pastrues dhe piling të butë për një sipërfaqe të pastër.

Produktet me antioksidantë për ndriçim dhe mbrojtje nga radikalet e lira.

Serumet me acid hialuronik ose peptide për hidratim dhe mbushje të lëkurës.

Produkte me ceramide, peptide ose niacinamide për ushqim dhe lëmuar të lëkurës.

Qëllimi është që lëkura të jetë e ushqyer dhe gati për grim. Aplikimi shtresë mbi shtresë i formulave të lehta siguron përthithje të mirë dhe pamje natyrale. Kujdesi për zonën nën sy me krem antirrudhë është i domosdoshëm për të shmangur grumbullimin e grimit në vijat e vogla. /A.Z/UBT News/

Continue Reading

Lifestyle

Miqësia, çelësi për lumturi! Takimet me shokët ulin ndjeshëm trishtimin

Published

on

Një studim i kryer nga Universiteti i Oksfordit ka zbuluar se socializimi me miqtë, sidomos në mjedise relaksuese si “natat me shokët”, ka një efekt të rëndësishëm pozitiv mbi mirëqenien emocionale të meshkujve.

Ky kërkim nxjerr në pah se takimet e rregullta me miqtë e ngushtë ndikojnë në uljen e ndjenjave të trishtimit dhe vetmisë deri në 45%, duke përmirësuar ndjeshëm humorin dhe shëndetin mendor.

Sipas studiuesve, përfitimet nuk lidhen me konsumin e alkoolit, siç mund të mendohet shpesh, por me ndërveprimet sociale, të qeshurat dhe lidhjen e thellë që krijohet gjatë kohës së kaluar me shokët.

Këto momente aktivizojnë sistemin e shpërblimit në tru, duke çliruar endorfina, hormonin e lumturisë dhe duke ulur nivelet e hormoneve të stresit.

Studimi tregon se meshkujt që kalojnë më shumë kohë në biseda argëtuese me miqtë, përjetojnë më pak stres e ndihen më pak të vetmuar.

Ky zbulim vlen për të theksuar rëndësinë e mbajtjes së lidhjeve sociale për mirëqenien emocionale dhe për të luftuar ndikimet negative të stresit dhe trishtimit.

Ekspertët rekomandojnë që, përtej rutinës së përditshme, të gjejmë kohë për takime me njerëzit që na bëjnë të ndihemi mirë, pasi këto momente sociale janë një mbështetje e fuqishme për shëndetin mendor.

Nuk është pijet që bëjnë diferencën, por lidhja dhe bashkëbisedimi i vërtetë. /A.Z/UBT News/

Continue Reading

Kulturë

Britania feston “Rozë Ball”-in në Muzeun Britanik, Greqia reagon për ekspozimin pranë Skulpturave të Partenonit

Published

on

Muzeu Britanik organizoi të shtunën në mbrëmje një festë madhështore me qëllim mbledhjen e fondeve për nevojat e institucionit, e quajtur “Rozë Ball”, që u zhvillua në ambientet e tij historike, përfshirë Galerinë Duveen, ku ekspozohen Skulpturat e Partenonit.

Siç pritej, ky fakt ngjalli reagime të ashpra në Greqi. Ngjarja, e frymëzuar nga MET Gala amerikane, kishte për synim të tërhiqte elitën e artit dhe biznesit për të ndihmuar muzeun, i cili po përballet me rënie të të ardhurave në vitet e fundit.

Një mbrëmje rozë për artin dhe luksin

Për këtë “Rozë Ball” të parë u ofruan 800 ftesa me çmim prej 2,000 paundësh secila, që u shitën plotësisht.  Të ftuarit duhej të respektonin veshjen zyrtare në nuanca rozë, në nder të ekspozitës së re mbi Indinë e lashtë, të sponsorizuar nga biznesmenja dhe artdashësja Isha Ambani, e cila ishte edhe bashkëorganizatore e mbrëmjes.

Atmosfera e natës mbajti një ngjyrim të fortë indian, nga muzika dhe ushqimi, deri te vallëzimet dhe dekorimet. Në një skenë të veçantë, përballë Skulpturave të Partenonit, të ftuarit shijuan shampanjë, aromat e kuzhinës indiane dhe performancat muzikore live.

Emra të njohur në tapetin rozë

Ndër të pranishmit u panë Sir Mick Jagger me partneren Melanie Hamrick, Naomi Campbell, Janet Jackson, Kristin Scott Thomas, Manolo Blahnik, si dhe mbesat e Princeshës Diana, Kitty, Amelia dhe Eliza Spencer.

Në mesin e të ftuarve ishin gjithashtu Daphne Guinness dhe Eugenia Niarchou, të njohura për lidhjet e tyre me modën dhe filantropinë.

Ankand për bamirësi

Përveç shitjes së biletave, fondet u shtuan përmes një ankandi bamirësie, ku u ofruan dhurata të veçanta, si portret kafshe i pikturuar nga kuratorja Dame Tracey Emin dhe një tur ekskluziv në apartamentin e Coco Chanel.

Greqia kërkon kthimin e skulpturave

Ndërkohë që Muzeu i Akropolit në Athinë vazhdon fushatën për ribashkimin e Skulpturave të Partenonit, drejtori i Muzeut Britanik, Nicholas Cullinan, ka zgjedhur të fokusohet në bashkëpunime private për të siguruar stabilitetin financiar të institucionit.

“Nevojat financiare të muzeut kërkojnë që të jesh fleksibël dhe sipërmarrës,” deklaroi ai, duke mbrojtur qasjen e re të muzeut ndaj financimit. /A.Z/UBT News/

Continue Reading

Kulturë

Prishtina mirëpret edicionin e 25-të të Festivalit Frankofon të Filmit

Published

on

Në Prishtinë sot hapet edicioni i 25-të i Festivalit Frankofon të Filmit, një ngjarje që këtë vit vjen me temën “Moda”.

Festivali organizohet nga Ambasada e Francës në bashkëpunim me ambasadat e Belgikës, Luksemburgut dhe Zvicrës, duke sjellë një program të pasur me filma, diskutime dhe performanca artistike që ndërthurin artin e kinemasë me botën e stilit dhe kreativitetit.

Hapja zyrtare në Kino ARMATA

Ceremonia hapëse do të mbahet sonte në orën 19:00 në Kino ARMATA, ku publiku do të ketë mundësinë të ndjekë filmin “Couture” të regjisores Alice Winocour, me aktorët Angelina Jolie dhe Louis Garrel në rolet kryesore.

Mbrëmja do të nisë me një performancë që bashkon modën dhe kinemanë, realizuar në bashkëpunim me Akademinë Evolucion, duke krijuar një atmosferë që përçon thelbin e temës së sivjetme të festivalit.

Konferenca “Moda dhe Kinemaja”

Në kuadër të aktiviteteve, më 28 tetor në orën 11:00, në Institutin Francez të Kosovës, do të mbahet konferenca “Moda dhe Kinemaja”, ku profesionistë të njohur do të diskutojnë për ndikimin e ndërsjellë mes artit filmik dhe industrisë së modës.

Programi dhe hyrja

Shfaqjet e filmave frankofonë do të zhvillohen nga 23 deri më 28 tetor në Kino ARMATA, ndërsa hyrja për publikun do të jetë falas.

Qëllimi i festivalit

Me këtë edicion jubilar, festivali synon të promovojë diversitetin kulturor dhe kreativitetin e kinemasë frankofone, duke e kthyer Prishtinën në një qendër të dialogut artistik frankofon për disa ditë me radhë. /A.Z/UBT News/

Continue Reading

Të kërkuara