Sport

​Gjonbalaj: Problemet në Kombëtare nuk zgjidhen me trajnerin e ri, duhet strategji zhvillimore

Gjonbalaj thotë se ka pasur zhvillime pozitive brenda Kombëtares së Kosovës, por që në vitin e fundit pati ngecje dhe rezultate negative.

Published

5 years ago

on

Ish-futbollisti i njohur, Malsor Gjonbalaj ka kërkuar nga Federata e Futbollit të Kosovës që të bëjë kujdes në përzgjedhjen e trajnerit të ri të Kombëtares. Sipas tij, përzgjedhësi i ri duhet të ketë njohuri për mentalitetin e skuadrës si dhe të kontribuojë në zhvillimin e një strategjie që do të çonte përpara futbollin e Kosovës.

Gjonbalaj thotë se ka pasur zhvillime pozitive brenda Kombëtares së Kosovës, por që në vitin e fundit pati ngecje dhe rezultate negative, që sollën edhe shkarkimin e trajnerit.

“Nuk i kisha ndarë paraqitjet e Kombëtares vetëm në këtë vit sepse ajo ka qenë një vazhdimësi, një periudhë e vazhdueshme prej konsolidimit të saj. Unë mendoj që ka pasur shumë zhvillime pozitive, por që së fundmi, sidomos vitin e fundit ose periudhën e fundit kishte ngecje, kishte disa probleme të cilat rezultuan edhe me largimin e trajnerit të Kosovës. Mbetet një punë e madhe për t’u bërë kryesisht në përzgjedhjen e trajnerit i cili duhet të jetë për mendimin tim një profil që e njeh mirë mentalitetin tonë dhe e cili do të kalojë më shumë kohë në Kosovë në kuptimin që ta analizojë më mirë Ligën e Kosovës, futbollin e Kosovës dhe në këtë aspekt të kontribuojë me idetë e tij në zhvillimin e një strategjie përparimtare për futbollin e Kosovës në përgjithësi”, tha fillimisht Gjonbalaj.

Gjonbalaj bën thirrje që drejtuesit e FFK-së nuk duhet të përjashtojnë emrat e trajnerëve vendorë kur të marrin vendimin për trajnerin e ri, por tërhoqi vëmendjen që problemi nuk qëndron vetëm te trajneri.

Sipas tij, Kosova ka nevojë për hartimin e një strategjie zhvillimore afatgjate në mënyrë që pastaj secili trajner që do të jetë në krye të ekipit të ketë një bazë për ta rritur dhe zhvilluar pikërisht atë strategji.

“Ne duhet të luftojmë që të sjellim cilësi në radhë të parë, edhe futbollistë cilësorë edhe trajnerë cilësorë, prandaj në këtë aspekt unë mendoj që duhet të mendohet që të sillet një trajner shumë cilësor i cili do të mund të kontribuonte, por në të njëjtën kohë absolutisht të mos anashkalohen edhe trajnerët kosovarë oshe shqiptarë. Unë mendoj që kemi kualitete edhe të trajnerëve shqiptarë të cilët mund të udhëheqin, por nuk mendoj se është ky problemi i zgjedhjes së një trajneri. Mendoj që problemi është, ose në fakt si do të duhet të përparohej futbolli i Kosovës dhe të eliminohet ky problem është në krijimin e një strategjie zhvillimore e cila do të ishte disavjeçare dhe në kuadër të kësaj edhe nëse trajnerët ndryshohen, cilido që vjen do të ketë një bazë strategjike të mirë dhe në skuadër të kësaj do të mund ta plotësonte, qoftë me futbollistë të rinj, qoftë me ide për të zhvilluar futbollin e të rinjve në Kosovë në mënyrë që Kombëtarja të prosperonte”, ka thënë më tutje Gjonbalaj.

Gjonbalaj komentoi edhe shortin e Kosovës në Ligën e Kombeve për të cilin tha se nuk pajtohet aspak me të tjerët që e konsiderojnë si një grup të lehtë sepse skuadra si Greqia dhe Irlanda e Veriut janë kundërshtarë shumë të fortë dhe nevojitet një punë e përbashkët për t’u treguar të suksesshëm në këtë kompeticion.

“I kam parë shumë komente të cila thonë që grupi nuk është shumë i fortë e kështu me radhë. Unë mendoj që e kanë gabim, Irlanda nuk është skuadër që duhet të nënçmohet, madje as Greqia pavarësisht që kemi luajtur me ta. Prandaj nuk janë ekipe këto të dobëta, duhet punë e madhe në mënyrë që ta kalojmë këtë grup, prandaj nuk e shoh si një grup të lehtë, do të varet shumë nga ana jonë, nga puna jonë si dhe në të njëjtën kohë do të varet shumë se futbollistët tanë që luajnë në klubet evropiane a do ta kenë minutazhën e plotë apo jo, a do të jenë në formë apo jo. Pra janë disa faktorë të cilët ndërlidhen me rezultatet pozitive dhe këtu nëse njëra prej këtyre hallkave dështon, më pas sukseset do të mungojnë”, theksoi Gjonbalaj.

Trajneri Gjonbalaj gjithashtu vlerësoi lartë nivelin e Superligës së Kosovës duke thënë se po zhvillohet një kampionat shumë cilësor, përkundër mungesës së infrastrukturës e cila vazhdon të mos jetë në nivelin e duhur. Ai kërkoi më shumë përgjegjësi nga skuadra që shpallet kampione që ta përfaqësojë sa më denjësisht Kosovën në arenën ndërkombëtare.

Related Topics:
Continue Reading

Lajmet

Zvicra mposht Kolumbinë me penallti dhe prek çerekfinalen historike në Kupën e Botës

Published

35 minutes ago

on

July 8, 2026

By

Zvicra ka siguruar një vend në çerekfinalen e Kupës së Botës pas një drame të vërtetë nga pika e bardhë, ku mposhti Kolumbinë me rezultatin 4:3. Koha e rregullt dhe vazhdimet e ndeshjes së zhvilluar të martën mbrëma nuk ofruan gola dhe as shumë spektakël në fushë, duke bërë që gjithçka të vendosej në serinë e penalltive, e cila dhuroi emocione të jashtëzakonshme për tifozët.

Seria e gjuajtjeve nisi me saktësi nga kolumbianët, por kapiteni Granit Xhaka u përgjigj menjëherë duke realizuar me siguri. Gjerat u ndezën në serinë e dytë kur Davinson Sanchez i Kolumbisë goditi traversën, por helvetikët gabuan në serinë e tretë përmes Manuel Akanjit, i cili e dërgoi topin lart mbi portë. Heroi i mbrëmjes doli të jetë portieri Gregor Kobel, i cili në serinë e katërt ndali gjuajtjen e Cucho Hernandezit, duke shënuar edhe momentin vendimtar të kësaj përballjeje. Më pas, Cedric Itten, Luis Diaz dhe në fund Ruben Vargas u treguan të saktë, me këtë të fundit që nisi festën e madhe të zviceranëve.

Ky kualifikim mban një peshë të jashtëzakonshme historike, pasi Zvicra nuk kishte prekur fazën çerekfinale të një Botërori që nga viti i largët 1954. Suksesi i madh mban vulën e Granit Xhakës, i cili po vazhdon të shkruajë histori me fanellën helvetike, ndërsa në këtë arritje kontribuoi edhe Ardon Jashari, i cili luajti gjatë pjesës së parë. Në raundin tjetër, Zvicra do të ketë një punë edhe më të vështirë, ku do të përballet me Argjentinën për një vend në gjysmëfinale./E.A/

Continue Reading

Sport

Botërori vazhdon me duele të zjarrta

Published

19 hours ago

on

July 7, 2026

By

Sot  në Kupën e Botës 2026 zhvillohen dy ndeshje të rëndësishme të fazës së 1/8 së finales, ku katër kombëtare do të luftojnë për një vend në çerekfinale.

Sfida e parë nis në ora 18:00, ku Argjentina përballet me Egjiptin. Kampionët në fuqi synojnë vazhdimin e rrugëtimit drejt mbrojtjes së titullit, ndërsa Egjipti kërkon të shkaktojë një nga surprizat më të mëdha të turneut.

Në mbrëmje, duke filluar nga ora 22:00, Zvicra do të përballet me Kolumbinë në një duel që pritet të jetë mjaft i luftuar. Të dyja kombëtaret kanë treguar paraqitje të mira deri në këtë fazë dhe synojnë një vend mes tetë skuadrave më të mira të Botërorit.

Fituesit e këtyre dy përballjeve do të sigurojnë kualifikimin në çerekfinale, ku do të përballen mes vete për një vend në gjysmëfinale.

D.L

Continue Reading

Sport

Roberto Martínez largohet nga Portugalia pas eliminimit nga Botërori

Published

19 hours ago

on

July 7, 2026

By

Trajneri Roberto Martínez ka konfirmuar se është larguar nga posti i përzgjedhësit të Portugalisë pas humbjes 1:0 ndaj Spanjës në fazën e 1/8 së finales së Kupës së Botës 2026.

Sipas ESPN, tekniku spanjoll e bëri të ditur vendimin në konferencën për media pas ndeshjes, duke theksuar se përfundimi i bashkëpunimit është “fundi i një cikli” dhe se nuk do të kishte kuptim vazhdimi i tij në krye të kombëtares portugeze.

“Po, kjo ishte ndeshja ime e fundit me ekipin kombëtar. Jam krenar për gjithçka që kemi arritur. Është fundi i një cikli dhe në këtë kontekst ka plotësisht kuptim”, deklaroi Martínez.

Portugalia u eliminua nga Botërori pasi pësoi gol në minutën e 91-të nga Mikel Merino, ndërsa kjo ishte edhe paraqitja e fundit e Cristiano Ronaldos në një Kupë Bote.

Megjithatë, Martínez refuzoi ta cilësojë eliminimin si dështim.

“Nuk dështuam. Humbëm ndaj një skuadre që është ndër favoritët. Dështon vetëm kur nuk përpiqesh të fitosh, ndërsa ne luftuam deri në minutën e fundit”, u shpreh ai.

Trajneri spanjoll mbrojti gjithashtu vendimin për ta mbajtur Cristiano Ronaldon në fushë gjatë gjithë 90 minutave, duke theksuar se një futbollist me ndikimin e tij nuk mund të zëvendësohej në një ndeshje ku Portugalia kërkonte me çdo kusht golin e barazimit.

Martínez mori drejtimin e Portugalisë në vitin 2023, ndërsa kontrata e tij përfundonte pas Kupës së Botës 2026. Gjatë mandatit të tij, Portugalia u eliminua në çerekfinale të Euro 2024 dhe në fazën e 1/8 së finales në Botërorin 2026.

D.L

Continue Reading

Sport

Trump dyshohet se ndërhyri në Kupën e Botës për të anuluar pezullimin e Balogun

Published

24 hours ago

on

July 7, 2026

By

Një raport i Wall Street Journal ka ngritur polemika të forta, duke pretenduar se administrata e presidentit amerikan Donald Trump ndërhyri te presidenti i FIFA-s, Gianni Infantino, për të anuluar pezullimin e sulmuesit të SHBA-së, Folarin Balogun, pas kartonit të kuq të marrë në ndeshjen ndaj Bosnje-Hercegovinës.

Sipas raportit, zyrtarë të lartë të Shtëpisë së Bardhë e konsideruan përjashtimin e Balogun si një goditje për shanset e kombëtares amerikane në Botëror dhe bindën Trump të kontaktonte drejtpërdrejt Infantinon. Pas bisedimeve, FIFA vendosi të anulonte pezullimin, duke u mbështetur në një dispozitë të rregullores që i jep Komisionit Disiplinor diskrecion për rishikimin e sanksioneve.

Vendimi ka shkaktuar reagime të forta në botën e futbollit. Federata Belge e Futbollit e quajti zhvillimin “tronditës” dhe njoftoi se po shqyrton opsionet ligjore, ndërsa trajneri i Belgjikës, Rudi Garcia, dhe ai i Norvegjisë, Ståle Solbakken, kritikuan ashpër FIFA-n, duke paralajmëruar se vendimi dëmton besueshmërinë e Kupës së Botës.

Sipas Wall Street Journal, Trump u bind të telefononte Infantinon pasi u informua nga Sekretari i Tregtisë Hoëard Lutnick dhe Andreë Giuliani, drejtues i grupit të punës së Shtëpisë së Bardhë për Kupën e Botës dhe djali i ish-kryebashkiakut të Nju Jorkut, Rudy Giuliani.

Ata argumentuan se kartoni i kuq ndaj Balogun ishte i padrejtë dhe se mungesa e sulmuesit kryesor do të dëmtonte seriozisht shanset e SHBA-së në ndeshjen vendimtare ndaj Belgjikës. Raporti shton se Trump, i cili e konsideron organizimin e Botërorit në SHBA si një çështje prestigji kombëtar dhe personal, urdhëroi bashkëpunëtorët e tij të gjenin një mënyrë për të kundërshtuar vendimin, përpara se të kontaktonte presidentin e FIFA-s, Gianni Infantino.

Nga ana e saj, FIFA mohoi se ka pasur ndikim politik, duke këmbëngulur se vendimi është marrë në mënyrë të pavarur nga Komisioni Disiplinor. Shtëpia e Bardhë nuk komentoi mbi raportin. Nëse pretendimet e Wall Street Journal konfirmohen, rasti mund të hapë një debat të gjerë mbi kufijtë e ndërhyrjes politike në vendimmarrjen e institucioneve sportive ndërkombëtare. /E.A/

Continue Reading

Të kërkuara