Sport

​Gjonbalaj: Problemet në Kombëtare nuk zgjidhen me trajnerin e ri, duhet strategji zhvillimore

Gjonbalaj thotë se ka pasur zhvillime pozitive brenda Kombëtares së Kosovës, por që në vitin e fundit pati ngecje dhe rezultate negative.

Published

4 years ago

on

Ish-futbollisti i njohur, Malsor Gjonbalaj ka kërkuar nga Federata e Futbollit të Kosovës që të bëjë kujdes në përzgjedhjen e trajnerit të ri të Kombëtares. Sipas tij, përzgjedhësi i ri duhet të ketë njohuri për mentalitetin e skuadrës si dhe të kontribuojë në zhvillimin e një strategjie që do të çonte përpara futbollin e Kosovës.

Gjonbalaj thotë se ka pasur zhvillime pozitive brenda Kombëtares së Kosovës, por që në vitin e fundit pati ngecje dhe rezultate negative, që sollën edhe shkarkimin e trajnerit.

“Nuk i kisha ndarë paraqitjet e Kombëtares vetëm në këtë vit sepse ajo ka qenë një vazhdimësi, një periudhë e vazhdueshme prej konsolidimit të saj. Unë mendoj që ka pasur shumë zhvillime pozitive, por që së fundmi, sidomos vitin e fundit ose periudhën e fundit kishte ngecje, kishte disa probleme të cilat rezultuan edhe me largimin e trajnerit të Kosovës. Mbetet një punë e madhe për t’u bërë kryesisht në përzgjedhjen e trajnerit i cili duhet të jetë për mendimin tim një profil që e njeh mirë mentalitetin tonë dhe e cili do të kalojë më shumë kohë në Kosovë në kuptimin që ta analizojë më mirë Ligën e Kosovës, futbollin e Kosovës dhe në këtë aspekt të kontribuojë me idetë e tij në zhvillimin e një strategjie përparimtare për futbollin e Kosovës në përgjithësi”, tha fillimisht Gjonbalaj.

Gjonbalaj bën thirrje që drejtuesit e FFK-së nuk duhet të përjashtojnë emrat e trajnerëve vendorë kur të marrin vendimin për trajnerin e ri, por tërhoqi vëmendjen që problemi nuk qëndron vetëm te trajneri.

Sipas tij, Kosova ka nevojë për hartimin e një strategjie zhvillimore afatgjate në mënyrë që pastaj secili trajner që do të jetë në krye të ekipit të ketë një bazë për ta rritur dhe zhvilluar pikërisht atë strategji.

“Ne duhet të luftojmë që të sjellim cilësi në radhë të parë, edhe futbollistë cilësorë edhe trajnerë cilësorë, prandaj në këtë aspekt unë mendoj që duhet të mendohet që të sillet një trajner shumë cilësor i cili do të mund të kontribuonte, por në të njëjtën kohë absolutisht të mos anashkalohen edhe trajnerët kosovarë oshe shqiptarë. Unë mendoj që kemi kualitete edhe të trajnerëve shqiptarë të cilët mund të udhëheqin, por nuk mendoj se është ky problemi i zgjedhjes së një trajneri. Mendoj që problemi është, ose në fakt si do të duhet të përparohej futbolli i Kosovës dhe të eliminohet ky problem është në krijimin e një strategjie zhvillimore e cila do të ishte disavjeçare dhe në kuadër të kësaj edhe nëse trajnerët ndryshohen, cilido që vjen do të ketë një bazë strategjike të mirë dhe në skuadër të kësaj do të mund ta plotësonte, qoftë me futbollistë të rinj, qoftë me ide për të zhvilluar futbollin e të rinjve në Kosovë në mënyrë që Kombëtarja të prosperonte”, ka thënë më tutje Gjonbalaj.

Gjonbalaj komentoi edhe shortin e Kosovës në Ligën e Kombeve për të cilin tha se nuk pajtohet aspak me të tjerët që e konsiderojnë si një grup të lehtë sepse skuadra si Greqia dhe Irlanda e Veriut janë kundërshtarë shumë të fortë dhe nevojitet një punë e përbashkët për t’u treguar të suksesshëm në këtë kompeticion.

“I kam parë shumë komente të cila thonë që grupi nuk është shumë i fortë e kështu me radhë. Unë mendoj që e kanë gabim, Irlanda nuk është skuadër që duhet të nënçmohet, madje as Greqia pavarësisht që kemi luajtur me ta. Prandaj nuk janë ekipe këto të dobëta, duhet punë e madhe në mënyrë që ta kalojmë këtë grup, prandaj nuk e shoh si një grup të lehtë, do të varet shumë nga ana jonë, nga puna jonë si dhe në të njëjtën kohë do të varet shumë se futbollistët tanë që luajnë në klubet evropiane a do ta kenë minutazhën e plotë apo jo, a do të jenë në formë apo jo. Pra janë disa faktorë të cilët ndërlidhen me rezultatet pozitive dhe këtu nëse njëra prej këtyre hallkave dështon, më pas sukseset do të mungojnë”, theksoi Gjonbalaj.

Trajneri Gjonbalaj gjithashtu vlerësoi lartë nivelin e Superligës së Kosovës duke thënë se po zhvillohet një kampionat shumë cilësor, përkundër mungesës së infrastrukturës e cila vazhdon të mos jetë në nivelin e duhur. Ai kërkoi më shumë përgjegjësi nga skuadra që shpallet kampione që ta përfaqësojë sa më denjësisht Kosovën në arenën ndërkombëtare.

Related Topics:
Continue Reading

Sport

Mbrëmje vendimtare në Ligën e Kampionëve, sot mbyllet faza e ligës

Published

3 days ago

on

January 28, 2026

By

Sonte zhvillohet xhiroja e fundit e fazës së ligës në UEFA Champions League për sezonin 2025/26, përkatësisht xhiro e tetë, ku të gjitha ndeshjet luhen njëkohësisht dhe përcaktojnë fatin përfundimtar të skuadrave në këtë fazë të re të garës.

36 ekipe janë pjesë e një renditjeje të vetme, pa grupe tradicionale. Secila skuadër ka zhvilluar nga shtatë ndeshje dhe takimet e sotme janë vendimtare për pozicionimin final në tabelë. Tetë skuadrat e para sigurojnë kualifikim direkt në fazën e 1/8 së finales, ndërsa ekipet e renditura nga pozita e nëntë deri në të 24-tën kalojnë në play-offet e fazës nokaut.

Programi i sotëm përfshin disa përballje të mëdha dhe shumë të pritura, si Ajax–Olympiacos, Arsenal–Kairat, Barcelona–Copenhagen, Benfica–Real Madrid, Manchester City–Galatasaray, PSV Eindhoven–Bayern Munich, Liverpool–Qarabağ, Eintracht Frankfurt–Tottenham, Dortmund-Inter, Manchester City – Galatasaray, Napoli – Chelsea, PSG – Newcastle, Paris Saint-Germain–Newcastle United, krahas ndeshjeve të tjera që ndikojnë drejtpërdrejt në renditjen përfundimtare.

Pas përfundimit të kësaj xhiroje, sot në mbrëmje zyrtarizohet renditja finale e fazës së ligës, ndërsa më 30 janar UEFA do të hedhë shortin për play-offet e fazës nokaut, ku do të përballen skuadrat e renditura nga vendi i nëntë deri në të 24-tin.

Continue Reading

Sport

​Nga Kosova në elitën e basketbollit amerikan, Edona Thaçi shkruan histori në WNBA

Published

4 days ago

on

January 27, 2026

By

Ish-basketbollistja e përfaqësueses së Kosovës, Edona Thaçi, ka shënuar një arritje të rëndësishme profesionale në Shtetet e Bashkuara të Amerikës, duke u bërë pjesë e USA Network për mbulimin e WNBA. Me këtë angazhim, ajo hyn në histori si shqiptarja e parë që punon si komentatore në ligën elitare të basketbollit për femra.

Ky sukses vjen pas një rrugëtimi të gjatë dhe sfidues profesional. Për Edonën, arritja nuk përfaqëson vetëm një hap të madh në karrierë, por edhe një shpërblim për punën e vazhdueshme, përkushtimin dhe sakrificat që e kanë shoqëruar gjatë viteve, si në parket ashtu edhe në botën e medias sportive.

Në mesazhin e saj drejtuar të rinjve, ajo thekson rëndësinë e besimit në vetvete, durimit dhe këmbënguljes, duke shpresuar që historia e saj të shërbejë si frymëzim veçanërisht për vajzat shqiptare që synojnë basketbollin ose gazetarinë sportive.

Federata e Basketbollit e Kosovës ka reaguar me urime për këtë arritje historike, duke i dëshiruar Edona Thaçit suksese të mëtejme në vazhdimin e karrierës së saj profesionale në skenën ndërkombëtare.

Continue Reading

Sport

​Milani drejt epokës së re

Published

4 days ago

on

January 27, 2026

By

Procesi i ndryshimit të strukturës financiare dhe të pronësisë te AC Milan ka hyrë në fazën vendimtare, me negociatat mes RedBird dhe Comvest që pritet të mbyllen brenda një afati shumë të shkurtër kohor.

Sipas mediave italiane, marrëveshja që fillimisht parashihej për fundin e shkurtit ose fillimin e marsit, tani mund të finalizohet që në ditët e para të muajit të ardhshëm, duke shënuar përfundimisht fundin e epokës Elliott në klub.

Në planin e parë qëndron shlyerja e borxhit ekzistues ndaj fondit Elliott, hap që do të çojë edhe në largimin e përfaqësuesve të ish-pronësisë nga bordi drejtues i klubit. Paralelisht, pritet të konsolidohet struktura aktuale drejtuese, me presidentin Paolo Scaroni dhe drejtorin ekzekutiv Giorgio Furlani që do të garantojnë vazhdimësinë operative të klubit, të paktën deri në fund të sezonit aktual dhe potencialisht edhe më gjatë.

Në nivel strategjik, ky zhvillim i hap rrugë RedBird-it që të avancojë pa pengesa projektet afatgjata të Gerry Cardinale, të cilat deri tani kanë qenë të kushtëzuara nga marrëdhënia financiare me Elliott. Me dokumentacionin thuajse të përfunduar dhe Comvest gati të hyjë si partner financiar, Milani po përshpejton drejt një faze të re, duke lënë pas një kapitull të rëndësishëm të historisë së tij të fundit.

Continue Reading

Sport

Nga renditja te përballjet direkte, gjithçka rreth shortit të Ligës së Kampionëve

Published

1 week ago

on

January 22, 2026

By

Fundi i fazës së ligës në Ligën e Kampionëve po afron dhe vëmendja tashmë është te shorti i play-off-eve, i cili do të mbahet të premten, më 30 janar 2026, në orën 12:00. Vetëm tetë skuadrat e para në renditje sigurojnë kualifikim direkt në raundin e 16-tave, ndërsa ekipet nga vendi i nëntë deri në të 24-tin do të përballen në fazën shtesë eliminatore me ndeshje vajtje-ardhje.

Sipas formatit të ri të UEFA-s, ekipet renditen në çifte dhe përballen në bazë të pozicionit përfundimtar në fazën e ligës, ku skuadrat më lart në renditje shortohen ndaj atyre më poshtë. Nuk ka kufizime për përballje mes ekipeve të së njëjtës federatë apo për duele që janë zhvilluar më herët në fazën e ligës, çka hap mundësinë edhe për derbi të mëdhenj evropianë.

Ndeshjet e para të play-off-eve do të luhen më 17/18 shkurt, ndërsa takimet vendimtare më 24/25 shkurt 2026. Fituesit do të avancojnë në raundin e 16-tave, shorti i të cilit do të hidhet më 27 shkurt, ndërsa finalja e Ligës së Kampionëve për këtë edicion është planifikuar të zhvillohet më 30 maj 2026 në Budapest.

Continue Reading

Të kërkuara