Lajmet

Gërvalla: Masat e BE-së të panevojshme dhe mesazh i rrezikshëm

Sipas saj, nuk bëhet fjalë për bllokim të fondeve të BE-së, por për suspendim të përkohshëm.

Published

1 year ago

June 30, 2023

UBT news

Zëvendëskryeministrja e Kosovës, Donika Gërvalla masat e paralajmëruara nga Bashkimi Evropian karshi Kosovës i ka quajtur të panevojshme. Sipas saj, nuk bëhet fjalë për bllokim të fondeve të BE-së, por për suspendim të përkohshëm.

E para e diplomacisë kosovare u shpreh se mesazhet e tilla janë të rrezikshme dhe mund t’i krijojnë përshtypjen presidentit serb, Aleksandër Vuçiq se mund të vazhdojë destabilizimin jo vetëm në Kosovë, por edhe në rajon.

Këto komente Gërvalla i bëri pas ceremonisë së hapjes së fushatës “Festo me zemër e jo me armë”, të organizuara nga Ministria e Punëve të Brendshme.

“Masat që janë ndërmarrë në kuadër të përpjekjeve të Bashkimit Evropian për deeskalim të gjendjes në veri të Kosovës, janë masa të cilat BE i sheh si të arsyeshme. Ne mendojmë se masat e tilla janë të panevojshme për shkak se është e rëndësishme që në një situatë të tillë në të cilën ndodhemi mesazhi t’i dërgohet qartë dhe pa asnjë mundësi për keqkuptim atyre që i kanë krijuar trazirat në pjesën veriore të Kosovës. Personalisht mendoj se mesazhet e tilla janë të rrezikshme sepse mund të krijojnë përshtypjen tek presidenti serb, Vuçiq se mund të vazhdojë me të njëjtën mënyrë të destabilizojë jo vetëm Kosovën, por dhe të gjithë fqinjët që ka rreth e rrotull”, theksoi ajo.

Ministrja e Punëve të Jashtme dhe Diasporës, Donika Gërvalla konsideron se këto masa nënkuptojnë suspendim të përkohshëm të fondeve të BE-së e jo bllokim.

“Nuk ka bllokim të fondeve, ka suspendim të përkohshëm të fondeve dhe BE e ka bërë të qartë që këto janë masa të cilat janë për momentin dhe të cilat janë natyrisht të rikthyeshme”, tha ajo.

E pyetur se a ka pasur koordin me SHBA-të për shpalljen e“Mbrojtjes Civile” dhe “Brigada e Veriut” si organizata terroriste, ajo nuk deshi të flas në këtë aspekt, por tha se organizatat që ushtrojnë terror mbi qytetarët dhe institucionet nuk kanë vend në Kosovë.

“Baza ligjore është aty edhe ne mendojmë se asnjë organizatë terroriste e çfarëdo prejardhje etnike apo çfarëdolloj përbërje kriminale të ketë nuk duhet të lejohet të veprojë në Republikën e Kosovës. Ne jemi zotuar për sundim të ligjit në çdo cep të vendit dhe aty organizatat që ushtrojnë terror ndaj qytetarëve dhe institucioneve të Republikës nuk kanë vend”, u shpreh ministrja Gërvalla.

E gjatë ditës së djeshme Qeveria e Kosovës, “Mbrojtjes Civile” dhe “Brigadës së Veriut” janë shpallur organizata terroriste. Për këtë vendim kanë votuar pro i gjithë kabineti qeveritar, në përjashtim të ministrit për Kthim dhe Komunitete, Nenad Rashiq.

Ndërsa, karshi këtij vendimi ka reaguar Departamenti i Shtetit Amerika të cilët thanë se ky vendim është ndërmarrë nga ekzekutivi kosovar pa koordinim me ta.

E Komisioni Evropian ka paralajmëruar një numër masash kundër Kosovës dhe ato do të përfshijnë pezullimin e programit të fondeve për Kosovën, pezullimin e mbështetjes së vazhdueshme për prokurimin dhe nënshkrimin e kontratave, pezullimin e pjesëmarrjes në ngjarjet e nivelit të lartë, pezullimin e vizitave dypalëshe, si dhe propozimin e dorëzuar nga Kosova për kornizën investuese për Ballkanin Perëndimor që nuk do të procedohet në këtë moment.

Ndërsa, dy ditë pasi Komisioni Evropian i prezantoi Parlamentit Evropian masat ndëshkuese për Kosovën, kryeministri Albin Kurti paraqiti në Prishtinë një plan 8-pikësh për “shtensionimin e situatës në veri të vendit”.

Lajmet

BE-ja e gjobit Meta-n me gati 800 milionë euro për praktika “abuzive”

Published

40 mins ago

November 14, 2024

UBTnews

Komisioni Evropian e ka gjobitur të enjten Meta-n, kompaninë që zotëron Facebook-un, me 797.72 milionë euro, për shkak të praktikave abuzive nga të cilat përfitoi tregu online në Facebook, i njohur si Martkerplace.

“Komisioni Evropian e gjobiti Meta-n… për shkeljen e rregullave të BE-së duke e lidhur shërbimin e vet online për reklama të klasifikuara, Facebook Marketplace, me rrjetin e vet social personale, Facebook, dhe duke vendosur kushte të padrejta komerciale ndaj shërbimeve të tjera online për reklama të klasifikuara”, tha Komisioni Evropian.

Meta njoftoi se do të ankohet ndaj këtij vendimi, por në ndërkohë, do të bashkëpunojë dhe do të punojë pa humbur kohë për të gjetur zgjidhje për adresimin e çështjeve të ngritura.

Ky vendim i Komisionit Evropian vjen dy vjet pasi ai e kishte akuzuar gjigantin amerikan të teknologjisë se i kishte dhënë përparësi të padrejtë shërbimit të vet për reklama të klasifikuara, Facebook Marketplace, duke i bashkuar dy shërbimet.

Bashkimi Evropian nisi një hetim formal ndaj dyshimeve për sjellje kundër konkurrencës nga Facebook në qershor 2021. Në dhjetor 2022, BE-ja ngriti shqetësime se Meta e lidh rrjetin e vet social mbizotërues, Facebook, me shërbimet e veta online për reklama të klasifikuara.

Facebook e lansoi tregun online Marketplace në vitin 2016 dhe e zgjeroi atë në disa vende evropiane një vit më pas.

BE-ja argumenton se Meta ua imponon Facebook Marketplace njerëzve të cilët e përdorin Facebook-un me një “lidhje” të jashtëligjshme, por Meta tha se ky argument e shpërfill faktin se përdoruesit e Facebook-ut mund të zgjedhin nëse duan të shkojnë në Marketplace, dhe shumë prej tyre nuk e bëjnë.

Meta tha se Komisioni Evropian pretendoi se Marketplace ka mundësi ta pengojë rritjen e tregjeve të mëdha të reja online në BE, por nuk gjeti prova për të dëshmuar se kjo i dëmton konkurrentët.

Lajmet

Etiopia regjistron 7.3 milionë raste malarie për gati 10 muaj

Published

41 mins ago

November 14, 2024

UBTNews

Më shumë se 7.3 milionë njerëz u diagnostikuan me malarie dhe 1.157 vdekje u raportuan në Etiopi nga 1 janari deri më 20 tetor, sipas Organizatës Botërore të Shëndetësisë (OBSH).

Në raport thuhet se ky është numri më i lartë i rasteve vjetore të regjistruara në shtatë vjetët e fundit të shkaktuara nga pickimi i mushkonjave femra të infektuara Anopheles.

Transmetimi i malaries është gjithashtu i mundur përmes transfuzionit të gjakut, transplantimit të organeve ose ndarjes së gjilpërave ose shiringave të kontaminuar me gjak të infektuar. Sëmundja gjithashtu mund të transmetohet nga nëna te fëmija para ose gjatë lindjes.

Malaria paraqet një sfidë të rëndësishme të shëndetit publik në Etiopi, ku afërsisht 75% e masës tokësore konsiderohet të jetë endemike e sëmundjes, tha OBSH.

“Rreth 69% e popullsisë në këto zona përballen me rrezikun e infeksionit ku shpërthimet periodike kontribuojnë në deri në 20 për qind të vdekjeve në mesin e fëmijëve nën moshën pesë vjeç,” thuhet në raport.

OBSH tha se po ofron mbështetje për Ministrinë e Shëndetësisë së Etiopisë në koordinimin e përpjekjeve të reagimit ndaj malaries përmes platformave të integruara së bashku me një strukturë të menaxhimit të incidenteve shumë emergjente.

Bota

Çekia ndalon pijet energjike për fëmijët

Published

43 mins ago

November 14, 2024

UBT NEWS

Qeveria çeke ka bërë një hap të rëndësishëm drejt mbrojtjes së shëndetit të fëmijëve, duke planifikuar ndalimin e shitjes dhe servirjes së pijeve energjike për fëmijët nën 15 vjeç. Ky projektligj, i prezantuar sot nga Ministri i Bujqësisë, Marek Vyborny, ka për qëllim të parandalojë efektet negative të konsumimit të këtyre pijave, të cilat përmbajnë shpesh kafeinë dhe sheqer në sasi të larta.

Projektligji i propozuar synon një ndalim të përgjithshëm të pijeve energjike në shkolla, objekte të kujdesit shëndetësor dhe shtëpitë e fëmijëve. Ky veprim është pjesë e një përpjekjeje të gjerë për të mbrojtur shëndetin e adoleshentëve nga efektet e dëmshme të stimuluesve, të cilët mund të ndikojnë në zhvillimin fizik dhe mendor të fëmijëve.

Ky projektligj ka ngjallur reagime të kundërta nga disa sektorë të industrisë. Shoqata çeke e prodhuesve të pijeve joalkoolike e ka kritikuar ndalimin, duke e quajtur atë një “kufizim absurd të lirisë së sipërmarrjes”. Presidenti i Shoqatës, Michal Dyttert, argumentoi se ky ndalim do të ndikonte edhe në shitjet në makinat shitëse, duke e bërë të vështirë konsumimin e pijeve energjike nga të rinjtë në mënyrë të ligjshme. Ai gjithashtu vuri në dukje se arsimi dhe informimi për rreziqet e konsumimit të këtyre pijave duhet të jenë prioriteti, në vend të vendosjes së kufizimeve të tilla.

Progresi i Projektligjit
Projektligji duhet ende të kalojë përmes dy dhomave të parlamentit në Pragë për t’u miratuar, por qeveria e koalicionit liberal-konservator ka shumicën në të dyja dhomat, që do të mundësojë një kalim të mundshëm të ligjit pa probleme. Në shumë shtete të tjera europiane, si Polonia, vendet baltike, Suedia dhe Norvegjia, ekzistojnë tashmë kufizime të ngjashme për moshën e konsumatorëve të pijeve energjike. Ky trend tregon një shqetësim në rritje për ndikimet shëndetësore të këtyre produkteve tek të rinjtë dhe përpjekjet për të mbrojtur shëndetin e tyre./UBTNews/

Lajmet

Koreja Jugore planifikon më shumë mbështetje për Ukrainën

Published

45 mins ago

November 14, 2024

UBTNews

Koreja Jugore mund të konsiderojë më shumë mbështetje për Ukrainën në përgjigje të vendosjes së trupave të Koresë Veriore në Rusi për të mbështetur agresionin e vazhdueshme të Moskës, tha presidenti Yoon Suk-yeol.

Yoon Suk-yeol tha se Pheniani zyrtar i ka ofruar gjithashtu armë Moskës në agresionin e saj ushtarak në Ukrainë.

“Nëse ata nuk e ndalin aventurën e tyre të rrezikshme ushtarake, ne jemi të përgatitur të zbatojmë masat e duhura efektive, duke përfshirë forcimin e mbështetjes për Ukrainën, në bashkëpunim me aleatët tanë dhe vendet me të njëjtin mendim,” tha ai.

Muajin e kaluar, Yoon tha se vendi i tij mund të konsiderojë ofrimin e armëve për Ukrainën “në varësi të shtrirjes së bashkëpunimit ushtarak midis Rusisë dhe Koresë Veriore”.

Të mërkurën, agjencia e spiunazhit të Koresë së Jugut, Shërbimi Informativ Kombëtar, tha se ushtarët e Koresë së Veriut ishin zhvendosur në rajonin e vijës së parë Kursk, Rusi për të luftuar kundër forcave ukrainase.

Të martën, një zyrtar ukrainas tha gjithashtu se 50 mijë trupa ruse dhe veri-koreane ishin vendosur në Kursk për të luftuar forcat ukrainase, por Pheniani nuk i ka konfirmuar pretendimet.