Chelsea nuk arriti të sigurojë një vend në garat evropiane për sezonin 2026/27, por stadiumi i saj, “Stamford Bridge”, mund të jetë sërish skenë e ndeshjeve të Ligës së Kampionëve.

Skuadra londineze e mbylli sezonin 2025/26 të Premier League në vendin e 10-të, duke mbetur jashtë Ligës së Kampionëve, Ligës së Evropës dhe Ligës së Konferencës. Arsenali, Manchester City, Manchester United, Aston Villa dhe Liverpooli siguruan pjesëmarrjen në Ligën e Kampionëve, ndërsa Bournemouthi dhe Sunderlandi u kualifikuan në Ligën e Evropës. Brightoni, që e përfundoi sezonin në pozitën e tetë, do të luajë në fazën kualifikuese të Ligës së Konferencës.

Megjithatë, sipas raportimit të The Standard, “Stamford Bridge” është një nga stadiumet që po shqyrtohen nga Shakhtar Donetsku për zhvillimin e ndeshjeve si vendas në Ligën e Kampionëve. UEFA vazhdon të mos lejojë organizimin e takimeve evropiane në Ukrainë për shkak të situatës së sigurisë të krijuar nga lufta, duke e detyruar klubin ukrainas të gjejë një stadium jashtë vendit.

Një zëdhënës i Shakhtarit ka konfirmuar se klubi është në negociata me disa stadiume në Mbretërinë e Bashkuar dhe Gjermani.

“Shakhtari aktualisht është në negociata me disa stadiume në Mbretërinë e Bashkuar dhe Gjermani për të siguruar një stadium ku do të zhvillojë ndeshjet e Ligës së Kampionëve sezonin e ardhshëm. Nuk do të komentojmë më tej derisa të merret një vendim,” ka deklaruar ai.

Përveç “Stamford Bridge”, në listën e opsioneve janë edhe “Gtech Community Stadium” i Brentfordit dhe “Craven Cottage” i Fulhamit.

Shakhtar Donetsku, kampion i Ukrainës për herë të 16-të dhe i drejtuar nga ish-futbollisti i Atletico Madridit dhe Barcelonës, Arda Turan, do ta nisë aventurën në fazën e ligës së Ligës së Kampionëve më 8 shtator. Sezonin e kaluar, skuadra ukrainase ndeshjet si vendase në këtë garë i zhvilloi në “Veltins Arena” në Gelsenkirchen të Gjermanisë.

D.L

Kombëtarja U18 e Kosovës në hendboll po vazhdon përgatitjet intensive për Kampionatin Evropian “Men’s 18 EHF Championship II”, i cili do të zhvillohet në Telavi të Gjeorgjisë.

Nën drejtimin e koordinatorit të gjeneratave të reja në Federatën e Hendbollit të Kosovës, Bujar Qerimi, hendbollistët e rinj janë vendosur në Ferizaj, ku po zhvillojnë fazën përfundimtare të përgatitjeve para nisjes së garës.

Federata Evropiane e Hendbollit ka publikuar edhe orarin e ndeshjeve. Kosova do ta zhvillojë sfidën e parë më 2 gusht, nga ora 11:45, përballë Bullgarisë.

Pas këtij takimi, Dardanët e rinj do të përballen me Qipron, Belgjikën, Gjeorgjinë dhe Britaninë e Madhe, ndërsa më 9 gusht, në ditën e fundit të kampionatit, do të zhvillohen ndeshjet për renditjen përfundimtare.

Kjo gjeneratë tashmë ka fituar përvojë në disa gara ndërkombëtare dhe synon një paraqitje sa më të suksesshme në Evropian, me objektivin për të konfirmuar rritjen e vazhdueshme të cilësisë së hendbollit kosovar në grupmoshat e reja.

D.L

KF Dukagjini i ka dhënë fund rrugëtimit në edicionin e sivjetmë të UEFA Conference League, pasi u eliminua nga skuadra zvicerane Lugano në raundin e dytë kualifikues.

Pas humbjes minimale 1:0 në ndeshjen e parë të zhvilluar në Zvicër, skuadra nga Klina synoi përmbysjen në takimin e kthimit, por u përball me një kundërshtar superior. Lugano triumfoi me rezultat të thellë 5:1 në Kampin Nacional të FFK-së në Hajvali, duke siguruar kualifikimin në raundin e ardhshëm me rezultat të përgjithshëm 6:1.

Golin e vetëm për Dukagjinin e realizoi Meris Maliqi, ndërsa për mysafirët shkëlqeu Kevin Behrens me tre gola. Në listën e realizatorëve u regjistrua edhe Daniel dos Santos, ndërsa një autogol i Egzon Sinanit kompletoi fitoren bindëse të skuadrës zvicerane.

Me këtë humbje, Dukagjini përfundon paraqitjen e tij në garat evropiane për këtë sezon, ndërsa Lugano vazhdon rrugëtimin në raundin e tretë kualifikues të UEFA Conference League.

D.L

Boksieri shqiptar Ermal Hadribeaj do të ketë mundësinë më të madhe të karrierës së tij, pasi më 17 tetor do të duelojë me kampionin amerikan Sebastian Fundora për titullin e botës në kategorinë WBC Super Welterweight.

Lajmi është konfirmuar të enjten, ndërsa Hadribeaj do të hyjë në ring si sfiduesi i detyrueshëm i kampionit. WBC është një nga katër organizatat më prestigjioze të boksit profesionist në botë dhe duelet për titujt e saj konsiderohen kampionate botërore.

Hadribeaj, 32 vjeç, është me origjinë nga Tirana, por jeton dhe zhvillon karrierën në Shtetet e Bashkuara të Amerikës. Ai mbetet i pamposhtur në boksin profesionist, me bilanc prej 23 fitoresh dhe asnjë humbjeje.

Të drejtën për të sfiduar Fundorën e siguroi më 23 maj, kur në Oberhausen të Gjermanisë mposhti francezin Bakary Samake dhe fitoi titullin WBC Silver Super Welterweight, duke u bërë sfiduesi zyrtar për titullin botëror.

Në anën tjetër, Sebastian Fundora, 28 vjeç, nga Shtetet e Bashkuara, është kampioni aktual i kategorisë. Ai ka zhvilluar 25 duele në boksin profesionist, duke regjistruar 24 fitore dhe vetëm një humbje.

Organizatorët pritet të konfirmojnë në ditët në vijim vendin ku do të zhvillohet meçi i shumëpritur më 17 tetor.

D.L