Kryeministri i Kosovës, Albin Kurti, njoftoi më 25 nëntor se është vendosur gurthemeli për ndërtimin e një nënstacioni policor në fshatin Izvor të Zveçanit, në veri të Kosovës.

“Në objektin e ri, që presim të ndërtohet shumë shpejt, do të shërbejë policia kufitare”, shkroi ai në Facebook.

Në vendosjen e gurthemelit për ndërtimin e këtij stacioni morën pjesë ministri i Punëve të Brendshme të Kosovës, Xhelal Sveçla dhe drejtori i Përgjithshëm i Policisë së Kosovës, Gazmend Hoxha.

Ndërkaq, sipas një njoftimi të Qeverisë së Kosovës, projekti për këtë nënstacion kap vlerën e rreth 700.000 eurove.

Kurti tha se javën e kaluar është vendosur edhe një gurthemel për stacionin e policisë mbi urën e lumit Bistrica, e cila ndodhet në rrugën kryesore që çon në kalimin kufitar të Jarinjës. Në këtë pikë ndodhen pjesëtarë të njësive speciale dhe të rregullta të Policia e Kosovës.

Ministri i Brendshëm, Xhelal Sveçla më 23 nëntor, gjatë vendosjes së gurthemelit për ndërtimin e stacionit në Bistricë, tha se ky “objekti i ri e modern do të jenë në shfrytëzim të pjesëtarëve të Policisë së Kosovës të cilët nga ky vend, po shërbejnë prej gati dy vjetësh në luftimin e çdo kriminaliteti, mbrojtjen e kufirit tonë e për sigurinë e përgjithshme të Republikës sonë”.

“Do të vazhdojmë pa u ndalur në ngritjen dhe forcimin e kapaciteteve tona për të përballur me sukses çdo sfidë që mund të na dalë përpara”, shtoi ai.

Nga ana tjetër, përfaqësuesit e komunitetit serb, që është shumicë në veri të Kosovës, kundërshtojnë ndërtimin e stacioneve policore ose bazave policore, me arsyetimin se ata janë të ekspozuar ndaj “presioneve dhe diskriminimit” nga ana e Policisë. Gjithashtu, sektori civil serb ka kërkuar kohët e fundit nga komuniteti ndërkombëtar që t’i kushtojë vëmendje ankesave të qytetarëve për sjelljen e Policisë së Kosovës, duke e cilësuar atë si “joprofesionale” dhe “të politizuar”.

Drejtori i Zyrës për Kosovën në Qeverinë e Serbisë, Petar Petkoviq, e ka vlerësuar ndërtimin e stacioneve të reja si “një mjet shtesë për shtypjen dhe dëbimin e popullatës serbe”. Ai po ashtu ka deklaruar se autoritetet e Kosovës “kanë ndryshuar në mënyrë të dhunshme strukturën etnike të policisë” në veri të Kosovës, dhe ka potencuar se Marrëveshja e Brukselit parashikon që në këtë pjesë të dislokohen policë nga radhët e komunitetit serb.

Në fillim të nëntorit 2022, mbi 500 policë nga radhët e komunitetit serb në veri të Kosovës dhanë dorëheqjen si pjesë e një aksioni kolektiv për t’u larguar nga institucionet e Kosovës për shkak të vendimit të Qeverisë së Kosovës për konvertimin e targave të makinave nga ato të lëshuara nga Serbia, në ato të Kosovës. Që nga ajo kohë, në veri të Kosovës janë ndodhur kriza të shumta, që kulmuan me një sulm të armatosur të një grupi të serbëve ndaj Policisë së Kosovës në shtator 2023, kur u vra një polic i Kosovës. Ndërkohë, në veri janë dërguar kryesisht policë nga komuniteti shqiptar, si dhe pjesëtarë të njësive speciale të Policisë së Kosovës.

Gjithashtu, Qeveria e Kosovës në fund të majit të këtij viti mori vendimin përfundimtar për shpronësimin e mbi 100 parcelave në komunat me shumicë serbe, Leposaviq dhe Zubin Potok, për ndërtimin e stacioneve dhe bazave të policisë.

Shtetet e QUINT-it – Shtetet e Bashkuara, Franca, Gjermania, Italia dhe Mbretëria e Bashkuar – së bashku me Zyrën e Bashkimit Evropian në Kosovë dhe Misionin e Organizatës për Siguri dhe Bashkëpunim në Kosovë (OSBE), atëbotë kishin shprehur shqetësimin për këtë vendim të Qeverisë së Kosovës, duke shtuar se shpronësimi duhet të vlerësohet në kuadër të ligjshmërisë, të drejtave të njeriut dhe interesit publik, dhe jo në bazë të përkatësisë etnike të qytetarëve.

Për nder të përvjetorit të pavarësisë së Shqipërisë, Komuna e Deçanit nderoi nënkolonelin e ushtrisë shqiptare, Besnik Fana, duke i dhënë titullin qytetar nderi.

Në mbledhjen solemne për festat e nëntorit, kryetari i Deçanit, Bashkim Ramosaj tha se në këtë mënyrë po nderojnë të gjithë ushtrinë shqiptare.

“Historia jonë është nëntori dhe marsi. Përpjekjet e shqiptarëve për liri dhe pavarësi krijuan ngjarje që mbetën në kujtesën tonë, për të mos u harruar kurrë. Data 28 nëntor e vitit 1997 është data e shfaqjes së ushtrisë sonë më të lavdishme ndër shekuj – UÇK-së. Një betim për të qenë gjithmonë bashkë e për të mbrojtur idealet kombëtare. Kemi përzgjedhur nënkolonelin Besnik Fana jo si emër i përvetshëm por si emër ku nderojmë luftëtarin shqiptar dhe ushtrinë e Shqipërisë”, tha Ramosaj.

Nënkoloneli Besnik Fana, i cili u nderua me këtë titull, u zotua për punë të pakursyer në të mirë të vendit.

“Marrja e titullit qytetar nderi, sidomos në Deçan më besoni që i kalon kufijtë e emocionit. Një vend që historinë e kombit shqiptar e ka shkruar e rishkruar me gjak sa herë që ka kërkuar nevoja. Qytet që është djegur shumë herë por sa herë është djegur është bërë më i fortë e ndërtuar më i bukur. Si ushtarak i shqiptarisë dhe si qytetari më i ri i juaji, ju premtoj që angazhimi dhe përkushtimi për të mirën e këtij vendi do të jetë i pakursyer sa herë të jetë nevoja. Zoti e bekoftë popullin shqiptar”, tha Fana.

Besnik Fana është nderuar me mbi dhjetë medalje të ndryshme.

Ai e ka filluar karrierën në Forcat e Armatosura të Republikës së Shqipërisë, ka marrë pjese në tetë misione, Irak, Afganistan dhe Kosovë.

Kuvendi i Kosovës më 2 dhjetor do mbahet seancë e re plenare, ku do të diskutohet për katër vjet të qeverisë Kurti. Ndërsa, 5 dhjetor do të mbajë dy seanca tjera.

Pas mbledhjes së kryesisë së Kuvendit, nga mazhoranca thanë se synojnë në këto seanca të shtyjnë përpara agjendën parlamentare të pushtetit.

Mirëpo, nga opozita e kualifikuan si të domosdoshëm siç thanë shpërfaqjen e qeverisjes së dështuar të qeverisë Kurti.

Krahas kësaj, shefi i grupit parlamentar të LDK-së, Arben Gashi dhe shefi i grupit parlamentar të AAK-së, Besnik Tahiri, u shprehën skeptik për progres në dialog, pas pyetjeve për takimin e radhës të kryenegociatorëve të Kosovës dhe Serbisë në Bruksel.

Sindikata e Bashkuar e Arsimit, Shkencës dhe Kulturës e Kosovës ka njoftuar se më 4 dhjetor do të protestojnë kundër qasjes së Ministrisë së Arsimit ndaj kërkesave të tyre, veçmas ndaj bllokimit me qëllim të ministres, Arberie Nagvci të negocimit për kontratën e re kolektive të arsimit.

Sipas komunikatës, llogaritet se në këtë protestë do të marrin pjesë rreth 2000 protestues dhe do të nis para Ministrisë së Arsimit e pastaj do të marshohet drejt Qeverisë dhe Parlamentit të Kosovës.

“Pas takimit të Këshillit Drejtues të SBASHK-ut, në të cilin është analizuar situata aktuale dhe janë thënë kritika të ashpra e të arsyeshme ndaj Qeverisë dhe veçmas ndaj Ministrisë së Arsimit për mungesë të dialogut dhe për shkak të qasjes të gabuar ndaj kërkesave legjitime të anëtarësisë së SBASHK-ut dhe veçmas ndaj bllokimit me qëllim të Ministres Nagvci të negocimit për Kontratën e re Kolektive të Arsimit, në orët e mbrëmjes së të dielës është mbajtur takimi konsultativ me kryetarët e nivelit komunal sindikal e të universiteteve dhe të gjithë kanë ripërsëritur vendimin e Këshillit Drejtues për të filluar me veprime sindikale. U vendos që veprimi i parë sindikal të jetë protesta më 4 dhjetor me pjesëmarrjen e kryetarëve dhe kryesive nga të gjitha shoqatat sindikale që nga çerdhet e deri në universitete, të anëtarëve të Këshillit Drejtues, të kryetarëve e kryesive të nivelit komunal sindikal e të universiteteve dhe të kryesisë qendrore duke qenë rreth 2000 protestues. Kjo protestë do të nisë para “, thuhet në komunikatë.

SBASHK thekson se ky do të jetë veprim i parë sindikal pas protestës së 1 majit të këtij viti dhe përpjekjeve të vazhdueshme për dialog, dhe do të vazhdohet edhe me veprime të tjera sindikale, duke mos përjashtuar edhe grevën në tërë sektorin e arsimit nëse Qeveria dhe në veçanti Ministria e Arsimit nuk reflekton dhe nuk nisë negocimin për Kontratën e re Kolektive të Arsimit.