Ka ndërruar jetë Shemë Mustafa, ish-pjesëtar i Policisë së Kosovës nga Mitrovica, i cili në qershor të vitit 2023, u rrëmbye nga forcat serbe së bashku me dy kolegë të tjerë.

Lajmi për ndarjen e tij nga jeta është bërë i ditur nga familjarët përmes rrjeteve sociale, kurse varrimi i tij do të bëhet nesër në varrezat e Shipolit në Mitrovicë.

Mustafa vuante prej kohësh nga një sëmundje kronike dhe shërbeu për vite me radhë në Policinë e Kosovës.

Gjatë rrëmbimit të tij, Policia aktin e cilësoi këtë si kidnapim klasik të organizuar brenda territorit të Kosovës, kurse në Beograd u tha se ata janë arrestuar nga njësitet anti-terror të xhandarmërisë serbe brenda territorit të Serbisë, në komunën e Rashkës.

Policia e Kosovës pati bër të ditur se ata dyshohet se janë rrëmbyer nga forcat serbe gjatë një patrullimi në vendin e quajtur Tresave/Bare, në vijën kufitare në veri të Kosovës në komunën e Leposaviqit. /S.K/KP/

Një bllokim i plotë policor u vendos në zonën më të gjerë të plazhit Jaz në Kotor mbrëmë për shkak të një vrasjeje pranë plazhit të afërt Trsteno.

Forcat policore kanë kontrolluar të gjitha qasjet dhe hetimi është duke vazhduar, raportoi portali Dan.

Bllokimi policor u vendos pranë urës në Jaz dhe shtrihet deri në vendin e ngjarjes, i cili është rreth një orë larg në këmbë.

Kalimi, me urdhër të prokurorit të lartë të shtetit, ishte i ndaluar, me përjashtim të zyrtarëve, përfshirë mediat.

Trupi i pajetë i një burri që ende nuk është identifikuar u gjet në një automjet pranë plazhit Trsteno.

Sipas informacioneve jozyrtare, policia po punon intensivisht për të përcaktuar identitetin e viktimës, dhe gjithashtu po heton dyshimin se ai është një anëtar i rangut të lartë i një prej grupeve kriminale, gjë që ngre mundësinë që kjo të jetë një vazhdim i konfliktit të klanit./S.K/KP/

E përditësuar:

13:40 – Në Gjykatën Themelore në Prishtinë ka vazhduar seanca gjyqësore ndaj Naim Murselit, Kushtrim Kokallës dhe Granit Plavës të akuzuar për vrasjen e Liridona Ademaj.

Në sesionin e paradites është dëgjuar eksperti i mjekësisë ligjore, Naim Uka i cili tha se e ndjera Liridona Ademaj u vra nga një distancë 2-5 centimetra.

Ndërsa, tani në pjesë e dytë të seancës se sotme do të dëgjohen Jeton Binaku Hasan Hasanaj dhe Naim Sadiku.

Seanca po vazhdon me dhënien e dëshmisë së Jeton Binakut, i cili ishte qiradhënësi i veturës.

10:22 – Në seancën gjyqësore ndaj Naim Murselit, Granit Plavës dhe Kushtrim Kokallës, të përfshirë në vrasjen e Liridona Ademajt, të hënën ka dëshmuar mjeku ligjor Naim Uka, i cili ka kryer autopsinë e trupit të saj.

Uka, duke iu përgjigjur pyetjeve të Prokurorisë, tha se një pjesë metalike e hedhur nga arma e zjarrit është gjetur në anën e majtë murale të kokës e cila ishte dorëzuar si provë.

“Gjatë procedurave të autopsisë mjeko-ligjore është konstatuar vrima hyrëse në regjionin e djathtë muror të kokës e shkaktuar nga veprimi dinamik i predhës së hedhur nga arma e zjarrit e cila ka pasur drejtim nga djathtas majtas nga përpara pjerrtas dhe pas dhe nga poshtë pjerrtas lart. Është e rëndësishme të cekët se pjesë metalike të kësaj predhe është gjetur në anën e majtë murale të kokës e cila është dorëzuar si provë sipas zinxhirit të provave tek policët hetues. Si rezultat i kësaj plage ka ardhur gjakderdhja e brendshme trunore e cila është edhe shkaku i vdekjes”, tha ai.

Ai shtoi se qitja e armës është bërë rreth 2 deri në 5 centimetra.

“Gjatë ekzaminimit të plagës hyrëse kemi konstatuar përreth vrimës hyrëse prezencën e faktorëve plotësues të qitjes të cilët kanë shkaktuar djegien lëkurore me prezencë të grimcave të barutit dhe në bazë të këtyre provave mjeko-ligjore është konstatuar se distanca e qitjes sillet rreth 2 deri 5 centimetra. Përjashtohet mundësia e vrasjes me puthitje apo gjysmë puthitje për shkak të mungesës së stampit të tytës së armës në indet e buta përreth vrimës hyrëse të plagës. Plaga është përshkruar se ka formë trekëndëshe e cila është e shoqëruar me thyerje të shumëfishta kockore dhe e shoqëruar me plozë përreth”, tha ai.

Ai tha ka eleminuar mundësinë se e njëjta ka kryer vetëvrasje.

“Në raste të ngjashme kur mungojnë të dhënat preliminare nga vendi i ngjarjes gjatë kryerjes së autopsisë kryhen edhe ekzaminimet e detajuara të shuplakave të duarve të të ndjerit apo të ndjerës. Edhe në këtë rast kemi kryer ekzaminimet e dy duarve të të ndjerës në mënyrë që bazuar në prezencën apo mungesën e faktorëve plotësues të qitjes dhe njollave është eliminuar mundësia që e njëjta të ketë përdorur ndonjë armë apo të ketë shkaktuar vetëvrasje. Edhe mungesa e shtangimit kataliptik të gishtit tregues është një provë tjetër mjeko-ligjore që e plotëson konstatimin e parë dhe nuk lë asnjë dyshim për ndonjë mundësi tjetër”, tha ai.

Ai duke ju përgjigjur pyetjeve të prokurorisë tha se në rastin konkret gjatë ekzaminimit të jashtëm të trupit është konstatuar gjakmbledhja lëkurore (hematoma) me përmasa rreth 6 x 1.5 cm

“Gjatë procedurave standardeve të strukturave mjeko-ligjore përveç plagëve vdekjeprurëse ekzaminohen të gjitha dëmtimet tjera eventuale trupore. Në rastin konkret gjatë ekzaminimit të jashtëm të trupit është konstatuar gjakmbledhja lëkurore (hematoma) me përmasa rreth 6 x 1.5 cm në regjionin e sipërm dhe të jashtëm në krahun e djathtë. Kjo gjakmbledhje është përshkruar me ngjyrim të kuqe dhe blu, vetë përngjyrimi i tillë, bazuar në kriteret shkencore mjeko-ligjore dhe praktike, dëshmon se kjo gjakmbledhje është shkaktuar para ose gjatë vrasjes së tani më të ndjerës. Ngjyra e kuqe tregon praninë e eritrociteve të freskëta dhe të oksigjenuara të dala nga enët e gjakut në momentin e traumatizimit – kjo është tipike për fazën akute, ndërsa ngjyra blu është kur fillon të deoksigjenohet dhe degradohet. Përjashtohet çdo mundësi tjetër që kjo gjakmbledhje të jetë shkaktuar pas vdekjes së tani më të ndjerës”, tha ai./D.B/EO

08:10

Do të vazhdojë edhe sot seanca e shqyrtimit gjyqësor ndaj Naim Murselit, Granit Plavës dhe Kushtrim Kokallës, të akuzuar për përfshirje në vrasjen e Liridona Ademajt.

Në këtë seancë pritet të dëgjohet raporti i autopsisë nga mjeku ligjor Naim Uka.

Ndryshe seanca e fundit u fokusua në dëgjimin e ekspertit të psikiatrisë, i cili kishte kryer ekzaminimin psikiatrik ndaj të akuzuarit Naim Murseli.

Eksperti kishte deklaruar në sallën e gjyqit se nga ekzaminimi i bërë nuk janë konstatuar çrregullime të shëndetit mendor te Naim Murseli, as në formë të përhershme e as të përkohshme. Ai tha se analizat janë kryer përmes dokumenteve të lëndës, bisedave të drejtpërdrejta me të akuzuarin, si dhe përmes vëzhgimit të sjelljes së tij gjatë ekzaminimit.

Liridona Ademaj u vra më 29 nëntor 2023, rreth orës 20:25, në rrugën “Dalip Alshiqi” në fshatin Bërnicë të Prishtinës./S.K/EO/

Policia e Kosovës njofton se dje në Pejë ka ndaluar dy persona tё dyshuar dhe ka arrestuar derisa ishte nё pikё kontrolli në rrugën “Maja e zezё-Peklenё’.

Ata njoftuan se gjatё kontrollit fizik tek njёri nga personat e dyshuar ёshtё gjetur dhe është sekuestruar: njё armё pistoletё, njё karikator i armёs, katёr fishekё

Sipas Policisë, gjatё intervistimit i dyshuari ёshtё prezantuar rrejshëm me identitet tjetёr, pastaj ёshtё verifikuar dhe vërtetuar nga hetuesit dhe i njëjti ka deklaruar rrejshёm.

“Pas intervistimit të personave tё dyshuar me urdhёr tё prokurorit tё Shtetit tё dyshuarit janё ndaluar pёr 48 orё”, thuhet në njoftim./S.K/KP/