Në kryeqytet sot ka filluar mësimi tërëditor edhe në dy shkolla, në shkollën fillore të mesme të ulët “Faik Konica” dhe “Xhemajl Mustafa”.

Fillimin e procesit të ri e pa nga afër edhe kryetari i Komunës së Prishtinës, Përparim Rama dhe nënkryetarja e njëherësh drejtoresha e Arsimit në këtë komunë, Jehona Lushaku-Sadriu.

Me këtë rast Rama ka thënë se ky sistem i ri po shfrytëzohet në mënyrë që nxënësit të kenë mundësi të lexojnë dhe kuptojnë mësimet më mirë dhe edukata të jetë në nivel.

“Desha me ardhur edhe eksperiencu (me parë) mënyrën e mësimit tash në shkolla tërëditor edhe ndryshimet të cilat janë bërë… Po e shfrytëzojmë këtë sistem që nxënësit tanë të kenë mundësi që ata që i lexojnë t’i kuptojnë dhe diskutojnë rreth asaj se çka po lexojnë dhe meritojnë një sistem më të mirë me u thellua edukata dhe leximet që bëjnë fëmijët tanë. Kurrikulën digjitale e kemi tash të hatashme, jemi zotua që çdo klasë t’i ketë panelat smart”, ka thënë Rama.

Ndërsa, drejtoresha e Arsimit në Komunën e Prishtinës, Jehona Lushaku-Sadriu është shprehur se kio është bërë me qëllim të ngritjes së cilësisë së arsimit në Kosovë.

“Kjo është një lloj përmbushje e një mësimi më funksional të fëmijëve dhe planifikimit të prindërve, por njëkohësisht është bërë me qëllime më të mira që ngritja e cilësisë në arsim të ndodh pjesërisht në qendër të Prishtinës. Po e shndërrojmë shkollë, në një vend lumturie krahas një vendi ku edhe aplikohet mësimdhënia me metoda bashkohore”, ka shtuar ajo.

Po ashtu profesori i biologjisë, Besnik Shabihu ka shtuar se aktivitetet janë kreativë e jo shabllon, prandaj sipas tij, fëmijët nuk do ta ndjenjë lodhjen.

“Është dita e parë, po shihet një entuziazëm, një energji ndryshe e fëmijëve. Duke dalë prej sistemit që kemi kalua ne si gjenerata, është diçka e re. Do të kenë mundësi përmes lojërave të jenë më afër mësimeve. Për shkak që aktivitetet janë atraktive, fëmijët nuk kanë me ndje fare lodhjen. Po të kishin qenë shabllon në formën tradicionale, po besoj se do të ishte e lodhshme”, ka shtuar ai.

Pas vizitës së shkollës “Faik Konica”, të njëjtit vizituan edhe shkollën “Xhemajl Mustafa”.

Megjithë përshkallëzimin e tensioneve në Lindjen e Mesme, territor ky i pasur me naftë, çmimet e naftës ranë të hënën pasi investitorët ishin kryesisht të shqetësuar për rënien e kërkesës në Kinë dhe një tepricë të ofertës globalisht.

Çmimi i një fuçie nafte të papërpunuar Brent, pikë referimi globale, u rrit pak në fillim të tregtisë, por u ul me 0.6% nga 7.31 e mëngjesit ET për të qëndruar pak mbi 71 dollarë. West Texas Intermediate, standardi i SHBA-së, ra me 0.8% për t’u tregtuar me pothuajse 68 dollarë.

Kjo është ende shumë poshtë niveleve prej 88 dhe 86 dollarësh që kontratat arritën respektivisht menjëherë pas sulmit vdekjeprurës të Hamasit ndaj Izraelit tetorin e kaluar.

Sulmet e fundit ajrore të Izraelit kundër Hezbollahut dhe Houthis nuk “ndikojnë materialisht furnizimet globale të naftës”, shkroi në një shënim të hënën Daniel Casali, kryestrategu i investimeve në Evelyn Partners në Londër.

“Megjithatë, nëse Izraeli godet thellë brenda Iranit në objektet e tij bërthamore, atëherë kjo mund të çojë në një përgjigje nga Teherani që ndërpret rrjedhën e naftës dhe gazit nga Lindja e Mesme… (duke çuar) në çmime shumë më të larta të naftës”, shtoi ai.

Shqetësimet për kërkesën e dobët për naftë në Kinë, importuesi më i madh në botë i naftës, kanë ndihmuar në mbajtjen e një mbulesë mbi çmimet në muajt e fundit, ashtu si edhe prodhimi rekord nga Shtetet e Bashkuara.

Në muajin qershor, Agjencia Ndërkombëtare e Energjisë tha se pret që rritja e prodhimit global të naftës të “fryjë kapacitetin rezervë (të naftës) në botë” në nivele të parë vetëm një herë më parë, gjatë pandemisë së koronavirusit kur çmimet e naftës ranë. Deri në vitin 2030, oferta globale e naftës do të tejkalojë kërkesën me 8 milionë fuçi në ditë./UBTNews/

Nga viti në vit vërehet rritje e rasteve të prekura me kancer. Sipas të dhënave të Agjencisë së Statistikave të Kosovës (ASK), numri i rasteve të reja me kancer është rritur në vitin 2023, krahasuar me vitin paraprak. Në vitin 2023 janë regjistruar mbi 1 mijë raste të reja me kancer, më shumë se sa një vit më parë.

Sipas të dhënave të ASK-së, gjatë vitit 2022 ishin gjithsej 3110 raste të reja të prekura nga kanceri. Ndërkaq në vitin 2023 janë gjithsej 4 mijë e 165 raste të reja me kancer. Nga këto raste 2 085 të rasteve janë femra dhe 2 080 meshkuj.

“Nëse shikohet në përgjithësi niveli i vizitave në Institucionet shëndetësore, e kryesisht atyre parandaluese është rritur, nëse shikojmë numrin e të gjitha vizitave në të gjitha nivelet e vizitave qofshin ato në shëndetin primar, sekundar apo edhe në atë terciar. Tek të prekurit me kancer vërehet një rritje e ndjeshme nga viti 2022 ku kishte 3110 raste të reja të prekura nga kanceri derisa në vitin 2023 kemi 4165 raste të reja”, thuhet në raportin e ASK-së.

Qeveria e Kosovës thotë se po i bëhet padrejtësi vendit me zvarritjen e shqyrtimit të aplikimit për marrjen e statusit vend-kandidat për anëtarësim në Bashkimin Evropian. Sipas ekzekutivit kosovar opinioni i BE-së ndaj këtij aplikimi dhe marrja e pyetësorit, janë hapa të domosdoshëm që duhet të merren nga unioni evropian.

Dy vjet nga aplikimi, në qeveri shpresojnë që presidenca hungareze e Këshillit të BE-së të trajtojë me seriozitet të merituar kërkesën e Kosovës. Në anën tjetër, në Lidhjen Demokratike të Kosovës akuzojnë qeverinë se s’ka punuar asgjë në integrimet evropiane, derisa këtë proces e ndërlidhin edhe me dialogun Kosovë-Serbi. Ndërkaq, njohësit e integrimeve evropiane janë skeptik se do të ketë vendim pozitiv nën presidencën e Hungarisë.

Klisman Kadiu, këshilltar i zëvendëskryeministrit për Integrim Evropian, Zhvillim dhe Dialog, Besnik Bislimi, thotë se është e padrejtë që Kosovës të mos i jepet mundësia që të vlerësohet në baza meritokracie mbi nivelin e përgatitjes dhe gatishmërisë institucionale.

“Ne mendojmë se është e padrejtë që Kosovës të mos i jepet mundësia që të vlerësohet në baza meritokracie mbi nivelin e përgatitjes dhe gatishmërisë institucionale. Opinioni nga ana e BE-së dhe marrja e pyetësorit, janë hapa të domosdoshëm të cilat duhet të ndërmerren. Kemi punuar ngushtë me presidencat e Këshillit të BE-së përgjatë kësaj periudhe, dhe shpresojmë që ajo aktuale hungareze ta trajtojë me seriozitetin e merituar kërkesën tonë për aplikim”,thekson Kadiu.

Ai shton se aplikimi i Kosovës për marrjen e statusit-vend kandidat për anëtarësim në BE ishte si rezultat siç thotë ai i progresit të gjithmbarshëm dhe sinjal i fuqishëm i vullnetit, gatishmërisë dhe vendosmërisë për të bërë hapa përpara në procesin e integrimit evropian dhe rrugës drejt BE-së.

“Aplikimi ynë për anëtarësim në Bashkimin Evropian në dhjetorin e para dy viteve, erdhi si rezultat i progresit të gjithmbarshëm që njohu vendi, i cili u pasqyrua bindshëm edhe në Raportin për Vendin për Kosovën 2022 të vetë Bashkimit Evropian. Gjithashtu, aplikimi ishte edhe një sinjal i fuqishëm i vullnetit, gatishmërisë, dhe vendosmërisë për të bërë hapa përpara në procesin e integrimit evropian dhe rrugës drejt BE-së. Tashmë 8 vite nga Marrëveshja e Stabilizim Asocimit, Kosova vijon të mbetet vendi i vetëm në rajon që nuk e ka statusin e vendit kandidat, kur shtetet e tjera të Ballkanit Perëndimor e kanë marrë atë menjëherë, në raste edhe pak javë pas nënshkrimit të asaj marrëveshjeje”, thuhet më tej në përgjigjen e Kadiut.

Mirëpo, kryetarja e Komisionit për Integrime Evropiane, në Kuvendin e Kosovës, Rrezarta Krasniqi, thotë se qeveria s’ka punuar asgjë për integrim evropian.

Marrjen e statusit të vendit-kandidat për anëtarësim në BE, ajo e ndërlidh edhe me dialogun Kosovë-Serbi.

“Me 15 dhjetor të këtij viti bëhen 2 vjet që nga aplikimi i Kosovës për marrjen e statusit vend-kandidat për anëtarësim në Bashkimin Evropian. Ne tashmë kemi masa nga Bashkimi Evropian sepse kjo qeveri s’ka punuar asgjë në integrim evropian. Sa i përket përkrahjes edhe pse jemi opozitë ne jemi gëzuar këtij aplikimi, mirëpo po shohim se kemi ngecje në procesin integrues sepse të gjitha proceset janë të lidhura me dialogun Kosovë-Serbi”, thotë ajo.

Në anën tjetër, profesori i integrimeve evropiane, Dritëro Arifi, është skeptik se do të ketë lëvizje nën presidencën hungareze për dhënien e statusit Kosovës si vend-kandidat për anëtarësim në BE.

Megjithatë, ai shton se edhe nëse Kosova merr dritën e gjelbër, anëtarësimi në BE në rrethana aktuale është i pamundur për shkak të mosnjohjes së Kosovës nga pesë vendeve të BE-së.

“Të dyja palët po luajnë një poker (ping-pong) me sy mbyllur. Është e kotë BE-ja çka po thotë, mirëpo edhe Kosova. Pa njohjen e Kosovës ne nuk mund të bëhemi anëtarë sipas Traktatit të Lisbonës. Kjo i bie që Këshilli i Evropës e autorizon komisionin evropian për me pa si është gjendja, por para se të merret vendimi duhet të kyçet edhe Parlamenti Evropian…Edhe nëse kushtimisht po themi se mund ta marrim statusin e vendit-kandidat, po themi mund të gjendet ndonjë vrimë por që të bëhemi anëtarë duhet gjithsesi aprovimi i 27 vendeve të BE-së, e kjo është misioni pamundur”, thekson Arifi.

Kosova ka aplikuar për marrjen e statusit vend-kandidat për anëtarësim në BE më 15 dhjetor të vitit 2022. Aplikimi deri tani nuk është shqyrtuar nga asnjë vend që ka pasur presidencën e Këshillit Evropian, ndërkaq deri më 31 dhjetor 2024, presidencën e Këshillit e ka Hungaria.

Kosova vijon të mbetet vendi i vetëm në rajon që nuk e ka statusin e vendit kandidat për anëtarësim në BE.