Lajmet

Dështimi i mbledhjeve të kryesisë, PDK kërkon zgjedhje të reja

Si zgjidhje të krizës në Kuvend, Tahiri po i sheh zgjedhjet e reja.

Published

4 years ago

November 30, 2021

Betim Gashi

Për të gjashtën herë me radhë, Kryesia e Kuvendit ka dështuar të mbajë mbledhjen e rregullt. Shkak i mungesës së disa nënkryetarëve, në momentet e fundit u anulua tërësisht mbledhja e paraparë të mbahet të martën. Kjo irritoi opozitën, të cilët e quajtën të papërgjegjshëm mazhorancën. Madje, u kërkuan edhe zgjedhje të reja parlamentare dhe kthim i mandatit tek populli, si zgjidhje për ngërçin në Kuvend.

Shefi i grupit parlamentar të PDK-së, Abelard Tahiri, në një konferencë për medie tha se partia në pushtet ka hyrë në krizë të thellë, sipas tij, kjo papërgjegjësi në Kuvend nuk është parë asnjëherë në historinë e jetës parlamentare.

“Jemi dëshmitar se tash e një kohë të gjatë kemi hyrë në një seri të dështimeve të njëpasnjëshme si të seancave, ashtu edhe të mbledhjeve të kryesisë. Këto dështime që janë kthyer si të zakonshme, realisht tregojnë se ky koalicion qeveritar dhe mazhorancë ka hyrë në një krizë e cila nuk është e lehtë… Është e papërgjegjshme mos me u njoftuar grupet parlamentare, mos me u njoftuar nënkryetarët e Kuvendit që mbledhja është anuluar. Ne jemi njoftuar ditën e premte për këtë mbledhje dhe sot vijmë këtu dhe na thuhet se mbledhja është anuluar. Në anën tjetër kemi një agjendë jashtëzakonisht të rëndësishme, agjendë që në pikat e saj ka edhe Gjykatën Kushtetuese dhe ka shumë projektligje ndërkombëtare që lypin trajtim…Këtë papërgjegjësi kaq të madhe në historinë parlamentare të Kuvendit nuk e kemi pa asnjëherë. Se dy dekada prej vitit 2001 dhe deri tani nuk kemi pa papërgjegjësi kaq të madhe, një mazhorancë kaq të fuqishme dhe dështime kaq të mëdha nuk kemi pa asnjë herë”, tha ai.

Si zgjidhje të krizës në Kuvend, Tahiri po i sheh zgjedhjet e reja.

“Ngërçi më së miri do të zgjidhej me zgjedhje të reja, meqenëse kemi hyrë në një krizë të njëpasnjëshëm të Kuvendit. Si duket mazhoranca është një krizë të thellë, pas 14 nëntorit po shohim që nuk e kanë vullnetin me qeverisë, nuk e kanë vullnetin me qenë prezentë në Kuvend, e keni pa se nuk janë prezentë as ministrat dhe as deputetë. Prandaj, kjo mahzorancë i ka dy drejtime, ose t’i kthej mandatin tek popullin ose të qeverisë vendin. Kjo qeveri në fakt po abstenon realisht, e shihni se gjithçka në vend është bllokuar”, shtoi Tahiri.

Kritik për dështimin e mbledhjes së kryesisë, u shpreh edhe shefi i grupit parlamentar të AAK-së, Besnik Tahiri.

Megjithatë, ai kërkoi miratimin e rregullores së re të Kuvendit dhe krijimin e “konferencës së kryetarëve”, ku në caktimin e seancave plenare rolë vendimmarrës do të kishin edhe shefat e grupeve parlamentare.

“U bënë 6 mbledhje të kryesisë të cilat për arsye të ndryshme nuk po mbahen. Është e papranueshme, është e padrejtë të mos ketë një takim të kryesisë dhe kjo të ndryshojë momentin e fundit. Në këtë kuptim siç po shihet është domosdoshmëri e kohës që kjo të ndryshohet sa më shpejtë që është e mundshme”, tha ai.

Dy shefat e grupeve parlamentare opozitare shprehën gatishmërinë për të qëndruar në sallë në momentin e votimit të bordit të RTK-së. Me rastin e anulimit të mbledhjes së Kryesisë nga mazhoranca nuk u deklaruan për medie.

Rajoni

Rektori Hajrizi viziton UniMarconi në Romë

Published

11 hours ago

November 8, 2025

Driton Iseni

Gjatë vizitës zyrtare në Itali, Rektori i UBT-së, Prof. Dr. Edmond Hajrizi, zhvilloi një vizitë në Universitetin UniMarconi, i pari institucion digjital i i akredituar në Itali.

Me këtë rast, Rektori Hajrizi u takua me Rektorin e UniMarconi-t, Prof. Marco Abate, me Prof. Ulrike Haider-Quercia, udhëheqëse e Shkollës së Doktoratës, si dhe me Prof. Francesco Gaspari, përgjegjës për bashkëpunimin ndërkombëtar.

Të dy rektorët shkëmbyen përvoja rreth zhvillimit të universiteteve moderne, bashkëpunimeve ndërkombëtare dhe mundësive për forcimin e partneritetit ndërmjet dy institucioneve në fusha të ndryshme, si mobiliteti akademik, studimet e përbashkëta, projektet kërkimore dhe inovacioni.

Lajmet

Bellingham dhe Foden rikthehen në kombëtaren e Anglisë

Published

1 day ago

November 7, 2025

UBT News

Jude Bellingham dhe Phil Foden janë rikthyer në skuadrën e Anglisë për ndeshjet kualifikuese të Kupës së Botës kundër Serbisë dhe Shqipërisë.

Trajneri Thomas Tuchel ka ftuar për herë të parë mesfushorin e Bournemouthit, Alex Scott, i cili ka bërë paraqitje mbresëlënëse këtë sezon. Nga ana tjetër, Jack Grealish dhe Danny Welbeck nuk janë përfshirë në listë, ndërsa mungojnë edhe Ollie Watkins dhe Myles Lewis-Skelly.

Bellingham, që kishte munguar në grumbullimin e kaluar për shkak dëmtimi, është rikthyer në formë me Real Madridin, duke shënuar tre gola në katër ndeshjet e fundit. Edhe Foden ka shkëlqyer me Manchester Cityn, ku shënoi dy herë në Ligën e Kampionëve kundër Borussia Dortmund.

“Jemi të kënaqur që janë rikthyer. Të dy kanë qenë vendimtarë për klubet e tyre dhe tani mund të ndihmojnë edhe kombëtaren,” tha Tuchel.

Anglia kryeson Grupin K me 18 pikë pas gjashtë ndeshjeve, ndërsa përballet me Serbinë në Wembley të enjten dhe me Shqipërinë në Tiranë të dielën.

Skuadra e Anglisë:

Portierë: Henderson, Pickford, Pope

Mbrojtës: Burn, Guehi, James, Konsa, O’Reilly, Quansah, Spence, Stones

Mesfushorë: Anderson, Bellingham, Henderson, Rice, Rogers, Scott, Wharton

Sulmues: Bowen, Eze, Foden, Gordon, Kane, Rashford, Saka./S.K/KP/

Sport

Vdes në moshën 24 vjeçare lojtari i Cowboys, Marshawn Kneeland

Published

1 day ago

November 7, 2025

UBT News

Sipas autoriteteve ligjore, ka vdekur mbrojtësi i Dallas Cowboys, Marshawn Kneeland në moshën 24 vjeçare. Ekipi lëshoi një deklaratë të enjten duke mos përmendur shkakun e vdekjes.

“Me trishtim të madh, Dallas Cowboys njoftojnë se Marshawn Kneeland ndërroi jetë tragjikisht këtë mëngjes. Marshawn ishte një shok skuadre i dashur dhe anëtar i organizatës sonë. Mendimet dhe lutjet tona në lidhje me Marshawn janë me të dashurën e tij Catalina dhe familjen e tij.”, thuhet në njoftim.

Cowboys kanë vënë në dispozicion burime këshillimi për të gjithë lojtarët, trajnerët dhe stafin.

Lojtarët aktualisht janë në javën e pushimit dhe nuk janë planifikuar të stërviten përsëri deri të hënën.

Policia e DPS-së gjeti automjetin e Kneeland të rrëzuar në Dallas Parkway në drejtim të jugut pranë Warren Parkway. Sipas raportit, Kneeland iku nga vendi i ngjarjes në këmbë dhe oficerët kontrolluan zonën me ndihmën e K-9 dhe njësive të dronëve.

Ndërsa autoritetet po kërkonin Kneeland, një dispeçer u tha oficerëve se njerëzit që e njihnin kishin marrë një mesazh në grup nga Kneeland duke i thënë lamtumirë. Përafërsisht tre orë më vonë, Kneeland u gjet i vdekur./S.K/NFL/

Rajoni

Profesorët e UBT-së përfaqësojnë institucionin në konferencën ndërkombëtare të projektit COWEB në Sarajevë

Published

1 day ago

November 7, 2025

Driton Iseni

Profesorët Dr. Engelbert Zefaj dhe Dr. Mentor Shaqiri përfaqësuan UBT-në në konferencën punuese ndërkombëtare të projektit COWEB, e cila u mbajt në Sarajevë, në ambientet e International Burch University.

Gjatë konferencës, përfaqësues nga universitete partnere të rajonit prezantuan punimet dhe rezultatet e tyre kërkimore, duke ndarë përvoja mbi zhvillimin e praktikave të reja në mësimin virtual bashkëpunues.

Në këtë kuadër, profesori i UBT-së Dr. Engelbert Zefaj mbajti një prezantim me temën: “Kultura dhe Ndërkulturaliteti në Mësimin Virtual Bashkëpunues (VCL): Ndikimet Pedagogjike dhe Vlerësimi i Studentëve”, ku theksoi rëndësinë e bashkëpunimit ndërkulturor dhe ndikimin pozitiv të tij në përmirësimin e përvojës së të nxënit.

Projekti COWEB ka për qëllim ndërtimin e kapaciteteve në institucionet e arsimit të lartë në Ballkanin Perëndimor për bashkëpunim ndërkombëtar virtual, duke promovuar pedagogji inovative dhe bashkëkrijimin e përmbajtjeve digjitale që forcojnë aftësitë dhe kompetencat e shekullit XXI.

Nëpërmjet pjesëmarrjes aktive në këtë projekt, UBT vazhdon të dëshmojë rolin e tij si një ndër institucionet lidere në avancimin e metodave bashkëkohore të mësimdhënies dhe në nxitjen e bashkëpunimit akademik ndërkombëtar në rajonin e Ballkanit Perëndimor.