Lajmet

​Dëshmitari i gjashtë në rastin ndaj Mustafës thotë se është rrahur për shkak të bindjeve politike

Fillimisht ai ka thënë se është mbajtur në një ahur dhe është marrë në pyetje, pastaj sipas tij është rrahur në një tjetër vend.

Published

on

Dëshmitari i gjashtë i Zyrës së Prokurorit të Specializuar(ZPS) në gjykimin ndaj Salih Mustafës, ka thënë se është rrahur e keqtrajtuar nga disa persona gjatë kohës që ai thotë se është mbajtur në një ahur. Dëshmitari pretendon se është rrahur nga disa persona me arsyetimin se i njëjti ishte spiun, por para trupit gjykues ai ka thënë se keqtrajtimi i është bërë për shkak të bindjeve të tij politike e ushtarake. Gjatë dëshmisë së tij ai ka thënë se personat që i mbanin i urdhëronin të thoshin”vdekje tradhtarëve, vdekje hajnave dhe lavdi Ushtrisë Çlirimtare të Kosovës”.

Dëshmitari që mban kodin 4669 dhe po dëgjohet në gjykimin ndaj ish-pjesëtarit të Ushtrisë Çlirimtare të Kosovës (UÇK), në Dhomat e Specializuara në Hagë është përgjigjur në pyetjet e prokurorit Cezar Michalzuk, ku ndër të tjera ka thënë se ka mbajtur një ditar me shënime, për çka sipas tij, nga personat që thotë se është rrahur i është thënë se po e përdor për të spiunuar.

Pjesa ku dëshmitari ka treguar si është dërguar në një objekt të mbajtjes është zhvilluar në seancë të mbyllur dhe dëshmia ka vazhduar prej periudhës ku dëshmitari pretendon se ka qëndruar në një ahur me dy persona të tjera që ka thënë se mbaheshin aty.

Fillimisht ai ka thënë se është mbajtur në një ahur dhe është marrë në pyetje, pastaj sipas tij është rrahur në një tjetër vend.

“Më morën në mbrëmje me vete, mi kanë mbyll sytë mos me pa ku po shkojmë, kur kemi shku atje mi kanë heq, pa duar të lidhura pa asgjë, vetëm në përcjellje të dy personave edhe dy kanë qenë anash tyre, edhe më thanë pjesën e sipërme me u zhvesh krejt, prej belit e lart me u zhvesh krejt edhe pastaj më pyesnin më thoshin pse ti ke marrë shënime në atë bllokun, si ditar që e kam pasur, është e shënuar me stilolaps, se atëherë kam shënuar me stilolaps ditarin jo me kimik në mënyrë që vetëm me i qitë ujë në rast rreziku fshihet ajo, dhe i kam thënë që kam marrë shënime që nuk më duket se janë të palejueshme askush nuk më ka thënë se janë të palejueshme ditari me marrë me vete. ‘Ti po spiunon, jo thash unë nuk kam të bëjë, nëse ke ti ndonjë dokument si provë që po spiunoj’. Ka filluar pastaj ‘përkulu, kam qenë në këmbë, tha kështu qëndro me rroba të hequra’ dhe më kanë goditur në shpinë, më kanë goditur me një shufër të gomës, sikur shufra e milicisë serbe, ka qenë shufër e tyre si duket, shufër e gomës jo shufër metalike, shufër e gomës policore”, ka thënë dëshmitari i mbrojtur.

Ai ka thënë se është marrë në pyetje nga dy persona të ri në moshë, rreth 17 dhe 18 vjeç, ndërsa dy të tjerë më të rritur ka thënë se rrinin në gjendje gatishmërie.

“Më vonë pasi kam analizuar gjërat e kam vërejtur, që mua nuk ma merr mendja që ka qenë ai qëllimi i rrahjes sime, por ka qenë më tepër çështje e bindjeve tona çfarë kemi pasur politike, ushtarake, shkaku i tyre, sikurse që u ka ndodhur shumë të tjerëve, nuk ka qenë çështja që ne kemi qenë spiunë fare, nuk ka pasur të bëjë me atë çështje fare, më vonë e kam menduar këtë jo për kohën që po më pyesni ju”, ka thënë dëshmitari i ZPS-së.

Derisa është pyetur rreth dy personave për të cilët thotë të kenë qëndruar në mbajtje me të, dhe moshave të tyre, seanca ka vijuar e mbyllur për publikun. Sipas tij, dy personat e tjerë ishin dërguar në atë ahur disa ditë përpara tij.

“Kur ka filluar marrja në pyetje, na kanë marrë secilin një nga një, na kanë dërguar prej vendit ku kemi qenë në një vend tjetër, edhe na kanë mbuluar fytyrën dhe kur kemi shkuar në atë vend na kanë hequr prej syve atë të fytyrës dhe e kemi parë vetën që jemi në një vend tjetër, por ajo ka qenë aty afër nuk ka qenë diku larg, ka qenë kapur objekti me objektin nuk më kujtohet saktë por shumë afër ka qenë në bazë të asaj që kemi ecë shumë pak. Marrja në pyetje ka qenë në mbrëmje vonë, ajo më kujtohet se ka qenë aty një dritë elektrike”, ka thënë dëshmitari.

4669 ka thënë se nga bisedat që ka dëgjuar nga sy personat që thotë se janë mbajtur aty, ka mësuar se ata janë rrahur gjatë marrjes në pyetje por sipas tij nuk e di se çka i kanë pyetur ata ose arsyen pse janë mbajtur.

Personat që sipas dëshmitarit kanë qëndruar aty, kanë marrë në pyetje dhe kanë ushtruar dhunë fizike ndaj tyre, ishin me rroba të zeza dhe vetëm disa me pantallona ushtarake.

Gjatë dëshmisë së tij, 4669 ka thënë se aty ku pretendon se ka qëndruar me dy persona, më vonë është sjellur edhe një tjetër person, që sipas tij, kishte duart e lidhura dhe ishte i nxirë në fytyrë nga rrahja.

“Kur e kanë sjellë herën e dytë ka qenë në gjendje gati i vdekur, ka qenë i shtrirë duke gjëmuar, ka qenë edhe më i enjtur se që ka qenë, hundët i ka pasur pak si gjak dhe nuk ka qenë në gjendje as të flas as kurrgjë, vetëm rënkonte. Kjo ka ndodhur herën e dytë, ne e kemi dëgjuar herën e parë kur e kanë pru, pastaj e kanë marrë e kanë mbajtur jashtë, nuk më kujtohet atë ditë apo të nesërmen, mirëpo herën e dytë përpara se me pru brenda kur e kanë marrë e kanë lënë jashtë e kanë rrahur aq shumë sa që dëgjoheshin të rrahurat e tij pastaj e shihnim nga vrimat që e godisnin me tepër se pesë-gjashtë veta, me çkado që kishin në duar, e vërenim prej vrimave, dhe pasi që e kanë përfunduar rrahjen e kanë pru të ne, dhe pasi që e kanë pru herën e dytë edhe herën e parë, sa herë e kanë pru të ne na kanë urdhëruar me thënë vdekje tradhtarëve, vdekje hajnave edhe lavdi Ushtrisë Çlirimtare të Kosovës. Këto kanë qenë sa herë e kanë pru brenda që ne është dashtë e i thënë, secili prej neve të treve”, ka thënë dëshmitari i ZPS-së.

Sipas tij, rrahja ka ndodhur jashtë ahurit dhe ai ka mundur të shoh nga disa vrima që sipas tij ishin në dhomën ku mbaheshin.

Personin për të cilin ka folur, dëshmitari e përshkruan me rreth 100 kilogramë dhe gjatësi deri në 2 metra.

“Ai i ka pasur duart e lidhura me tel, edhe i ka pasur të shtrënguara shumë, tel, tel i bakrit të bardhë apo se di si me quajt, a ka qenë i bardhë apo i zi nuk më kujtohet, por tel. Ajo ka qenë e palogjikshme… Kur e kanë marrë herën e dytë brenda një nate, ose atë natë e kanë marrë ose të nesërmen dhe më nuk e kemi parë asnjëherë, kjo është ajo përgjigja që më kujtohet, jo në bazë të thashethemeve por unë çka kam parë vet”, ka thënë dëshmitari.

Sipas dëshmitarit, gjendja e personit, të cilin e përshkruan, i ka frikësuar atë dhe personat e tjerë që mbaheshin.

“Unë e kam kuptuar që më të vërtetë jemi në rrezik për shkak që mund të na ndodh sikurse ajo që i ka ndodhur atij, dhe çështja sa i përket pse e kanë pru, ata thoshin që ai ka vjedhur gjatë luftës, sidomos një person e përmendin një grua shtatzënë që i ka vjedh të hollat të tregu thoshin dhe po ashtu që bashkëpunonte me serbët. Ashtu kam dëgjuar, ashtu kanë thënë”, ka thënë dëshmitari i mbrojtur.

Ky është dëshmitari i gjashtë i ZPS-së dhe gjatë pjesës së parë të seancës ai ka thënë se në shkurt të vitit 1999 ka qëndruar dhjetë ditë në fshatin Zllashë ku sipas tij ka kryer stërvitje në mënyrë që të bëhet pjesë e UÇK-së.

Në gjykimin ndaj Mustafës deri tani janë dëgjuar pesë dëshmitarë, të gjithë të mbrojtur, identiteti i të cilëve nuk është bërë i ditur për publikun.

Gjykimi ka filluar më 15 shtator 2021 dhe është i pari në Dhomat e Specializuara të Kosovës në Hagë, e Salih Mustafa është i arrestuari i parë nga Specialja.

Aktakuza ndaj Mustafës është konfirmuar më 12 qershor të vitit 2020 ndërsa ai u arrestua më 24 shtator të vitit të kaluar, me pretendimin për krime lufte. Ai po qëndron në qendrën e paraburgimit në Hagë ndërsa në deklarimin e tij para trupit gjykues, Salih Mustafa është deklaruar i pafajshëm.

Lajmet

Policia shqipton mbi 2 mijë e 300 gjoba trafiku për 24 orët e fundit

Published

on

By

Policia e Kosovës ka shqiptuar 2397 gjoba për kundërvajtësit e trafikut brenda 24 orëve të fundit.

Sipas raportit të publikuar nga Policia, gjatë kësaj periudhe janë regjistruar 107 aksidente trafiku me dëme materiale, ndërsa 23 të tjera kanë përfunduar me të lënduar. Fatmirësisht, nuk raportohet për ndonjë aksident me pasoja fatale.

Përveç kësaj, në kuadër të operacioneve të rregullta, autoritetet kanë arrestuar 11 persona, ndërsa 8 prej tyre janë dërguar në mbajtje.

Policia e Kosovës vazhdon t’u bëjë thirrje qytetarëve për kujdes të shtuar në trafik dhe respektim të rregullave rrugore, me qëllim të parandalimit të aksidenteve dhe ruajtjes së jetës së pjesëmarrësve në komunikacion.

Continue Reading

Aktualitet

Vazhdojnë kërkimet për 33-vjeçarin që dyshohet se u mbyt në Ujman

Published

on

Operacioni i kërkimit për mërgimtarin që ra të dielën në Liqenin e Ujmanit po vazhdon ende. Që të dielën pasdite thuhet se ai u hodh në liqenin e Ujmanit, dhe nuk u pa më në sipërfaqe. Policia dhe ekipet e kërkim-shpëtimit janë angazhuar për ta gjetur 33 vjeçarin, por deri më tani nuk ka asnjë gjurmë.

Shoqata e Kosovës për Kërkim dhe Shpëtim ka thënë mbrëmë se operacioni i kërkimit duke vazhduar dhe se çdo informacion zyrtar do të bëhet publik vetëm nga institucionet kompetente dhe ekipet e përfshira në terren.

“Shoqata e Kosovës për Kërkim dhe Shpëtim njofton opinionin publik se informacionet që po qarkullojnë në rrjete sociale lidhur me lokalizimin e trupit të personit të mbytur në Ujman janë të pabazuara dhe pa fakte.

Kërkimet ende janë në vazhdim dhe çdo informacion zyrtar do të publikohet vetëm nga institucionet përkatëse dhe nga ekipet e angazhuara në terren. Lusim qytetarët dhe mediat që të mos shpërndajnë lajme të pavërteta që vetëm sa krijojnë konfuzion dhe pengojnë operacionet e kërkim-shpëtimit”, thuhet në njoftim.

Policia ka njoftuar për rastin edhe në raportin 24 orësh.

 

Continue Reading

Lajmet

​Drita përballet Copenhagenit në stadiumin “Fadil Vokrri”

Published

on

Stadiumi “Fadil Vokrri” do të jetë sonte skenë e një ndeshjeje të zjarrtë në kuadër të rrethit të dytë kualifikues të Ligës së Kampionëve, ku Drita do të përballet me skuadrën daneze Copenhagen, në ndeshjen e kthimit që nis në orën 20:00.

Takimi i parë i zhvilluar në Danimarkë përfundoi me fitoren 2-0 të vendasve, duke vendosur Dritën në një pozitë jo të lehtë. Megjithatë, skuadra gjilanase është e vendosur të japë gjithçka në fushë për të realizuar një përmbysje të madhe dhe për të vazhduar ëndrrën evropiane.

Përkrahja e tifozëve pritet të jetë e madhe në “Fadil Vokrri”, ku atmosfera do të jetë elektrizuese në përkrahje të bardhekaltërve.

Në lojë është më shumë se një kualifikim, është krenaria, historia dhe dëshira për ta çuar më tej emrin e Kosovës në arenën ndërkombëtare të futbollit.

Continue Reading

Aktualitet

112 vjet nga Konferenca e Londrës

Published

on

Janë bërë 112 vjet që kur përfundoi punimet Konferenca e Londrës, në të cilën u vendos përgjysmimi i trojeve shqiptare dhe fati i saj. Pas shumë diskutimesh, më 29 korrik 1913, ambasadorët morën një vendim formal për të njohur Principatën e Shqipërisë si shtet sovran të pavarur nga Perandoria Osmane, duke e copëtuar edhe njëherë dhe duke marrë dy të tretat e trojeve shqiptare.

Nga kjo konferencë Shqipëria doli e përgjysmuar në kufijtë e saj. Konferenca u diktua prej shpërthimit të Luftës së Parë Ballkanike ku morën pjesë fuqitë e mëdha të Evropës, përfaqësuesi i Perandorisë Otomane dhe përfaqësues të fuqive ballkanike, me përjashtim të Shqipërisë (që nuk njihej) dhe Greqisë.

Nga kjo konferencë doli Traktati i Londrës, mbi ndarjen e territoreve që dolën jashtë Perandorisë Otomane prej fuqive të mëdha dhe aleatëve të tyre, por mbeti i fshehtë deri në Konferencën e Versajës (1918).

Të gjitha fuqitë e mëdha paraqitën versionin e tyre të hartës së Shqipërisë, por harta më e favorshme për shqiptarët ishte ajo e propozuar nga Austro-Hungaria.

Pas shumë diskutimesh, më 29 korrik 1913, ambasadorët morën një vendim formal për të njohur Principatën e Shqipërisë si shtet sovran të pavarur nga Perandoria Osmane, duke e copëtuar edhe njëherë dhe duke marrë dy të tretat e trojeve shqiptare.

Harta me propozimet e Qeverisë së përkohshme të Vlorës për hartën e Shqipërisë, propozimet e Francës, Rusisë dhe ligës së Ballkanit ( Serbia, Bullgaria dhe Greqia) si dhe kufijtë e tanishëm të propozuar dhe miratuar nga konferenca e Londrës  që tani quhet Shqipëri.

Konferenca e Ambasadorëve filloi punimet në dhjetor 1912, duke vazhduar deri më 29 korrik 1913.

Continue Reading

Të kërkuara