Kuvendi i Kosovës rikthehet sot në seancë të re konstituive në orën 10:00 si një tentativë për të përfunduar procesin që ka ngecur tash e sa kohë.

Njoftimi është bërë në faqen zyrtare të parlamentit, ku theksohet se një nga pikat kryesore është zgjedhja e nënkryetarit të Kuvendit nga radha e komunitetit serb.

Gjykata Kushtetuese, në vendimin e saj të plotë, ka konstatuar se seanca Konstituive e Kuvendit, e filluar më 15 prill 2025, nuk ka përfunduar si rezultat i moszgjedhjes së nënkryetarit të Kuvendit nga radhët e deputetëve të komunitetit serb, dhe Kuvendi nuk është konstituuar në pajtim me përcaktimet e paragrafit 1 të nenit 66 dhe paragrafët 1 dhe 4 të nenit 67 të Kushtetutës së Republikës së Kosovës.

Kryetari i Kuvendit, Dimal Basha, kishte përmbyllur seancën e kaluar më 30 gusht pa zgjedhjen e këtij nënkryetari, duke lënë procesin pezull për më shumë se një muaj./S.K/KP/

Zyrtarisht, Gjykata Kushtetuese e Shqipërisë ka ngrirë dekretin e presidentit Bajram Begaj që vendosi datën 9 nëntor si ditë për mbajtjen e zgjedhjeve për bashkinë Tiranë.

Gjykata tha se vendimi u mor njëzëri dhe se padia e ish-kryebashkiakut Erjon Veliaj kalon në seancë plenare publike që do të mbahet më datën 31 tetor.

Vendimi i pezullimit të dekretit të presidentit Begaj do të thotë se për Tiranën gjykata kushtetuese urdhëron të mos ketë zgjedhje lokale, ndërkohë që më herët avokatët e Veliaj e konsideruan shkelje të rëndë kushtetuese dekretimin e datës së zgjedhjeve për sa kohë sipas mbrojtjes e trajtoi shkarkimin e Veliajt si një çështje administrative, duke prodhuar sipas tyre një akti juridik të pavlefshëm.

Po në kushtetuese Erjon Veliaj ka kundërshtuar edhe shkarkimin nga detyra e kryetarit të bashkisë së Tiranës, që nuk u paraqit në detyrë siç thotë ai për shkak të pamundësisë sepse është i paraburgosur nën akuzat për korrupsion ndërkohë që çështja është në seancë paraprake.

Pas kësaj padie avokatët shtuan edhe një pikë tjetër, ku kërkohej pezullim i dekretit derisa gjykata të shprehet për tërësinë e çështjes.

Në arsyetimin e saj, Gjykata thekson se pas shqyrtimit të animimit të bërë nga Veliaj, se në vlerësimin e Mbledhjes së Gjyqtarëve zbatimi i dekretit të presidentit për zhvillimin e zgjedhjeve vendore vetëm për Bashkinë e Tiranës, do të sillte pasoja të pariparueshme në drejtim të të drejtave të të zgjedhurit vendor (Erion Veliaj), për sa kohë çështja gjyqësore për shkarkimin e tij është ende në shqyrtim.

Zyra e presidentit Begaj në një njoftim për mediat deklaroi se respekton vendimin e Gjykatës Kushtetuese.

“Në përgjigje të interesit të mediave, ju bëjmë me dije se Institucioni i Presidentit të Republikës respekton vendimin e Gjykatës Kushtetuese për pezullimin e pjesës që përcakton datën e zgjedhjeve vendore në Bashkinë e Tiranës të dekretit me nr.350, datë 01.10.2025”, thuhet në deklaratë./S.K/KP/TopChannel/

Zëvendës-drejtoresha e Federatës së Organizatave Kombëtare që Punojnë me të Pastrehët në Evropë, Ruth Owen tha se sipas të dhënave të fundit evropiane, më shumë se 1.27 milion njerëz flenë në rrugë ose strehimore në të gjithë Evropën çdo natë.

Duke shënuar Ditën Botërore të Pastrehëve, Owen tha se mungesa e strehimit është shndërruar në krizë të thellë, sidomos në qytetet e mëdha.

“Përveç gjumit në rrugë dhe qëndrimit në akomodim për njerëzit e pastrehë, kjo do të përfshinte gjëra të tilla si qëndrimi me familjen dhe miqtë sepse nuk keni ku të shkoni tjetër, dhe kjo arrin në pothuajse 5% të popullsisë së BE-së (që) kanë përjetuar një formë të mungesës së strehimit në jetën e tyre.”, tha ajo.

Ajo shtoi se mungesa e strehimit është përkeqësuar në shumë qytete evropiane, duke përmendur Brukselin si një nga shembujt më të zymtë.

“Mendoj se hera e parë që u numërua popullsia e pastrehë në Bruksel ishte në vitin 2008, dhe ishte rreth 1.700 njerëz. Dhe tani është më shumë se 10.000. Njëra prej tyre është padyshim kostoja e strehimit në qytet,” vlerësoi ajo.

Gjermania ka popullsinë më të madhe të pastrehë në Evropë, me rreth 530.000 njerëz, tha Owen, duke shtuar se shifra pasqyron si një regjistrim gjithëpërfshirës ashtu edhe një përkufizim të gjerë të mungesës së strehimit.

Në Francë, numri i të pastrehëve u rrit me 20 mijë vitin e kaluar për të arritur në 350 mijë, sipas një raporti të vitit 2025 nga Fondacioni për të Pastrehët. Raporti përmendi ngecjen në ndërtimin e banesave, rritjen e çmimeve të qirave dhe mungesën e veprimeve qeveritare si faktorë kryesorë nxitës.

Gjithashtu tha se 2.7 milionë njerëz janë duke pritur për strehim publik në Francë, por vetëm 393 mijë prej tyre u ndanë për strehim të tillë në vitin 2023.

Raporti theksoi se deri më sot nuk janë ndërmarrë hapa të rëndësishëm për të zgjidhur problemin e strehimit dhe ky problem mund të thellohet si rezultat i mungesës së vullnetit politik të shkaktuar nga krizat e vazhdueshme qeveritare.

Raporti tha se numri i personave të pastrehë u rrit me 130 për qind gjatë periudhës 2002-2022, duke vënë në dukje se numri i personave të pastrehë, i cili u regjistrua 330.000 vitin e kaluar, është rritur me 20.000 këtë vit, për të arritur në total prej 350.000.

Si zgjidhje për mungesën e strehimit, Owen rekomandoi rritjen e iniciativave të strehimit publik dhe rregullimin e tregut të strehimit.

“Mendoj se duhet ta bëjmë strehimin më të përballueshëm për njerëzit me të ardhura shumë të ulëta, duke përfshirë rregullimin e tregut të strehimit, ndërtimin e banesave publike dhe ofrimin e mbështetjes së të ardhurave për familjet. Finlanda është një histori e vërtetë suksesi. Ajo e uli popullsinë e saj të pastrehë nga rreth 20 mijë në 3 mijë gjatë dy dekadave,”, përfundoi ajo.

Ambasadori britanik në Prishtinë, Jonathan Hargreaves, deklaroi se vendi i tij po i ofron mbështetje Komisionit Qendror Zgjedhor përmes një projekti kibernetik, për të siguruar integritetin dhe zhvillim e qetë të zgjedhjeve komunale.

Ai gjatë një takimi sot me kryetarin e KQZ-së, Kreshnik Radoniqi kanë diskutuar mbi përgatitjet për zgjedhjet e së dielës.

“E falënderova atë dhe ekipin e tij për përpjekjet që po bëjnë për t’i bërë këto zgjedhje gjithëpërfshirëse, transparente dhe efikase, dhe theksova rëndësinë që mediat legjitime të kenë mundësinë të vëzhgojnë procesin zgjedhor në përputhje me ligjet e Kosovës”, ka shkruar Hargreaves në rrjetin X.

Ai ka shtuar se Britania e Madhe ka kënaqësinë të mbështesë KQZ-në, nëpërmjet një projekti kibernetik të financuar nga Qeveria britanike, në punën e saj jetësore për të siguruar integritetin dhe mbarëvajtjen e zgjedhjeve komunale.

Kujtojmë se presidentja Vjosa Osmani vuri theks të veçantë te ndërhyrjet direkte nga Serbia në zgjedhjet lokale, një dukuri e përsëritur ndër vite, e cila po manifestohet përmes blerjes së votës, ndërhyrjeve të jashtme, frikësimit dhe dhunës.

Osmani ka dënuar ashpër ndërhyrjet e Beogradit zyrtar, duke bërë thirrje për angazhim të plotë në mbrojtje të integritetit të procesit zgjedhor./S.K/KP/