Lajmet

COVID-19 dhe migrimi kanë ndikuar në rënien e lindjeve në Kosovë

Published

5 years ago

July 12, 2021

Betim Gashi

Pandemia COVID-19 ka ndikuar në rënien e lindjeve në gjithë botën përfshirë edhe Kosovën. Në Kosovë në uljen e shifrave të lindjeve ka ndikuar edhe migrimi i të rinjve. Kështu u tha me rastin e Ditës Botërore të Popullsisë, në një tryezë të organizuar nga UNFPA në bashkëpunim me Komisionin për Shëndetësi dhe Mirëqenie Sociale, me temën “Të drejtat dhe zgjedhjet janë përgjigja. Qoftë rritja apo zvogëlimi i numrit të foshnjave, zgjidhja për të ndryshuar normat e lindshmërisë qëndron në prioritizimin e shëndetit dhe të drejtat riprodhuese të të gjithë njerëzve”.

Udhëheqësja e Zyrës së Fondi për Popullsi të Kombeve të Bashkuara (UNFPA) në Kosovë, Visare Mujko-Nimani tha se COVID-19 e ka përshpejtuar trendin global drejt niveleve më të ulëta të lindjeve.

Ajo tha se në uljen e lindjeve në Kosovë ka ndikuar edhe aspekti i migrimit, prandaj ajo kërkoi që institucionet e vendit të krijojnë politika të qartë që do ndihmojnë të rinjtë në planifikimin e të ardhmes së tyre.

“Të gjithë e dimë që pandemia COVID-19 mund ta ketë përshpejtuar së paku përkohësisht trendin global drejt niveleve më të ulëta të fertilitetit. Statistikat tregojnë një rënie të mprehtë të numri të lindjeve në shumë vende evropiane në fund të vitit 2020 nëntë muaj pas mbylljeve të para. Lajmet në lidhje me rënien e lindjeve nga COVID-19 kanë nxitur ankth dhe shqetësim në disa shtete, goditja e pandemisë dhe ndikimi i saj në zgjidhjen riprodhuese të njerëzve erdhën në një kohë kur nivelet e lindshmërisë veçse ishin shumë të ulëta në mbarë botën. Në Evropën Lindore ky problem është rritur edhe nga emigracioni. Njerëzit jo vetëm që nuk kanë fëmijë por edhe janë larguar masivisht nga vendet e tyre në kërkim të mundësive më të mira diku tjetër, për pasojë popullsitë e këtyre vendeve janë zvogëluar. Edhe Kosova si gjitha vendet e Ballkanit po përballet me çështjen e migrimit dhe institucionet duhet të krijojnë politika që do ofrojnë një mjedis në të cilin të rinjtë kosovar do të ndihen të sigurt për të planifikuar të ardhmen e tyre dhe për të krijuar familjen e tyre”, tha ajo.

Kryetarja e Komisionit për Shëndetësi, Fatmire Kollçaku derisa tha se pandemia edhe në Kosovë ka ndikuar në rënien e fertilitetit u shpreh se qeveria e Kosovës ka ndërmarr masa konkrete për ringjalljen ekonomike që do ndikoj edhe në mirëqenien e qytetarëve dhe planifikimin familjar. Ajo tha se si qeveri po punojnë në luftimin e krimit dhe korrupsionit me qëllim që të krijohen më shumë për të rinjtë.

“Mendoj që si parakusht që ne t’i realizojmë të gjitha këto është që vërtetë njëri nga zotimet kryesore që i kemi dhënë në fushatë dhe do i qëndrojmë besnik deri në fund është që mos të keqpërdoret paraja publike sa do që kemi qenë edhe të varfër ne më shumë kemi qenë të vjedhur dhe unë supozoj se qeveria mazhoranca aktuale e ka luftimin e krimit, korrupsionin e organizuar institucional nëse arrijmë këto t’i minimizojmë mendoj që do kemi shumë më shumë mundësi t’i mbështesim këto familje që të vendosin të rinjtë dhe të rejat që të krijojnë familje dhe të mbesin këtu që popullata të rritet në mënyrë të natyrshme duke e parë perspektivën jo me shtytje por të mundësojmë edhe në ruajtjen e shëndetit riprodhues”, tha Kollçaku.

Koordinatorja për Zhvillim të Kombeve të Bashkuara në Kosovë, Ulrike Richardson tha se tkurrja e popullatës do qëndroj edhe për një kohë, prandaj sipas saj politika ekonomike dhe fuqizimi i gruas do luante rol kyç që situata në këtë aspekt të përmirësohej. Ajo tha se edhe migrimi i të rinjve është sfidë për Kosovë.

“Kemi parë që është zvogëluar numri i lindjeve dhe kjo është diçka që të gjithë ne duhet të pajtohemi dhe besojmë që ky zvogëlim i lindjeve do qëndroj për një kohë, familjet tani më nuk kanë fëmijë aq sa kanë pasur më përpara dhe të në të njëjtën kohë COVID ka shkaktuar tkurrje edhe më të madhe të këtij zvogëlimi të fertilitetit, pra në disa shtet ka tendenca që të bëhet rikthimi pak a shumë nuk e di deri në cilën shkallë ky trend do qëndroj kështu por disa nga gjërat që neve i dimë dhe kjo është ai veprimi për balancim….Kur e shohim tkurrjen e popullatës e dimë edhe në Ballkanin Perëndimor vërehet kur të rinjtë largohen dhe kjo kombinohet me normat e ulëta të fertilitet… Të rinjtë që po largohen kjo është sfidë se do ta keni një popullatë të vjetër se kush do kujdeset për ta, nëse investoni në kujdesin shëndetësor mund të jeni produktiv deri në moshën 70 sepse nuk u duhet të keni mbështetje, apo të jeni barrë e sistemit shëndetësor nëse investoni në kujdesin shëndetësor, kujdesi shëndetësor është i rëndësishëm”, tha ajo.

Kryeshefi i Agjencisë së Statistikave të Kosovës, Ilir Berisha tha se regjistrim i popullsisë i cili ishte planifikuar të realizohej këtë vit, për shkak të pandemisë është shtyrë për vitin e ardhshëm

“Bëjmë edhe regjistrimin e popullsisë ku nxjerrim një numër të madh të treguesve demografik, social ekonomik, aktualisht ASK është e angazhuar në projektin e regjistrimin e popullsisë, si projekti më i madh i saj që ka qenë në plan të realizohet këtë vit, por për shkak të kushteve me COVID është shtyrë, por ne jemi në vlugun e aktiviteteve tona”, theksoi Berisha.

11 korriku shënon Ditën Botërore të Popullsisë, dheqëllimi i kësaj dite është që të fokusohet vëmendja e gjithë botës në rëndësinë e çështjeve të popullsisë. Ideja për këtë ditë lindi kur popullsia e botës arriti në 5 miliardë.

Vendi

Reformat në drejtësi dhe zgjedhja e Kryeprokurorit: Haxhiu pret në takim kryesuesin e Këshillit Prokurorial

Published

1 hour ago

April 22, 2026

UBTNews

Ushtruesja e detyrës së Presidentes së Kosovës dhe njëherësh Kryetarja e Kuvendit, Albulena Haxhiu, ka pritur sot në takim Kryesuesin e Këshillit Prokurorial, Arian Gashi.

Pjesë e këtij diskutimi ishin sfidat dhe arritjet me të cilat po përballet sistemi prokurorial në Kosovë. Në takim u diskutua edhe për reformat e nevojshme në drejtësi dhe për procesin e zgjedhjes së Kryeprokurorit të Shtetit.

“Folëm për reformat në drejtësi dhe domosdoshmërinë e përmbylljes sa më të shpejtë të procesit për zgjedhjen e Kryeprokurorit të Shtetit”, shkruan Haxhiu.

Ndërsa, një temë tjetër që u ngrit në këtë takim ishin edhe nevojat buxhetore e infrastrukturore, si dhe nevojat për më shumë prokurorë dhe staf mbështetës, çështje që ndikojnë në efikasitetin institucional, sipas Haxhiut.

Tutje, u.d. presidentja Haxhiu, drejtuesit të Këshillit Prokurorial ia ka riafirmuar përkushtimin për pavarësinë institucionale dhe forcimin e sundimit të ligjit në Republikën e Kosovës.

Aktualitet

Përurohet renovimi i Klinikës së Kardiologjisë në QKUK

Published

2 hours ago

April 22, 2026

UBTNews

Sot është përuruar transformimi i Klinikës së Kardiologjisë në Qendrën Klinike Universitare të Kosovës, pas përfundimit të punimeve për modernizimin e hapësirave të saj.

Në këtë ceremoni morën pjesë përfaqësues të institucioneve të vendit dhe Ambasadori i Luksemburgut, shtet ky që mbështeti financiarisht projektin.

Projekti ka përfshirë renovimin e një hapësire prej rreth 400 metrash katrorë, e cila është përshtatur për nevojat e shërbimeve kardiologjike.

Pjesë e këtij investimi është edhe funksionalizimi i Cath-Lab-it (Laboratorit të Kateterizimit) dhe vendosja e një angiografi të ri, pajisje këto që shërbejnë për diagnostikimin dhe trajtimin e sëmundjeve të zemrës.

Sipas njoftimit, ky transformim ka përfshirë edhe njësinë gjysmë-intenzive, punimet e së cilës kishin nisur në prill të këtij viti.

Ministri i Shëndetësisë, Arben Vitia, bëri të ditur se ky renovim synon rritjen e kapaciteteve për trajtimin e pacientëve dhe përmirësimin e kushteve të punës për stafin mjekësor.

Lidhur me rëndësinë e këtyre punimeve, Kryeministri Albin Kurti u shpreh se ky ndryshim është komfort standardeve moderne.

“Një hapësirë prej rreth 400 metrash katrorë është transformuar sipas standardeve moderne spitalore, duke krijuar kushte më të mira për mjekët, specialistët, infermierët dhe mbi të gjitha, kushte më dinjitoze për shërim të plotë e më të shpejtë për pacientët tanë”, deklaroi Kryeminstri Kurti.

Rajoni

Shkodër: Humb jetën 27-vjeçarja pas lindjes së binjakëve

Published

2 hours ago

April 22, 2026

UBTNews

Një 27-vjeçare me inicialet M.S. ka ndërruar jetë në spitalin e Shkodrës, pak orë pasi solli në jetë fëmijët e saj binjakë.

Vdekja e të resë erdhi si pasojë e komplikimeve shëndetësore që u shfaqën menjëherë pas procesit të lindjes.

Për shkak të gjendjes kritike, gjatë ditës ishte bërë një apel urgjent për sigurimin e gjakut të grupit 0 negativ, në përpjekje për të stabilizuar gjendjen e saj. Siç raporton “Top Channel”, pavarësisht ndërhyrjes së stafit mjekësor dhe trajtimit intensiv, e reja nuk arriti t’i mbijetojë krizës shëndetësore.

Deri më tani nuk ka një njoftim zyrtar nga autoritetet spitalore mbi shkaqet specifike mjekësore që çuan në fatalitet.

Lajmet

DITARI: Çfarë lajmesh kemi lexuar në çdo 22 prill, në vitet nëntëdhjetë

Published

4 hours ago

April 22, 2026

UBTNews

22 prill 1993

Lajmet kryesore:

Dr. Bujar Bukoshi në Ankara

Konferencë për shtyp për Kosovën në Pallatin e Kongresit të Shteteve të Bashkuara të Amerikës

Në Prishtinë policia serbe rrahu dy studentë

Kryetari i Degës së LDK-së së Suharekës në “bisedë informative”

Në “bisedë informative” edhe aktivistët e komunës së Lipjanit

Në Sekiraqë të Podujevës u bastis një familje

Një anije e Hondurasit provoi të shkelë hapësirën detare të Shqipërisë

Vizitat në Kosovë vetëm me përcjellje

Këmbëngulje për vendosjen e refugjatëve serbë në Deçan

Pesë gjykatës serbë nga Jagodina në Mitrovicë

22 prill 1994

Lajm i plotë:

Konferencë për gazetarë e kryetarit të Republikës së Kosovës dr. Ibrahim Rugova

Javën që po shkon e karakterizoi një sulm represiv e terror. Vështirë se mund të numrohen viktimat e këtij represioni që po zgjat qe sa vite në Kosovë, tha në konferencën e sotme për gazetarë kryetari i Republikës së Kosovës dr. Ibrahim Rugova.

U intensifikuan bastisjet me pretekst të kërkimit të armëve në rrethinat e qyteteve të Podujevës, Gjakovës, Lipjanit, Vitisë, Malishevës, Mitrovicës, Skënderajt, Istogut, Klinës, Vushtrrisë, Ferizajit, Prizrenti, Gjilanit, Kamenicës, Prishtinës e Deçanit. Bastisjet përcillen me demolime, me maltretime, arrestime e dënime të njerëzve. Për shkak se kërkoheshin armë prej tij, u dënua me burg Ymer Bala, deputet nga Mitrovica. Ndërsa në lokalitete të ndryshme të Kosovës, si në fshatin Bokshiq të Klinës, në aeroportin e Dumoshit afër Podujevës dhe në disa shkolla, forcat serbe shtinë edhe me armë.

Gjatë javës u bë një represion i madh ndaj nxënësve shqiptarë, në shkollat e Deçanit, Klinës e Kijevës. Janë kërcënuar e janë rrahur nxënës e arsimtarë dhe është djegur një pjesë e dokumentacionit të shkollës. Po shfaqet alergji aq e madhe ndaj shkollës shqipe dhe ndaj nxënësve shqiptarë, theksoi kryetari Rugova.

Pati lëvizje të ushtrisë në kufirin me Shqipërinë, në Vërmicë – në vendkalimin kufitar të Kosovës me Shqipërinë, i cili më nuk është vendkalim, por është i mbyllur, ndërsa në Dragash pati vendosje të reja të ushtrisë, tha dr. Rugova dhe shprehu keqardhje për vrasjen e dy qytetarëve shqiptarë javën e kaluar në kufirin Shqipëri – Kosovë. Ai theksoi se qytetarët ishin të paarmatosur. Kjo do të thotë se kufiri i Kosovës me Shqipërinë vazhdon të jetë mur i fundit i Berlinit dhe mur mjaft i rrezikshëm në Evropë.

Vazhdoi ndjekja e aktivistëve politikë të të gjitha partive politike, ndërsa këtu në Prishtinë filloi edhe një proces i montuar politik kundër 14 shqiptarëve. Ky proces, si dhe ato nga fundi i vitit të kaluar dhe fillimi i këtij viti, bëhet me qëllim që të diskreditohet lëvizja paqësore e shqiptarëve dhe e popullit të Kosovës.

Pasi përkujtoi se gjatë javës që shkoi pati plaçkitje të mëdha të mallit, përzënie të njerëzve nga banesat e dërgime me dhunë në ushtri, kryetari Rugova konstatoi se është mjaft e rrezikshme kjo peshë e represionit që po e rëndon Kosovën.

Në vazhdim, ai kërkoi që bashkësia ndërkombëtare ta ketë parasysh situatën në Kosovë, e cila mund të eskalojë.

Dr. Rugova dënoi maltretimin e znj. Adelajde Felike – Timan, gazetare e “Dojçe Veles”, e cila ishte në Kosovë dhe e cila u keqtrajtua nga policia serbe derisa po kalonte në vendkalimin kufitar Kosovë – Shqipëri.

Në vazhdim, kryetari Rugova shfaqi keqardhje për tragjedinë në Gorazhde. Kjo tragjedi po e habit gjithë botën, edhe për shkak të paaftësisë së institucioneve ndërkombëtare që ta ndalojnë atë. Edhe në këtë kontekst Kosova u përmend si një vatër e krizës në ish-Jugosllavi që kërkon zgjidhje.

“Ne na vjen keq në rast se legalizohet dhuna dhe agresioni në Bosnjë. Nëse bëhet kjo atëherë do të ketë probleme në Ballkan dhe në gjithë Evropën. Të gjitha parimet e institucioneve ndërkombëtare dhe të Kombeve të Bashkuara janë që të mos shpërblehen dhuna dhe agresioni, por përpjekjet për paqe. Dje edhe sekretari i shtetit amerikan Kristofer shprehu pikëpamjet për rrezikun e shpërthimit të luftës në Kosovë apo në Maqedoni. Nëse vazhdon projekti i krijimit të Serbisë së Madhe në Bosnjë, ai mund të vazhdojë edhe në pjesët tjera”, theksoi kryetari Rugova.

Ai përshëndeti planin e presidentit Klinton për intervenime më të gjëra në Bosnjë. Ai shfaqi shpresën se bashkësia ndërkombëtare do të bëjë çmos që ta pengojë këtë tragjedi dhe se do të gjindet një zgjidhje për të gjitha problemet në ish-Jugosllavi.

Në rast se mbahet një samit në nivelin më të lartë midis SHBA-ve, Bashkimit Evropian dhe Rusisë, siç është propozuar, kryetari Rugova tha se do të kërkojmë me ngulm që Kosova patjetër të jetë pjesë e kësaj zgjidhjeje, pasi Kosova ishte pjesë e ish-federatës jugosllave, ishte njësi federale, që kishte statusin e barabartë me njësitë e tjera. Kosova edhe si vatër e krizës, po të mos zgjidhet në bazë të vullnetit politik të popullit dhe të konteksteve ballkanike, do të jetë një rrezik i vazhdueshëm.

Në fund, kryetari Rugova pasi përkujtoi zhgënjimet që ndodhën me institucionet ndërkombëtare, kërkoi që Kosova të vihet në mbrojtje ndërkombëtare të Kombeve të Bashkuara apo të institucioneve të tjera ndërkombëtare.

Duke u përgjigjur në pyetjen se a është shpërblyer lëvizja paqësore e shqiptarëve në Kosovë dhe se a mund të ketë kjo lëvizje alternativë, kryetari Rugova tha se tash kjo lëvizje, udhëheqja dhe populli i Kosovës gëzojnë në botë një autoritet për qëndresën dhe durimin që kanë treguar deri më tash. “Shpresoj se do të shpërblehet kjo politikë. Kryesore është të ndalet lufta e tragjedia në Bosnjë dhe të pengohet përhapja e konfliktit në Kosovë. Ne e kemi thënë edhe shumë herë më parë se duke pasur parasysh situatën tonë prej vitit 1990 e këndej, çdo alternativë e lëvizjes paqësore do të ishte katastrofale”, theksoi ai.

Duke komentuar një lajm për ngritjen e shtëpive për refugjatët eventualë ose fatkeqësitë natyrore në verilindje të Shqipërisë, kryetari Rugova, pasi tha se nuk ka informacione të tjera pos atyre që janë publikuar shtoi: “Nuk kisha dëshiruar të ndodh diçka këtu në Kosovë, pasi, siç kemi thënë, nëse ndodh diçka në Kosovë, pak do të ketë edhe refugjatë. Nuk duhet ta marrim me ndonjë panik këtë lajm që mund të ndikojë negativisht te popullata. Me siguri Kryqi Kuq ka menduar që të marrë masa preventive për çdo rast eventual”, përfundoi kryetari Rugova.

Lajme të tjera:

Qeveria e Kosovës kërkon përfshirjen e Kosovës në bisedimet për paqe

Amerikanët pohojnë se është diskutuar edhe mundësia e bombardimit të pozicioneve në Serbi

U.Kristofer: Serbia synon të përhapë konfliktin në Kosovë

Në Vërbicë të Kamenicës serbët provokojnë me të shtëna armësh

Ushtria dhe policia serbe bastisi disa shtëpi në Dimcë të Hanit të Elezit

Policia konfiskoi librezat e nxënësve të SHF “H.Dobruna” në Junik

Vdiq Mehmet Hajrullahu, i cili ishte torturuar para dy javësh në polici

Represioni në Kosovë

Kaçanik: Në “cirilikë” edhe mbishkrimet e firmave private

Të hënën fillon procesi kundër 10 shqiptarëve në Shkup

U ndërprenë punimet e Parlamentit të Maqedonisë

Shaban M.Çelaj për Fondin e Qeverisë së Kosovës dha 5.000 dollarë

Në Prizren katër shqiptarë u dënuan për armë

Serbët e Varvarinit u shitën armë shqiptarëve

Komunistët serbë ftojnë shqiptarët për bisedime

22 prill 1995

Lajmet kryesore:

Kryetari Rugova u takua me Sabri Godon dhe monsinjor Rok Mirditën

Delegacioni i Kosovës u takua me delegacionin parlamentar të Këshillit të Evropës

Ish-policët në Pejë mohojnë akuzën

B.Luzha: Në polici kërkonin që me çdo kusht t’i pranojmë akuzat

Plaçkitje e re përmes taksave për ujë

Dhuna e përditshme në Kosovë

Plaçkitje në tregun e Istogut

Republika e imagjinuar serbe në Bosnjë i shtriu duart edhe në Kosovë

Si u plaçkit ndërmarrja “Luks” e Mitrovicës

22 prill 1997

Lajmet kryesore:

Dr. Esat Stavileci u takua me kryetarin e Gjykatës Kushtetuese të Austrisë

Konferencë për gazetarë në PSHDK

Nano nuk është deklaruar rreth statusit të Kosovës as të shqiptarëve në Maqedoni

Në vend të refuzimit, reklamim i ndërmarrjeve të pushtuesit

Gjermani: Një refugjat kthehet e dhjetë shkojnë

Katër shqiptarë po mbahen në aeroportin e Beogradit

Në Irzniq u përkujtua studenti martir Armend Daci

E burgosura Shukrie Rexha merret edhe më tutje në pyetje

U mor në pyetje kryetari i Degës së UNIKOMB-it në Suharekë

Dhuna e përditshme në Kosovë

Në Gjykatën e instaluar serbe në Suharekë u nxor në gjyq një inkasant i KKF-së

Një qytetari nga Podujeva iu plaçkitën cigare në vlerë prej 5. 000 DM

Rënie e vlerës së markës gjermane – çmimet në rritje

Në Gllogoc policia ndërpreu ndeshjen midis Ferronikelit dhe Prishtinës

Vllasi akuzoi regjimin serb për ligjet diskriminuese ndaj shqiptarëve

Në komunën e Podujevës u ndihmuan 505 familje shqiptare

Lajm i plotë:

Policia srebe në Klinë vrau një djalosh serb

Pardje policia serbe vrau në Klinë djaloshin 14 vjeçar Zharko Dubiq nga fshati Llukavc, njofton gazeta “D. telegraf”.

Pranë djaloshit të vrarë është gjetur një pushkë gjuetie. Sipas kësaj gazete ai gjoja ka dashur ta marrë hakun e xhaxhait të tij Dragolubit, i cili para katër vjetësh ishte vrarë para stacionit të policisë në Klinë.

Organet serbe nuk kanë dhënë kurrfarë njoftimi për këtë vrasje.

22 prill 1998

Edicioni i parë (ora 10:00)

Lajm i plotë:

GJENDJE SHUMË E RREZIKSHME NË DEÇAN

Barikadim i forcave serbe dhe të shtëna sporadike në fshatin Baballoq

Sot në mëngjes forca të mëdha ushtarako-policore janë stacionar dhe janë barrikaduar në vendbanimin e kolonëve, kurse në rrugën magjistrale që kalon afër vendbanimit të kolonistëve serbë në Baballoq janë ngritur postblloqe të policisë dhe po vazhdon kontrollimi rigoroz.

Baballoqi është një fshat shqiptar, me 180 familje dhe rreth 1600 banorë, ndërsa rreth 300 metra larg tij është ngritur kampi i kolonistëve serbë.

Komisioni për Informim i Degës së LDK-së në Deçan njofton se nga fshati Baballoq edhe sot po dëgjohen të shtëna sporadike.

Në orën 7. 30 një konvoj ushtarak, i pajisur me armatim të rëndë, arriti në Deçan nga Peja dhe pastaj shkoi në drejtim të këitj fshati.

Baballoqi ishte cak i një sulmi gjatë ditës së djeshme prej orës 10:45 deri në orën 20:15. Në sulmin nga largësia kishin marrë pjesë policë, ushtarë dhe kolonistë serbë të vendosur në kampin e refugjatëve serbë, rreth 300 metra larg fshatit Baballoq.

Për konfrontime të armatosura gjatë ditës së djeshme njoftojnë sot edhe gazetat serbe, duke e hedhur përgjegjësinë për këto në anën e shqiptarëve. Thuhet se në kampin e refugjatëve, afër Baballoqit në rrugën për Gramoçel e Glloxhan policia e Deçanit ka formuar një punkt të policisë, të cilin e kanë sulmuar shqiptarët. Policët janë përgjigjur me zjarr, ndërsa anën e policisë nuk ka të vrarë e të plagosur.

Aktivistët e LDK-së shkuan mbrëmë vonë në Baballoq. Ata i thanë QIK-ut se nuk dihej për të vrarë ose të plagosur gjatë sulmit të djeshëm serb.

Sulmi i djeshëm kundër fshatit Baballoq është i pari sulm masiv pas atij kundër fshatit Glloxhan më 24 mars, kur në shtëpitë e veta u vranë tre të rinj shqiptarë dhe disa të tjerë u plagosën.

Ka disa ditë që gjendja në Deçan është para shpërthimit. Politika dhe forcat serbe kanë bërë përgatitje të gjithanshme për një sulm masiv kundër fshatrave shqiptare, të cilat kanë mbetur etnikisht të pastra pasi nga shtëpitë e veta me urdhërin e policisë serbe janë larguar serbët e malazezët.

Lajme të tjera:

Pozicionime të forcave ushtarake në brezin kufitar

Policia u largua nga stacioni në Irzniq

Edicioni i dytë (ora 13:00)

Lajmet kryesore:

Forcat serbe vazhdojnë të shtijnë kundër banorëve të Baballoqit

Përforcime të ushtrisë jugosllave në kufi me Shqipërinë dhe në Dushkajë të Gjakovës

U rrah përkthyesi shqiptar i gazetarit të sevrisit anglisht të “Dojçe veles”

Çështja e Kosovës – me rëndësi të jashtëzakonshme për paqen në Evropë

Gjendje e tensionuar në kufirin verilindor të Shqipërisë

Parakalime të ushtrisë nëpër fshatin Shkabaj

Rreth stacioneve të policisë në Podujevë janë vendosur thasë me rërë